خلائی لال بتی

شکیل امجد صادق

اک حاجی صاحب مالش کرا رہے سن تے مالشیے نال سیاسی گل بات وی کر رہے سن اجڈ تے جاہل مالشیا (عوام ورگا) مروت وچ ہاں جی ہاں جی دا راگ الاپ رہیا سی کہ اینے وچ اک بندہ آیا تے کہن لگا ’’کیہ حال نیں حاجی صاحب… تسیں نظر نہیں آندے اج کل؟ کتھے رہندے او‘‘۔ حاجی صاحب نے اوہدی گل سنی ان سنی کر دتی تے سیاسی گتھیاں نوں سلجھان وچ لگا رہیا۔ اوہ بندہ کہن لگا ’’حاجی صاحب! میں تہاڈی سائیکل لے کے جا رہیا واں‘‘۔ اوہ سائیکل مالشی دی سی اوہ لے کے ٹر گیا۔ کافی دیر ہو گئی تے مالشی کہن لگا ’’حاجی صاحب! تہاڈا دوست آیا نہیں اجے تک واپس میری سائیکل لے کے؟‘‘۔ حاجی صاحب بولے ’’اوہ میرا دوست نہیں سی‘‘ تے میں اوہنوں جان دا وی نہیں کہ اوہ کون سی؟ مالشی بولیا: ’’پر اوہ تے تہاڈے نال گلاں کر رہیا سی‘‘ حاجی صاحب بولے: میں تے اوہنوں جان دا ای نہیں‘ میں تے سمجھیا سی کہ اوہ تیرا دوست اے‘‘۔ مالشی بولیا: حاجی صاحب! میں غریب بندہ آں‘ میں تے لٹ گیا‘‘۔ حاجی صاحب بولے ’’اچھا توں رو نہ‘ میں تینوں نویں سائیکل لے دینا واں‘ توں سائیکل والی دکان تے جا کے سائیکل پسند کر لے میں تیرے پچھے آنا واں‘‘۔ مالشی نے اک سائیکل پسند تے چکر لا کے ویکھیا مالشی واپسی تے آ کے کہن لگا کہ حاجی صاحب ایہ سائیکل ذرا ٹیڑھی چل رہی اے۔ حاجی صاحب نے کہیا ’’جا یار نویں سائیکل اے‘ ایہ ٹھیک ٹھاک تے بہترین کمپنی داے۔ لیا وکھا میں چیک کرنا واں‘‘۔ حاجی صاحب سائیکل تے چکر لان گئے تے واپس آئے ای نہیں۔ مالشی نوں اوس سائیکل دے پیسے وی دینے پے گئے۔
اج انج دا ای حال پاکستانی قوم دے نال ہو رہیا اے۔ ہر نواں آن والا حکمران حاجی اے تے عوام مالشی نیں۔ جائیداداں دے مالک حکمران نیں تے بھکھے تے مفلوک الحال عوام نیں۔ سوئس اکائونٹ حکمراناں دے نیں تے عوام پائی پائی نوں ترسدے نیں۔ حکمرانی لیڈر کردے نیں تے نعرے عوام لاندے نیں۔ عدالتاں رات باراں وجے اوہناں لئی کھلدیاں نیں تے انصاف نو ںایہ ترسدے نیں۔ پاکستان وچ عجیب الخلقت خاندان اجے تک موجود اے تے اوہناں دی صورتحال وی حاجی صاحب تے مالشیے ورگی اے۔ تسیں ایس گل توں اندازا لائو کہ نوازشریف 67 ورھیاں دا اے پر 69 ورھے والے شہباز توں وڈا اے۔ نوازشریف نے جدوں کلثوم بی بی بیمار سی کہیا سی میرا کلثوم نال 40 سال رفاقت دا رشتہ اے جد کہ حسین 48 سال دا تے مریم 46 سال دی سی حسن تے حسین 42 سال دا سی۔ نوازشریف دا ابا امیر سی تے شہبازشریف دا غریب آدمی آدمی سی۔ بی بی مریم کہندی اے حسین نواز دا دادا ارب پتی سی جد کہ حمزہ دا دادا اک مزدور آدمی سی۔
جدہ سٹیل مل 2006ء وچ ویچی سی تے ایسے پیسے نال 2002ء وچ لندن وچ فلیٹ خریدے سن جد کہ حسن نواز 1992ء وچ ادھر رہ رہیا سی۔ بندہ منجی گوانڈھی نوں ادھار نہ دیوے پر آپ اپنی منجی تے سون دی ترتیب تے ٹھیک کر لوے۔ چوہدری نثار کہندا اے لندن فلیٹس 93 توں شریف خاندان دی ملکیت نیں تے تے 1968ء وچ لگن والی اتفاق فائونڈری نے 1965ء دی جنگ وچ استعمال ہون والے ٹینک بنائے سن۔ اسیں تے آپ جدہ سٹیل مل ویچی تے اوہناں پیسیاں نال لندن دی پراپرٹی خریدی پر الحمدللہ جدہ سٹیل ہن وی ساڈی اے۔ 1989ء ابوظہبی توں سٹیل مل شفٹ کرکے 1988ء وچ جدہ وچ لا لئی سی اسیں الحمدللہ 1988ء وچ ارب پتی سی پر ٹیکس صرف 900روپیے دیندے سی۔
1992ء وچ چار ہزار 700 ٹیکس دتا۔ میں جدوں وردی پا کے پنڈ جاندا تے پنڈ دیاں عورتاں چھت کے چڑھ کے ویکھدیاں‘ صفدر اعوان حسین نواز نے دو ورھے دی عمر وچ شیخ جاسم دے والد نال پارٹنر شپ دا معاہدہ کیتا سی فونٹ ایجاد ہون توں پہلے ایس خاندان نے استعمال کر لیا۔ مریم بی بی آپ کہندی اے اک سال پہلاں میری لندن تے کیہ پاکستان وچ وی کوئی پراپرٹی نہیں۔ کوئی بینک بیلنس نہیں سی پر اک سال بعد الیکشن دے کاغذات وچ 5ملین‘ سینکڑوں ایکڑ زرعی بھوئیں‘ شاپنگ مالز‘ لندن وچ پراپرٹی تے اٹلی وچ سٹیل مل کتھوں نکل آئی۔ مقصود چپڑاسی دے اکائونٹ توں پیسہ کتھوں آیا۔ سولاں ارب دی کرپشن کتھوں ہوئی۔ احمدچیمہ تے کیس کیوں بنیا؟ سلمان شہباز باہر کیوں گیا؟ سارا ریکارڈ کیوں ساڑیا؟ اک اسیں آں جو انھیاں تے کانیاں وانگوں تیرہ شبی نوں مقدر سمجھ کے اوہناں دی خلائی لال بتی دے پچھے لگے اپنے آپ نوں موجودہ نسل تے آن والی نوں تباہ و برباد کرن تے تلے ہوئے آں۔ اسیں اپنی زندگی دیاں راہواں نوں آپ کنڈیاں والا بنا رہے آں۔ یاد رکھو آن والیاں نسلاں دی تباہی تے اوہناں دا نقصان وی ساڈیاں دھوناں تے ہووے گا۔٭٭