عمران خان دی خارجہ پالیسی

پاکستان تحریک انصاف دی اک ایم پی اے نے پنجاب اسمبلی وچ ہنگامہ ارائی تے مارکٹائی دے واقعے مگروں فون کیتا تے غصیلے لہجے وچ بولی’ ایس ملک چو ںاخلاقیات تے انصاف دا جنازہ اٹھ گیا اے۔ ساڈے نال بڑی زیادتی ہوئی اے تے میں بیرون ملک زیرتعلیم اپنے بچیاں نوں کہیا اے کہ ایہ ملک ہن رہن دے قابل نہیں رہیا۔ تسیں پڑھائی دے بعد اوتھے سیٹل ہو جانا۔ میں جواباً کہیا’ تسیں امریکہ وچ زیرتعلیم اپنے بچیاں نوں ایس ملک وچ مستقل رہائش رکھن دا مشورہ دے رہیاں جے جنہے تہاڈے تے تہاڈے لیڈر عمران خان دے بقول اوہناں دی حکومت نوں ختم کرن دی سازش کیتی۔ اک پاسے تسیں امریکہ سیٹل کرکے اپنے بچیاں دا مستقبل محفوظ بنا رہیاں جے دوجے پاسے تہاڈا سب دا موقف ایہ وے کہ سانوں امریکہ تے مغرب دی غلامی قبول نہیں۔ اجہی غلامی توں موت چنگی اے۔ پاکستان توں ہر ورھے ہزاراں بچے بچیاں امریکہ تے دوجے مغربی ملکاں وچ اعلیٰ تعلیم لئی جاندے نیں جتھے بعد وچ پڑھائی چنگی جابز اوہناں دی منتظر ہوندی اے۔ آئی ٹی ایکسپرٹ تے ڈاکٹرز سینکڑوں دی گنتی وچ ہر ورھے H-1 تے میچنگ وغیرہ دے راہیں اوہناں دے سسٹم وچ داخل ہوندے نیں۔ اوورسیز پاکستانیاں دے بیوی بچے تے رشتے دار وڈی گنتی وچ امیگرنٹ ویزیاں تے امریکہ’ برطانیہ وغیرہ جاندے نیں تے ایہناں ملکاں توں کدی آ واز نہیں اٹھی کہ ایہ ساڈے وسیلیاں تے قابض ہو رہے نیں۔
سابق وزیراعظم عمران خان دے دوویں پتر وی اپنی برطانوی ماں دے کول برطانیہ وچ رہندے نیں تے اعلیٰ تعلیم حاصل کر رہے نیں۔ اوورسیز پاکستانی جہڑے بڑی محنت نال بیرون ملک کم کردے نیں تے اوتھوں دے سسٹم دیاں ساریاں سہولتاں توں فیض یاب ہوندے نیں اوہناں نوں چاہیدا اے کہ پاکستان دے سیاسی لیڈراں دی اقتدار دی لڑائی وچ حصہ دار نہ بنن سگوں اوہناں ملکاں جتھے اوہ رہندے نیں دی مقامی سیاست تے سماجی سرگرمیاں وچ فعال ہون ایس طرح اوہ نہ صرف اپنی کمیونٹی سگوں اپنے آبائی وطن دی وی بہتر انداز نال خدمت کر سکدے نیں۔ امریکہ تے دوجے مغربی ملکاں وچ دنیا بھر توں آئے تارکین وطن اپنا نیشنل ڈے اکٹھے ہو کے دھڑلے نال مناندے نیں جد کہ اوورسیز پاکستانی سیاسی تفریق دا شکار ہو کے اک دوجے نال لڑدے نظر آندے نیں۔ لندن وچ اکثر مخالف سیاسی جماعتاں دے کارکن اک دوجے دے گھراں دے سامنے تماشا تے دنگا فساد کر رہے ہوندے نیں تے بیرون ملک جگ ہنسائی دا کارن بن دے نیں۔ اجہے کماں لئی برٹش گورنمنٹ نے ہائیڈ پارک وچ تھاں مخصوص کیتی ہوئی اے جتھے کوئی وی بندہ کھل کے آزادی رائے دا اظہار کر سکدا اے۔ پاکستان دیاں ساریاں سیاسی جماعتاں نوں چاہیدا اے کہ بیرون ملک رہندے پاکستانیاں نوں اپنے مقصد لئی استعمال نہ کرن سگوں اوہناں توں ملک لئی لابنگ دا کم لین تے ساڈیاں حکومتاں نوں وی چاہیدا اے کہ اپنی خارجہ پالیسی ذاتی پسند ناپسند دی تھاں حقیقت پسندانہ خطوط تے تشکیل دین۔
پاکستان تحریک انصاف دی حکومت دے ساڑھے تن سالہ دور دی خارجہ پالیسی دا جائزہ لیا جاوے تے کجھ زیادہ مثبت کارکردگی نظر نہیں آندی۔ وزیرخارجہ شاہ محمود قریشی جہناں دی وزیراعلیٰ پنجاب بنن دی ڈاڈھی خواہش سی وزیر خارجہ بن کے ملتان دی سیاست توں باہر نکل ای نہیں سکے۔ مخدوم صاحب دیاں صلاحیتاں تے کارکردگی چنگی انگریزی تے اعلیٰ کپڑیاں تک محدود رہی تے عالمی سفارتکاری وچ اوہناں دا کردار نہ ہون دے برابر سی۔ اپنے دور حکومت دی ابتدا وچ وزیراعظم عمران خان نے اوس ویلے دے امریکی صدر ڈونلڈ ٹرمپ نال اوہناں دے جوائی دے راہیں چنگے تعلقات قائم کیتے پر ڈیموکریٹک جماعت دے برسراقتدار آن دے بعد دوہاں ملکاں دے تعلقات سردمہری دا شکار ہو گئے جہدی وجوہات وچ واشنگٹن وچ موثر لابنگ دا نہ ہونا تے حکومت پاکستان دی افغان پالیسی وغیرہ شامل ہو سکدی اے۔ سابق وزیراعظم ولوں واشنگٹن توں آئے خفیہ مراسلے نوں اوپن کرنا وی دنیا بھر دے سفارتی حلقیاں وچ تضحیک دا کارن بنیا تے بیرونی دنیا خاص کر مغربی ملکاں وچ پاکستان دا امیج خراب ہویا۔ عمران خان دے دور حکومت وچ سفارتی ناپکیائی دا وکھالا اوس ویلے ویکھن نوں ملیا جدوں وزیراعظم نے دوست تے محسن ملک سعودی عرب نوں او آئی سی دے متبادل اسلامک بلاک بنان لئی ملائیشیا تے ترکی دی حمایت دا اعلان کرکے رِنج کیتا۔ ساڈا دوست ملک چین وی سی پیک وچ پاکستان دی عدم دلچسپی تے کجھ وزیراں دے بیاناں پاروں ساڈے نال رنج رہیا پر ساڈی دفاعی لوڑ پوری کرن وچ چین نے ہر ممکن تعاون کیتا۔ پاکستان نوں سفارتی دنیا وچ اکلا کرن دا آخری اقدام روس دے یوکرین تے حملہ آور ہون دے دوران وزیراعظم عمران خان دا دورہ ماسکو سی جہدی بعد وچ اوہناں نے ایہ توجیہہ پیش کیتی کہ ایہ دورہ سستے تیل’ گیس تے کنک دے حصول لئی سی۔٭٭