خالص جمہوریت

تحریر حمید اللہ بھٹی

ایوب خان‘ ضیاالحق تے پرویز مشرف مگروں ہن ملک خالص جمہوریت ول گامزن اے۔ ایس جمہوریت لئی نواز شریف تے بے نظیر بھٹو دی لمی خدمات نیں کیوں جے جمہوریت ہن ملاوٹ توں پاک ہوندی جا رہی اے۔ وڈے بھرا نے وزیراعظم تے چھوٹے بھرا نے وزیراعلیٰ بن کے جمہوریت دی مضبوطی لئی انتہائی قابل قدر کم کیتا۔ سچ تاں ایہہ ہے کہ ایہناں دی وجہ نال جمہوریت مضبوط ہوئی جہدا پورا ملک معترف اے۔ موجودہ قومی اسمبلی وچ پیو نے اپوزیشن لیڈر بن کے اپنی صلاحیتاں دا لوہا منوایا تے پتر نے پنجاب اسمبلی وچ اپوزیشن لیڈر دے فرائض منصبی نہایت جانفشانی نال ادا کیتے جہدے توں جمہوریت نوں لاحق امراض دا بڑی حد تک خاتمہ ہویا اے۔ ہن تے ملاوٹ توں پاک خالص جمہوریت دی منزل چندگام رہ گئی اے کیوں جے والد ملک دا وزیراعظم بن چکیا اے‘ چھیتی ای حلف چکن مگروں ہونہار فرزند آبادی دے لحاظ نال سب توں وڈے صوبے دا وزیراعلیٰ بن جاوے گا۔ ایہہ سب خالص جمہوریت دا ثمر اے۔ امید واثق اے کہ عوام نوں یقین آوے گا کہ ملک وچ خالص کھوئے تے بادام والی جمہوریت آ چکی اے جہدے تے شریف خاندان دی جہنی وی تعریف کیتی جاوے گھٹ اے۔ ایہہ جہڑے لوک آکھدے نیں کہ ملک سلطنت شریفیہ ول ودھن لگیا اے اوہناں نوں نظرانداز کرنا تے ملک دشمن قرار دینا ای جمہوریت دی حقیقی خدمت اے۔
خالص جمہوریت ول جاری سفر وچ رخنہ اندازی کرن والے ملک دے خیر خواہ نہیں کیوں جے ایہہ اوہ لوک نیں جہڑے ملک نوں خالص جمہوریت ول ودھدا نہیں ویکھنا چاہندے۔ ایسے لوکاں دی وجہ نال والد دی وفاتی کابینہ دی حلف برداری کئی دن تک التوا دا شکار رہی تے صدر ولوں انکار مگروں چیئرمین سینیٹ صادق سنجرانی دے ذریعے حلف برداری کرا چکے ہین۔خالص جمہوریت ولو جاری سفر وچ رخنہ اندازی کرن والے ملک دے خیر خواہ نہیں کیوں جے ایہہ اوہ لوک نیں جہڑے ملک نوں خالص جمہوریت ول ودھدا نہیں ویکھنا چاہندے۔ ایسے لوکاں پاروں والد دی وفاتی کابینہ دی حلف برداری کئی دناں تک التوا دا شکار رہی تے صدر ولوں انکار مگروں چیئرمین سینیٹ صادق سنجرانی دے ذریعے حلف برداری کرا چکے نیں مگر پتر دی بطور وزیراعلیٰ حلف برداری تاخیر دا شکار رہی۔ جے مولانا فضل الرحمن تے آصف زرداری صدر بنن دے مطالبے اتے لچک وکھان تے وفاق وچ خالص جمہوریت دی منزل فوری حاصل ہو سکدی اے۔ بس قریبی عزیزاں اسحاق ڈار تے خواجہ آصف نوں نوازن دی دیر اے۔ اسحاق ڈار تے اینے صابر وشاکر قسم دے انسان نیں کہ چیئرمین سینیٹ جئے معمولی منصب اتے کم کرن نوں آمادہ نیں جد کہ خواجہ آصف جئے نفیس انسان نوں وڈے بجٹ دی کوئی وی وزارت دین نال جمہوریت دی آبیاری کیتی جا سکدی اے لیکن ایہہ کمبخت اتحادی کیسے احمق لوک نیں کہ یوسف رضا گیلانی نوں چیئرمین سینیٹ بنان دا مطالبہ کر رہے نیں۔ ہن ایہہ فضل الرحمن نوں ویکھ لوو عجیب بندا اے جہنوں پی ٹی آئی والے ڈیزل ڈیزل آکھ کے چھیڑدے نیں اوہ صدر دا منصب نہ ملن تے فوری الیکشن دی صدا لان لگیا اے۔ اوئے بھراوا اک عالم دین نوں تے عہدیاں دا لالچ ہونا ای نہیں چاہیدا بلکہ ایہ سب دنیاداراں لئی چھڈ دینا ای جمہوریت اے لیکن اوہ صدر بنن اتے ای بضد نیں۔ اوہناں نوں سمجھنا چاہیدا کہ عارف علوی نوں ہٹان لئی دوتہائی اکثریت ضروری اے جہڑی ساڈے کول نہیں۔ا یسے بنا تے وزیراعظم کولوں حلف نہ لین دے باوجود اوہناں نوں برداشت کیتا جا رہیا اے۔ کاش سپیکر اسد قیصر وانگوں آپ ای استعفیٰ دے کے ایوان صدر خالی کر دے تاں جے ایہہ عہدہ وی اسیں جمہوریت مضبوط کرن دی جدوجہد کرن والے کسے اپنے عزیز نوں سونپ سکیے۔ ویسے ایہہ عہدہ نواز شریف تے مریم نواز دے ای شایان شان اے مگر مجبوری ایہہ ہے کہ اوہناں نوں عدالتاں نے تاحیات نااہل کر رکھیا اے۔ ایسے وجہ نال جمہوریت کمزور ہوئی مگر ہن چھیتی ای کیس تے سزا دا تیا پانچا کرن والے نیں جہدے وچ ساڈا کوئی ذاتی مفاد نہیں بلکہ ایسا کرنا خالص جمہوریت دی بحالی لئی بہت ضروری اے۔
خالص جمہوریت دی بحالی ول جاری سفر وچ گورنر پنجاب عمر سرفراز چیمہ اک وڈی رکاوٹ نیں۔ ایسے لئی وفاقی حکومت نے اوہناں نوں ہٹان دی سمری صدر مملکت نوں بھیج دتی اے کیوں جے اسیں خالص جمہوریت اتے کسے قسم دی مصلحت دے قائل نہیں۔ ویسے ایس منصب اتے کوئی ساڈا کارکن ہوندا تے نومنتخب وزیراعلیٰ حمزہ شہباز دی حلف دی تقریب اینی تاخیر دا شکار نہ ہُندی۔ ایہہ جہڑی خالص جمہوریت ہوندی اے ایہدے وچ اپوزیشن دا کوئی کردار نہیں ہوندا لیکن پنجاب وچ چودھری پرویزالٰہی ایس گل نوں سمجھ ای نہیں رہے۔ عمران خان دی اے ٹی ایم مشیناں جہانگیر ترین تے علیم خان ولوں ساتھ دین پاروں ای اوہناں دے سارے عیب تے بدعنوانیاں نظر انداز کردتیاں نیں البتہ ڈپٹی سپیکر دوست محمد مزاری نوں توڑن لئی کافی محنت کرنا پئی مگر جو وی اوہناں نے منگیا اسیں دین وچ کوئی تامل نہیں کیتا۔ ایہہ گل اپوزیشن نوں پسند نہیں آئی تے پلس دے ذریعے پھینٹی لوا کے اسمبلی توں کڈدتا۔ چودھری پرویزالٰہی جدوں آئین تے قنون دی گل کرن توں باز نہیں آئے تے اوہناں نوں وی تشدد دا نشانہ بنوا کے دسیا اے کہ جمہوریت 1122 سروس دین‘ یونیورسٹیاں تے ہسپتال بنان‘ ٹریفک دا نظام درست کرن لئی ٹریفک وارڈن بھرتی کرن نال مضبوط نہیں ہوندی۔ ایہہ جہڑی تسیں کسان تے مزدور دی گل کردے او جمہوریت وچ ایہناں دا کوئی کردار نہیں۔ فیر وی اوہ اپنے موقف اتے ثابت قدم نیں جہدے تے اسیں سخت حیران آں۔ چودھری پرویزالٰہی نوں التماس اے کہ سری لنکا دے پاپاکسا خانداناں دی جمہوریت نوں رول ماڈل سمجھو فیر وی انکاری رہوے تے سبق دین لئی پلس فورس ساڈے کول موجود اے جہڑی اینی جانبدار اے کہ ساڈے خلاف ایف آئی آر دے اندراج دی جرات نہیں کر سکدی۔ جے مجبوری وچ ایسا کرن دی نوبت آ وی جاوے تے وی انصاف نہیں ہو ندا۔ سمجھان لئی سانحہ ماڈل ٹائون دے مقتولین دا کیس واضح مثال اے۔
خالص جمہوریت وچ اپنے نہیں صرف مخالفاں دے عیب نظر آندے نیں۔ ہن
ویکھو ترکمانستان ولوں 1997وچ دتا قیمتی قالین دا تحفہ جمہوریت مضبوط کرن لئی نواز شریف 50روپے وچ توشہ خانے توں خرید کے لے آئے۔ قطر دے ولی عہد نے انتہائی قیمتی بریف کیس دتا تے صرف جمہوریت لئی 875 روپے وچ لے لیتا۔ 1999وچ سعودی عرب ولوں 50لکھ دی مرسڈیز گڈی دا دتا تحفہ چھ لکھ وچ خریدیا۔ سعودی حکومت دے اک ہور تحفے قیمتی رائفل دے عوض توشہ خانے نوں چودہ ہزار دتے۔ ابوظہبی دے حکمران ولوں 1999وچ دس لکھ مالیت دی دتی گھڑی مریم نواز نے 45 ہزار وچ خرید لیتی۔ ایسے طرح شوکت عزیز‘ یوسف رضا گیلانی تے آصف زرداری نے وی توشہ خانے توں کروڑاں دے تحفے کوڑیاں دے بھائوخریدے مگر یوسف رضا گیلانی تے آصف زرداری کیوں جے ہن حکومتی اتحاد دا حصہ نیں ایس لئی اوہناں دے خلاف گل کرن توں خالص جمہوریت دی منزل دور ہو سکدی اے جد کہ شوکت عزیز سیاست توں ای کنارہ کش ہو چکے نیں ایس لئی اوہناں دی تے گل کرنا ای فضول اے۔ ایسے لئی سارا زور عمران خان نوں بدنام کرن اتے اے کیوں جے اپوزیشن نوں بدنام کرن تے دیوار نال لان نال ای خالص جمہوریت ممکن اے۔ آئو اسیں سارے رَل کے عہد کریے کہ خالص جمہوریت دی منزل حاصل کرن لئی تسیں سارے ساڈی حکومت دا ساتھ دیو گے تے پلس دے ذریعے اپوزیشن دی ہر واری ٹھکائی اتے شادیانے وجائو گے ۔ اللہ ساڈے ساریاں دا حامی و ناصر ہووے۔ پاکستان زندہ باد۔