خود پسندی توں بے بسی تک

شوگر مافیا اُتے ہتھ پان دے بلند و بانگ دعوے کیتے گئے پر گنے دی پیداوار دے حوالے نال دنیا دے
پنجویں وڈے ملک وچ چینی دا بحران عروج اُتے تے چینی دے ریٹ تاریخ دی بلند ترین سطح اُتے نیں

تحریر حمیداللہ بھٹی

اپوزیشن رہنمائواں نال ہتھ ملان نوں عمران خان کرپشن تسلیم کرن دے مترادف قرار دیندے نیں تے قومی سلامتی کمیٹی دے اجلاس وچ شرکت توں وی گریز کردے نیں مبادا کسے اپوزیشن رہنما نال ہتھ ملان دی نوبت نہ آ جائے حالانکہ پارلیمانی طرز حکومت وچ حزب اقتدار وانگوں حزب اختلاف وی اہم ہوندی اے پر وائے افسوس کہ یپاکستان وچ انج دی جمہوری قدراں نہیں بن سکیاں موجودہ حکمران تے اپنے سوا سب نوں خائن سمجھدے نیں عمران خان دی کامیابی توں امید سی کہ شاید جمہوری قدراں مضبوط ہون پر ایہہ خیال وی خام ای ثابت ہویا اے بلکہ ہر لنگھدے دن دے نال صورتحال خراب تر ہوندی جا رہی اے جمہوریت وچ اپوزیشن دا نکتہ نظر سننا پیندا اے ماضی وچ پی پی تے ن لیگ نے سخت محاذ آرائی دے باوجود گل بات تے مشاورت دے دروازے کھلے رکھے پر عمران خان تے پارلیمنٹ وچ وی اپوزیشن نال ہتھ ملان دے روادار نہیں انج دا حکومتی طرز عمل عوام نوں پارلیمانی طرز سیاست توں بدظن کر سکدا اے ایس لئی نظام بچان لئی حکومت نوں رویے اُتے نظر ثانی کرنی چاہیدی اے کیوں جے جدوں تیکر کجھ ثابت نہ ہوئے کسے دے کہن نال کوئی چار یا ڈاکو نہیں ہو جاندا وڈی تعداد وچ اپوزیشن اکابرین نوں جیلاں وچ وی پایا گیا پر عدم ثبوت دی بنا اُتے اکثریت ضمانتاں اُتے رہا ہو چکے جس دے بعد الزام تراشی دا جواز نہیں رہندا فیر وی تواتر نال حکومتی صفاں توں الزام تراشی جاری اے ایس لئی انتخابی اصلاحات سنے دیگر قانون سازی لئی حکومت نوں ایواناں وچ سُبکی ہون لگی اے جدوں تیکر خود پسندی توں نکلیا نہیں جاندا مسائل دے حل دی بے بسی ختم نہیں ہو سکدی۔
صحت کارڈ دا اجراء ، کساناں تے نوجواناں لئی قرضیاں دے پروگرام، نویں ڈیماں دی تعمیر حکومت دے چنگے اقدامات نیں۔ ٹیکساں دی وصولی وچ وی ریکارڈ بہتری آئی اے شجر کاری اُتے وی توجہ دتی گئی پر آٹے، چینی، دالاں، سبزیاں، گیس ، بجلی تے پٹرال دیاں قیمتاں وچ ہوشربا اضافے نے عام بندے دیاں چیخاں کڈ دتیاں نیں مہنگائی دے خلاف اپوزیشن دے شور شرابے اُتے وزیراعظم عمران خان نے اک کھرب 20 ارب دے ریلیف پیکج دا اعلان کیتا پر ایہہ اعلان ہجے تیکر عملی شکل اختیار نہیں کر سکیا ایس لئی مہنگائی رُکن دا ناں نہیں لے رہی نویں ریلیف دی بجائے بجلی تے پٹرول دی سبسڈی ختم نہ کیتی جاندی تے مہنگائی انج بے لگام نہ ہوندی پر گڈ گورننس دے فقدان توں حکومتی کنٹرول ختم ہو رہیا اے ۔ علاوہ ازیں بیورو کریسی تے تاجراں ولوں وی حکومتی منصوبیاں وچ ایس لئی تعاون نہیں کیتا جا رہیا کیوں جے خود پسند حکمراناں نوں اپنے سوا کجھ نظر ای نہیں آندا۔ جس دی بنا اُتے مسائل حل کرن وچ بے بس تے خرابی ودھدی جا رہی اے جے حکمراناں نے اپنی خامیاں دور نہ کیتیاں تے کم کرن دی بجائے اپوزیشن نوں ای بُرا بھلا کہن اُتے زور رکھیا تے اگلے الیکشن وچ سخت خسارے توں بچ نہیں سکن گے۔
ویلے دے نال نال ہر شعبے وچ جدت آ رہی اے دنیا دی کئی ریاستاںانتخابی طریقہ کار وچ تبدیلیاں لیا رہیاں نیں تاکہ دھاندلی دے امکانات ختم ہو سکن تے انج دے آزادانہ و منصفانہ صاف شفاف الیکشن ممکن بنائے جان جس نال نتائج اُتے کسے نوں انگلی چکن دا موقع نہ ملے پاکستان وچ وی ایس حوالے نال ڈھیروں کم کرن دی لوڑ اے کیوں جے ایتھے ہر الیکشن ہارن والی جماعت دھاندلی دا شور مچاندی اے پر ایسے کم دے چنگے نتائج ساہمنے آندے نیں جیہڑ مشاورت نال کیتا جائے پر حکمران مشاورت دی بجائے فیصلے ٹھونسن دی کوشش کردے نیں تاں ای حکومتی جماعت دے سرکرہ رہنمائواں دے نال نال اتحادیاں ولوں وی حمایت نہیں ملدی تے پارلیمنٹ دا اجلاس بُلا کے ملتوی کرنا پیا اے قبل ازیں حکومت دے قومی اسمبلی وچ پیش کیتے دونویں بل کثرتِ رات توں نامنظور کر دتے گئے ایہہ شکست منفرد نہیں پر ایہہ واقعہ ایس امر دی نشاندہی کردا اے کہ جے حکومت دے خلاف عدم اعتماد دی تحریک پیش کیتی گئی تے مشکلات ودھ سکدیاں نیں ایم کیو ایم نوں ایہہ شکوہ اے کہ جولائی 2018 دے عام انتخابات وچ ایس دی کئی جتی نشستاں پی ٹی آئی نوں دے دتیاں گئیاں جد کہ ق لیگ دی خفگی دی وجہ ایہہ وے کہ ایس دے اہم ترین لوکاں نوں پی ٹی آئی ول دھکیل دتا گیا اپوزیشن نال گل نہ کرن دے روادار جدوں اتحادی جماعتاں نوں وی اعتماد وچ نہیں لیا جائے گا تے رد عمل آنا یقینی اے ایسے بنا اُتے حکمراناں دی اپوزیشن دے نال اتحادیاں نال وی تلخی ودھ رہی اے پر ایس تلخی دا حکومت نوں احساس اے یا ایس تلخی نوں گھٹ کرن وچ سنجیدہ اے حالات توں ہجے تیکر انج دا کوئی اشارہ نہیں آندا البتہ اپوزیشن نے حکومتی اتحادیاں نال میل جول ودھایا اے جس دی وجہ نال حکومت دی سادہ اکثریت ختم ہون دا امکان بحرحل موجود اے پی ڈی ایم جہے اتحاد وچ پی پی نوں واپس آن اُتے مصلحت پسند شہباز شریف رضا مند کر لیا اے تے حکمران کیوں سب نوں دھتکارن تے دیوار نال لا کے رکھن اُتے بضد نیں؟
کجھ اک وزیر تے مشیر تے انج دے نیں جنہاں دے بارے عام تاثر ایہہ وے کہ اوہ حکومت نوں چنگے مشورے دین دی بجائے بزور فیصلے کران دی حکمتِ عملی اپنان اُتے زور دیندے نیں شاید ایس دی وجہ ایہہ وے کہ حکمران جماعت دے لوکاں دی کوئی فکری تربیت تے ہوئی نہیں بلکہ اکثریت ہانک کے شامل کرائی گئی اے۔ علاوہ ازیں اکثر لوک حکومتی امور دے حوالے نال ناتجربہ کار نیں ایہناں دی واحد مہارت کنٹینراں اُتے چڑھ کے گلے پھاڑ پھاڑ کے بولنا اے وزیراں تے مشیراں دا کم حکومتی کماں دا دفاع کرنا ہوندا اے پر کجھ اک دے سوا سب چُپ نیں اتحادی وی کجھ عرصے توں چپ تماشائی بن چکے نیں عین ممکن اے مہنگائی دی وجہ نال حکومتی کماں دے دفاع دی ہمت نہ رکھدے ہون پر اپوزیشن نال لڑائی ودھان دی کوششاں کیوں کیتیاں جا رہیاں نیں؟ کیہ ایہناں نوں نہیں پتہ کہ حکومت کمزور وکٹ اُتے وے مدتِ اقتدار دا تہائی حصہ لنگھان دے نیڑے وے ہن وی جے عام بندے نوں فائدہ نہ دتا گیا تے کس منہ نال الیکشن وچ عوام دا ساہمنا کرن گے ملک وچ مہنگائی اینی ودھ گئی اے کہ اراکین اسمبلی حلقیاں وچ جان توں قاصر نیں اپوزیشن دے دبائو اُتے جے عام انتخابات دا اعلان کیتا جاندا اے تے حکمران جماعت دا جینا محال اے ایس دا حکومتی حلقیاں نوں ایس دا ادراک کیوں نہین؟ وزیراعظم جس شے دی کمیابی دا نوٹس لیندے نیں اوہ شے سرے توں مارکیٹ توں ای غائب ہو جاندی اے۔شوگر مافیا اُتے ہتھ پان دے بلند و بانگ دعوے کیتے گئے پر گنے دی پیداوار دے حوالے نال دنیا دے پنجویں وڈے ملک وچ چینی دا بحران عروج اُتے تے چینی دے ریٹ تاریخ دی بلند ترین سطح اُتے نیں پر خودپسندی نکل کے مسائل حل کرن دی کوئی سنجیدہ کوشش نہیں ہو رہی جے انج دا رویہ ای رہیا تے حکومت رٹ دی کمزوری مسائل حل کرن وچ بے بسی اُتے منتج ہو سکدی اے۔