سندھ دا مقدمہ

کراچی توں 98کلومیٹر دور ٹھٹھہ شہر کئی حکومتاں دے عروج و زوال دی داستان سناندا اے۔ ٹھٹھہ جتھے اقتدار دیاں کہانیاں بیان کردا اے اوتھے اوہدی جھولی وچ تن اہم رومانوی داستاناں وی نیں۔ نوری جام تماچی دی داستان بڑی مشہور اے۔ نوری تے دوجیاں رانیاں نے الزامات لائے پر نوری نے اپنے کردار نال الزامات نوں غلط ثابت کیتا۔ اک ہور رومانوی داستان سسی پنوں دے ناں توں مشہور اے۔ سسی بھنبھور دی رہن والی سی جد کہ پنوں کیچ مکران دا رہائشی سی۔ رلا دین والی ایس عشقیہ داستان نوں شاہ عبداللطیف بھٹائی نے اپنی شاعری دا حصہ بنایا۔ اک ہور داستان سمرہ دور دی اے جو لیلا چنے سر دے بارے اے۔ ٹھٹھہ دی زیادہ ترقی جام نظام الدین دے دور وچ ہوئی اوہنے زراعت تے انڈسٹری دوہاں تے دھیان دتا۔ ہن ذرا بھنبھور دی گل ہو جاوے۔ بھنبھور نوں پہلے دیبل کہیا جاندا سی ایس حوالے نال کجھ مورخین کیٹی بندر نوں دیبل کہندے نیں پر زیادہ قرین قیاس ایہو اے کہ بھبنھور ای دیبل سی۔ ایہنوں محمد بن قاسم نے فتح کیتا۔ بھنبھور تجارت دا وڈا مرکز تے پرانا شہر سی۔ بھنبھور دے کھنڈرات نوں یونیسکو نے عالمی ورثہ قرار دتا اے۔ بھنبھور وچ میوزیم اے۔ بھنبھور وڈا تجارتی شہر سی ایتھے رونقاں ہوندیاں سن پر ایہ شہر انج اجڑیا کہ سسی دے بعد آباد نہ ہو سکیا پر اہمیت اینی کہ اج ورھیاں بعد وی ڈویژن دا ناں بھنبھور رکھیا گیا۔ شاہ عبداللطیف بھٹائی توں علاوہ شیخ ایاز نے وی سسی پنوں دی عشقیہ داستان نوں اپنی شاعری دا حصہ بنایا اے۔ پنجاب دے شاعر ہاشم شاہ نے وی ایس محبت بھری داستان نوں شعری زبان عطا کیتی اے۔
جنگ شاہی ضلع ٹھٹھہ دا اک قصبہ اے۔ ایتھے پلیجو’ جوکھیو’ بروہی تے دوجیاں برادریاں آباد نیں ایتھے چوکنڈی کراچی دی طرز تے وڈا قبرستان اے ایہدے وچ حضرت پیر جنگ شاہ دا مقبرہ اے ایسے نسبت نال ایس قصبے نوں جنگ شاہی کہیا جاندا اے۔ ضلع ٹھٹھہ دی تحصیل میرپور ساکرو سمندر دے ساحل نوں چھوہندی اے۔ سردار لقمان ملکانی’ شمشاد ساکرانی تے معروف شاعر جمال مراد گبول دے رہن والے نیں۔ میرپور ساکرو دے نیڑے ای مشہور بچوواریو دا قبرستان اے۔ ضلع ٹھٹھہ دا اک ہور معروف قصبہ گھارو اے گھارو شہر پرانا وی اے تے اہم وی’ جاکھی بندر تحصیل میرپور ساکرو وچ اے۔ تحصیل گھوڑا باری ضلع ٹھٹھہ دی اک ہور اجہی تحصیل اے جو سمندر دے نیڑے اے قیام پاکستان دے بعد تقریباً پندراں سولاں ورھے تک نصابی کتاباں وچ ایہ پڑھایا جاندا رہیا کہ قائداعظم سندھ دے پرانے تجارتی شہر جھرک وچ پیدا ہوئے۔ حقیقت وی ایہو اے۔ قائداعظم دی جائے پیدائش دے حوالے نال حیدرآباد دے اک کمشنر مسرور حسن نے بددیانتی دا مظاہرہ کیتا۔ اوہنے جھرک پرائمری سکول دا ریکارڈ منگوا کے ضائع کیتا شاید بڑے گھٹ لوکاں نوں پتہ ہووے کہ جھرک وچ قائداعظم دا گھر آغاخان اول دے گھر دے نیڑے سی۔ ایہ قدیمی تجارتی قصبہ جھرک’ کوٹری ٹھٹھہ روڈ تے واقع اے ایہ اک چھوٹی جہی بندرگاہ وی سی ایتھے علی شاہ دا محل وی سی ایتھے چھوٹے شاہ جہاں دے ناں توں مسجد وی سی ایتھے کدی ہر ویلے تجارتی کشتیاں چلدیاں رہندیاں سن۔ ایتھے چھوٹی جہی پہاڑی تے بدھ مت دا مندر سی انگریزاں نے ایس شہر دی تجارتی اہمیت پاروں 1843 وچ جھرک نوں ضلع بنایا۔ تحریک خلافت وچ ایہ شہر بڑا متحرک نظر آیا ایس دوران سیٹھ واریومیمن تے پیر مہرعلی شاہ سب تو ںاگے سن۔ قائداعظم دی جائے پیدائش دے حوالے نال رسول بخش پلیجو’ ڈاکٹر نبی بخش بلوچ تے جی اے الانا نے سچ بیان کیتا اے ہن ایہ سچ لوکاں دے سامنے رکھ دینا چاہیدا اے۔
جے ٹھٹھہ توں شخصیات دا جائزہ لیا جاوے تے فیر شاہ عنایت نوں نظرانداز نہیں کیتا جا سکدا جہدا نعرہ سی جو ہل چلاوے’ اوہ کھاوے سندھ دے ہاریاں وچ ایہ نعرہ اج وی مقبول اے۔ شاہ عنایت اللہ توں علاوہ ابوالخیر ٹھٹھوی، ابوالقاسم نقشبندی ٹھٹھوی، ابو الحسن کبیر ٹھٹھوی سندھی، ضیا الدین ٹھٹھوی ، عبدالرشید ٹھٹھوی، غازی بیگ ترخان، غلام علی مائل ٹھٹھوی، محمد بن تغلق ، مخدوم محمد ہاشم ٹھٹھوی، میر علی شہر قانع ٹھٹھوی تے نظام الدین ثانی ٹھٹھوی دے تذکرے دے بناں وی ٹھٹھہ دا ذکر ادھورا رہندا اے۔ ایسے طرح جنگ شاہی نال تعلق رکھن والے پلیجو خاندان دے ذکر دے بناں وی ٹھٹھہ دی کہانی مکمل نہیں ہوندی۔ رسول بخش پلیجو توں کون واقف نہیں۔ حمزہ خان پلیجو، غلام قادر پلیجو، امجد علی پلیجو، ڈاکٹر محمد اسماعیل پلیجو تے نامور وکیل اسد پلیجو توں سارے واقف نیں۔ سندھ دے حقوق لئی چلائی جان والیاں تحریکاں دا تذکرہ ایاز لطیف پلیجو دے بناں مکمل نہیں ہوندا۔ سینیٹر سسی پلیجو نے وی سیاست وچ خوب ناں کمایا اے۔ سندھ دی سیاست توں شروع ہو کے اوہ قومی دھارے وچ شامل ہوئیاں پر سسی دا لباس ہمیشہ سندھی ثقافت دا آئینہ دار رہیا۔ عورتاں دے حقوق لئی سسی پلیجو نے بہادری نال جدوجہد کیتی۔ جنگ شاہی توں مولوی فضل اللہ حسینی، منجم ماسٹر شوکت بروہی تے ریاض احمد بروہی نامور شخصیات وچ شامل نیں۔ (جاری اے)