مالی سال 2022-23 لئی9ہزار502ارب روپے دا نوا بجٹ پیش

اسلام آباد( پنجابی میڈیاگروپ)وفاقی وزیر خزانہ مفتاح اسماعیل نے مالی سال 2022-23 دا 4 ہزار ارب توں ودھ خسارے دا 9 ہزار 502 ارب روپے دا بجٹ پیش کر دتا۔سپیکر راجا پرویز اشرف دی زیر صدارت قومی اسمبلی دے اجلاس وچ وزیر خزانہ مفتاح اسماعیل نے بجٹ پیش کیتا۔اجلاس وچ وزیراعظم شہباز شریف سنے ہور ارکاناں وی رلت کیتی جدکہ تحریک انصاف ولوں حسب معمول ایوان دی کارروائی دا بائیکاٹ کیتا گیا تے اپوزیشن دیاں نشستاں خالی رہیاں۔بجٹ پیش کردیاں ہویاں وزیر خزانہ نے آکھیا کہ اتحادی حکومت دا پہلا بجٹ پیش کرنا اعزاز دی گل اے، حکومت وچ ساریاں اکائیاں دی نمائندگی اے،4 ورھیاں توںمعاشی ترقی رک گئی تے قومی اتحاد تتر بتر ہو گیا، سابقہ حکومت وچ ہر شے دی قیمت ودھی، ناتجربہ کار ٹیم نے ملک نوں تباہی دے کنارے لیا کھڑا کیتا،سابق حکومت دے دور وچ عام آدمی بری طرح متاثر ہویا، غریب تے متوسط طبقے دی زندگی اجیرن ہو گئی۔ پونے 4ورھیاں وچ اک ناتجربہ کار ٹیم نے ملکی معیشت ڈبو دتی، پچھلی حکومت وچ ہر سال اک نوا وزیر خزانہ بجٹ تقریر کردا رہیا۔ایہ لوگ گل کر کے مکر جان دے ماہر نیں،ایہ عالمی اداریاںدے نال وی گل کر کے مکر گئے۔ اوہناں نے عالمی اداریاں دے ساہمنے وی اپنا موقف تبدیل کیتا، معیشت دے سٹرکچر دے وِگاڑ نوںدرست کرن لئی ریفارمز دی ضرورت ہُندی اے،پچھلی حکومت اصلاحات توں دامن چراندی اے، جس پاروں اج معیشت اپنے پیراں اُتے کھڑی نہ ہو سکی۔اوہناں نے ہور آکھیا کہ موجودہ حکومت کول ویلا بوہت گھٹ اے، اسیں ایہ ذمہ داری آئندہ حکومت اُتے پا سکدے ساں لیکن ایہ ملک دا نقصان اے۔اسیں معیشت تباہ حال ہون دے باوجود اقتدار لیا۔ الیکشن دا اعلان کردے تے ملک دوبارہ پیراں اُتے کھڑا نہ ہوسکدا۔ اوہ ساری تبدیلیاں کراں گے جس نال ملک نوں فائدہ ہوئے گا، ایہ جاندیاں ہویاں حکومت وچ آن دا فیصلہ کیتا کہ معیشت خراب اے، 2آپشن سن اک الیکشن دا اعلان کردیندے، اسیں دُوجا رستہ اپنا کے مشکل فیصلے کیتے، مشکل فیصلیاںدی کڑی اجے مکمل نہیں ہوئی، اسیں پہلاں وی کیتا تے ہُن وی کرکے وکھاواں گے۔ ترقی ہُندی اے تے کرنٹ اکانٹ خسارہ بے قابو ہو جاندا اے، ساہنوں کوئی نویں سوچ اپنانی ہوئے گی، ساہنوں امرا دی بجائے غریباں نوںسہولتاں دینا ہون گیاں، اسیں مشکل فیصلیاں لئی تیار ہاں، ساہنوں معاشی ترقی دی مضبوط بنیاد رکھنا ہوگی۔وزیر خزانہ نے دا کہنا سی کہ معشیت دے ڈھانچہ جاتی وگاڑ نوں درست کرن لئی بنیادی اصلاحات کرن دی ضرورت ہُندی اے، جس دا اک فوری منفی رد عمل وی ویکھن وچ آندا اے مگر معشیت مضبوط بنیاداں اُتے استوار ہوجاندی اے،پچھلی حکومت اینج دے اقداماں توں کُتراندی رہی، ایس لئی اوہ ساریاں اصلاحات موخر ہُندیاں رہیاں جناں پاروں اج معشیت اپنے پیراں اُتے کھڑی نہیں ہوسکی ۔ موجودہ حکومت کول بوہت گھٹ ویلا اے،اسیں بڑی آسانی نال اوہناں تبدیلیاں نوں آئندہ حکومت اُتے پا سکدے سان لیکن ایس وچ ملک دا نقصان سی، ایس لئی اسیں فیصلہ کیتا کہ اوہ ساریاں تبدیلیاں کیتیاںجان گیاں جناں نال معشیت تے ملک نوں فائدہ ہوئے گا۔مفتاح اسماعیل نے آکھیا کہ اسیں ایہ جاندے ہوئے حکومت وچ آئے ساں کہ ملک دی معشیت خراب اے، ساڈے کول دو آپشن سن، اک تاں ایہ کہ ملک نون ایسی حالت وچ چھڈ دیندے تے نویں الیکشن دا اعلان کردیندے مگر ایس طرح معشیت دا بیڑا غرق ہوجاندا تے ملک نوں دوبارہ پٹڑی اُتے چڑھانا ہور مشکل ہوجاندا،ایس لئی اسیں دوجا رستہ اپنایا تے مشکل فیصلے کرنا شروع کیتے، ایہ ہی ترقی دا رستہ اے،اسیں پہلاں وی ایہ آکھیا اے،اسیںکرسکدے ہاں تے اسیں کرکے وکھاواں گے۔ اسیں ہمیشہ قومی مفاد نوں اپنے سیاسی مفاد اُتے ترجیح دتی اے، ایس ویلے وی ساڈی اولین ترجیح معاشی استحکام اے، ساڈی معشیت دا اک بنیادی مسئلہ ایہ رہیا اے کہ اکثر معاشی ترقی دی شرح 3 تے 4 فیصد دے درمیان رہندی اے جیہڑی ساڈی آبادی دی شرح نال مطابقت نہیں رکھدی، اوس دے برعکس جَد معاشی ترقی دی شرح 5 یا 6 فیصد توں اُتے جاندی اے تے کرنٹ اکانٹ دا خسارہ قابو توںباہر ہوجاندا اے، ایس پاروں کہ اسیں معیشت نوں چلان لئی امیر طبقے نوں مراعات دیندے ہاں جس نال درآمدات ودھ جاندی اے جد کہ برآمدات اوتھے کھڑی رہندی اے۔وزیر خزانہ دا کہنا سی کہ ایس مسئلے نال نمنٹن لئی ساہنوں نویں سوچ نوں اپنانا ہوئے گا تے اک قوم دے طور اُتے ایس مسئلے دا حل کَڈنا ہوئے گا،ساہنوں معیشت نوں چلان لئی گھٹ آمدنی والے تے متوسط طبقے نوں مراعات دینا ہوئے گی جس نال مقامی پیداوار ودھے گی تے زراعت نوں وی ترقی ملے گی۔ ساہنوں غریب دے معاشی حالات نوں سنوارنا ہوئے گا، غریب طبقے نوں سہولتاں دینیاں ہون گیاں تاکہ اوس دی آمدن ودھے، جد غریب دی آمدن ودھ دی اے تے اوہ اینج دیاں شیواں خریددا اے جیہڑیاں ملک اندر تیار ہُندیاں نیں، اینج دیاں شیواںاُتے خرچ کیتی گئی رقم نال درآمدات نہیں ودھ دی، لیکن ملک اندر معاشی ترقی دا عمل شروع ہوجاندا اے، اینج کرن نال اسیں مستقل بنیاداں اُتے جامع ترقی کرسکدے ہاں۔اوہناں نے آکھیا کہ ساہنوں معاشی ترقی دی بنیاد رکھنی ہوئے گی، اینج دی مضبوط بنیاد جس اُتے مستحکم معاشی ترقی دی شاندار عمارت تعمیر ہوسکے تے جیہڑی اپنی پوری آب و تاب نال قائم و دائم رہے، ساہنوں برآمدات ودھان، زراعت، آئی ٹی سیکٹر تے صنعتی برآمدات ودھانا ہوئے گی۔ ساہنوں زرعی شعبے دی پیداوار ودھانا تے اپنی برآمدات دی مسابقت نوں وی ودھانا ہوئے گا تاکہ اوہ عالمی منڈی ہور ملکاں دی مصنوعات دا مقابلہ کرسکن، ساہنوں کاروبار کرن دے مواقع نوں آسان تے بہتر بنانا ہوئے گا تاکہ مقامی تے بیرونی سرمایہ کار ودھ توںودھ سرمایہ کاری کرن۔ ساہنوں مشینری تے خام مال دی درآمد توں بعد اوس دی ویلیو وچ ودھا کرکے برآمد کرنا ہوئے گا، ایس طرح جنی درآمدات ودھے گی اوس توں کدھرے زیادہ بر آمدات وی ودھے گی۔مفتاح اسمعیل دا کہنا سی کہ ساہنوں تباہ حال معشیت نوں درست رستے اُتے گامزن کرن دا مشکل چیلنج درپش اے، پچھلے پونے 4 ورھیاں دے دوران معاشی عدم استحکام جاری سی، تریخی مہنگائی، غیر ملکی زر مبادلہ دی مشکلاں، ودھ لاگت اُتے بے دریغ قرضے ، لوڈ شیڈنگ ورگے مسائل دا حل کَڈن وچ نکام سابقہ حکومت نے عوام دی زندگی مشکل کر دتی۔پچھلے پونے 4 ورھیاں دی بد انتظامی پاروں پاکستان مہنگائی دے حساب وچ دنیا دے وڈے ملکاں وچوں نمبر 3 اُتے اے، ساڑھے 7کروڑ لوگ غربت دی زندگی بسر کرن اُتے مجبور اے، اوہناں اُتے2 کروڑ دا ودھا پچھلے پونے 4 ورھیاں وچ ہویا جد کہ ایس دوران60لکھ لوگ بے روزگار ہوئے، اپنی پونے 4 ورھیاں دی مدت وچ سابقہ حکومت نے 20ہزار ارب روپے قرض لیا جیہڑا لیاقت علی خان تے خواجہ ناظم الدین توں لے کے ایوب خان، ذوالفقار علی بھٹو، بے نظیر بھٹو، میاں محمد نواز، شاہد خاقان عباسی تے راجا پرویز اشرف سنے سارے وزیر اعظماں دیاں حکومتاں دے 71 ورھیاں وچ لتے گئے قرضیاںدے 80 فیصد دے براب اے۔ ایس دی وجہ ایہ سی کہ اوہناں نے آمدنی توں ودھ خرچ کیتا تے پاکستان دی تریخ دے 4 بلند ترین خسارے دے بجٹ پیش کیتے، اوہناںدا اوسط بجٹ خسارہ 8عشاریہ 6 فیصد دے نیڑے رہیا، ایس دوران سالانہ تقریبا 5 ہزار ارب روپے دا قرضہ ودھایا گیا تے ایس مالی سال وچ 5 ہزار 100ارب روپے دا خسارہ متوقع اے۔اوہناں دا کہنا سی کہ ایس طرح بتی دا گردشی قرضہ اک ہزار 62ارب روپے توںودھ کے جیہڑا اسیںمئی 2018 وچ چھڈ کر گئے سن، ہن ڈھائی ہزار ارب روپے دا ہوگیا اے تے ملکی تریخ وچ پہلی وار گیس دے شعبے وچ گردشی قرضہ ویکھن وچ آیا اے جیہڑے مارچ 22-2021 وچ اک ہزار 400 ارب روپے تک پہنچ چکیا اے۔ نواز شریف دے دور حکومت وچ مہنگائی گھٹ توں گھٹ کیتی گئی، مہنگائی دی شرح تقریبا 5 فیصد دے نیڑے سی جد کہ افراط زر دی گھٹ توں گھٹ شرح 3اعشاریہ 9 فیصد ریکارڈ کیتی گئی، پچھلے پونے 4ورھیاں دی بد انتظامی پاروں پاکستان اک مستقل مہنگائی دی لہر وچ اے کیونکہ پچھلے وزیراعظم کہندے سن کہ میں پیاز تے ٹماٹر دے ریٹ ویکھن نہیں آیا بلکہ ملک نوں عظیم بنان آیا ہاں، مینوں نہیں معلوم کہ غریب آدمی مہنگائی دی چکی وچ پیس کے کوئی ملک کنج عظیم بن سکدا اے۔مفتاح اسمعیل دا کہنا سی کہ مینوں سمجھ نہیں آندی کہ عمران خان دی حکومت آندیاں ہی چینی تے آٹے دی قیمتیں کیوں ودھ گئی، 2013 وچ چینی دی قیمت 55 روپے فی کلو سی سی 2018 وچ جد اسیں گئے تے چینی دے قیمت 53 روپے سی مگر فیر 2018 توں بعد چینی دی قیمت نوں پر لگ گئے تے اوس دی قیمت 140روپے توں تجویز کر گئی۔ فیر وزیراعظم شہباز شریف آئے جیہڑے چینی دی قیمت70 روپے فی کلو اُتے لے آئے، ایسی طرح اسیں 2018 وچ آٹے دی قیمت 35 روپے فی کلو چھڈ کر گئے جیہڑے نویں پاکستان وچ ودھ کے 80 روپے فی کلو تک اپڑ گئی، فیر شہباز شریف نے یوٹیلٹی اسٹوراں تے بوہت ساریاںدکاناں اُتے آٹا 40 روپے فی کلو فراہم کرنا شروع کیتا۔اوہناں نے آکھیا کہ جد2018 وچ ساڈی حکومت گئی تے پاکستان کنک تے چینی برآمد کر رہیا ای مگر ہُن اسیں دونوں شیواں درآمد کر رہے نیں جس پاروں سابقہ حکومت دے غلط فیصلے نیں۔ ساڈے ایل این جی دے معاہدیاںاُتے جھوٹے الزام لائے گئے جس پاروں کئی رہنماواں نوں جیل کٹنا پئی، سابقہ حکومت نے کورونا دے دوران سستے ترین نرخاں اُتے معاہدے کرن دی بجائے مہنگے داماں اُتے اسپاٹ خریداری کیتی، ایس پاروں ساہنوں مہنگی ایل این جی خریدنا پہ رہی اے۔ جد عمران خان نوں فروری دے آخر وچ لگیا کہ ساڈی حکومت جارہی اے تے اوہناں نے پیٹرول تے ڈیزل دیاں قیمتاں گھٹ کیتیاں جَد کہ پاکستان دا خزانہ قرضے اُتے چل رہیا سی، ایس فیصلے نال پاکستان دی معیشت بحران وچ پھس گئی جس نوں کَڈن دی کوشش جاری اے۔