دل دا سکو ن

عتیق انور راجا

اج دے جدید دور وچ نویں نویں ایجاداں ہر دن ہو رہیاں نیں جہڑی انسان نوں بہت ساری سہولتاں پہنچا رہیاں نیں۔ ایہناں سہولتاں دے میسر آن نال بظاہر انسان نوں زندگی دے امور وچ بہت ساری آسانیاں ملنی شروع ہو گئیاں نیں۔ انسان اپنے لائف سٹائل نوں بہت انجوائے وی کر رہیا اے مگر ایہناں ساری سہولتاں نے انسان دے اندر نفسا نفسی تے بے سکونی وی پیدا کردتی اے یا انج آکھنا چاہیدا اے کہ ایہناں سہولتاں نوں انجوائے کردے ہوئے انسان دا دل و دماغ پہلے توں وی بوہتا پریشان ہو گیا اے۔ ہر کوئی اگے ودھن لئی دوڑ رہیا اے جہڑا ویلا اللہ تعالیٰ نے آرام کرن لئی بنایا اے اوہدے وچ وی کم۔ انسان بہتر زندگی گزارن لئی بس ہر ویلے اپنے آپ نوں مصروف رکھے ہوئے اے۔ سکون قلب کیویں ملدا اے ایہدے لئی قرآن پاک وچ اللہ پاک نے فرمایا اے کہ اوہ لوک جہڑے ایمان لیائے اللہ دے ذکر نال اوہناں دے دلاں نوں سکون تے اطمینان ملدا اے۔ اللہ پاک ارشاد فرماندا اے کہ جہڑا شخص نیک کم کرے گا خواہ اوہ زنانی ہووے یا مرد بشرطیکہ صاحب ایمان ہووے تے اسیں اوہنوں پرلطف زندگی دیاں گے تے اوہناں دے چنگے کماں دے عوض اوہناں دا اجر وی دیاں گے۔ انسان نے اپنے رب نوں چھڈیا’ اوہدے احکاماں توں منہ موڑیا تے اج دنیا پریسانیاں دی آماجگاہ بن گئی اے۔ کسی نوں دلی سکون تے قرار نصیب نہیں ہوندا’ انساناں دی اکثریت ہر ویلے ایہو سوچدی رہندی اے کہ دوجے لوکاں نے کہنی معاشی ترقی کر لیتی اے۔ کہنا مال و دولت جمع کر لیتا اے تے اوہناں دی زندگیاں وچ کہنی آسائشاں نیں’ ایہہ سب ویکھن مگروں انسان ہر جائز تے ناجائز ذریعے توں خود نوں وی اوسے مقام تک لے جان لئی تے چھیتی ترقی لئی ہر رستہ اناندا اے جہڑا تھوڑا سکون اوہدی زندگی وچ پہلے توں موجود ہوندا اے’ دوجیاں دی ویکھا ویکھی اپنا اوہ سکون وی لٹا دیندا اے۔ اج انسان دی پریشانی دا معیار وی بدلیا بدلیا جیا لگدا اے۔ اج دے انسان نوں بہت ساری سہولتاں صرف ایس لئی گھٹ لگدیاں نیں کہ ہائے دوجے لوک کہنی ترقی کر گئے نیں۔ ایہہ ویکھ کے انسان کولوں صبر نہیں ہو رہیا اے۔ اوہ کسی وی طرح کوئی وی رستہ اختیار کر کے چھیتی چھیتی بس امیر ہونا چاہندا اے حالانکہ انسانی تریخ وچ ایسا کدی وی نہیں ہویاکہ دنیا وچ وسن والے سارے لوک امیر ہو جان یا سارے لوک غریب ہون۔ ایہہ سب خالق کائنات دی حکمتاں نیں تے اوہی خوب جاندا ے کہ ایس دنیاوی نظام نوں کس طرح بہتر انداز وچ چلانا اے۔ ایس دنیا وچ طرح طرح دے مسئلے نیں جہناںنے انساناں نوں اپنے شکنجے وچ کسیا ہویا اے۔ کدھرے اچانک اگ لگ جاندی اے تے لوکاں دا سب کجھ سڑ جاندا اے’ کدھرے کسی اتے کوئی طاقتور دشمن حملہ آور ہو جاندا اے تے اوہنوں اپنی جان بچانی اوکھی ہو جاندی اے۔ کدھرے سڑک اتے چلدے چلدے اچانک کوئی ایسا حادثہ ہو جاندا اے کہ شادوشاداب خاندان اچانک اجڑ جاندے نیں۔ کوئی ویاہ کر کے خانماں برباد اے تے کوئی چنگا رشتہ نہ ملن دی وجہ نال پریشان حال اے۔ کسی نوں اللہ پاک نے اولاد دی نعمت نال ای نہیں نوازیا تے کوئی نافرمان تے نالائق اولاد دی وجہ نال پریشان اے۔ الغرض اج ہر پاسے زندگی عذاب جئی لگدی اے۔ ایہہ سب ساڈے اپنے کرتوتاں دی سزا اے جہڑی اسیںایس دنیا وچ جھیل رہے آں۔ دنیا دے رنج و الم توں نجات دا واحد علاج ایہو اے کہ انسان اپنے رب نوں راضی کرن دی کوشش کردا رہوے تے اوہدی رضا اتے راضی رہوے’ ترقی دی کوشش ضرور کرنی چاہیدی اے مگر ایہدے لئی اپنے اج دے آرام و سکون نوں تباہ نہیں کر دینا چاہیدا۔ ہر ویلے اپنے رب اتے پورا یقین کرن نال ای انسان دنیا وچ وی ترقی کر سکدا اے تے اوہدی آخرت وی سنور سکدی اے۔ دنیاوی زندگی گزارن لئی جہڑے طریقے ساڈے نبی پاکۖنے سانوں دسے نیں اوہناں اتے چلن دی کوشش نال ای ساڈی زندگیاں وچ آرام تے سکون آ سکدا اے۔ اج انسانی زندگی وچ سکون لیان لئی سانوں حقوق اللہ دے نال نال حقوق العباد دا وی خصوصی خیال کرنا اے۔ اللہ دے ذکر نال بیشک دلاں نوں اطمینان تے سکون ملدا اے تے اللہ دی مخلوق نال بہتر سلوک نال جتھے اللہ پاک خوش ہوندا اے اوتھے ساڈے آس پاس رہن والے لوک وی ساڈے توں خوش ہوندے نیں۔ انج جے اسیں سارے اک دوجے دا خیال کرن لگیے تے اک صحت مند تے بہتر معاشرہ وجود وچ آجاوے گا جتھے سب نوں بہتر سہولتاں تے ترقی دے بہتر موقعے ملن گے۔ جے اسیں جائز انداز وچ ترقی کرن دی کوشش کرنے آں تے لازمی طور تے اسیں خود وی حلال کھاواں گے تے اپنے بالاں نوں وی حلال کھواواں گے۔ ایس توں ایہہ ہووے گا کہ تھوڑے رزق اتے وی راضی رہواں گے۔ دوجے لوکاں دے بہتر لائف سٹائل نوں ویکھ کے پریشان ہونا چھڈ دین نال انسان دے اندر فضول خواہشاں ختم ہونا شروع ہو جاندیاں نیں۔ انسان اپنے نصیب اتے راضی رہن لگدا اے۔ ایس توں وی یقینی طور تے دلاں نوں سکون ملدا اے۔ حدیث شریف وچ آندا اے کہ دنیاوی معاملیاں وچ اپنے توں تھلے والیاں نوں ویکھو تے دینی معاملیاں وچ اپنے توں اتے والیاں اتے نظر رکھو۔ اج ساڈی زندگیاں وچوں سچ ختم ہوندا جا رہیا اے تے جھوٹ دا بول بالا اے۔ جے اسیں اپنی زندگیاں وچ بہتری لیانا چاہندے نیں تے گھٹ کھانا’ گھٹ بولنا تے گھٹ سونا دے فلسفے اتے عمل کرنا ہووے گا۔ بوہتا کھان نال تے فضول گل بات نال انسان دا دل سخت تے مردہ ہو جاندا اے تے انسان ہر ویلے بے چینی تے بے آرامی محسوس کردا اے۔ دوجے لوکاں نوں ویکھ کے جلن تے حسد توں جے اسیں بچ جایے تے وی ساڈے لئی بہت آسانیاں نیں۔ مختصر ایہہ کہ اج جے اسیں اپنی زندگیاں وچ سکون لیانا اے تے سانوں اپنے مالک و مختار رب اتے پورا یقین ہر ویلے رکھنا اے۔ اپنے طرزعمل نال اپنے آسے پاسے رہن والے لوکاں نوں خوش کرن دی سعی کردے رہنا اے۔ جے اسیں کسی نوں خوشی نہیں دے سکدے تے سانوں کسی دی دل آزاری دا کارن وی نہیں بننا چاہیدا۔ بہتر سلوک دے بوہتے حقدار ساڈے والدین تے قریبی رشتے دار وی نیں تے اوہناں دے علاوہ جہڑے لوک ساڈے آسے پاسے رہندے ہون اوہناں نال وی چنگا برتائو کرن نال ساڈا معاشرہ بہتر توں بہتر ہوندا جاوے گا۔