اراکاناں دی لئی ویچی ذریعے حکومت ڈیگن داسلسلہ بند ہوناچاہیدا اے:سپریم کورٹ

اسلام آباد(پنجابی میڈیاگروپ)آرٹیکل63اے دی تشریح بارے صدارتی ریفرنس دی سماعت دے دوران جسٹس اعجاز الاحسن نے ریمارکس دِتے کہ روایت بن گئی اے کہ پیسیاں نال حکومت ڈیگی جاندی اے۔کجھ لوکاں دی خرید و فروخت نال22کروڑ عوام دا مستقبل دا اُتے ہُندااے۔اراکاناں دی خرید و فروخت ذریعے حکومت ڈیگن دا سلسلہ بند ہونا چاہیدا اے۔چیف جسٹس عمرعطا بندیال دی سربراہی وچ5رُکنی لارجر بینچ نے آرٹیکل63اے دی تشریح بارے صدارتی ریفرنس دی سماعت کیتی۔تحریک انصاف دے وکیل بابر اعوان نے دلائل دِتے کہ یوٹیلیٹی بلز ادا نہ کرن والا وی رُکنیت دااہل نہیں ہُندا۔مدت دا تعین نہ ہوئے تے نااہلی تاحیات ہوئے گی۔ایس اُتے جسٹس جمال مندوخیل نے استفسار کہ کوئی امیدوار آئندہ الیکشن توں پہلاں بل ادا کردیوے تے کیا او فیر وی نااہل ہوئے گا۔جسٹس اعجاز الاحسن نے آکھیا کہ بل ادا کرن توں بعد نااہلی ختم ہوجائے گی۔آرٹیکل62ون ایف دے تحت ہی نااہلی تاحیات اے۔جدوں تک نااہلی دا ڈکلیریشن عدالت ختم نہ کرے نااہلی برقرار رہے گی لیکن یوٹیلیٹی بلاں دی عدم ادائیگی اُتے نااہلی تاحیات نہیں ہوسکدی۔اسیں تہاڈا نقطہ نوٹ کرلیا اے۔تُسی کہہ رہے او کہ نااہلی دی میعاد نہ ہون اُتے تاحیات نااہلی ہوئے گی۔تُسی چاہیندے او کہ آرٹیکل63اے نوں اینہا سخت بنایا جائے کہ کوئی انحراف نہ کرسکے؟جسٹس جمال مندوخیل نے آکھیا کہ قنون وچ جرم دیاں مختلف سزاواں دِتیاں گئیاں نیں۔کیا عدالت سزا وچ اک دن دا وی ودھا کرسکدی اے؟آرٹیکل63اے منحرف ارکاناں دے خلاف کارروائی دا فورم مہیا کردا اے۔عدالت نے سماعت کل12وجے تک ملتوی کردِتی۔