کجھ کیرزماتی سیاستدان

آل انڈیا مسلم لیگ دی بتالی سالہ تریخ وچ اک وی مثال نہیں ملدی جہدے وچ قائداعظم نے جلسے دی قیادت کیتی ہووے۔ لوکاں دا لہو گرم رکھن لئی دھواں دھار تقریر کیتی ہووے’ سڑکاں تے روڈ راہواں تے قنون لاگو کرن والے اداریاں دا سامنا کیتا ہووے تے تصادم وچ آئے ہون۔ فقیر دی گل تسیں تحمل نال سنو۔ بانہواں نہ ٹنگو۔ ازروئے محاورہ کسے عوامی جلسے وچ لوکاں دے ٹھاٹھاں ماردے ہوئے سمندر دے سامنے تقریر کردے ہوئے قائداعظم نے کدی مہاتما گاندھی’ پنڈت جواہرلال نہرو تے دوجے کانگریسی قیادت دے خلاف نازیبا زبان استعمال نہیں سی کیتی۔ ہندوستان وچ علماء تے دانشوراں دی اک بہت وڈی گنتی ہندوستان دی ونڈ دے حق وچ نہیں سی۔ قائداعظم نے اوہناں نوں کدی غدار نہیں سی کہیا۔ اوہناں دے خلاف کدی توہین آمیز کلمات منہ چوں نہیں سن کڈھے۔ گھٹ بولدے سن’ سیاستداناں وانگوں لوکاں تے نظر پیندیاں ای بولناشروع نہیں سن کر دیندے۔ لوڑ توں ودھ اک لفظ نہیں سن بولدے۔ تنہائی پسند سن۔ اکلا رہنا اوہناں نوں چنگا نہیں سی لگدا۔ میں قائداعظم نوں سیاستدان دی تھاں مدبر سمجھنا واں۔ اک سیاستدان لازمی طور تے امور مملکت تے دسترس نہیں سی رکھدا پر اک مدبر’ امور مملکت تے دسترس رکھن والا بندہ’ سیاست دی سائنس دا مکمل ادراک رکھدا اے۔ ایس لئی اج دے زیربحث موضوع توں میں قائداعظم نوں دور رکھنا چاہنا واں۔ ہندوستان دی ونڈ تے انگریز نوں راضی کرنا آل انڈیا مسلم لیگ دے سیاستداناں دے وَس دی گل نہیں سی۔ 1920-21ء دے آل دوالے قائداعظم خفا ہو کے واپس انگلستان چلے گئے سن۔ سراسیمگی دے عالم وچ آل انڈیا مسلم لیگیاں نوں سمجھ وچ نہیں سی آ رہیا کہ اوہ انگریز نال گل بات جاری رکھن’ تے کس طرح جاری رکھن۔ اوہناں دے کول انگریزی زبان تے عبور رکھن والا قائداعظم دے پائے دا مدبر ہور کوئی نہیں سی۔ دو ورھے بعد لیاقت علی خان اک وفد لے کے لندن گئے۔ وفد وچ رعنا لیاقت علی خان’ سرعبداللہ ہارون تے دو چار دوجے مسلم لیگی شامل سن۔ قائداعظم واپس آئے تے اک مدبر ہون دے ناطے گل بات تے بحث مباحثیاں وچ استدلال نوں سیاست وچ استعمال کیتا۔ اپنا نقطہ نظر بیان کرن لئی اوہناں نوں کسے نے وی چیکدے چلاندے تے ڈائس تے مکے ماردے ہوئے نہیں سی ویکھیا۔ تحمل اوہناں دی غیرمعمولی کامیابیاں دا سب توں وڈا کارن سی۔ اوہ پہلے مدبر تے بعد وچ سیاستدان سن۔ قائداعظم نے سیاست دوران کدی شرافت نوں ہتھوں نہیں جان دتا۔ بہتر اے کہ اج کل دی سیاست توں اوہناں نوں اسیں محفوظ رکھیے۔
پاکستان دی سیاست وچ پہلے کیرزماتی سیاستدان شیخ مجیب الرحمن سن۔ اوہناں نوں ویکھن تے سنن لئی پورا مشرقی پاکستان دیوانہ وار جلسہ گاہواں دا رخ کردا سی۔ بیمار تے ناداراں نوں چھڈ کے شاید ای کوئی بچہ’ بڈھا’ جوان’ مرد’ عورت گھر تے بیٹھنا جائز سمجھدے ہون۔ اوہ سب شیخ مجیب الرحمن دی کیرزماتی کشش توں کھچے ہوئے’ ہجوم در ہجوم جلسیاں وچ اپڑ جاندے سی۔ یاد رہوے کہ مشرقی پاکستان دی آبادی مغربی پاکستان دی آبادی توں ودھ ہوندی سی۔ مغربی پاکستان وچ چار صوبے پنجاب’ بلوچستان’ صوبہ سرحد (ہن پختونخوا) تے سندھ ہوندے سن۔ اک اکلا مشرقی پاکستان دا صوبہ ایہناں ساریاں تے بھاری ہوندا سی۔ قومی اسمبلی وچ اوہناں دیاں سیٹاں وی زیادہ ہوندیاں سن۔ مشرقی پاکستان دی زیادہ سیٹاں تے ساڈے ورگے عام اللہ سائیں دے بندے بیٹھے ہوندے سن۔ اوہناں نوں ویکھ ویکھ کے مغربی پاکستان دے چوہاں صوبیاں دے سردار’ جاگیردار’ رئیس’ وڈیرے’ خان تے سردار تلملا اٹھدے سی۔ مشرقی پاکستان دے کول اک کیرزماتی بندہ شیخ مجیب الرحمن ہوندے سن کہن والے کہندے نیں کہ شیخ مجیب الرحمن دے کول اجیہا کرشماتی کیرزما سی کہ اوہ جے چاہندے تے مردیاں وچ جان پا سکدے سن ایہ کہن والے کہندے نیں۔ میں نہیں کہندا۔مشرقی پاکستان مردم خیز حصہ سی پاکستان دا۔ اک توں ودھ کے اک پڑھے لکھے دانشور سیاستدان ہوندے سن۔ مشرقی پاکستان وچ نورالامین’ خواجہ ناظم الدین’ حسین شہید سہروردی’ ابوالحسن سرکار’ فضل الحق بھاشانی’ محمدعلی بوگر تے ایسے اعلیٰ پائے دے دوجے کئی سیاستدان مشرقی پاکستان دی سیاست تے چھائے ہوئے سن پر شیخ مجیب الرحمن وچ کجھ ہور سی۔ قدرت نے اوہنوں کیرزما نال نوازیا سی۔ کیرزما وی ایسا ویسا نہیں۔ سنن والیاں نے ٹھاٹھاں ماردے سمندر دیاں گلاں سنیاں نیں۔ میری نسل نے شیخ مجیب الرحمن دے سامنے لوکاں دا ٹھاٹھاں ماردا سمندر ویکھیا سی۔ پتہ نہیں کیسا جادو سی۔ شیخ مجیب الرحمن وچ کہ لوک اوہدے اک اشارے تے جان نچھاور کرن لئی تیار رہندے سن۔ اوہناں نوں بابائے بنگلہ دیش کہیا جاوے تے شاید غلط نہیں ہووے گا۔
دوجا کیرزماتی بندہ جہنوں اسیں پاکستان تے چھایا ہویا ویکھیا سی اوہ سن ذوالفقارعلی بھٹو’ اوہناں دے جلسے جلوساں وچ ان گنت تے بے حساب لوک دیوانہ وار ویکھے جاندے سن۔ اوہناں نوں تقریر کرن دا فن سکھایا سی معراج محمد خان نے۔ اک واری سٹیج تے آن دے بعد لوکاں دا سمندر ویکھ کے ذوالفقار علی بھٹو دنگ رہ گئے سن۔ معراج محمد خان نے اک جملہ اوہناں دے گوش گزار کیتا سی تے اوہ جملہ ذوالفقار علی بھٹو دا ہردلعزیز جملہ بن کے سامنے آیا سی۔ لوکاں ول اشارا کردے ہوئے معراج محمد خان نے کہیا سی عوام تہاڈی طاقت دا سرچشمہ نیں۔
بینظیر بھٹو دی شخصیت وی کیرزماتی سی پر جو کیرزما اسیں الطاف حسین وچ ویکھیا اوہدے ورگا کیرزما اسیں صرف شیخ مجیب وچ ویکھیا سی۔ شیخ مجیب دے بعد اسیں صرف اک الطاف حسین تے لوکاں نوں جان نچھاور کرن دے جذبے نال مامور ویکھیا سی۔ تسیں الطاف حسین نال لکھ اختلاف رکھو’ پر پاکستان دی 75 سالہ تریخ وچ فیر کدی الطاف حسین ورگا کیرزماتی بندہ اسیں نہیں ویکھیا۔ لوک اوہناں دی Hero Worship کردے سن۔ اوہناں دی پرستش کردے سن اوہناں لئی مرمٹن نوں تیار رہندے سن۔ کدی کدی تے اوہ دیومالائی کردار لگدے سن۔ میں اوہناں دا عروج تے اوہناں دی جلاوطنی ویکھی اے۔ کیرزماتی لوکاں دے بارے اک گل سانجھی اے۔ کیرزماتی لوک زیادہ تر المناک موت مردے نیں جیویں مہاتما گاندھی’ اندراگاندھی’ شیخ مجیب الرحمن’ ذوالفقارعلی بھٹو تے اوہناں دی دھی بینظیر بھٹو۔٭٭