کیہ منہاجین تے انصافین دا ملاپ ممکن اے؟

دوستو! اج دے میرے ایس تجزیے وچ علامہ ڈاکٹر طاہر القادری صاحب تے سابق وزیراعظم عمران خان صاحب دے وچکار سیاسی دوری تے ایہدے نقصانات تے بڑی تفصیل نال بحث کیتی گئی اے۔
سابق وزیراعظم عمران خان نے اتحادی پارٹیاں دی حکومت دے خلاف تے چھیتی طور تے انتخابات دے اعلان دے مطالبے دے نال لانگ مارچ کیتا۔ اوہناں دا دعویٰ سی کہ ویہہ لکھ بندے اسلام آباد آن گے تے انتخابات دے انعقاد دی تریخ لے کے ای جاواں گے۔ 25مئی نوں لوک گھراں چوں نکلے اوہناں نوں حکومت ولوں اسلام آباد جان توں سختی نال روکیا۔ 25مئی نوں جو ہویا اوہنوں دہران دی لوڑ نہیں۔ اسلام آباد کنے لوک اپڑے ایہ سوال وی ہن زیادہ اہمیت نہیں رکھدا۔ اہمیت ایس سوال دی اے کہ لوک اسلام آباد اپڑے کیویں؟ ایس توں علاوہ وی سوالات نیں۔ ایہناں وچوں اک ایہہ وی اے کہ عمران خان نے ایس دھرنے توں کیہ کھویا تے کیہ پایا اے۔ میں سمجھنا واں کہ عمران خان طے شدہ منزل تے نہیں اپڑ سکے پر منزل ول اوہناں دی مثبت پیش رفت جاری اے۔ ایہدے تے تفصیل نال گل بات کرنے آں۔ ایس توں پہلاں میں ڈاکٹر طاہرالقادری دے اک پیغام دی گل کرنا واں۔
عمران خان دے لانگ مارچ توں پہلاں ڈاکٹر طاہر القادری نے پاکستان عوامی تحریک تے منہاج القرآن دے کارکن لانگ مارچ توں لاتعلق رہن کیو ںجے عمران خان نے سانحہ ماڈل ٹائون دے حوالے نال اپنے دور اقتدار وچ ساڈی مدد نہیں کیتی۔ میں ڈاکٹر طاہر القادری دا پولیٹیکل سیکرٹری رہیا واں میرے اوہناں دے نال بدستور رابطے نیں اوہناں دی پارٹی دے لیڈر تے کارکن میری عزت کردے نیں جیویں میں اوہناں نوں مکمل احترام دینا واں۔ ڈاکٹر صاحب بڑے مدبر تے مفکر نیں۔ عمران خان حکومت ولوں سانحہ ماڈل ٹائون دے حوالے نال اوہ کجھ نہ کر سکے جہدی توقع پاکستان عوامی تحریک کر رہی سی۔ طاہر القادری صاحب دی رنجگی تے مایوسی اپنی تھاں اوہناں نوں عمران خان دیاں مجبوریاں احساس وی ہووے گا۔ ہن عمران خان دی ذمہ داری بن دی اے کہ اوہ ڈاکٹر طاہرالقادری نال رابطہ کرن۔ مستقبل وچ عمران خان نوں ایس پارٹی دے کارکناں دی شاید لوڑ پوے۔ نہ وی پوے تے فیر وی رابطے ضروری نیں۔ عمران خان اپنے کزن نوں امام دے طور تے من کے اگے لیان۔ اوہناں توں رہنمائی حاصل کرن۔ عوامی تحریک دے عمران خان دے لانگ مارچ لکھاں کارکن شریک ہو سکدے سن پر جس طرح دے حالات بنے تے حکومتی جارحیت سامنے آئی اوہدے پاروں حتمی طور تے کجھ نہیں کہیا جا سکدا کہ عوامی تحریک دے کنے لوک عمران خان دے قافلیاں وچ شامل ہوئے۔ ہن حقیقت ایہہ وے کہ لانگ مارچ لئی صرف تحریک انصاف کمیٹڈ ورکر ای نکل سکے۔ پی ٹی آئی نوں نوجواناں دی یوتھ پارٹی کہیا جاندا اے۔ ایہناں جوان کڑیاں منڈیاں نوں ممی ڈیڈی تے برگر فیملی کہیا جاندا اے۔ عمومی تاثر ایہو اے اجہے لوک سختیاں برداشت نہیں کر سکدے پر عمران خان دی اپنے کارکناں دی تربیت ایس طرح کیتی کہ منظرنامہ اکا بدل گیا۔ عمران خان نے نویں نسل نوں بہترین طریقے نال سیاسی طور تے پالش کیتا اے۔ ساڈے سامنے کجھ مثالاں وی نیں۔ پی ٹی آئی دے کارکناں نوں پولیس توں بری طرح مار پئی اے تے ایس مار نال کارکن کندن بن کے نکلے نیں۔ سب توں ودھ مار گوہر ایوب خان نوں پئی اے اوہ فیلڈ مارشل ایوب خان دے پوتے تے پاکستان دے امیرترین لوکاں وچ اوہناں دا ناں شامل اے۔ گندھارا انڈسٹری دے مالک نیں’ سونے دا چمچ منہ وچ لے کے پیدا ہوئے۔ پولیس نے اوہناں تے تشدد دی انتہا کر دتی پر اوہ جس تھاں کھڑے سن اوتھے ڈٹے رہے۔ حماداظہر’ گورنر پنجاب میاں اظہر دے پُتر نیں وڈے انڈسٹریلیٹ نیں اوہناں تے لہور توں لے کے آخر تک تشدد ہوندا رہیا۔ عثمان ڈار وڈے کاروباری باپ دے پُتر نیں اوہناں نوں وی پولیس گردی دا سامنا کرنا پیا۔ زلفی بخاری نے جس استقامت دا مظاہرہ کیتا اوہ وی قابل دید اے۔ عمران اسماعیل ہراول دستے وچ شامل رہے۔ اجہیاں تہانوں سیکڑوں مثالاں مل جان گئیاں عمران خان تربیت دی وجہ نال پی ٹی آئی دے کارکن ہر مشکل نال نبڑن’ تشدد دا سامنا کرن لئی تیار ہو چکے نیں۔
ایہدے باوجود وی میں فیر زور دیواں گا کہ پی ٹی آئی تے پی اے ٹی نوں اک دوجے دے نیڑے ضرور آنا چاہیدا اے۔ عمران خان نے اپنے لانگ مارچ دے خاتمے تے چھ دن دی ڈیڈلائن دتی سی جے اوہناں دے مطالبے پورے نہیں ہوندے تے چھ دن دے بعد اوہ پہلے توں ودھ تیاری دے نال نکلن گے تے نشان منزل تک اپڑن دی ہر ممکن کوشش کرن گے۔ زیادہ امکان اے کہ ہن عمران خان دے اسلام آباد آن دی نوبت نہیں آوے گی جے آئی تے فیر تشدد برداشت کرن دا حوصلہ رکھن والے کارکن’ مینوں ڈر اے آپ وی تشدد تے نہ اتر آن۔ 26 مارچ دی صبح حکومت نے فوج سد لئی سی عمران خان نے تصادم توں بچن لئی ٹھیک فیصلہ کیتا۔ اگے اگے ویکھو کیہ ہوندا اے۔٭