”یاداں جُنید اکرم دِیاں” دے سرناویں ہیٹھ اِکٹھ

پنجابی یونین دے پربندھ ہیٹھ پچھلے دناں پنجاب ہائوس وچ پنجابی دے سرگرم کارکن منے پرمنے شاعر تے دانشور جنید اکرم دی پہلی برسی دے موقعے تے اوہناں دی پنجابی لئی خدمات اتے اوہناں نوں خراج تحسین پیش کرن لئی ”یاداں جنید اکرم دیاں”دے عنوان نال اک پروقار تقریب دا پربندھ کیتا گیا۔ اوہ بابائے پنجابی ڈاکٹر فقیر محمد دے نواسے ہون دے نال فروغ پنجابی دی اوہناں دی جدوجہد دے جانشین وی سن تے معروف اداکار سہیل احمد عزیزی دے چھوٹے بھرا سن۔ تقریب دی صدارت چیئرمین حفیظ تائب فائونڈیشن عبدالمجید مجید منہاس نے کیتی۔ اُچیچے پروہنیاں وچ الیاس گھمن،سہیل احمد،اتفاق بٹ ،بابا نجمی،اکمل شہزاد گھمن،نورالحسن ،خرم شہزاد تے میاں شکیل شامل سن۔میزبانی پنجابی یونین دے چیئرمین مدثر اقبال بٹ ‘وائس چیئرمین بلال مدثر بٹ نے کیتی۔
تقریب دا باقاعدہ آغاز تلاوت قرآن پاک نال ہویا۔تلاوت حافظ ممتاز ملک نے کیتی ۔نعت سنان دااعزاز اکرم قلندری نے جنید اکرم دی لکھی پنجابی نعت ”ہوائیں مدینے پاک جائیں..میرے آقا نوں دکھ میرا سنائیں” سنا کے حاصل کیتا۔ پنجابی یونین دے چیئرمین مدثر اقبال بٹ نے آکھیا کہ پروفیسر جنید اکرم دی پنجابی دے فروغ لئی کم دی اینیاں جہتاں نیں کہ اوہناں اتے اک نشست وچ گل نہیں ہو سکدی۔ اوہناں لئی کئی نشستاں دی لوڑ اے۔ پنجابی لئی اوہناں دی خدمات ہمیشہ یاد رکھیاں جان گِیاں۔ ایہہ اوہناں دی محبتاں دا اثر اے کہ اج دی تقریب وچ رلت لئی لوک دور دور توں آئے نیں۔ تقریب دے دوران مدثر اقبال بٹ تے حاضرین محفل ڈاکٹر فقیر محمد فقیر تے جنید اکرم دے ذکر اتے بار بار آبدیدہ ہو گئے۔
پنجابی میڈیا گروپ دے صدر ندیم رضا نے آکھیا کہ جنید اکرم دے حوالے نال پنجاب ہائوس وچ اَج دوجی تقریب منعقد کیتی گئی اے۔ پہلی تقریب اک سال پہلاں منعقد کیتی گئی سی۔ ایس دوران پنجاب ہائوس وچ اک سو تقریباں منعقد ہوئیاں نیں۔ پنجاب ہائوس لئی ایہہ اعزاز دی گل اے کہ اینی وڈی تعداد وچ پنجابی دی تقریباں دی میزبانی کیتی اے۔ پنجاب ہائوس مدثر اقبال بٹ دا جنون اے۔ ایہہ اوہناں دا سفنا اے جہڑا اوہناں نے اپنی اکھاں نال شرمندہ تعبیر ہوندے ویکھیا اے۔ ساڈے لئی ایہہ خوشی دی گل اے کہ پنجاب ہائوس دے منصوبے تکمیل دے اخیرلے مرحلے وچ نیں۔ ساڈا سٹوڈیو فنکشنل ہو گیا اے جہڑا پنجابی دے حوالے نال کوئی کم کرنا چاہے’ ریسرچ ورک کرنا چاہے تے اوہنوں سٹوڈیو سنے ساری سہولتاں بلا معاوضہ فراہم کیتیاں جان گئیاں۔ ایتھوں تک کہ پنجابی لئی ریسرچ ورک کرن والیاں دی مالی معاونت وی کیتی جاوے گی۔ ایہہ سارے کم حکومتی اداریاں دے نیں لیکن حکومت کوئی کم نہیں کر رہی۔ پنجاب ہائوس دا ایہہ اعزاز اے کہ اوہ اینا وڈا کم کر رہیا اے۔ ایہہ سب مدثر اقبال بٹ دی لگن’ محنت تے وڈے پن دا نتیجہ اے۔ اوہناں نے آکھیا کہ مینوں ہمیشہ ایہہ شکایت رہی کہ بابا نجمی دے علاوہ کسے پنجابی دے شاعر نے اوہ آسان لفظ استعمال نہیں کیتے جہڑے ساڈی نویں نسل دی سمجھ وچ آ سکن لیکن جدوں جنید اکرم نوں پڑھیا تے پتہ چلیا کہ اوہناں نے ایہہ کمی پوری کردتی اے۔ عنایت عابد نے جنید اکرم دی ای لکھی حمد ”سب توں سوہنا میرا اللہ’ ذات اپنی وچ کلم کلا ”سنا کے حاضرین کولوں خوب داد وصولی۔ پنجابی دے ناول نگار تے کہانی نویس زاہد حسن نے آکھیا کہ جنید اکرم کمال دے بندے سن جہناں نوں اپنی بیماری دی سنگینی دے بارے وچ بہت پہلے توں پتہ سی لیکن ایہدے باوجود اوہناں نے اینا کم کیتا جہدی مثال نہیں ملدی۔ جنید اکرم دی ای وجہ نال پنجابی ادب بورڈ وچ پنجابی دے اک سو توں ودھ شاعراں دا کلام اکٹھا ہویا۔ اوہناں نے جس طرح بابائے پنجابی فقیر محمد فقیر دے کم دی تنظیم نو کیتی ہن کوئی وی ریسرچ کرنا چاہے تے اوہنوں اوہناں دی شروع دی تحریراں مل جان گئیاں۔ سہیل احمد وی پنجابی لئی بہت کم کر رہے نیں۔
اشرف سہیل نے جنید اکرم دی زندگی دے مختلف پہلواں اتے چانن پاندے ہوئے آکھیا کہ اوہناں نے ماہنامہ پکھیرو دی اشاعت نوں جاری رکھن وچ میری بڑی مالی معاونت کیتی جہدا اوہ ذکر تک وی نہیں کردے سن اوہ بہت محبت کرن والی شخصیت دے مالک سن۔ میری بیماری وچ وی اوہناں نے خود بیمار ہوندے ہوئے بڑی تیمارداری تے مالی معاونت کیتی۔ شریف انجم نے آکھیا کہ میری اوہناں نال پہلی ملاقات 2000وچ ہوئی سی۔ ایہہ ملاقات اجیہے گہرے تعلق وچ بدلی جہڑی اوہناں دی زندگی دے آخری لمحے تک قائم رہیا۔
ویر سپاہی نے آکھیا کہ جنید اکرم گو ایس دنیا توں رخصت ہو گئے نیں لیکن وہ اج وی ساڈے وچ موجود نیں۔ اوہناں نے آکھیا کہ ایہہ مدثر اقبال بٹ دا کمال اے کہ اوہ پنجابی لکھن والیاں دی حوصلہ افزائی وچ کوئی کمی نہیں چھڈدے۔ ایس موقع تے اوہناں نے جنید اکرم اتے لکھی ہوئی نظم وی سنائی۔
ستارہ امتیاز ایم آر شاہد نے آکھیا کہ جنید اکرم بہت محبت کرن والے سن۔ میں بیمار ہویا تے میری عیادت لئی گھر آئے تے میں اوہناں نوںبڑی محبت دے نال سیون اپ دی بوتل پین لئی دتی تے اوہناں نے دسیا کہ ڈاکٹر نے منع کیتا اے لیکن میرے ول ویکھیا تے آکھیا میں تہاڈی چاہت ویکھنی اے تے بول پی لیتی۔
پنجابی دے منے پرنے شاعر بابا نجمی نے آکھیا کہ جنید اکرم تے سہیل احمد بہت خوش نصیب نیں۔ جہڑے گھر وچ ایہناں دی پرورش ہوئی اوس گھر فقیر محمد فقیر بوڑھ دے درخت وانگوں موجود سن جہدے سائے وچ اوہناں دی پرورش ہوئی۔ اوہناں نے آکھیا کہ ایہہ مدثر بٹ دی محبت اے کہ پنجابی دے لکھاری جہناں نوں کوئی شائع کرن لئی تیار نہیں ہوندا۔ اوہناں دا پورا پورا صفحہ شائع کر دیندے نیں۔ ایس موقع تے اوہناں نے اپنی نظم ”مینوں وی توں اک واری کرادیدار مدینے دا’ میرے آیاں ہونئیں جانا جا تنگ بازار مدینے دا” پرٹھی۔
اکمل شہزاد گھمن نے آکھیا کہ جنید اکرم انتہائی زندہ دل تے محبت کرن والے سن۔ میری اوہناں نال پہلی ملاقات 1999وچ ہوئی سی۔ پنجابی دے رہنما الیاس گھمن نے مینوں انگلی پھڑ کے پنجابی وچ اگے ودھنا سکھایا تے جنید اکرم نے سینے نال لا کے اگے ودھایا۔ قیام پاکستان مگروں پنجابی دی گل کرنا انتہائی اوکھا سی۔ لیکن فقیر محمد فقیر نے بڑی دانشمندی نال ایہہ کارنامہ کیتا کہ جہڑے لوک پنجابی دی گل کرنا پسند نہیں کردے سن۔ اوہناں توں ای پنجابی لئی لکھوایا میں باصلاحیت لوکاں دی حوصلہ افزائی کرنا جنید اکرم کولوں ای سکھیا اے۔ میں جدوں اپنی زندگی اتے کتاب لکھاں گا تے جنید اکرم اتے پورا اک چیپٹر لکھاں گا۔
پنجابی تحریک دے رہنما الیاس گھمن نے آکھیا کہ میں جہڑا سفنا ویکھنا واں۔ مدثر اقبال بٹ ایہنوں شرمندہ تعبیر کر کے وکھیا۔ میں 9سال دی عمر توں ای پنجابی دے فروغ دی تحریک وچ شامل ہو گیا سی۔ ایس لئی میں جاننا واں کہ بابائے پنجابی فقیر محمد فقیر دا پنجابی دے فروغ وچ جہڑا کردار اے اوہنوں کدی فراموش نہیں کیتا جا سکدا۔ جدوں مشتاق بٹ نوں ایم اے پنجابی کران دا مطالبہ کرن اتے نظر بند کردتا گیا سی۔ فقیر محمد فقیر نے صاف صاف اعلان کردتا سی کہ میں مال روڈ اتے اوس ویلے تک بیٹھیا رہواں گا جدوں تک مشتاق بٹ دی نظر بندی ختم نہیں کیتی جاندی۔ 1951 وچ اوہناں نے جہڑا اخبار کڈیا اوہ تحریکی پرچہ سی۔ ایہدے وچ اوہناں نے ہر شعبہ نوں اینی مناسب جگہ دتی کہ پنجابی دی تحریک نوں متاوزن کر دتا۔ اوہناں نے آکھیا کہ ہن ایہہ ساڈی ذمہ واری اے کہ جس طرح جنید اکرم نے فقیر محمد فقیر دے مشن نوں اگلی نسل تک منتقل کیتا۔ اسیں وی اوہناں دے کم نوں ایسے جذبے دے نال اگے ودھائیے۔
اداکار تے اینکر نورالحسن نے آکھیا کہ مینوں سہیل بھائی نے جنید اکرم لئی کجھ لکھن لئی آکھیا تے جدوں وی کوشش کیتی تے جنید اکرم دی ذات پچھے رہ گئی تے اتھروواں دی جھڑی اگے آ گئی۔ میں جنید اکرم نوں ہمیشہ بھائی جان آکھیا اے اوہ 12سال تک ہفتے وچ تن واری ڈائیلسز دی تکلیف چکدے سن جدوں مینوں مدینے جان دا موقع ملیا تے اوہناں نے آکھیا کہ آقاۖ دے پیری بیٹھ کے میرے لئی آکھنا کہ میں تھک گیا واں میرے لئی کیہ حکم اے۔ جدوں میں اپنے والد دی قبر بنان والے تے اوہدی دیکھ بھال کرن والے گورکن نوں گھر لے کے آیاتے جنید بھائی دے پیری بیٹھ کے دسیا کہ ایہہ اوہ نیں جہناں نے میرے والد دی قبر بنائی سی تے فوری آکھن لگے کہ میری قبر وی آپ ای بنانا تے انج ای بنانا ۔ میں ٹوکیا تے بڑے پیار نال اپنی گل جاری رکھی تے حیرت دی گل مگروں سب کجھ ایسا ای ہویا۔ آخری ویلے اوہناں دی اکھاں بند سن تے جھولے لعل دے نعرے لا رہے سن۔ زندگی بھر ایہہ نعرہ لایا سی غور کیتا تے پتہ چلیا کہ اوہ دن لعل شہباز قلندر دے عرس دا دن سی۔ میرے لئی فخر دی گل اے کہ میں جنید اکرم دے گوڈیاںنال گھوڈے جوڑ کے بیٹھدا رہیا واں۔ اوہ بہت وڈے سن۔ اوہناں نے کم وی وڈیاں جئے ای کیتے نیں۔
صاحب صدر مجید منہاس نے اپنے خطاب دی شروعات ایس شعر توں کیتی۔” ایہہ تے سوچیا وی نہیں سی کہ اوہ مر جاوے گا۔ چن اک قبر دے پہلو وچ اتر جاوے گا” اوہناں نے آکھیا کہ جنید دی شاعری اتے فقیر محمد فقیر دی فکر دا گہرا رنگ اے۔ جنید اکرم دے بارے وچ بہت کجھ آکھیا جا سکدا اے۔ ایس موقع تے اوہناں نے جاوید اکرم دی لکھی نظم سنائی جہدے اتے حاضرین محفل آبدیدہ ہو گئے۔
معروف اداکار سہیل احمد نے آکھیا کہ مینوں لہور آئے تے اداکاری کردے ہوئے 42 سال ہو گئے نیں۔ مینوں بابیاں نال بیٹھن دا بہت شوق اے۔ میں طفیل نیازی’ مہندی حسن تے سلامت علی دے کول بیٹھن دا وی موقع پایا ۔ بابے بہت وڈے ہوندے نیں۔ میں کدی کسے بابے نوں کسے دی برائی کردے نہیں سنیا۔ میں سلامت علی جہڑے سنگیت دی کائنات نیں نوں گود وچ وی چکیا اے۔ ایہہ موقع مینوں جنگ دے اک پروگرام وچ ملیا سی۔ قوی خان میرے بہت گہرے دوست نیں۔ میں اکثر اوہناں کولوں پیسے لیندا رہیا واں اوہ جدوں آندے تے اپنی ادھی جیب میری جیب وچ پا دیندے سن تے میری ذمہ واری لاندے سن کہ فلاں فلاں نوں پہنچا دیاں۔ میں اپنے کم دی تعریف نہیں کردا میرے کم نوں بہتر اللہ بناندا اے۔ میرا کوئی شاگرد نہیں اے بلکہ میں ساریاں کولوں سکھنا واں۔ ایس موقع تے اوہناں نے اپنے نِکے بھرا جنید اکرم دے حوالے نال اپنی تحریر پڑھی تے سارے ای آبدیدہ ہو گئے۔