چھیتی انتخاب ای مسئلے دا حل

سعد اللہ شاہ

گل ایہہ وے کہ زندگی ہے تے ایہ رونا دھونا وی نال ای رہوے گا۔ موت توں پہلاں بندہ غم توں نجات کیویں پائے۔ پر ایہدا مطلب ایہ نہیں کہ بندہ ہتھ بھن کے بہہ جاوے۔ ہن دی صورتحال بڑی نازک اے اوہی میر والی گل کہ لے سانس بھی آہستہ کہ نازک ہے بہت کام۔ آفاق کی اس کار کہ شیشہ گری کا۔ ایس ویلے صورتحال بڑی کشیدہ اے۔ اک منظر وگڑ رہیا اے تے اک منظر بن رہیا اے۔ سارے سچ تے جھوٹ دے وچکار اڑے ہوئے نیں تے ایہو جھوٹ دی حد تک سچ اے۔ پہلی تے آخری گل تے ایہہ وے کہ ایہ ملک ہے تے اسیں آں جس نہج تے ایس ملک نوں لیاندا گیا اوہ ساریاں دے سامنے اے۔ روٹی‘ کپڑا تے مکان دے ناں تے ایس ملک دی صنعت برباد کیتی گئی‘ فیر اک دور آیا کہ کار حکومت کاروبار بن گیا۔ سیاستدان جاگیرداری نظام توں سرمایہ داری نظام دا حصہ بن گئے۔ ایہدے بعد تنگ آئے لوکاں نوں اک جنونی بندہ ملیا تے اک نویں بیداری سامنے آئی پر امید تے امنگاں جگان والا وی ایس مکروہ نظام وچ کان نمک ہو گیا۔
اسیں وی دل و جان نال ایس ملک وچ ہن نظام چاہندے سی جو خاندانی سیاست یاں موروثی سیاست چوں باہر نکلے تے اک قومی سوچ رواج پا سکے۔ ظاہر اے جہناں دے نال چلے تے دل و جان نال اوہناں دی سپورٹ کیتی کہ تبدیلی آ جاوے پر ڈاڈھی مایوسی ہوئی تے ایہدا اظہار وی بے ساختہ انداز وچ کیتا جہدے نال ساڈے دوست وی رنج ہوئے تے اللہ دا شکر اے کہ سانوں کسے نے گالھ نہیں کڈھی پر ایہ ضرور باور کروایا کہ اوہ ساڈی عزت کردے نیں پر اختلاف رائے تے مثبت تے تعمیری گل اے۔ ہن وی جہڑے لوک خان صاحب دی حمایت وچ باہر نکلے نیں اوہ محب وطن نیں کہ ایہدے وچ تے کوئی دوجی رائے نہیں کہ پاکستانی ایہ محسوس کردے نیں کہ امریکہ نے سانوں غلام بنا رکھیا اے۔ ایتھے وی دوہاں پاسیوں غلطیاں ہوئیاں کہ جتھے اپوزیشن نے پونے چار ورھے برداشت کیتا سی کجھ ہور ٹھہر جاندے تے خان صاحب نوں اپنی کارکردگی پاروں لوکاں وچ جان اوکھا ہو جاندا پر اوہناں نوں بڑی جلدی سی تے فیر باغی ارکان نے زیادہ شک وچ پایا کہ اوہ پی ٹی آئی دے ٹکٹاں تے آئے سن تے استعفے دے دتے۔ بہرحال آئین تے قنون دی عملداری تے لازم اے۔ خیر جو وی ہووے ایس حوالے نال بڑی خوشی ہوئی کہ ایس مقام تے خان صاحب نے کہیا کہ اوہ کوئی اجیہا قدم نہیں چکن گے جہدے نال ملک و قوم دا نقصان ہووے۔ ایہ اک تعمیری تے میچور سوچ اے۔ لگدا اے اوہناں نوں احساس ہونا شروع ہو گیا اے کہ اپنیاں غلطیاں توں سکھیا جاوے۔ مثلاً اوہناں نے ایہدا وی اعتراف کیتا کہ ایویں ای فائز عیسیٰ ریفرنس بنایا۔ فیر اوہ روانی وچ ایہ وی کہہ گئے کہ بزدار نوں ہٹانا اوہناں دی غلطی سی۔ خیر ایتھے اسیں اختلاف کراں گے کہ بزدار نوں لانا اصل غلطی سی۔ کہنا میں ایہ چاہنا واں کہ خان صاحب دے جلسیاں توں اندازہ اوہناں نوں ہو گیا اے کہ لوک ہن وی اوہناں دے نال نیں تے اوہ اوہناں دے بیانیے نوں سچ من دے نیں فیر اوہناں دے فالورز دی رہنمائی دوست انداز وچ ہونی چاہیدی اے۔ انتشار کسے نوں وی پسند نہیں خاص طو رتے جو عام دیہاڑی دار غریب نیں جو کما کر لے جاندے نیں تے چلہا جلدا اے۔ پہلے ای روزگار نہیں‘ مہنگائی تے ہن وی رکن دا ناں نہیں لے رہی۔ مسئلے اجے ختم نہیں ہوئے۔ تسیں ویکھدے نہیں کہ آئی ایم ایف نے نئی حکومت توں ناں منگ لئے نیں کہ جو مذاکرات کرن گے۔ یقین کرو کہ ایسٹ انڈیا دا ذہن وچ آن لگ پیندا اے۔ ساڈی بدبختی کہ سٹیٹ بینک وی ہن اوہناں دے رحم و کرم اُتے اے۔
ہن آنے آں موجودہ کشیدگی دے حل ول‘ ایہدا حل تے چھیتی انتخاب توں اڈ کجھ نہیں۔ اجے پنجاب دی وزارت اعلیٰ دی حلف برداری لمک گئی اے تے گورنر دی برطرفی تے صدر دے احکامات سب کیہ اے۔ دوجے پاسے کجھ لوک اپوزیشن نہیں بن سکدے تے پنجاب وچ منحرف لوکاں دا ووٹ کاسٹ کرنا آئینی مسئلہ پیدا کر سکدا اے۔ لوکاں دی سطح تے سوشل میڈیا تے جنگ زیادہ زوراں اٍُتے اے۔ اجے تے رمضان شریف اے تے لوگ کجھ نہ کجھ لحاظ کر رہے نیں۔ شہبازشریف زور شور نال بھج نس کر رہے نیں۔ اوہناں نے ڈائیلاگ وی بولیا کہ لوکاں دی گھبراہٹ ختم تے عمران خان تے طاری۔ اسد عمر نے کہیا اے کہ میٹرو دا سہرا وی شہباز لے رہے نیں جد کہ دو مہینے پہلاں دا فیصلہ موجود اے کہ میٹرو اپریل وچ چلے گی۔ اک پتے دی گل ارشاد عارف نے کیتی اے کہ انتخاب وچ دیر ہوئی تے حکومت نوں نقصان ہووے گا۔ گل تے ٹھیک اے کہ اپوزیشن دے بناں تے فیر وزارتاں لئی قابلیت تے لیاقت دی تھاں پارٹیاں نوں حصہ دین دی گل ہو رہی اے۔ واقعی انج لگدا اے کہ جیویں دسترخوان تے کوئی مرغ مسلم یاں بکرا پیا اے تے اوہنوں ونڈنا باقی اے۔ سمجھ وچ نہیں آندا کہ اینے وکھووکھ خیالات رکھن والے ایہ لوک کیویں چلن گے۔ ہن حکومت دا پرفارمنس وکھان تے زور ہووے گا تے پی ٹی آئی دی نظر الیکشن اُتے اے۔٭