چمچیاں دیاں پھرتیاں

خالد مسعود خان

اجے نویں حکومت عملی طور تے وجود وچ نہیں سی آئی تے شہبازشریف دی وزارت عظمیٰ چوی گھنٹیاں دی دوری تے سی پر کیوں جے ایہ منظرنامہ کافی صاف وکھائی دے رہیا سی ایس لئی چمچیاں نے پھرتیاں وکھانیاں شروع کر دتیاں۔ اتفاق ویکھو‘ جس دن ایف آئی اے نے میاں شہبازشریف تے فرد جرم لانی سی بالکل اوسے دن وزیراعظم پاکستان دا الیکشن آ گیا۔ میاں شہبازشریف دی کامیابی وچ کسے فارغ ترین بندے نوں وی شک نہیں سی اجہے وچ احتساب تے لگے سرکاری ادارے نے حالات نوں سمجھدے ہوئے موقعے دی مناسبت نال بڑا ای سمجھدارانہ فیصلہ کیتا تے ملزم دے وکیل دی عمرے تے جان دی درخواست تے عدالت دے استفسار تے اوس وکیل ولوں التوا دی درخواست تے آمنا و صدقنا کر کے لمی تریخ لے لئی۔ ایہ ایس اقتدار وچ آن لئی وکھائی جان والی بے تابیاں دے نتیجیاں دی پہلی قسط اے۔ ہن اگلے چار چھ مہینے ایسے قسم دی فلم چلے گی تے فیر غالباً سارے ملزمان بڑے ای مزے نال باعزت بری ہو جان گے۔
ایسے اک دن جدوں عمران خان وزارت عظمیٰ توں فارغ ہو چکے سن تے اجے نویں وزیراعظم دا انتخاب اگلے دن ہونا سی ایسے اک لاوارث دن جدوں ملک اپنے چیف ایگزیکٹو دے بناں حیرانی پریشانی دے عالم وچ سی اوسے دن چست و چالاک سرکاری افسراں نے آن والیاں نال اپنی وفاداری دا پیشگی ثبوت دیندے ہوئے نہ صرف ایہ کہ منی لانڈرنگ کیس وچ میاں شہبازشریف تے فرد جرم لان دی تھاں اوہناں نوں بلااعتراض اگلی تریخ دلوان وچ مدد کیتی سگوں اوسے دن کسے قسم دی درخواست یاں ایف آئی آر دے بناں ای سابق حکومت دے چھ کھڑپینچاں نوں نوفلائی لسٹ وچ سٹ دتا۔ ایہ وکھری گل اے کہ اوہناں دی ایہ حرکت عدالت نے نکام بنا دتی پر اپنے طور تے کیتی چمچہ گیری دی ایہ مثال کوئی پہلی نہیں ماضی وچ وی بیوروکریسی اجہے کارنامے نبھاندی رہی اے بھاویں ملک عزیز وچ رضاکار چاپلوس سرکاری افسراں دی ایہ قبیل واہوا عام اے تے ہر دور وچ بلامعاوضہ دستیاب رہی اے پر مسلم لیگ ن دے دور وچ تے رنگ ای دوجا ہوندا اے۔
مینوں مبینہ ڈرامے باز‘ نااہل تے نالائق شہزاداکبر نال رتی برابر ہمدردی نہیں جہڑے لوکاں نے ایس ملک وچ احتساب نوں مذاق تے ٹھٹھہ بنا کے رکھ دتا اے اوہناں وچ شہزاداکبر نوں پہلا نمبر دتا جانا چاہیدا اے کہ موصوف دے چنیدہ قسم دے احتساب نے تے فیر اُتوں نالائقی نے ملک وچ احتساب دے عمل نوں جہڑا نقصان اپڑایا اوہدا اپاء ممکن ای نہیں۔ نیب دے اک معمولی جہے پراسیکیوٹر توں مملکت وچ احتساب دے سب توں طاقتور بندے دے مرتبے تک اپڑن والے ایہناں صاحب نے تن ورھے احتساب دے ڈرامے وچ ہر دن نواں رنگ بھریا تے بڑی ای کامیابی نال عمران خان نوں احتساب دے ٹرک دی بتی دے پچھے لائی رکھیا تے فیر اک دن اپنا پاندان چک کے ٹر پئے۔ بالکل اوس فقیر وانگوں جہنوں شہر وچ صبح پہلے بندے دے طور تے داخل ہون دے بدلے مملکت دی سربراہی مل گئی سی پر حلوے دے شوقین اوس فقیر نے ایس دوران حلوے توں لطف اندوز ہون توں علاوہ کجھ نہ کیتا‘ تے گوانڈھی ملک ولوں حملے تے جنگ کرن دی تھاں آخری وقت تک حلوہ پکوا کے کھاندا رہیا۔ جدوں دشمن دی فوج شہر وچ وڑ گئی تے اپنی پرانی گدڑی پائی‘ کشکول چکیا تے ایہ آکھ کے ٹر پیا کہ حلوہ کھان آیا سی‘ اوہ چنگی طرح نال ڈھڈ بھر کے کھا لیا اے ہن میں چلنا واں۔ فیر زور نال آواز لائی: کوئی سخی جو اللہ دے ناں تے ایس فقیر نوں خیرات دیوے۔
کہن والے کہندے نیں کہ ڈاکٹر ظفر مرزا‘ ندیم بابر‘ زلفی بخاری‘ تابش گوہر تے شہزاداکبر ایسے قسم دے تحفے سن جہناں نے موج میلہ کیتا تے جدوں ویکھیا کہ اپنا گھر پورا ہو گیا اے تے اوہناں نے قوم نوں تے عمران خان نوں چنگی طرح چونا لا لیا اے تے فیر اوہ اپنا پاندان چک کے چپکے نال کھسک گئے۔ احتساب دے پرچارک عمران خان دی ایہ بہرحال اعلیٰ ظرفی ای کہی جا سکدی اے کہ اوہناں نے کسے وی کھسک جان والے مشیر یاں معاون خصوصی توں ایہ نہیں پچھیا کہ تسیں ایس دوران دوائیاں والیاں توں کنے پیسے وٹے‘ کرونا فنڈ توں کناں مال کمال‘ پٹرول دے سکینڈل توں کنے نوٹ چھاپے‘ بجلی دی تقسیم کار کمپنیاں دے بورڈ آف ڈائریکٹرز وچ کس کس پیداگیر نوں مسلط کیتا‘ احتساب دے ناں تے کنے لوکاں نوں نچوڑ کے اپنی جھولی تر کیتی تے کتھوں کتھوں عمران خان دے ناں تے رگڑ لایا۔ لوک آئے‘ مال پانی بنایا تے خاموشی نال سٹک گئے پر ایہناں ساریاں گلاں دے باوجود ایہ گل بہرحال قابل غور اے کہ یاراں تریخ نوں جد کہ ملک وچ نہ وزیراعظم سی‘ کابینہ سی تے نہ ای حکومت سی تے اوہناں لوکاں دے ناں کنہے اینی ایمرجنسی وچ سٹاپ لسٹ وچ شامل کروائے؟ ایہناں تن سیاسی لوکاں توں علاوہ ڈی جی اینٹی کرپشن پنجاب گوہرنفیس‘ سابق وزیراعظم دا پرنسپل سیکرٹری اعظم خان تے میاں شہبازشریف دے منی لانڈرنگ والے کیس دی تفتیش کرن والا ڈائریکٹر ایف آئی اے پنجاب زون محمد رضوان وی ایس لسٹ وچ شامل سی۔
چمچیاں دیاں پھرتیاں عروج تے نیں تے سنیا اے کہ ہائی پروفائل شخصیات دے کیساں دیاں فائلاں وی سجے کھبے ہو رہیاں نیں۔ ساڈے ایتھے ہن ایہ گل بالکل عام جہی ہو چکی اے کہ سرکاری ملازم ریاست دی تھاں حکمراناں دے ملازم بننا زیادہ محفوظ تے فائدہ مند سمجھدے نیں۔ پنجاب وچ عشریاں توں حکمرانی کرن والے شریفین دے وفادار سرکاری ملازماں دی گنتی سرکار نال وفادار سرکاری ملازماں دی گنتی توں ڈھیر ودھ اے۔ ایہناں وفاداراں نے اپنے مالکان دی آمد توں پہلاں ای اپنی وفاداری وکھانی شروع کر دتی اے۔ میاں شہبازشریف تے حمزہ شہباز دی فرد جرم والی پیشی تے ملزماں دے وکیل ولوں لمی تریخ لین دی استدعا تے وکیل ولوں چھیتی رضامندی وچ ایہناں کیساں دے مستقبل بارے جو اشارے پوشیدہ نیں اوہ ہن اینے پوشیدہ وی نہیں کہ عقل والیاں نوں ایہناں دے آثار نظر نہ آن۔٭٭