”پنجابی شاعری تے موسیقی دا سمبندھ” دا مُکھ وکھالی اِکٹھ

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ ڈاکٹر سعادت علی ثاقب دی کتاب ”پنجابی شاعری تے موسیقی دا سمبندھ” دی تقریب رونمائی ہوئی جہدی صدارت استاد بدرالزمان نے کیتی جد کہ استاد حامد علی خان نے بطور مہمان خصوصی رلت کیتی۔ اظہار خیال کرن والیاں وچ پرویز پارس، ڈاکٹر نبیلہ رحمن، فہیم مظہر، شان اختر علی خان تے ڈائریکٹر جنرل پِلاک ڈاکٹر صغرا صدف شامل سن۔
ڈائریکٹر جنرل پلاک ڈاکٹر صغرا صدف نے آکھیا کہ موسیقی دے بغیر انسان نامکمل اے۔ اوہدے جمالیاتی پہلو دی تکمیل وچ موسیقی اہم کرادر ادا کردی اے۔ اوہناں نے ہور آکھیا کہ ایس کتاب تے ایف ایم ریڈیو پنجاب رنگ اتے اک اُچیچے پروگرام دا پربندھ کیتاجاوے گا۔ ڈاکٹر سعادت علی ثاقب دی کتاب پنجابی زبان’ فن تے ثقافت دا اک انمول ورثہ اے۔
استاد بدرالزمان نے ڈاکٹر سعادت علی ثاقب نوں موسیقی دے موضوع اتے عمدہ کتاب لکھن تے مبارکباد پیش کیتی تے آکھیا کہ لوح و قلم دے موجد اللہ تعالیٰ دی ذات اے۔ اوہنے ایہہ فریضہ انسان نوں سونپیا کہ اوہ علم نوں اگلی نسلاں تک پہنچان لئی قلم تے کتاب دا سہارا لووے کیوں جے جدوں انسان ایس دنیا توں چلا جاندا اے تے اوہدے لفظ کتاب دی صورت وچ زندہ رہندے نیں۔پنجابی زبان دا ایہہ خاصہ اے کہ سراں دے تال میل وچ اوہدا کوئی ثانی نہیں۔
استاد حامد علی خان نے آکھیا کہ کائنات دی ہر شے لے تے سر وچ اے۔ میرا یقین اے کہ ست سر اللہ تعالیٰ ولوں اتارے گئے نیں۔ انساناں نے صرف اوہناں نوں دریافت کیتا اے تے اوہدے ہور اگے سر بنائے۔ موسیقی نال واقفیت رکھن والا انسان ہر کم خوش اسلوبی نال سرانجام دیندا اے۔ دوجیاں دے دکھ درد نوں محسوس کردا اے۔
پرویز پارس نے آکھیا کہ موسیقی دے موضوع اتے بہت گھٹ کتاباں لکھی گئیاں نیں۔ چونکہ ایس فن دا تعلق سراسرسکھن نال اے۔ کتاب کسی حد تک معاون ثابت ہو سکدی اے۔ لیکن استاد دے بغیر موسیقی دے فن وچ مہارت حاصل کرنا ناممکن اے۔ پنجابی زبان وچ موسیقی دے موضوع اتے کتاب لکھنابہت چنگا قدم اے۔ پنجابی زبان موسیقیت نال بھرویںزبان اے۔
ڈاکٹر نبیلہ رحمن نے آکھیاکہ ڈاکٹر سعادت علی ثاقب نے نہایت ای عرق ریزی نال ایس کتاب نوں مرتب کیتا اے۔ موسیقی احساسات دی ترجمانی وچ اہم کرادر ادا کردی اے۔ پنجابی زبان نوں علمی تے تحقیقی زبان ثابت کرن لئی ایہہ کتاب معاون تے مددگار ہووے گی۔
فہیم مظہر نے آکھیا کہ موسیقی کائنات دی پہلی زبان اے۔ جدوں لفظ ایجاد نہیں ہوئے سن تے انسان مختلف قسم دی آوازاں کڈ کے اک دوجے نوں مخاطب کردے سن۔ ساڈے پنجاب دی تہذیب دنیا دی پرانی تہذیباں وچوں اک اے۔ ٹیکسلا یونیورسٹی کسے دور وچ علوم تے فنون دا مرکز سی۔
ڈاکٹر سعادت علی ثاقب نے اپنی کتاب دے حوالے نال گل بات کردے ہوئے آکھیا کہ ایس کتاب وچ لوک گیت’ صوفیانہ شاعری تے جدید شاعری دے حوالے نال موضوعات شامل کیتے گئے نیں۔ شاعری تے موسیقی دا چولی دامن دا ساتھ اے۔ دونویں اک دوجے دے بغیر نامکمل نیں۔ کائنات دی ہر چیز اک نپے تلے انداز وچ چل رہی اے۔ موسیقی وی آوازاں نوں خاص ترتیب نال ادا کرن دا نام اے۔
شان اختر علی خان نے آکھیا کہ ڈاکٹر سعادت علی ثاقب نے فزکس دے اصولاں نوں مدنظر رکھدے ہوئے موسیقی دے موضوع اتے نہایت ای محققانہ انداز وچ کتاب لکھی اے۔ ایس کتاب دا ترجمہ دوجی زباناں وچ وی ہونا چاہیدا اے۔ پروگرام وچ نظامت دے فرائض ڈائریکٹر پروگرام ڈاکٹر خاقان حیدر غازی نے سرانجام دتے۔