نواں جندرا پرانی چابی

میرے نال میرا دوست الطاف سی اسیں اک تریجے دوست طارق دے گھر متھے ویلے توں ذرا پہلے اپڑ گئے کیوں جے اوہدے گھر دی چابی الطاف دے کول سی ایس لئی سانوں کسے قسم دی فکر نہیں سی۔ اوہ جندرا کھولن دی کوشش کرن لگا۔ اوہدی نکام کوشش ہن جھنجھلاہٹ وچ بدل چکی سی۔ اوہ کافی دیر توں جندرے دے نال زورازمائی کر رہیا سی۔ یقینا ایہ جندرے دی خرابی اے جہدی وجہ نال ایہ نہیں کھل رہیا۔ اوہنے کہیا طارق نوں وی ایہدے توں علاوہ کوئی جندرا نہیں ملدا۔ ساری کفایت اوہنوں بس جندرے وچ ای کرنی سی۔ ایہدے بعد اوہنے ملکی صنعت نوں کوسنا شروع کر دتا۔ ساڈے صنعتکار صرف چیزاں دیاں شکلاں بناندے نیں تے اوہناں نوں وکھا کے گاہک توں پیسے وصول کردے نیں اوہناں نوں ایہدے نال غرض نہیں کہ گھر اپڑ کے اوہ گاہک دے کم وی آوے گی یاں نہیں۔ اینے وچ ساڈا دوست طارق آ گیا۔ کیہ جندرا نہیں کھل رہیا؟ اوہنے کنجی اپنے ہتھ وچ لیندے ہوئے آکھیا۔ اچھا تسیں غلط چابی لا رہے سو’ اصل وچ اج ای میں جندرا بدل دتا اے پر چابی چھلے وچ پانا بھُل گیا۔ ایہدی چابی دوجی اے۔ ایہدے بعد اوہنے جیب چوں دوجی چابی کڈھی تے اک دم جندرا کھل گیا۔
میں سوچیا انج دا ای کجھ حال موجودہ زمانے وچ مسلماناں دا ہو رہیا اے۔ موجودہ زمانے نے زندگی دے دروازیاں دے جندرے بدل دتے نیں پر اوہناں دا حال ایہہ وے کہ پرانیاں چابیاں دا گچھا لے کے جندریاں دے نال زورازمائی کر رہے نیں تے جدوں پرانیاں چابیاں نال نویں جندرے نہیں کھلدے تے کدی جندرا بنان والے تے کدی سارے ماحول تے خفا ہوندے نیں حالاں کہ صرف غصہ تے نفرت پاروں انج نہیں ہو سکدا کہ پرانیاں چابیاں نال نویں جندرے کھل جان۔ ساڈے کافی سارے قائدین دا ایہ حال اے کہ ہر اک نے اپنے ذوق دے مطابق کجھ اسلام دشمن تے کجھ وطن دشمن لبھ رکھے نیں تے ایہناں مفروضہ دشمناں دی سازش نوں مسلماناں دیاں ساریاں مصیبتاں دا کارن سمجھدے نیں پر خدا دی دنیا وچ ایس توں ودھ بے معنی گل ہور کوئی نہیں ہو سکدی۔ ایتھے ہر قوم تے ہر بندے نوں صرف اپنیاں کوتاہیاں دی سزا ملدی اے ایس دنیا وچ ہر حادثہ جو کسے دے نال پیش آندا اے اوہ ایہدی اپنی کسے کمزوری دی قیمت ہوندا اے موجودہ زمانے وچ ساڈیاں اکثر مصیبتاں زمانے نال عدم مطابقت دی قیمت نیں۔ جے اسیں ایس عدم مطابقت نوں ختم کر دیئے تے اپنے آپ موجودہ حالات ختم ہو جان گے۔ واقعیت پسندی تے حقیقت نگاری دے دور وچ جذباتی تقریراں تے تحریراں’ اہلیت پاروں حقوق حاصل کرن دے دور وچ رعایت تے رزرویشن دیاں گلاں’ تعمیری استحکام راہیں اُتے اٹھن دے دور وچ جلسیاں تے جلوساں دے راہیں قوم دا مستقبل برآمد کرن دی کوشش سماجی بنیاداں دی اہمیت دے زمانے وچ سیاسی سودے بازی دے راہیں ترقی دے منصوبے ایہ ساریاں گلاں ایہدیاں مثالاں نیں۔ اج دا نواں جندرا اوہناں پرانیاں چابیاں نال نہیں کھلدا۔ ایس لئی دوجا نتیجہ ایہ ہوندا اے کہ اسیں جھنجھلاہٹ’ غصہ تے مایوسی دا شکار ہو جانے آں۔
اسیں ایہ سمجھنے آں کہ دنیا اپنے ظلم تے تعصب دی وجہ نال سانوں کجھ دین لئی تیار نہیں۔ اج پوری مسلم قوم اک قسم دی نفسیاتی مریض ہو کے رہ گئی اے تے ایس المیے دی سب توں وڈی وجہ ایہہ وے کہ اسیں زمانے دے تقاضے پورے نہیں کیتے ایس لئی زمانے نے وی سانوں اپنے اندر تھاں نہیں دتی۔ بدلے ہوئے زمانے وچ اسیں اک پسماندہ قوم بن کے رہ گئے آں جے اسیں چاہیے تے قومی زندگی دی تعمیر تھوڑے جہے وقت وچ وی ہو سکدی اے تے ایہدے لئی زیادہ مدت وی چاہیدی ہوندی اے ایہدا انحصار ایس اُتے اے کہ تسیں کس قسم دی قوم تعمیر کرنا چاہندے او جے قوم دے اندر فوری جوش پیدا کرنا مقصود اے جے صرف منفی قسم دے کسے وقتی ابال نوں تسیں مقصد سمجھن دی غلطی وچ مبتلا او جے عوامی نفسیات نو ںاپیل کرن والے نعرے لا کے تھوڑی دیر لئی اک بھیڑ جمع کر لین نوں تسیں کم سمجھدے او۔ جے جلوساں دی دھوم دھام دا ناں نیڑے قوم دی تعمیر اے تے ایس قسم دی قومی تعمیر’ جے اتفاق نال ایہدے حالات ہو گئے ہون تے فوراً ہو سکدی اے پر حقیقت ایہ وے کہ ایہ قوم دی تعمیر توں ودھ قیادت دی تعمیر اے کہ ایس طرح دے رولے رپے نال وقتی طور تے قائدین نوں تے ضرور فائدہ ہو جاندا اے۔ انسانیت دے ایس مجموعی تسلسل نوں ایہدے توں کوئی فائدہ نہیں ہوندا جہنوں قوم یاں ملت کہندے نیں۔ ایہ سستی لیڈری حاصل کرن دا اک کامیاب نسخہ اے جہنوں کجھ لوک ذاتی حوصلیاں دی تکمیل لئی اختیار کردے نیں جے اسیں واقعی قوم یاں ملت دی تعمیر کرنا چاہنے آں تے سانوں ایہ سمجھ لینا چاہیدا اے کہ اسیں شاہ بلوط دا رُکھ اگان بیٹھے آں نہ کہ ہدوانے دی بیل جمان’ ایہ اک اجیہا کم اے جو لازمی طور تے لماں منصوبہ چاہندا اے تے ایہ کہ تھوڑی مدت وچ ایہنوں حاصل نہیں کیتا جا سکدا جے کوئی قوم اجہی اے جو لمے انتظار دے بناں اپنی تعمیروترقی دا قلعہ بنیا بنایا ویکھنا چاہندی اے تے اوہنوں سمجھ لینا چاہیدا اے کہ اجہے قلعے صرف ذہناں وچ بن دے نیں۔ دنیا وچ کدھرے موجود نہیں۔ لوکاں وچ طاقت دی اینی کمی نہیں جنی بھوترے ادارے دی۔
ایہ اک واقعہ اے کہ اکثر لوکاں دے اندر صلاحیت موجود ہوندی اے پر ایہدا فائدہ اوہ صرف ایس لئی نہیں اٹھا سکدے کہ اوہ استقلال دے نال دیر تک جدوجہد نہیں کر سکدے تے کسے کامیابی لئی لمی جدوجہد فیصلہ کن طور تے ضروری اے۔ زندگی دا راز اک جملے وچ ایہہ وے جناں زیادہ انتظار اونی ای زیادہ ترقی۔ ٭٭