میرا وقار،میری آبرو حجاب وچ اے

)سپیشل رپورٹ(حجاب دراصل عربی زبان وچ پردہ تے لباس دے مفہوم وچ استعمال ہوندا اے۔ جدید عربی وچ ایس لفظ دا مطلب مسلمان زنانیاں دا سکارف اے یا حجاب جہڑا زنانی نوں لکا کے تحفظ فراہم کردا اے۔ اسلامی تعلیمات دے مطابق دین اسلام دا امتیازی وصف حیا اے تے حجاب زنانی دی پہچان اے۔ قرآن و حدیث دی اصطلاح وچ حیا دا مفہوم بہت وسیع اے تاہم ایہہ گل طے اے کہ حجاب مسلم معاشرے وچ پاکیزگی تے تقدس دی علامت اے۔ اک شوٹ دی ماڈل سدرہ آکھدیاں نیں ساڈے پیارے دین اسلام نے حقیقت وچ زنانی نوں نگینے تے آبگینے جئی حساس تے نازک طبع تے قیمتی چیز نال تشبیہہ دتی اے۔ حجاب دے احکامات عورت لئی تحفے دا درجہ رکھدے نیں۔ اوہ آکھدیاں نیں ہمسایہ ملک بھارت وچ مسکان نامی طالبہ نے جس طرح حجاب لئی آواز چکی اوہ ساڈے ساریاں لئی مشعل راہ اے۔ اوہناں دا آکھنا اے کہ بنگلہ دیش نال تعلق رکھن والی ناظمہ خان نے وی سوشل میڈیا اتے حجاب تحریک شروع کیتی۔ ایس تحریک نے وی دنیا بھر دی زنانیاں نوں متاثر کیتا۔ سدرہ آکھدیاں نیں رمضان المبارک دا مقدس مہینہ شروع ہو چکیا اے تے ایہدے وچ سانوں اپنے ہر عمل نوں اسلامی تعلیمات دے مطابق اختیار کرنا چاہیدا اے۔ جھوٹ تے دروغ گوئی توں بچنا چاہیدا اے تے اک دوجے دا احساس کرناچاہیدا اے۔ دوجیاں دی تکلیفاں دور کرن دی ہر ممکن کوشش کرنی چاہیدی اے۔ ایہہ اوہ مہینہ اے جہدے وچ اسیں اپنی بری عادتاں نوں آسانی نال چھڈ سکدے آں۔سدرہ نے حجاب نوں دوبارہ موضوع گفتگو بناندے ہوئے آکھیا کہ سکارف یا حجاب ساڈی پہچان تے شناخت اے تے ایہدے تے سانوں مان ہونا چاہیدا اے۔
اِس ایک بات پہ میرا یقینِ کامل ہے
مرا وقار، مری آبرو حجاب میں ہے