قدیم دور دے وکٹ کیپر دے مشورے

جدوں اک واری یقین اٹھ جاندا اے اودوں یقین دا دوبارہ بحال ہونا اوکھا لگدا اے۔ جے اک توں ودھ واری یقین ڈانواں ڈول ہو جاوے تے فیر یقین دا دوبارہ مستحکم ہونا تے امکان توں ای باہر لگدا اے۔ 1947ء توں اج تک اظہار دی آزادی دے دعوے توں میرا یقین متزلزل ہو رہیا اے۔ پچھلے 75 ورھیاں دوران میں پتہ نہیں کنے وزیر اطلاعات ویکھے نیں۔ پتہ نہیں کنی واری اظہار دی آزادی دی یقین دہانی سنی اے۔ حالاں کہ تن چار مارشل لاواںدوران وی اسیں اظہار دی آزادی دے فرمان سنے سن۔ ایہناں وعدیاں تے یقین دہانیاں دے دوران پتہ نہیں کنے ادیب’ شاعر تے صحافی نام نہاد اظہار آزادی دے ڈھائے چڑھ چکے نیں۔ مننا واں کہ میں کسے قسم دی اظہار آزادی دی یقین دہانی تے یقین نہیں رکھدا۔ کجھ لکھدے ہوئے’ لیکچر دوران کجھ کہندے ہوئے ڈر لگدا اے۔ دوچار تہمتاں پچھلے 75 ورھیاں توں گردش وچ نیں۔ لکھدے ہوئے تے بولدے ہوئے ڈر لگدا اے کہ پتہ نہیں کس قسم دی تہمت گلے پے جاوے تے باقی رہندی زندگی ایس تہمت توں جان چھڑان وچ گزر جاوے۔ مثلاً جے تہاڈے تے ملک نال غداری دا الزام لگ جاوے تے فیر تسیں لکھنا پڑھنا بھل جائو گے۔ تہانوں صرف خاص عدالتاں وچ پیشی دیاں تریخاں یاد رہ جاندیاں نیں۔ مت کدی کسے وزیراطلاعات دے جھانسے وچ آئو۔ تہاڈے پر تے ہوندے نیں پر تہانوں پرواز دی اجازت نہیں ہوندی۔ وزیراطلاعات دی لکھ یقین دہانیاں دے باوجود تسیں کدی وی اڑن دی کوشش نہ کرنا۔ تہاڈے تے کفر تے الحاد دا الزام لا کے تہانوں بلاسفیمی دی تہمت وچ دھر لیا جاندا اے۔ جے عدالتاں نے تہانوں سزائے موت دین وچ تاخیر کیتی تے فیر جیل دے اندر عمرقید کٹن والا کوئی رہزن تہانوں جانوں مار دیوے گا۔ تہاڈے تے دس من چرس تے ہیروئن سمگل کرن دا الزام وی لگ سکدا اے۔
بلوچستان دے ہردلعزیز شاعر گل خان نصیر ذوالفقارعلی بھٹو دے دور وچ ہون والیاں ناانصافیاں دا اپنی شاعری وچ کھل کے اظہار کردے سن۔ اوہناں نوں چپ کران لئی انتظامیہ نے گل خان نصیر تے مجھ چوری کرن دا الزام لا کے اوہناں نوں جیل وچ بند کر دتا سی۔ 1965ء دی جنگ دوران سندھ دے ہردلعزیز شاعر شیخ ایاز نوں دھر لیا گیا سی۔ اوہناں تے الزام سی کہ اوہ وائرلیس تے دشمن نوں خفیہ خبراں دیندے سن۔ مینوں ذاتی طور تے پتہ اے کہ شیخ ایاز فیوز بلب دی تھاں نواں بلب نہیں سن لا سکدے۔ اوہ کسے قسم دی ٹیکنالوجی توں غیرمانوس سن۔ پر لان والے کرتا دھرتاواں نے اوہناں تے دشمن ملک نوں خفیہ جانکاری دین دین دا الزام لا کے اوہناں نو ںجیل وچ بند کر دتا سی۔ اصل حقیقت کجھ ہور سی’ جہدے توں کرتا دھرتا ڈاڈھے رنج سن۔ شیخ ایاز جنگ وجدل دے خلاف سن۔ 1965ء دی جنگ دوران اوہناں نے اپنے دوست شاعر نارائن شام دے ناں غزل لکھی سی۔ غزل وچ اوہناں نے اک تھاں لکھیا سی:
یہ میدان جنگ ہے،سامنے نارائن شام ہے، میں اس کو گولی کیسے ماروں، میں اس کو گولی کیسے ماروں
میں ایس قسم دے قصے کہانیاں توں واقف آں۔ ایس لئی ڈرنا واں’ کرکٹ دے فلسفے توں جانوں آں۔ ایہدے تے عمل کرنا واں’ بیٹنگ کرن توں پہلاں پچ دا جائزہ لینا واں۔ غیرمعین’ اکھڑی ہوئی تے گیلی پچ توں میں ڈرنا واں۔ سردست میرے فاسٹ بالر تے اوہناں دے وزیر اطلاعات حالات تے حاوی نظر نہیں آندے۔ بہت کجھ اوہناں دے قابو تے اختیار وچ نہیں۔ ہن اپنے فاسٹ بالر دے بارے لکھیا جا سکدا اے بناں کسے خوف تے خطرے دے۔ موہنجوداڑو دے دور دا وکٹ کیپر ہون دے ناطے میں اپنے آپ نوں سند یافتہ سمجھنا واں کہ فاسٹ بالر نال گل کراں۔ فاسٹ بالر نوں مشورے دیواں۔ میں باوثوق ذریعاں توں تصدیق کیتی اے کہ دور اقتدار دوران فاسٹ بالر دے صلاح کاراں تے مشیراں وچ کوئی وی کرکٹر نہیں سی۔ کرکٹ دی گل نوں چھڈو’ کوئی اک وی فاسٹ بالر دا مشیر کھڈاری نہیں سی۔ اوہناںنے گلی کوچیاں وچ گلی ڈنڈے دا کھیڈ تک نہیں سی کھیڈیا۔ میں تہانوں پہلے وی دس چکیا واں کہ وکٹ کیپر تے فاسٹ بالر اک دوجے نوں سمجھ سکدے نیں۔ اک دوجے نوں سمجھا سکدے نیں۔ اک پتے دی گل دس دیواں تہانوں’ کسے وکٹ کیپر دا فاسٹ بالر نوں سمجھن لئی اک ای دور وچ’ اک ای ٹیم لئی’ اکٹھے کھیڈنا ضروری نہیں۔ اک گھاگ وکٹ کیپر دوجے کسے دور دے فاسٹ بالر نوں ویکھدیاں ای اوہنوں پچھان لیندا اے۔ اوہدے ظاہر تے باطن دا تجزیہ کر لیندا اے۔ میرے گھاگ ہون دی تصدیق ایس گل توں زیادہ ہور کیہ ہو سکدی اے کہ میں موہنجوداڑو دے دور دا وکٹ کیپر رہ چکیا واں۔ ایس توں پہلاں کہ میرے کالم دی گنجائش ختم ہو جاوے تے گیند بائونڈری پار کر جاوے میں اپنے فاسٹ بالر نوں کجھ مشورے دینا چاہنا واں۔
(1) تسیں بذات خود میچاں وچ نیوٹرل’ غیرجانبدار امپائرز دا تقاضا کیتا سی۔ اج تک دنیا بھر وچ کھیڈے جان والے میچاں وچ نیوٹرل امپائر امپائرنگ کردے نیں اوہ جانور نہیں ہوندے۔ تہاڈے وانگوں بندے ہوندے نیں۔ فٹ بال میچاں دے ریفری نیوٹرل ہوندے نیں پر اوہ جانور نہیں ہوندے’ بندے ہوندے نیں۔ بندے دے پتر ہوندے نیں۔ (2) ہر عقیدے دے سیانیاں نے اک ای تلقین کیتی اے کہ بندے نوں گھٹ بولنا چاہیدا اے۔ بے تکا بولن توں گریز کرنا چاہیدا اے۔ کون جانے کدوں تہاڈے منہ چوں کوئی نازیبا گل نکل جاوے تے بن بلائی بلا تہاڈے گلے پے جاوے۔ (3) لوکاں نوں اک ای گل بار بار سنان نال تسیں لوکاں نوں بور کردے او۔ لڈو بھاویں موتی چور دا ہووے’ تسیں روزانہ صبح شام’ رات موتی چور دے لڈو نہیں کھا سکدے یاں کسے نوں نہیں کھلا سکدے۔ (4) اک گل یاد رکھو کہ تہاڈے آل دوالے تماشائی زیادہ تے تہاڈے ہمدرد تے حمایتی گھٹ نیں۔ اوہ لوک ٹھمکے لان تے تقریر دوران وجن والی موسیقی تے نچن آندے نیں۔ ایہ جو تسیں جم غفیر ویکھدے او تے اپنا سر بدلاں توں اچا محسوس کردے او ایہ لوک تہاڈے ووٹر نہیں۔ (5) آخری گل’ اک اوور وچ تسیں چھ بائونسر نہیں مار سکدے’ امپائر تہانوں انج نہیں کرن دیوے گا۔٭٭