عالمی پنجابی کانفرنس دا آخری دیہاڑ

سید ذیشان گیلانی، علی عمران چٹھہ
فوٹواں: وقار بابری

عالمی پنجابی کانفرنس دے آخری دیہاڑ بھارتی پنجابیاں نے اظہار تشکر کردیاں ہورا آکھیاکہ پاکستان نے بھارتی شرکاء نوں ویزے جاری کر کے دوستی دا دیپ جلایا۔دوستی تے بھائی چارے نوں فروغ دینا چاہندے نیں پر معاشرے دے کجھ شدت پسند تے حکومتاں ایس راہ وچ رکاوٹ نیں۔تن روزہ33ویں انٹرنیشنل پنجابی کانگریس دے زیر اہتمام سکھ مذہب دے بانی بابا گورونانک دیو جی مہاراج دے 550ویں جنم دن دے حوالے نال پنجابی زبان دے فروغ ، تہذیب، ثقافت تے باہمی میل جول دے موضوعات تے ہون والی کانفرنس اختتام پذیر ہو گئی۔ اختتامی دیہاڑ کانفرنس دے وکھو وکھ موضوعات تے 2سیشن ہوئے جد کہ آخر وچ معروف پاکستانی ادیب تے سابق ڈائریکٹر جنرل پلاک صغرا صدف نے کیتی جہدے وچ ہندوستان تے پاکستان دے شعراء نے دوستی تے محبت تے اپنا کلام پیش کیتا۔ پہلے سیشن دی صدارت ہندوستان دے ممتاز شاعر و ادیب گربھجن سنگھ نے کیتی جد کہ دوجے سیشن دی صدارت انٹرنیشنل پنجابی کانگریس دے سربراہ ممتاز ادیب دانشور تے سابق وفاقی وزیر فخر زمان نے کیتی تے شرکاء دے وچ دوجے سیشن دے دوران اپنے ہتھیں گولڈ میڈل دتے۔ تقریب نال خطاب کردیاں فخر زمان آکھیا مختلف ممالک پنجابیاں ولوں اوہناں نوں کانفرنس منعقد کروان دی پیشکش سی پر اوہناں دی خواہش اے بھارت دے دوست ایہدی میزبان دے فرائض سرانجام دین پر ایہدے لئی ضروری اے کہ بھارتی سرکار اپنی ویزہ پالیسی تے نظرثانی کردیاں ہوئیاں ادیباں، شاعراں تے دانشوراں لئی ویزہ جاری کرے۔ اوہناں آکھیا پاکستان حکومت نے 40بھارتی شرکاء نوں ویزے جاری کرکے دوستی دا دیپ بالیا اے حالات نارمل کرن لئی بھارتی سرکار وی انج ای کرکے بھارت نے تعاون نہ کیتا تے فیر اگلی کانفرنس شاید پاکستان وچ ای منعقد کروانی پوے۔ پہلے سیشن وچ بھارتی ادیب سردار گربھجن سنگھ آکھیا دوواں ملکاں دے عوام آپسی ملن ، دوستی تے بھائی چارے نوں فروغ دینا چاہندے نیں پر معاشرے دے کجھ شدت پسند تے حکومتاں ایس راہ وچ رکاوٹ نیں۔ اوہناں آکھیا عالمی طاقتاں نوں سمجھنا چاہیدا اے کہ جنی یورپ وچ امن دی لوڑ اے ساڈے خطہ ساؤتھ ایشیا وچ وی امن اوناں ای ضروری اے۔ اوہناں آکھیا میرے اہل خانہ نے ناول توں ہجرت کرکے تقسیم ہند دے مظالم ویکھے۔ میں 7دن تک برسات دن رات راوی کنڈے کٹے، خون خرابہ ویکھیا ایسے طرح اوتھوں آن والے مسلماناں نے وی قتل و غارت گری اپنی اکھاں نال ویکھی تے نا چاہندیاں ہوئیاں وی دوواں ملکاں دے پنجابیاں وچکار تلخیاں ودھ گئیاں ہن ویلا آ گیا اے کہ دوواں ماضی نوں فراموش کرن تے چنگے گوانڈھی بن کے باہمی میل جول ودھایئے۔ سردار گربھجن سنگھ آکھیا عوام دا فیصلہ دوستی اے دیر یا جلدی حاکماں نوں مننا پوے گا ہندوستان توں آئے ہوئے صحافی سوشیل دوسانجھ (Soushil Dosanth)نے ہندوستان وچ پنجابی جرنلزم دے حوالے نال گل کردیاں آکھیا دوواں پاسے دے جرنلسٹ نوں اکو جہی مشکلات دا ساہمنا اے۔ اوہناں آکھیا بھارتی پنجاب وچ پریت لڑی گرو بخش سنگھ دی ادارت وچ شائع ہون والا پنجابی رسالہ سی جہنوں بہت شہرت ملی۔ بعدوں امریتا پریتم دی ادارت وچ چھپن والا ناگ منی وی مشہور ہویا۔ فیر آر سی دے مدیر بابا پریتم سنگھ نے لوکاں وچ تھاں بنائی جد کہ اج کل پنجابی میگزین ھن (Hun) عوام وچ بہت مقبول اے۔ ایس رسالے نے شاعری وچ نظم، غزل کہانی دے نال نال صوفیاء دی فلاسفی نوں وی اپنے ورقیاں دی زینت بنایا۔ اوہناں آکھیا میرے نزدیک صحافت عوامی مسئلیاں دی نشاندہی ایہدا حل سچ عوامی مفاد وچ ہونا چاہیدا اے۔ دوواں پنجاب دے عوام اک دوجے نال تعلقات ودھانا چاہندے نیں۔ ساڈی تہذیب، ثقافت ، رہن سہن، بولی اک اے۔ حکومتاں نوں عوامی مفاد وچ فیصلے کرنے چاہیدے نیں۔ دوواں پنجاب دے صحافیاں دے اک دوجے نال روابط وچ سانوں آزادانہ طور تے اک دوجے نال ملن نال عوامی مسئلے اجاگر کرن وچ آزادی ہونی چاہیدی اے۔ تقریب نال خطاب کردیاں ہندوستانی صحافی بلجیت بلّی آکھیا اوہ کئی واری پاکستان آ چکے نیں اوہناں دے والدین تے سسرال پاکستان پنجاب دے رہائشی سن۔ ایس لئی اوہناں نوں ایس دھرتی تے ایہدے لوکاں نال خاص لگاؤ اے۔ بلجیت بلّی آکھیا پاکستان دی طرح بھارت وچ وی سیاستدان تے سرمایہ دار صحافت نوں کنٹرول کرن دی کوششاں وچ مگن نیں پر فیر وی سانوں اوہناں دے مذموم مقاصد لئی استعمال ہو کے نفرت دا پرچار نہیں کرنا چاہیدا۔ اوہناں آکھیا پنجابی زبان وچ روزمرہ استعمال ہون والے انگریزی الفاظ نوں شامل کر لینا چاہیدا اے تاں جے آن والی نسلاں نوں پنجابی ول راغب کیتا جا سکے۔ سکھویندر سنگھ نے برصغیر پاک و ہند دی عصر حاضر شاعری تے مقالہ پیش کردیاں آکھیا شاعری ذہنی سکون لئی ہونی چاہیدی اے ایہدے وچ محبت تے امن دے نغمے ہونے چاہیدے نیں۔ ایہدے نال نفرت تے افراتفری دا تاثر ایہدی توہین اے۔ صوفیاں دا پیغام محبت اے ہر شاعر تے مداح دا اپنا مزاج ہوندا اے۔ پروفیسر پورن سنگھ پنجابی زبان دا ماڈرن شاعر اے۔ امریتا پریتم، وارث شاہ، بابا نجمی، شیو بٹالوی، بابا فرید زیادہ پڑھے جا رہے نیں۔ آزادی دی تحریک وچ پنجابی شاعر ڈاکٹر جتاب دی شاعری توں وی لوکاں نوں شعور ملیا۔ بھارتی ادیب روہیل سنگھ بھنڈر آکھیا لوک ورثہ پنجابی ادب وچ لوکاں دی خوشی غمی دا تذکرہ ہوندا اے۔ پنجاب دے لوک گیت، لوریاں، کوڈیاں، بولیاں عوامی نیں جہناں دی دنیا وچ کدھرے مثال نہیں ملدی۔ پاکستان دے مشہور ادیب نقاد تے شاعر احمد سلیم نے کلاسیکی پنجابی ادب دی مزاحمتی رِیت تے مقالہ وی پڑھیا۔بعدوں بھارتی شاعر ارکیش سنگھ سدھو نے پنجابی عوامی دی دوستی تے اپنا کلام پیش کیتا۔

اپنا تبصرہ گھلو