کوئی ہے جہڑا انج کرے

سوچن والی گل ایہہ وے کہ جے سی ایس ایس کرن والے اینے قابل نیں تے پاکستان دے ادارے تباہ حال کیوں نیں؟ تے ٹی سی ایس وچ اک وی سی ایس ایس افسر کم نہیں کردا پر ٹی سی ایس پاکستان پوسٹ توں ودھ منافعے وچ کیوں اے؟ تسیں ریلوے دا حال ویکھ لوو؟ تسیں پولیس دا حال ویکھ لوو؟ تسیں پاکستان دے سارے وڈے کاروباری تے منافع بخش ادارے ویکھ لوو اوتھے کوئی سی ایس ایس افسر نہیں سارے کامیاب تے منافع بخش اداریاں وچ تہانوں پروفیشنل لوک ملن گے۔ اینگروگروپ’ عارف حبیب گروپ’ ڈی جی خان سیمنٹ سنے سارے کامیاب ادارے پروفیشنل لوک چلا رہے نیں۔ دنیا وچ پروفیشنل لوک انجینئرز’ ڈاکٹرز تے سائنسداناں تے استاداں دی عزت اے۔ اجہے پروفیشنلز جو اپنے ملکاں نوں اسمان تک لے گئے تے بدقسمتی وچ ساڈے ملک وچ الٹی گنگا بہہ رہی اے۔ اک پروفیشنل ڈاکٹر تے انجینئر دے اُتے ڈپٹی کمشنر رعب جماندا اے جہدی قابلیت صرف انگریزی دا امتحان پاس کرنا اے جے انگریزی نوں سی ایس ایس چوں کڈھیا جاوے تے پاس کرن والے ہزاراں امیدوار ہون گے۔ عرب ملکاں وچ سی ایس ایس ورگا امتحان نہیں ہوندا پر اوتھوں دے مضبوط اداریاں دی کارکردگی تہاڈے سامنے اے۔ جاپان تے تائیوان دے کول کوئی قدرتی وسیلے نہیں پر اوہ ٹیکنالوجی وچ دنیا توں اگے نیں۔ پاکستان نوں ترقی لئی سرکاری افسرشاہی نہیں سگوں ڈاکٹرز’ سائنسداناں تے انجینئرنگ پروفیشنلاں دی لوڑ اے۔
اک وڈی کمپنی نوں منیجر دی پوسٹ لئی کسے بڑے قابل بندے دی تلاش سی پر پینٹ کوٹ پائے ہوئے اعلیٰ تعلیم یافتہ امیدواراں دے درجناں انٹرویوز دے باوجود کوئی وی امیدوار ایہ نوکری حاصل کرن وچ کامیاب نہیں سی ہو رہیا۔ ایہدی خاص وجہ ایہ سی کہ کمپنی دا مالک انٹرویوز دے پینل وچ آپ وی بیٹھدا سی تے جدوں پینل دے دوجے ممبران اپنے سوالات مکمل کر لیندے تے مالک آخر وچ ہر امیدوار توں ایہ سوال ضرور پچھدا کہ اک چنگے منیجر دی سب توں خاص گل کیہ ہوندی اے۔ ایس سوال دے جواب وچ کوئی امیدوار کہندا کہ اک چنگے منیجر نوں وقت دا پابند ہونا چاہیدا اے کسے دا جواب ہوندا اوہنوں پروفیشنل ہونا چاہیدااے’ کوئی کہندا اوہنوں سکلڈ ہونا چاہیدا اے ایسے طرح کوئی تجربہ کاری’ کوئی ذمہ داری تے کوئی ایمانداری نوں چنگے منیجر دی پچھان دسدا۔ پر کمپنی مالک اوہناں وچوں ہر جواب تے غیرتسلی بخش انداز وچ چپ ہو جاندا تے امیدوار نوں جان دا کہہ دیندا’ پینل دے دوجے ممبران اک تے انٹرویو کر کر کے تنگ آ چکے سن دوجا اوہ ایس تجسس وچ سن کہ آخر کمپنی مالک دے نیڑے اک چنگے منیجر دی سب توں خاص گل کیہ ہو سکدی اے۔ اوہناں نے آپ وی ایس سوال دا جواب کمپنی مالک توں جانن دی کوشش کیتی پر مالک نے اپنا مطلوبہ جواب کسے تے ظاہر نہیں کیتا تے پینل نوں انٹرویوز جاری رکھن نوں کہیا۔
اک دن اک سادہ جہے کپڑیاں وچ ملبوس تے عام جہے حلیے والا نوجوان انٹرویو دین آ گیا۔ اوہنوں ویکھ کے پینل دے ممبران طنزیہ انداز وچ اک دوجے ول ویکھن لگ جیویں کہہ رہے ہون کہ اینے ماڈسکاڈ تے اپ ٹو ڈیٹ قسم دے لوک ایہ انٹرویو پاس نہیں کر سکے تے ایہ دیسی جیہا بندہ کتھے سلیکٹ ہووے گا تے ایس گل دا تے سوال ای پیدا نہیں ہوندا کہ اوہنوں ایس سوال دا جواب پتہ لگ جاوے جو باقی امیدواراں دی نکامی دی وجہ بنیا۔ خیر نوجوان نے پینل دے سوالات دے بڑے اعتماد نال جواب دتے جہدے بعد کمپنی دے مالک نے اپنا سوال پچھیا جینٹل مین ایہ دسو کہ اک چنگے منیجر دی سب توں بہترین کوالٹی کیہ ہوندی اے؟ نوجوان نے سوال سن کے کجھ دیر لئی سر جھکایا تے فیر کمپنی مالک ول ویکھ کے پورے اعتماد نال مسکرا کے کہیا سر’ چنگا منیجر اوہو اے جو کمپنی دے معاملات نوں کمپنی دے مالک توں ودھ وی بہتر جان دا تے سمجھدا ہووے تے جہدے ہوندے ہوئے مالک برائے نام مالک ای کہلائے’ ایہ عجیب و غریب جواب سن کے پینل ممبران چونک گئے’ اوہ جوان دی ایس بدتمیزی تے گستاخانہ لہجے تے تلملا اٹھے تے ایس پرشٹ اپ تے مائنڈیور لینگوئج ورگے کلمات دی بوچھاڑ کر دتی پر کمپنی مالک نے ممبراں نوں چپ رہن تے انتظار کرن نوں کہیا فیر مسکرا کے نوجوان نوں مخاطب ہو کے کہیا بالکل توں ٹھیک جواب دتا’ پر ایہ گل توں کہدے توں سکھی اے؟ پینل ممبران حیرت نال اک دوجے دے منہ ویکھن لگ پئے۔ نوجوان نے بدستور خوداعتمادی دے نال مسکراندے ہوئے جواب دتا’ سر اپنے گھروں تے اپنے والدین توں’ پینل ممبران نوجوان دی گل غور نال سنن لگے۔ نوجوان نے واری واری اوہناں ممبراں ول ویکھدے ہوئے اوہناں نوں مخاطب ہوندے ہوئے اپنی گل جاری رکھی۔ اسیں بھین بھراواں نے اپنے والد نوں اپنے گھر دے سربراہ دا درجہ دتا۔ اک منٹ لئی من لوو کہ اوہ کمپنی مالک سن۔ پورے گھر دی کفالت اوہناں دی ذمہ داری سی پر گھر نوں چلانا کس منیجر دا کم سی۔ کہدے کپڑے کتھے ٹنگے نیں’ کہدیاں جتیاں کتھے رکھیاں نیں’ کہدیاں کتاباں کتھے دھریاں نیں کہدے کھڈونے کتھے پئے نیں’ کپڑے گندے ہو گئے تے کون دھوئے گا’ استری کر کے کون دیوے گا’ ساریاں دی من پسند کھانا بنانا’ بنا کے سامنے کھنا’ فیر بھانڈے دھونا کہدی ذمہ داری اے فیر گھر بھر دی صفائی’ جھاڑو پونچھ’ فرش دی دھلائی’ رات ساریاں نوں سلا کے فیر سونا’ ایہ سب مینج کرن والی میری امی سن’ اوہ شاندار منیجر سن’ کدی بھل کے اسیں ابو توں پچھ لیندے کہ ساڈی فلاں چیز کتھے پئی اے تے جھڑک کے کہندے ارے بھئی مینوں کیہ پتہ’ اپنی امی توں پچھو تے ایس توں وی مزیدار گل ایہ کہ آپ ابو دا موبائل’ پرس’ کپڑے’ جتی’ موٹرسائیکل دی چابی حالاں کہ دفتر دیاں فائلاں تک امی دے پتے تے ہوندیاں نیں۔ فیر اسیں اکثر ابو نوں چھیڑدے ہوئے کہندے سی’ تسیں تے بس برائے نام ای گھر دے مالک او’ تہاڈے توں ڈھیر ودھ تے امی گھر نوں جان دی تے سمجھدی اے تے ابو وی ہس کے اعتراف کردے کہ امی دے ہوندے ہوئے اوہناں نوں کدی کسے وی گل دی فکر نہیں ہوندی ایس لئی اوہ گھر دے برائے نام مالک ای ٹھیک نیں۔ بس سر ایس لئی میرے نزدیک اک چنگے منیجر دی ایہو تعریف اے۔
کمپنی مالک نے تجسس بھریاں نگاہواں نال نوجوان نوں ویکھیا تے فیر پینل نوں مخاطب ہو کے کہیا تسیں ساریاں نے ایس نوجوان دا جواب سن کے اوہنوں جھڑک دتا سی پر ہن جد کہ اوہنے اپنے جواب دی تشریح کیتی اے تے مینوں امید اے تسیں سمجھ گئے ہوو گے کہ ایہدے جواب دے پچھے اوہدا مشاہدہ وی اے تے عمر بھر دا تجربہ وی تے اک ٹھوس نظریہ وی۔ مینوں وی اک اجیہا منیجر چاہیدا اے جہدے ہوندے ہوئے میں برائے نام مالک تے بے فکر شخص بن جاواں’ ایہ کہہ کے کمپنی مالک نے نوجوان نوں منیجر دی پوسٹ لئی منتخب ہون دی مبارکباد دیندے ہوئے ہتھ ملایا تے پینل دے ممبران کھڑے ہو کے ساڑیاں مارن لگ پئے۔
ایس کہانی دے دو پہلو نیں اک تے ایہ کہ گھر دا ماحول بہترین درسگاہ اے تے دوجا ایہ کہ دوجیاں نوں قائل کرن لئی رٹی رٹائی تے گھسی پٹی کتابی گلاں دا سہارا لین دی تھاں سادہ الفاظ عملیت پسندی تے فطری مشاہدات تے مبنی سوچ توں کم لوو’ تسیں زیادہ معتبر ٹھہرو گے تے ترقی ول ٹردے رہو گے۔٭٭