مہینا وار پرچاکاری

ایہناں وچ کہانی توں وکھ ترجمے ہڈورتی سفرنامے تے پنجابیات وغیرا دے موضوع شامل نیں۔ باقی رسالیاں وچ وی ایہناں موضوعات بارے کجھ نہ کجھ چھپدا رہندا اے پر سویر انٹرنیشنل نے ایہناں موضوعات ول زیادا دھیان وچ پہل کیتی۔ سویر دے ایڈیٹر جمیل احمد پال نیں جہناں بارے ویروا اسیں لوکائی دے تحت دے آئے آں۔
1997ء وچ سویر دا پہلا شمارا ساہمنے آیا۔اداریے وچ ایس وچار دااظہار کیتا گیا کہ پنجابی ادب اندر جہڑے شعبیاں وچ کمی اے سویر اوس کمی نوں دور کرن دا جتن کرے گا۔ سویر نے بہت چھیتی مقبولیت حاصل کر لئی تے پنجابی دے وڈے وڈے لکھاری ایہدے وچ لکھن لگے پئے۔ ایس رسالے نے اعلا درجے دِیاں کہانیاں دے ترجمے شائع کیتے۔ ایس توں وکھ ہڈورتی(آپ بیتی)سفرناما تے ہور موضوعاں بارے جہناں بارے پنجابی وچ گھٹ لکھیا گیا سی اوہناں نوں شائع کرن ول دھیان دتا۔ ایس طرحاں پنجابی ادب وچ بھرواں وادھا ہوون لگیا۔ پہلے ڈیڈھ کو سال سویر دا سایز 23×33/8 سی جہنوں بعد وچ 20×30/8کر دتا گیا۔ ایہدے صفحے 40 توں لے کے 64 تک ہوندے رہے۔
سویر نے شروع توں ای عام شمارے وچ خاص نمبر شائع کرن دی رِیت شروع کیتی یعنی پورے دا پورا شمارا کسے خاص موضوع بارے وقف کر دتا جاندا سی۔ ایہناں خاص شماریاں وچ کہانی نمبر شاعری نمبر ناول نمبر ہاس رس (طنز و مزاح) نمبر وغیرا شامل نیں۔ ناول نمبر وچ دو ناول شائع کیتے جاندے سن۔ ایس رسالے نے امرتا پریتم نمبر وی شائع کیتا۔ سویر دی اٹھان بہت چنگی سی پر بعد دے رسالیاں وچ یکسانیت نظر آون لگ پئی۔ 2016 وچ ایہ رسالا بے قاعدگی دا شکار ہو گیا۔
سویر دی پنجابی ادب نوں دین:
سویر نے اوہناں موضوعات ول دھیان دِتا جہڑے پنجابی ادب وچ نظر انداز کیتے جاندے سن۔ عام کر کے پنجابی رسالیاں وچ حمد تے نعت توں وکھ تنقیدی تے شخصی مضمون نظم غزلاں تے اِکا دکا کہانیاں شائع کیتیاں جاندیاں سن۔ پنجابی ادب تے بعدوں پنچم نے البتا کہانی ول خاص دھیان دتا سی۔ سویر نے سفرنامے ناول تے ہڈورتی ول وی دھیان دِتا۔آپ بیتی دے سلسلے وچ اجیت کور راجا رسالو تے پروین ملک ورگے لکھاریاں دِیاں آپ بیتیاں قسط وار شائع کیتیاں گئیاں۔ سفرنامیاں وچ جمیل احمد پال دے اپنے لندن تے کینیڈا دے سفرنامیاں توں وکھ حمید رازی دے چین تے جاپان دے سفرنامے عاشق رحیل دے دو سفرنامے وقار احمد پال دا آسٹریلیا دا سفرناما جمیل اصغر مرزا دانیدرلینڈ تے اظہر حمید دا تھائی لینڈ دا سفرناما قسط وار شائع کیتے گئے۔ ایہناں وِچوں اکثر بعدوں کتابی روپ وچ وی چھپ گئے۔ سویر نے اعلا ادب دے ترجمے دا فروغ وی کیتا تے ہر شمارے وچ انگریزی توں وکھ ہندی بنگالی سندھی پشتو تے ہور زباناں دیاں کہانیاں دے ترجمے باقاعدگی نال شائع کیتے۔ایہدے نال پنجابی دے کہانیکاراں نوں اک معیار ملیا تے پنجابی وچ ہور چنگا لکھیا جان لگیا۔
(جاری اے)