کامیاب لوک اکلّے کیوں؟

کمرے دی باری توں آندی روشنی ہولی ہولی گھٹدی جا رہی سی۔ شام دے سائے پھیلدے جا رہے سن۔ کمرے وچ مکمل خموشی سی۔ میرے سامنے اک باوقار شخص براجمان سی۔ اک ویلا سی کہ ایہہ اپنے زمانے دا اک کامیاب ترین انسان سی۔ عزت’ شہرت’ دولت تے رتبہ اوہدے گھر دے ملازم سن۔ اک مگروں اک کامیابی تے کامرانی اوہدی منتظر سی۔ اوہنے وی جی جان نال محنت کیتی تے انڈسٹری وچ چاروں پاسے اپنی کامیابیاں دے جھنڈے گاڑے۔ بے تحاشا کامیابیاں سمیٹن مگروں جدوں اوہنے باقی زندگی آرام نال گزارنا چاہی تے فیر اوہدے اتے ایہہ خوفناک انکشاف ہویا کہ اوہدے کول کوئی ایسا انسان تے ہے ای نہیں جہدے نال اوہ اپنا دکھ سکھ شیئر کرے’ جہدے نال جی بھر کے گلاں کرے تے جہدے توں اپنا حال دل آکھ دیوے۔ اوہدی اکھاں جہناں وچ کدی کامیاب ہون دا اعتماد سی اج ویرانیاں دا سنیہا دے رہیاں سن۔ اوہدا چہرہ جہڑا مال و دولت تے نعمتاں دی فراوانی نال ہشاش بشاش سی’ اج کلے پن دی اذیتاں نال بھریا ہویا سی تے جھریاں نے اوہدے اتے قبضہ کر رکھیا سی۔ اوہنے اک زہرخند مسکراہٹ دے نال میرے ول ویکھیا تے فیر بولیا: پچھو جو وی پچھنا اے۔ میں اپنے اندر حوصلہ پیدا کیتا تے بڑے ادب دے نال اوہناں کولوں پچھیا: لوک اینی شاندار کامیابیاں سمیٹن مگروں بالآخر کلیا کیوں رہ جاندے نیں؟
اوہنے سگار دا اک بھرواں کش لیا’ اپنا سر کرسی دی پشت نال ٹکایا تے کجھ دیر خلا وچ گُھورن مگروں بولیا: کیوں جے ساڈے اتے خبط سوار ہوندا اے۔ اسیں اپنے نال ضد لا رکھی ہوندی اے کہ اسیں ہر حال وچ کامیاب ہونا اے۔ اپنی کامیابی سانوں ایس قدر عزیز ہوندی اے کہ اوہدے لئی اسیں اپنی ذات دے نال نال اپنے بیوی بچیاں دا وقت وی قربان کر دیندے آں۔اسیں سمجھنے آں کہ ایہہ سب کجھ اسیں اپنے چاہن والیاں لئی کر رہے آں لیکن جدوں اسیں کامیابی دی چوٹی اتے پہنچ جاندے آںتے ایس گل دے منتظر ہونے آں کہ ہن سانوں کوئی موہنڈھیاں اتے چکے گا’ ساڈے نام دا جشن مناوے گا تے ایہہ ویکھ کے سانوں دھچکا لگ جاندا اے کہ ساہنوں پھلاں دے ہار پہنان والا تے ساڈی کامیابی اتے تالیاں وجان والا کوئی نہیں ہوندا۔
اوہنے سگار دا اک کش لیتا تے ایش ٹرے وچ رکھ کے دوبارہ بولیا: نکولاٹسلا دا نام سنیا ہووے تسیں۔ ایہہ شخص دنیا دااک عظیم سائنس دان سی۔ اوہدے نام تے تن سو توں ودھ ایجاداں نیں۔اوہ تے زباناں اتے مہارت رکھدا سی۔ ٹسلا کمپنی اوہدے نام توں اے۔ اج دنیا وچ جہنی وی موٹراں چل رہیاں نیں اوہدا کریڈٹ اوہنوں جاندا اے لیکن اوہ کئی سال تک اک ہوٹل وچ کلیاں زندگی گزاردا رہیا۔اوہ شخص جہنے 20ویں صدی نوں تخلیق کیتا تے جہڑا اپنے زمانے توں سو سال اگے سی۔ اک دن تنہائی تے اداسی دا دکھ برداشت نہ کردے ہوئے نیویارک دے اک ہوٹل وچ مردہ حالت وچ پایا گیا۔ دراصل ہر انسان نوں کامیابی دی اک قیمت چکانا پیندی اے۔
ایہہ قیمت تسیں پیسے نال نہیں ادا کر سکدے بلکہ اپنے جذباتی’ ذہنی تے معاشرتی تعلقات نوں قربان کر کے ای ایہہ قیمت چکا سکدے او لیکن سب توں بھارتی قیمت تنہائی دی ہوندی اے۔ تنہائی انسان دی تکلیف نوں دگنا کر دیندی اے۔ اوہ مایوسی تے ناامیدی دا غلام بن جاندا اے۔ منفی خیالات’وسوسے تے اندیشے اوہدے اتے یلغار کر دیندے نیں۔ ایہدی مثال ایسے شخض وانگوں ہوندی اے جہڑا روز اپنے ہتھاں نال اپنے لئی قبر کھود رہیا ہوندا اے تے فیر اک دن تھک ہار کے اوسے قبر وچ ڈگ جاندا اے تے دنیا نوں خبر تک نہیں ہوندی۔
اوہنے سامنے پئے کافی دے کپ توں اک گھُٹ بھریا تے فیر بولیا: اک ہور وجہ ایہہ وی اے کہ کامیابی لئی تخلیقی سوچ دی لوڑ ہوندی اے۔ ایہہ سوچ انسان نوں تنہائی وچ لے جان تے مجبور کردی اے۔ فیر ای اوہ اپنے مستقبل لئی پلاننگ کر سکدا اے۔ اپنے لئی وڈے وڈے سفنے ویکھ سکدا اے تے اوہناں وچ رنگ بھر سکدا اے۔ ٹسلا وی ایہو آکھدا سی کہ کجھ نواں کرن دا راز ایہو اے کہ تسیں فوکسڈ کِنھے او لیکن اپنی سوچ تے اپنے آئیڈیاز اتے چلدے چلدے اک ویلا آندا اے کہ اوہ مکمل طور تے خودانحصار بن جاندا اے۔ اوہنوں دوجیاں دی لوڑ نہیں رہندی۔ اوہنے اپنے دم تے سب کجھ حاصل کیتا ہوندا اے تے جدوں اوہنوں ایہہ احساس ہونا شروع ہوندااے تے اوہ سمجھدا اے کہ مینوں دوجے لوکاں دی لوڑ ای نہیں’ انج اوہ تنہائی دا شکار ہو جاندا اے۔ کامیاب لوکاںدی تنہائی دی اک وجہ ایہہ ہے کہ ترقی دے سفر وچ اوہناں دے قریبی لوک اوہناں دے عزائم اتے بھروسہ گھٹ تے شک بوہتا کردے نیں۔ اوہ اوہناں کولوں طرح طرح دے سوال پچھدے نیں تے بعض دفعہ تے ایہہ وی آکھ دیندے نیں کہ تہاڈے کولوں نہیں ہو پاوے گا۔
ایس طرح ایہہ لوک اپنے آپ نوں اوہناں لوکاں توںدور کردے نیں تاں جے اوہ ایہناں مایوس کن آوازاں نوں نہ سنن تے کامیاب ہو جان۔ اوہناں نوں کامیابی مل جاندی اے لیکن اوہدے نال نال اوہ تنہائی دا شکار ہو جاندے نیں۔ کامیاب لوکاں دے کلیا ںرہ جان دی اک وجہ ایہہ وی اے کہ ایہہ لوک مستقبل دا سوچدے نیں تے بڑی دور دی سوچدے نیں جہدی وجہ نال عام لوک اوہناں نال ذہنی مطابقت نہیں رکھدے۔ ایہہ لوک اپنے وژن تے سفنے نوں پورا کرن لئی ایس قدر جنونی ہوندے نیں کہ زمان و مکان دی قید توں آزاد ہو جاندے نیں۔ اوہ لگاتار کئی گھنٹیاں تک کم کردے نیں۔ ایس غیر معمولی محنت پاروں اوہ اپنے میدان دے شہسوار تے بن جاندے نیں مگر ایس عمل وچ اوہ بہت کجھ گوا دیندے نیں۔ اوہ اپنے دوستاں نوں وقت نہیں دے پاندے تے اوہناں دے کول اپنے خاندان لئی وقت نہیں بچدا۔ اپنے شعبے وچ ٹاپ پوزیشن حاصل کرنا اک بڑا رسک اے۔ جے تسیں ایہہ فیصلہ کردے اوتے فیر جان لوو کہ تہاڈے کول اپنے کم دے علاوہ وقت نہیں بچے گا۔ تسیں اپنی فیملی’ دوستاں تے زندگی دی خوبصورتی توں لطف اندوز نہیں ہوسکو گے۔
زندگی وچ اپنے لئی وکھرا رستہ تلاش کرن دا مطلب ایہہ ہے کہ تہانوں ایہدے اتے کلیا ںچلنا ہووے گا تے ایس وجہ نال دوجے لوکاں نال رشتہ بنانا تہاڈے لئی اوکھا ہووے گا۔ چارلیس بو کوسکی آکھدا اے جدوں سویرے تہانوں کوئی بیدار نہ کرے’ رات نوں کوئی تہاڈا انتظار نہ کرے تے تسیں اپنی مرضی نال جو چاہو و کردے ہو تے تسیں ایس کیفیت نوں کیہ آکھو گے۔ آزادی یا تنہائی؟
اوہنے اپنے دونویں ہتھ سامنے میز اتے رکھے تے سلسلہ کلام نوں جوڑدے ہوئے بولیا: ساڈے جئے لوک پنڈاں توں آئے ہوندے نیں۔ ساڈی ایہہ سوچ ہوندی اے کہ شہر جا کے ای اسیں ترقی کر سکاں گے۔ ہاں اسیں ترقی کر لینے آں۔ اسیں
اگے ودھ جانے آں لیکن بہت ساری چیزاں وچ پچھے رہ جانے آں۔ شہری زندگی سانوں اپنی ذات لئی سوچنا سکھادیندی اے۔ ایتھے اسیں دن رات محنت کرنے آں۔ اپنے اخراجات پورے کرن لئی کئی کم کرنے آں۔ جہناں دی وجہ نال اپنے نال نال سانوں اپنی فیملی لئی وی وقت کڈنا اوکھا ہو جاندا اے۔انج اسیں کامیاب ہو کے وی نکام رہنے آں۔ جیک ما آکھدا اے کہ مینوں ایس گل تے پچھتاوا اے کہ میں زندگی وچ کم تے بہت کیتا لیکن اپنی فیملی نوں بوہتا وقت نہیں دے سکیا تے جے مینوں اک ہور زندگی ملی تے میں ایسا بالکل نہیں کراں گا۔ کلیاں رہ جان دی اک ہور وجہ ساڈے انساناں وچ جذباتی ذہانت دی کمی وی اے۔
سانوں ایہہ سکھایا ای نہیں گیا کہ اسیں دوجیاں نال کامیاب تعلق کیویں بنانا اے۔ ایہو وجہ اے کہ جدوں کوئی بندا اپنے شعبے وچ جیویں جیویں کامیاب ہوندا جاندا اے تے اوہ دوجے انساناں کولوں کٹدا جاندا اے۔ اوہ صرف ایہہ سوچدا اے کہ دوجیاں کولوں کم کروان دے کامیاب طریقے کہڑے نیں تے ایسے وجہ نال اوہ اپنے آپ نوں نہایت تجربہ کار تے کامیاب خیال کردا اے۔ اوہ اپنے ماتحتاں دے نال تعلقات بنان توں گریز کردا اے۔ زندگی دی دوڑ وچ اوہدے بہت سارے دوست ایہدے توں پچھے رہ جاندے نیں۔ ہن اوہنوں اپنے برابر دا دوست ملنا اوکھا ہو جاندا اے جہدی وجہ نال اوہ کلیاں رہ جاندا اے۔
اوہ ہور آکھن لگیا تنہائی دی آزیت کس قدر تلخ اے ایہدا ثبوت میں تہانوں دینا واں۔ پچھلے دناں جاپانی معاشرے دی اک تحقیق نے دنیا نوں چونکا دتا۔ تہانوں تے پتہ اے کہ جاپان اک ایسا معاشرہ اے جہڑا قنون دا بہت احترام کردا اے لیکن اوتھے اچانک 65 سال توں ودھ عمر دے بندیاں وچ قنون شکنی دا رجحان ودھ گیا تے اوہ جیل جان لگے۔ جدوں ایہدی وجہ پتہ کیتی گئی تے پتہ چلیا کہ معاشرے وچ ریٹائرڈ ہون والے بندے اپنے آپ نوں کلیاں محسوس کردے نیں۔ ایس تنہائی نوں ختم کرن لئی ایہہ بڈھے بندے جرم کردے نیں تاں جے جیل جا کے انساناں دی سنگت حاصل کرن۔ ایہہ گل یاد رکھوکہ انسان اپناجذباتی سکون مادری شیواں توں نہیں بلکہ دوجے انساناں توں حاصل کردا اے۔ دوجے انساناں توں ای ایہدی تکمیل ہوندی اے۔ اک انسان صحت مند اے۔ اوہدے کول فیملی دی محبت تے دوستاں دا پیار اے۔ کتاب پڑھن تے دنیا گھمن لئی ویلا اے تے نال چنگا ذریعہ آمدن وی اے تے اوہ اک خوش قسمت انسان اے۔
ایہدے الٹ جے کسے انسان دی زندگی وچ ایہہ چیزاں نہیں نیں تے اوہدے گھر دی الماریاں گولڈ میڈلاں تے اعزازاں نال بھری ہوئی کیوں نہ ہون’ اوہدے کول دولت دی ریل پیل کیوں نہ ہووے۔ درحقیقت اوہ اک کھوکھلا انسان اے۔ زندگی وچ کامیاب ہونا ضروری اے کہ ایہدے توں نہ صرف تسیں اپنی بلکہ دوجیاں دی زندگی نوں وی بہتر بنا سکدے او۔ لیکن ایس سفر تے روانہ ہون ویلے ایہہ گل پلے نال بنھ لینی چاہیدی اے کہ زندگی دا مقصد صرف کامیاب ہونا ای نہیں اے۔ پیسہ’ شہرت دولت تے عزت ای زندگی دی حقیقت نہیں اے بلکہ ایس دے علاوہ وی کجھ چیزیاں ایسیاں نیں جہڑیاں سانوں اللہ نے دتیاں نیں تے اوہ بے مثال نیں۔ پیسہ دوبارہ آ سکدا اے’ شہرت وی مل سکدی اے لیکن لوک دوبارہ نہیں ملدے۔ رشتیاں دی محبت تے اپنائیت دا کوئی نعم البدل ای نہیں۔ شہرت دے پچھے نسدے نسدے جے اسیں ایہناں نعمتاں نوں نظرانداز کیتا تے فیر ایہہ ساڈے کولوں کھوہ لیتی جان گئیاں تے فیر جدوں زندگی کولوں تھک ہار کے اسیں بیٹھاں گے تے دو گھڑی لئی وی ساڈا کوئی غم خوار نہیں ہووے گا تے نہ ای سانوں کوئی ایسا موہنڈھا میسر ہووے گا جہدے اتے سر رکھ کے اسیں اپنی تھکن اتار سکیے۔
تے فیر کامیابی دے سفر وچ انسانی تعلق نوں کیویں برقرار رکھیے۔ میرا اوہنوں دوجا سوال سی۔
ساڈی بدقسمتی ایہہ اے کہ جدوں اسیں کامیابی دے سفر اتے چل رہے ہونے آں تے اہم چیزاں نوں نظرانداز کر دینے آں۔ اسیں سمجھنے آں کہ ساڈا ویلا بہت قیمتی اے تے لوکاں دے نال ملن نال میرا وقت ضائع ہو جاوے گا لیکن ایہہ اک غلط سوچ اے۔ اسیں اپنی زندگی توں انساناں نوں مائنس کر ای نہیں سکدے۔ سانوں ایہہ چیز سمجھنا چاہیدی اے کہ خوشی تے غمی اپنیاں دے نال ای منائی جاندی اے۔ جے کوئی کامیاب ہونا چاہندا اے تے اوہ اپنے سفنے’ اپنے عزائم اپنی فیملی نوں دسے۔ اوہناں نوں دسے کہ ایہہ میری زندگی دا مقصد اے جہنوں میں پورا کرنا اے تے ایہدے لئی مینوں تہاڈے لوکاں دی مدد درکار اے۔ جدوں تسیں اپنے مقصد دے نال نال اپنی فیملی تے اپنے دوستاں نوںاہمیت دیو گے تے اوہناں توں نظراں نہیں پھیرو گے تے اوہ وی تہانوں سپورٹ کرنا شروع ہو جان گے تے فیر جدوں تسیں کامیابی دی منزل اتے پہنچ جائو گے تے ایہو لوک پھل لے کے تہاڈا استقبال کر رہے ہون گے تے سب توں ودھ کے ایہہ کہ تہانوں زندگی وچ تنہائی دا عذاب وی نہیں جھیلنا ہووے گا۔
کمرہ مکمل تریک ہو چکیا سی۔ میں اٹھیا’ باریاں دے پردے برابر کیتے’ فیر لائٹ آن کردتی۔ اوہدے چہرے اتے دکھ دی ای کیفیت سی۔ میں اوہنوں ہور ڈسٹرب کرنا مناسب نہیں سمجھیا تے اوہناں دا شکریہ ادا کر کے اوتھوں نکل آیا۔