مہینا وار پرچاکاری

کجھ پرچے کتاب لڑی دے طور اتے نکلن دے بعد ایہدا ڈیکلریشن مل گیا تے انج مہیناوار ماں بولی وجود وچ آیا۔ ایہ 23×36/16سایز دا پرچا سی جہدے وچ معیاری ادب چھاپیا جاندا سی۔ مقصود ثاقب آپ چنگے کہانیکار نیں جس پاروں اوہناں دے پرچے وچ کہانی ہمیشا بہت معیاری چھپدی رہی۔ ایس توں وکھ ترقی پسند ادب دے مختلف پہلوواں بارے وی ماں بولی وچ بہت کجھ چھپدا رہیا۔ ماں بولی نے زبان ول خاص دھیان رکھیا تے لہندے بھا دی پنجابی دا الار ایہدے وچ ہمیشا نظر آیا۔ ایہدے نال نال پنجابی دے دوجے لہجے وی کدی نظر انداز نہیں کیتے گئے۔
ادارے اندر کجھ اندرونی اختلاف پاروں مقصود ثاقب نے ماں بولی توں پنچم ول سفر کیتا۔ پنچم دا پہلا شمارا نویں دفتر کوئنز روڈ توں کڈھیا گیا۔ ایہدا سایز کجھ وڈا سی پر اگلے ای پرچے توں ایہنوں کتابی سایز 23×36/16 نال بدل دتا گیا۔ اپنے بھرویں ایڈیٹرگناں پاروں مقصود ثاقب دے ایڈٹ کیتے پرچے ہمیشامعیاری مواد پیش کردے نیں۔ ماں بولی ہووے یاں پنچم ایڈیٹر دا اپنا رنگ ہر صفحے اتے ویکھیا جا سکدا اے۔ پنچم نے اپنے پہلے پرچے توں ای اپنا اعتبار قایم کر لیا۔ ایہدا بے قاعدا ہونا البتا پڑھن والیاں نوں رڑکدا رہیا۔ معاشی مسائل سارے ای پنجابی رسالیاں دا مسئلا اے۔ پنچم وی ایہدا شکار رہیا جس پاروں کدی دو دو پرچے وی سانجھے شائع کرنے پئے۔ پنچم نے وی ہڈورتی تے سفرنامے شائع کرن ول دھیان دِتا۔ ایس توں وکھ گرمکھی راہیں بہت ساری وست لپی انتر کر کے چھاپی گئی۔
لکھاری
لکھاری دا اجرا کتاب لڑی دے طور اتے ہویا۔ اقبال زخمی ایہدے جاری کرن والے سن جو آپ پنجابی زبان دے چنگے شاعر سن۔ 32 پرچے کتاب لڑی دے طور اتے کڈھن دے بعد اوہناں نے ڈیکلریشن لے کے ایہنوں باقاعدا مہیناوار دا روپ دے دتا۔ لکھاری تھوڑے بجٹ تے سادگی وچ معیاری مواد دی چنگی مثال پیش کردا سی۔ اک رنگا حد دو رنگا ٹایٹل ہون دے باوجود ایہدے اندر بہت معیاری شاعری پیش کیتی جاندی سی جہدا سب ایڈیٹر دا چنگا شاعر ہونا وی سی۔لکھاری نے بہت سارے نعت نمبر چھاپن دے نال نال آپ بیتی نمبر وی شائع کر کے مانتا کھٹی۔ ایہ 20×30/8 سایز دا پرچا سی جہدے صفحے 24 توں لے کے 40 تک ہوندے سن۔ اقبال زخمی دی وفات دے بعد اوہناں دے سپتر ڈاکٹر ارشد اقبال ارشد نے ایہنوں شائع کرنا شروع کیتا ۔(جاری اے)