کُڑیاں دا گھر چھڈ کے مرضی نال ویاہ

پچھلے کجھ دنا ںتوں سیاسی گہما گہمی سنے بوہت سارے مسئلیاں اُلجھا کے رکھیاہویاسی ۔ہر سوچ تے گل ملکی حالات ،سیاسی جماعتاں دے نابالغ رویے توں ہندی ہوئی معزز اداریاں دی سوچ تیکر جاندی تے مایوسی لے کے پرتدی۔ایہہ حالات میرے جیہے بندے لئی یقینی طور اتے پریشان کن نیں جیہڑا کسے سیاسی نظریے دی تھاویں صرف اپنے وطن نال پیار کردا اے تے اوہدے عشق دی مالا جھپدا اے۔
سیاسی حالاتاں دیاں ایہناں پریشانیاں وچ اک اجیہی خبر آئی جنھیں میرے سنے پورے پاکستان نوں ہلا کے رکھ دِتا۔خاص کر اونھاں ماپیاں نوں جیہڑے اپنی اولاد نوں جان توں وی ودھ پیار کردے نیں۔
ایہہ کراچی وسدی اک کڑی دعا زہرہ دے اغوا دی خبر سی۔14 ورھیاں دی ایس بچی دے ماپیاں دا برا حال ویکھ کے جیویں دل پسیج کے رہ گیا۔الیکٹرونک میڈیا،سوشل میڈیا تے پرنٹ میڈیا نے دعا دے ماپیاں دا پورا ساتھ دتاتے ایس کیس نوں ہائی پروفائل بنا دتا۔
ایہدے نال ای اک ہور بچی نمرہ دے اغوا دی خبر وی سامنے آگئی،حالے ایس خبر اتے تبصرے جاری سن کہ پتا لگا کہ اک کڑی دینار جیہدی عمر 25ورھے ہے،اوہ وی اغوا ہوگئی اے۔ بچیاں دا انج اغوا ہونا پورے ملک لئی سنسنی بن گیا۔اک پاسے بچیاں دا اغواسوشل میڈیا تے ٹاپ ٹرینڈ بن گیا تے دوجے بنھے نیشنل میڈیا وی کدی پلساں نوں کوسدا تے کدی ایہہ تبصرہ کردا کہ ساڈے اداریاں دی ساری دلچسپی سیاستاں تک محدود ہوکے رہ گئی اے ،ایس لئی جرائم پیشہ گروہاں نوں کھلی آزادی مل گئی اے۔سنسنی تے خوف دا ایہہ سلسلہ جاری سی کہ پہلی خبر ایہہ آئی کہ نمرہ ناں دی بچی نے ڈیرہ غازی خان دے اک منڈے نال ویاہ کرلیا اے۔نال ای میاں بیوی دیاں ویڈیوز وی وائرل ہوگئیاں ،جنھاں وچ دونویںای بڑے خوش نظر آرہے سن۔نمرہ دا ایہہ بیان وی سامنے آگیا کہ ماپے اوہدی مرضی توںبنا اوہدا نکاح ودھیری عمر دے کسے بندے نال کرنا چاہندے سن،ایس لئی اونھے نجیب شاہ رخ ناں دے منڈے نال ویاہ کرلیا اے۔نمرہ ایہہ وی آکھیا کہ اونھوں اپنے ماپیاں توں خطرہ اے۔۔۔۔
اونھاں ماپیاں توں خطرہ جنھاں پال پوس کے وڈا کیتا۔لہو مڑکا ،اک کرکے ہر خواہش پورے کیتی۔جواپنی اوقات توں ودھ کے پڑھا لکھا رہے سن ،پر بچی نوں اونھاںتوں جان دا خطرہ اے۔حالے ایس خبر دی اذیت نہیں سی مکی کہ دوجی بچی دینار دا نکاح نامہ وی سامنے آگیا،اوس وی اپنی مرضی نال نکاح کرکے آکھیا کہ مینوںماپیاں توں بچایا جائے۔میں تے جیویں ہِل کے رہ گیا۔ایہہ کیہو جیہاں دھیاں نیں جیہڑیاں ماپیاں توں ڈر رہیاں نیں۔اونھاں ماپیاں توں جنھاں ایہناں دے جمدیاں ای اپنی ذات دی نفی کرکے اپنی حیاتی دیاں ساریاں خوشیاں ایہناں دیاں نکیاں نکیاں آساں پوریاں کرن اتے قربان کردتیاںسن ،پر ایہناں بچیاں نوں ہن ماپیاں کولوں ڈر لگ رہیا سی کہ جیویں اوہ ایہناں دے سب توں وڈھے دشمن نیں۔
حالے میں ایہناں دے چہرے ای ویکھ رہیا ساں کہ نیوز چینلز اتے دعا زہرادا نکاح نامہ وی آگیا۔فیر پتا لگا کہ اوہ بچی وی کراچیوں نس کے لہور اپڑ گئی اے۔ اونھیں کسے ظہیر نامی منڈے نال ویاہ کرلیا اے جیہڑا رائے ونڈروڈ دا رہن والا اے۔ فیر اس بچی دیاں تصویراں تے ویڈیو و ی آگئی ۔میں ویکھ کے سکتے وچ آگیا ۔ایہہ بالڑی تے واقعی 12،13ورھیاں دی اے۔تے منڈا؟اوہدی عمر وی 16یا 17ورھے ہووے گی؟۔۔۔
حالے تے ایہناں نوں کسے وی گل دا نہیں پتا۔نہ حیاتی دی دھپ چھاں ویکھی نہ آزمائشاں دی سختی دا کوئی پتا۔ایہہ تے ایہہ وی نہیں جان دے کہ شادی چار دن اکٹھیاں رہ کے ہاسے کھیڈے دا ناں نہیں۔نہ ای ایہہ کوئی فلم اے جیہڑی انج ای چلدی رہوے گی تے تسیں گانے گاوندے پیار دیاں گلاں کردے جیون بِتا دیو گے۔نہ تعلیم پوری کیتی تے نہ کوئی کم کار۔۔۔۔کڑی ولوں جیہڑا بیان جاری ہویا اوہ وی سٹیریوٹائپ بیان سی جیویںپچھلیاںکڑیاں دتا سی۔14ورھیاں دی کڑی دعا نوں وی اپنے اونھاں ماپیاں تو خطرہ سی جیڑھے اوہدے پچھے رو رو جھلے ہوئے پئے نیں۔دعا دا پیو اج وی ایس خوش گمانی وچ اے کہ میری دھی نوں ورغلایا جا رہیا اے۔جیویں اوہدی کوئی غلطی ای نہیں۔اوہ وچارہ ایس گل اتے خوش سی کہ میری دھی جس حال چے وی اے ،زندہ تاں ہے نا۔۔۔
ایس سارے معاملے دا جائزہ لیئے تے سانوں بوہت کجھ سوچنا پئے گا۔ماپیاں دی ذمے داری توں لے کے سماج وچ سر چکدیاں اونھاں سوچاں دی وی گل کرنی پوے گی جیہڑیاں آلودگی بن کے ساڈی رہتل وچ بے حیائی دا زہر گھول رہئیاں نیں۔ساڈا میڈیا کیہہ وکھا رہیا اے ؟اوہدے موضوعات کیہہ نیں تے میرا جسم میری مرضی ٹائپ دیاں منگاں کرن والے کیہدے ایجنڈے اتے عمل کررہے نیں؟
دعا کوئی اک کردار نہیں ،یا فیر گل نمرہ کاظمی اتے جاکے مک نہیں جاندی بلکہ اجیہے ہزاراں کردار اپنئیاں سوچاں اندر زہر پال رہے نیں،کیہ خبر کدھوں کس گھر دی دھی دہلیزاں ٹپ کے ماپیاں نوں منہ وکھاون جوگھا نہ چھڈے۔ایہناں ساریاں گلاں داذمے دار کون اے؟
سوچیا جاوے تے ہر بندہ اپنی اپنی تھاویں قصور وار اے جیہڑاایس سماج دی تشکیل وچ ماسا وی کردار ادا کردا اے۔ماپیاں تے استاداں توں لے کے گلی محلے دی دکان والا وی،جیہڑا دوجے دے بچیاں نوںاپنے بچے نہیں سمجھدا۔ٹی وی سکرین توں لے کے موبائل فون تیکر ۔سوشل میڈیا توں لے کیپرنٹ میڈیا تیکر،مسیتے درس دیندے مولوی توں لے کے عورت دی آزادی دے ناں اتے کنجر خانہ لاون والیاں ادھ ننگیاں زنانیاں تیکر،ہر شعبہ تے ہر طبقہ قصور واراے۔ سانھوں مننا پئے گا کہ اسیں اپنے بچیاں نوں محفوظ ماحول نہیں دے سکے۔ساڈیاں آون والیاں نسلاںاخلاقی تے سماجی طور اتے غیر محفوظ معاشرے چے جین گِیاں ،جیہدے مجرم اسیں سب ہاں۔
سجنو!
کسے دی دھی بھین دی غلطی نوں چھج وچ پا کے چھٹنا بہت سوکھا اے۔ پر ایہہ پھٹ اپنے سینے اتے سہنا بڑا اوکھا اے۔دوجی گل ایہہ وی کہ سانھوں اپنے جوڈیشل سسٹم ول وی ویکھنا پوے گا،جنھاں گند ایتھے وے شاید ای کسے ہور محکمے وچ ہووے۔جد تیکر ساڈا جج تے وکیل معاشرے دی بہتری لئی کردار ادا نہیں کرے گا جرم ودھدا رہوے گا۔
ہن ایہناں بچیاں توں جنھاں وکیلاں رٹے رٹائے بیان دوائے تے جنھاں ججاں اپنے فیصلیاں وچ اجیہیاں حرکتاں دی حوصلہ افزائی کیتی اوہ سارے دے سارے سماج نوں زہریلا کرن دے ذمے دار نیں۔میں اخیر اتے کہواں گا کہ اپنے گھراں دی خبر لین دے نال نال سماج اتے وی نظر رکھو۔ایہہ سماج ساڈیاں اپنیاںکوتاہیاں تے غلطیاں پاروں آلودہ ہندا جا رہیا اے ،تے ہن اسیں آپ ای ایہدی صفائی وی کرنی اے۔