نِکی عید…مِٹھی عید

خصوصی رپورٹ

ہر سال مسلمان قوم یکم شوال دے دن عیدالفطر دا تہوار مناندی اے جہڑی رمضان المبارک دے مقدس مہینے مگروں سب توں وڈی خوشی سمجھی جاندی اے۔عیدالفطر دے دن یا اوس توں پہلاں لوک صدقہ فطر ادا کردے نیں‘ نماز عید دی ادائیگی مگروں گلے ملدے نیں‘ مٹھائیاں تقسیم کیتی جاندیاں نیں تے دوست احباب نال ملاقاتاں ہُندیاں نیں۔ چالُو سال کورونا پاروں عید دی خوشیاں پچھلے سالاں دے مقابلے وچ قدرے مختلف ہون گئیاں۔ آئو ایس ساری صورتحال دا جائزہ لینے آں۔
نمازِ عید دی ادائیگی
نماز عید دی ادائیگی چھوٹی وی مسجداں تے گرائونڈاں وچ کیتی جاندی اے جہڑی 2رکعت‘ 6زائد تکبیراں دے نال پڑھی جاندی اے۔ بنیادی طور تے شوال اسلامی کیلنڈر دا دسواں مہینہ اے۔ عید دے لغوی معنی جشن‘ خوشی‘ پہل تے فرحت نیں جد کہ فطر توں مراد روزہ کھولنا یا روزہ ختم کرنا اے۔ مسلماناں نوں عیدالفطر دے دن روزہ نہ رکھن دا حکم دتا گیا اے۔
عید دی اہمیت، سنتاں تے آداب
شریعت اسلامی دے مطابق عیدالفطر دے دن اللہ تعالیٰ اپنے بندیاں نوں روزے تے رمضان المبارک دے دوران کیتی گئی عبادتاں دا ثواب عطا فرماندا اے۔ مسلمان نماز عید لئی مسجد یا عیدگاہ جان توں پہلاں غسل کردے نیں۔فرزندان اسلام نماز دی ادائیگی توں پہلاں گھروں کجھ نہ کجھ کھا کے روانہ ہوندے نیں‘ مسجد پہنچن توں پہلاں رستے وچ تکبیراں آکھی جاندیاں نیں تے اللہ دا ذکر کیتا جاندا اے۔ اک دوجے نوں عید دی مبارکباد دینا وی عیدالفطر دے آداب دا حصہ اے۔ادائیگی نماز لئی مسجد جان لئی جہڑا رستہ اختیار کیتا جاندا اے۔ واپسی تے اوہ رستہ بدل کے گھر پہنچنا سنت اے۔ خشبو استعمال کرنا تے صاف ستھرا تے چنگا لباس پانا وی سنت اے‘ ضروری نہیں کہ لباس نواں ای پایا جاوے‘ تاہم عید دے موقعے اتے بوہتے مسلمان نویں لباس وچ ملبوس نظر آندے نیں۔
مستحقین دی عید
دنیا بھر وچ تباہی پھیلان والے کورونا وائرس نے پاکستان وچ وی کم و بیش پونے 9لکھ بندیاں نوں متاثر کیتا تے 19ہزار توں ودھ بندیاں دی جان لے لیتی جد کہ ملکی معیشت نوں پہنچن والا ناقابل تلافی نقصان اوہدے علاوہ اے۔خاص طور تے دیہاڑی دار مزدور طبقہ کورونا پاروں سب توں ودھ متاثر ہویا۔ چھوٹے موٹے دکاندار حضرات جہڑے اشیائے ضروریہ تے میڈیکل سٹوراں دے علاوہ کوئی ہور کاروبار کردے نیں‘ اوہناں دی دکاناں ایس او پیز دے تحت بند کرا دتی جاندیاں سن۔ایہدے وچ فرزندان اسلام دا فرض بندا اے کہ بے شک بوہتا دور نہ جائو تے پیشہ ور فقیراں دی تے بالکل مدد نہ کرو لیکن اپنے ای رشتہ داراں‘ عزیز واقارب تے دوست احباب وچوں ایسے لوکاں نوں تلاش کرو جہناں لئی ساہ دا سلسلہ بحال رکھنا وی ویلے دے نال نال اوکھا ہوندا جا رہیا اے۔
خوشی دے ایس موقعے اتے مستحقین دی مدد کرنا فرزندان اسلام دا فرض اے۔ صدقہ فطر‘ زکوٰۃ تے دوجے صدقیاں دے علاوہ اپنی لوڑ توں ودھ رقم استعمال کر کے وی ایسے بندیاں دی مدد کیتی جا سکدی اے۔ اوہناں نوں اپنی خوشیاں وچ شامل کرن نال ای تہانوں حقیقی خوشی حاصل ہو سکدی اے۔