ککھ بھن کے دوہرا نہیں کیتا…

جیویں دو بیویاں تے اک شوہر ہووے تے دوویں بیویاں روزانہ گھر وچ لڑائی پا کے بیٹھیاں ہون کہ تسیں اوہنوں لے آئے جہدے کارن ساریاں خرابیاں نیں گھر وچ دوجی دا وی موقف اوہی ہووے کہ تسیں دوجی والی لے آئے فیر ای تے گھر نہیں چل رہیا… ایہ سلسلہ لماں تے ہو سکدا اے پر دوہاں وچوں اک دے منطقی انجام تک ختم نہیں ہو سکدا شوہر دے اک توں ودھ بیویاں دے حق تے وی مخالفت نہیں ہو سکدی تے بیویاں دی اک دوجے تے الزام تراشی تے وی کوئی قدغن نہیں۔ رہ گئے گوانڈھی تے اوہناں دا حال اوہو اے جو اج کل ساڈا اے۔ اسیں اوہ ہمسائے آں جو نہ چاہندے ہوئے وی روزانہ دیاں گالھاں’ ڈنڈا سوٹا’ مارکٹائی تے سب توں ودھ کے الزام تراشی سنن تے مجبور آں۔ ہو سکدا اے اسیں لتا تے نورجہاں دے گانے سننے چاہندے ہوئیے پر سانوں پھنکاردی آواز وچ کھرباں دی کرپشن سنائی جاندی اے تے اسیں کجھ ہزار دے بجٹ تے گڑبڑا جان والے حساب وچ مسلسل فیل ہون والے گھر دے بجٹ تے سوا تنقید سنن والے کھرباں دی کرپشن تے کرپشن تے دماغ کھان والے ”داستان گو” نال چکرا جانے آں۔ جی ایہ صرف ”داستان گو” ایس لئی کہیا کہ ایہ ساڈی بچپن دیاں کہانیاں نوں خوفناک بنا کے سناندے نیں۔ کہانیاں تے کہانی گو ایس لئی وی موثر اے کہ کہانیاں وچ وی کارن تے ہوندے سن پر سدباب نہیں سی ہوندا۔ ایس سجری عجب کرپشن دی غضب کہانی وچ وی کردار ہوندے نیں پر سدباب نہیں۔
صرف پچھلے تریہہ ورھے دا حساب کرنے آں چلو من لیا بہت سارے پراجیکٹس سڑکاں’ پل’ ہسپتال بنے’ پر بقول بائی ورھے دی جدوجہد والے عمران خان دے مطابق کھرباں دی کرپشن رہی چلو ایہ وی من لینے آں ہن اک محاورہ اے ”سودن چور دا اک دن صاحب دا” اوہ دن وی آ گیا خان صاحب تریہہ ورھے توں بیٹھے حکمراناں نوں کرپشن سمیٹ اکھیڑ کے آپ ایماندار بہہ گئے لوکاں نے لڈیاں پائیاں لو جی کہانی وچ ”ٹرن” آ گیا ہن کرپشن ختم ہووے گی تے بقول مراد سعید اسیں کھرباں روپیے واپس لیا کے ادھے قرضے والیاں دے منہ تے ماراں گے۔ (وچاریاں دے منہ تے مار کے اوہناں دے قرض دین دی سزا دیاں گے) تے باقی نال خزانہ بھراں گے ایہ خزانہ وی جیویں والدہ دا پرس ہو گیا کہ اسیں بھین بھائی ہتھ لان لگدے اوہ دوروں تڑپ کے کہندیاں ”پیسے مُک گئے نیں” ایس لئی حکومتی ایہ بیان تے سانوں برا نہیں لگدا کہ ساریاں دیاں ماواں وی ایہو کہندیاں نیں جے مائی باپ نے کہہ لیا تے کیہ ہویا…
گل ہو رہی سی ”داستان گو” دی جہنوں آخر کار ڈنڈا سوٹا حکومت مل ای گئی۔ پر ایہ کیہ ایہ تے ڈکشن ای بدل گئی۔ ساڈے کول کوئی جادو دی چھڑی نہیں جو لوکاں دے حالات بدل دیئے۔ ستر ورھیاں دا گند کجھ ورھیاں وچ صاف نہیں ہو سکدا۔ ایہ مسئلے سانوں ورثے وچ ملے نیں فیر کدوں ہووے گا؟ ایہ حکومت وی ساڈی اگلی وی ساڈی ایس توں اگلی وی ساڈی… ایہ سگار والے شیخ رشید لگدے نیں ہاں ایہ تباہ کرن لئی نہیں کہہ رہے ایہ تے عادتاً کہہ رہے نیں۔ چلو من لوو سارے زمانے تہاڈے پر پونے چار ورھے وی تے کوئی گھٹ عرصہ نہیں ہوندا کوئی اک ای کیفرکردار تک اپڑ جاندا شاید تسیں احتساب دی نیب نال پھڑیا نہیں انتقام پاروں جیل توں پکھا اتروان دے نعرے لاندے رہے ایس پکھے دے اترن دا لوکاں نوں براہ راست کوئی فائدہ ہویا۔
اسیں ساری زندگی دفتراں وچ ویکھیا کہ ذمہ دار سربراہ محکمہ ہوندا اے جو یاں تے اپنی نکامی دا اعتراف کردا اے یاں فیر آئیں بائیں شائیں کردا اے پر اوہدے تے ایہ دھبہ لگ جاندا اے کہ بندہ کمپی ٹینٹ نہیں۔ ایہو حال گھراں دا اے جس گھر دے بیٹے ڈاکو تے عورتاں چوریاں کرن تے اوس گھر دا سربراہ دے دامن بچا کے کھڑا ہو سکدا اے کہ جی میں تے شریف آں میرے گھر والے چور نیں۔ ایہ تے انج ای ہو گیا کہ اک بندہ نسیا نسیا جا رہیا سی لوکاں نے پھڑ کے پچھیا کیہ ہویا بولیا پچھلے چوک وچ میرے والد صاحب نوں ”چھتر” پے رہے نیں میں عزت بچا کے آ گیا واں۔
کہندے نیں کامیابی دا کوئی نعم البدل نہیں تے نکامی دے سو جواز وی جھوٹے ایہ نہیں کہ تہانوں موقع نہیں دتا گیا پونے چار ورھیاں وچ تسیں ”ککھ بھن کے دوہرا” نہیں کیتا۔ کدھرے کندھاں دے اندر بیٹھے رہے جاگرز تے ٹریک سوٹ پا کے ہاں شادیاں طلاقاں کیتیاں تے ضمناً اپنی رائے دینا ضروری سمجھنے آں کہ ایہ برصغیر اے ایتھے پہلی شادی ای شادی ہوندی اے اوہ وی جو معاشرہ اپنی رضامندی نال اجازت دیوے نہیں تے انج سبق سکھاندا اے کہ چھٹی دا ددھ یاد آ جاندا اے۔ ساڈے ایتھوں دی شادی وچ لڑکا لڑکی نوں چھڈ کے باقی ساریاں دی مرضی مقدم ہوندی اے تے جے معاملہ الٹ ہووے تے ایہ معاشرہ لڑکا لڑکی دی ساری محبت ختم کرکے ساہ لیندا اے ایسے لئی تہانوں زیادہ تر بے جوڑ شادیاں نظر آندیاں نیں۔ جہدے وچ اسیں سارے اپنے مسئلیاں سنے فٹ بیٹھ جانے آں ہندو گائوماتا دے سنگھ تے کھڑا ایہ معاشرہ دوجی تریجی شادی نہیں چلن دیندا ایتھے اک شادی دا چلنا ساڈے کسے وصف دی نمائندگی نہیں کردا سگوں ایتھے شادیاں ہندومت دی وجہ نال اک پرقانع ہو کے چل رہیاں نیں۔
واقعی ہن تے اوہ مقام آ گیا اے کہ سارے پاسیوں سیاسی بیان’ الزام تراشی تے اپنی نکامی دے دوجے ذمہ داراں دا رولا بند کرکے کوئی پلاننگ کیتی جاوے کہ مہنگائی نے لک بھن دتا اے ایس لئی سیاسی بک بک بند تے مہنگائی تے کم شروع ہووے کہ ہن غریباں نہیں مڈل کلاس تے اپرمڈل کلاس دیاں وی چیکاں نکل رہیاں نیں۔٭٭