روٹی روٹی کردی نی میں آپے روٹی ہوئی

لکھت: فاروق ندیم

لندن وچ جہڑا دیسی متھے لگدا اے، چھٹدیاں سار پچھدا اے ’’پونڈ دا ریٹ کیہ اے؟ ‘‘اوہنوں اج دے ریٹ دا پتہ لگدا اے تے اندر دا کلکولیٹر خش کر دیندا اے۔ ڈھڈوں دعا نکلدی اے۔ پاکستانی روپے دا ریٹ ہور ڈِگنا چاہی دا اے۔ پاکستان وچ جہڑا متھے لگدا اے فورن توں پہلاں پچھدا اے ’’اج روٹی دا ریٹ کیہ اے؟‘‘ روٹی دے ریٹ دا پتہ لگے تے اندر دا کلکولیٹر ادھ موا کر دیندا اے۔ اندروں بددعا نکلدی اے روٹی دا بھاء چُکن والیاں نوں رب چُکے۔ کرسی والیاں نوں کرسی توں ڈِگنا چاہی دا اے۔ایتھے ماڑے بندے دی واء نہیں تگڑے کم وکھائی جاندے نیں۔ پانی نیویں پاسے ای ویہندا اے تگڑے جدوں چاہن اپنیاں شوگر ملاں نوں گنا سپلائی کرن والے کساناں دی پے منٹ روک لین تے اوہناں نوں سڑک تے لے آن۔ کساناں دی مصنوعی قیادت دے بُھکانے وچ ہوا بھر کے اوہناں نوں لیڈر بنا دین۔ اگوں اوہ قیادت اُتلیاں نال بار گیننگ کرکے ثابت دیوے کہ چِت وی ساڈی پُٹھ وی ساڈی۔ تگڑے جدوں چاہن چینی تے آٹے دا بحران پیدا کر دین۔ ذخیرہ اندوزاں دے گودام بھر جان تے اوہناں نوں سیل کرن والیاں دے ہتھ آپ سیل ہو جان۔ جدوں چاہن 8لکھ ٹن کنک صوبہ کے پی دے اوہناں کارخانیاں نوں دان کر دین جو ککڑیاں دی خوراک بناندے نیں۔ اپنے بھڑولے خالی کر دین تے کنک افغانستان گھل دین تے کوئی پچھن والا نہ ہووے۔ حاکماں دے کارندیاں دا راگ ایہو رہوے ’’پنجاب وچ کوئی آٹا بحران نہیں، نہ قلت اے نہ قیمتاں ودھیاں۔‘‘ اگوں بھاویں لوک 80روپے کلو آٹا خریدن تے مجبور ہون۔ کسے نوں کیہ پرواہ؟ جدوں دا انسان نے شعور سنبھالیا اے قنون اکو ای اے ’’جیدھی ڈانگ، اوہدی مج‘‘پچھلے 73سال توں ایس دیس وچ تگڑیاں دا جو ’’پولیٹیکل ایڈونچر‘‘ چل رہیا اے، اوس نے دیس دی حالت قحط زدہ افریقی ملکاں ورگی بنا دتی اے۔ ایتھے سارے تخت نشیں تے درباری بھاویں ’’الیکٹڈ‘‘ نیں تے بھاویں ’’سلیکٹڈ‘‘ پر اکثریتی لوکائی، پیداواری طبقات دی نظر وچ ہن اوہ سارے ’’ریجیکٹڈ‘‘ لوو کر لوو گل بوہتے پانی دا اکو حل عوام ٹیوب ویل، عوام ٹیوب ویل۔ ایتھے ودھدی ہوئی مہنگائی تے بیروزگاری دے خلاف جنیاں مرضی تحریکاں چلا لوو اُتلیاں کول مہنگائی، بیروزگاری تے خوراک دے بحران ورگے نکے نکے مسئلیاں لئی ٹائم ای کوئی نہیں۔ کوئی مخالفاں نوں ڈھکن وچ مصروف اے تے کوئی ’’پروڈکشن آرڈر‘‘ دے رولے وچ اے۔ آٹا مُکے تے عوام لنگر خانیاں توں روٹی کھائے، کوئی حکومت مخالف تحریک منظم کرن وچ مصروف اے تے کوئی ’’فیس ویلیو‘‘ برقرار رکھن لئی پریس کانفرنساں، جلسیاں، جلوساں توں ویھلا نہیں کوئی شعبہ بازی، کلکولیشناں، بڑھکاں، دعویاں، وعدیاں، نعریاں دے سر اُتے قسماں کھا کھا کے ایہ یقین دوان وچ مصروف اے کہ ایہ حکومت کِتے نہیں جا رہی۔ ایہدا کِلّا مضبوط اے۔ دوجے بنے حکومت نوں نکام کہن والے فصلی بٹیریاں دے اُدن دی منادی کردیاں ایہ گان وچ رُجھے نیں ’’مج پُٹ کے لے گئی کِلّا۔عوام آٹا آٹا کردی آپے آٹا ہو گئی اے پر رونقاں نہیں مُکیاں، دفتراں دا عشق جاری اے۔ ’’شاہی حمام‘‘ ہیر معشوق تے ’’ٹی ڈی سی پی‘‘ تے ’’اولڈ سٹی‘‘ رانجھا تے کھیڑا، نیشنل ہسٹری میوزیم دے عشق پچھے پی ایچ اے انتظامیہ تے نجی کمپنی ’’آئی کیپ‘‘ پر ایس عشق دی ماڈل تے اتوار بزاراں نوں پرواہ نہیں۔ جتھے گلی محلے دیاں دکاناں توں وی ودھ ریٹ لگدا اے، اگوں سودا وی نمبر دو یا باسی۔ سڑکاں تے رونقاں اپنی تھاں نیں ، کدی ڈاکٹر موج میلہ کردے نیں تے کدی وکیل۔ Lowبلڈ پریشر والے نیوز چیلنج ویکھ ویکھ بلڈ ہائی کر لیندے نیں تے دوائی لین دی لوڑ نہیں۔ کِتے انھے سڑک بلاک کرکے بیٹھے نیں، معذوراں دا نوکریاں وچ کوٹہ منگدے نیں، کِتے اساتذہ پلس دے ڈنڈے کھاندے اپنے حق لئی آواز چُک رہے نیں تے کِتے نرساں، کِتے لوک رولا پائی جا رہے نیں، ہن کپاہ دا وی بحران والا اے فیر نہ کہیا جے دسیا نہیں سی۔ کِتے سرکاری ایواناں تے حساس دفتراں وچ ٹپ ٹاپ تے ڈِنگ ڈانگ چل رہی اے تے کِتے سرکاری علم ادب آرٹ دے اداریاں وچ پرانے جوکر نویں کاسٹیوم وچ نچ رہے نیں، کِتے کافی ہاؤس ، پاک ٹی ہاؤس تے پریس کلب وچ محروم تمنا شاعر، ادیب، دانشور، صحافی کھپ پا رہے نیں کہ اکیڈمی آف لیٹرز، پلاک، لوک ورثہ، پنجابی ادبی بورڈ تے علم، ادب، آرٹ دے دوجے سرکاری اداریاں نوں ’’ساڈا وی چہرہ کراؤ۔‘‘گل کیہ اے؟ وسیلے بھاویں ریاستی ہون یا حکومتی۔ عوام تائیں نہیں پہنچ رہے۔ سیاسی مافیا تے عوام نوں جمہوریت دے ناں اُتے ای گمراہ کرکے پچھے ٹور لیندا اے حالانکہ ’’پولیٹیکل گینگسٹرز‘‘دا مطلب ہندا اے ایہ عوام دی نہیں ، خواص دی جمہوریت خواص لئی اے۔ عوام ماما لگدی اے۔ ہندا کیہ اے؟ تگڑیاں نال تگڑے رل جاندے نیں جہڑے سیاسی گھوڑے جِت سکدے نیں یا شاہی نجومی جہناں دے جتن دا ریٹ ودھا دیندے نیں اوہناں پچھے تاجر، صنعت کار، سٹاکسٹ، زوردار مافیا، زمیندار گینگ، سیاسی مجاور بن کے اگے لگے گھوڑے دیاں اے ٹی ایم مشیناں بن جاندے نیں۔ اوہ جتن لئی داء لاندے نیں ، جتن توں بعد خرچی رقم بمعہ سود در سود وصولدے نیں۔ فیر عوام نوں آٹا نہیں گھاٹا لبھدا اے۔ چینی، پٹرول، بجلی تے گیس دے ریٹ گیس چیمبر وچ پُچا دیندے نیں تے اُتلے صبر دی تلقین کردے نیں۔ ’’مشکل وقت اے۔ برداشت کرو۔‘‘