حمزہ شہباز دا صبروتحمل

چوہدری پہلی فہرست تے اعلیٰ پائے دے سیاستدان کدی نہیں رہے پر گجرات وچ اوہناں دے رکھ رھائو’ ملنساری تے گجرات پروری پاروں اک معتدل جیہا پنجاب نال رغبت رکھن والا عکس ضرور بن گیا سی جہنوں پہلا دھچکا تے مشرف دی غلامی’ اوہنوں سو سال وردی والا صدر ویکھن دی خواہش عوامی خاہشاں نال متصادم رہی تے اوہناں نوںمعتبر ادارے دا زبردستی دا غلام ثابت کردی رہی ایہدے باوجود 1122 تے چار چھ کماں نے کجھ امیج بنایا ای سی کہ پرویزالٰہی دا وزارت اعلیٰ دے منصب لئی پی ٹی آئی تے پی ڈی ایم دے پلے گرائونڈ وچ شٹل کاک بن جانا اوہناں دی ساکھ نوں کافی گرا گیا ایہدے تے ای بس نہیں سیاسی فٹ بال گرائونڈ وچ متضاد ککس لان تے بہت ٹھڈے وی پئے اوہناں نے وزیراعلیٰ بنن لئی ہر دائو پیچ کھیڈیا’ قنون دیاںدھجیاں اڑ کے پنجاب اسمبلی نوں اکھاڑا بنا دتا ایس توں پہلاںکہ عدالت منحوف ارکان نوں جرم دے بعد سزا دیندی موصوف نے پہلے ای عدالت لا کے پرتے’ ہیلمٹ’ گھن برسوا دتے ایہو نہیں ڈپٹی سپیکر دے بال وی کھچوائے’ نوجوان پولیس والیاں نال موٹیاں تازیاں عورتاں بھڑوا دتیاں۔ لڑا دے اسمبلی کو شہباز سے دے مصداق فتح دے اشارے کردے رہے۔ اینی ڈاڈھی مارکٹائی جتھے وی ہووے گی ریاست یعنی پولیس فورس تے جاناں بچان آوے گی۔ پنج مئی نوں جے پولیس اسمبلی وچ نہ آندی تے پنج ست بندے مر جاندے تے وی ریاست تے بھار آندا۔
جیویں قومی اسمبلی وچ اپنی واضح شکست ویکھدے ہوئے پی ٹی آئی دے بڑھک ماراں نے ہر حربہ آزمایا کدی اوہنوں امریکی سازش کہیا کدی عدالت تے فورسز نوں مجرم ٹھہرایا نہیں گیا تے عدم اعتما ددا سامنا نہیں کیتا۔ ایہو حال پنجاب اسمبلی دا ہویا۔ حمزہ شہباز پوری گنتی دے نال وزیراعلیٰ بنے تے حلف نہیں اٹھان دتا گیا۔ گورنر تے صدر اپوزیشن لیڈر بن کے بہہ گئے اسمبلی آئو تے ماراں گے کدھرے ہور جائو تے غیرقنونی کہواں گے۔ گورنر انج اپنی کرسی نال چمڑیا کہ جیویں پرویزالٰہی پنجاب اسمبلی نال جن جپھا پا کے لمک گیا۔
پی ٹی آئی دے ہر رکن وانگوں پرویزالٰہی نے وی ثابت کیتا کہ اوہ معزز ایواناں دے قابل نہیں سن جہدی گندی مثال ایہ دتی کہ باراں کروڑ لوکاں دا پنجاب بجٹ ڈک کے موصوف ایس شرط تے ڈٹ گئے کہ پہلے ساڈے مقدمے ختم کرو حالاں کہ ایہ کتھوں دا قنون اے کہ بجٹ مشروط پاس ہووے کہ پرویزالٰہی دے مقدمے ختم کیتے جان انج وی گورنمنٹ ازخود مقدمیاں نوں کیویں ختم کر سکدی اے۔ ایہ وی پہلی واری ہویا کہ ذاتی شرطاں بجٹ اجلاس دی راہ وچ رکاوٹ بنا دتیاں گئیاں۔ ایہدے تے وی بس نہیں کیتا پنجاب دا بجٹ کیہ ایناں بے توقیر اے کہ پرویزالٰہی دی ذاتی انا دے ڈھائے چڑھا دتا جاندا اک بندہ جے کسے عہدے تے بیٹھا بیٹھا ذہنی توازن کھو دیوے تے ایس گل تے آئی جی تے چیف سیکرٹری نوں سدے کہ پنج مئی نوں کھل کھلا کے ہور مار کٹائی کیوں نہیں کرن دتی ایس لئی اوہدے سامنے معافی منگی جاوے نہیں تے اوہ بجٹ پیش نہیں کرن دیوے گا۔
سچ کہندے نیں ایہ دنیا اک بازار اے تے ایتھے جے اپنے آپ دی مناسب قیمت نہ لائی جاوے تے بندہ شوکیس وچ پیا سڑدارہندا اے۔ ایہو پرویزالٰہی دے نال ہویا سپیکر دی کرسی وی بے توقیر ہوئی تے شرطاں وی حد توں ودھن دی وجہ نال انجے ای رہ گئیاں تے اجلاس اٹھ کے کدھرے ہور چل پیا۔ دنیا دے کم وی کدی رکے نیں پر کار سرکار وچ مداخلت کرن والے رُل جاندے نیں۔ آئی جی تے آئی جی میں سمجھنی آں کہ کسے دی ذاتی تسکین لئی اک سپاہی تے چیف سیکرٹری دی تھاں اک کلرک نوں وی کسے دی ذاتی عدالت وچ پیش نہیں ہونا چاہیدا۔ سارے جان دے نیں کہ بجٹ یک نجاتی ایجنڈا ہوندا اے۔ اوس دن نوں دوجے معاملیاں لئی استعمال نہیں کیتا جا سکدا۔ حمزہ شہباز نے بڑا چنگا کیتا بلیک میل نہیں ہوئے تے بطور وزیراعلیٰ اک مضبوط کردار دا مظاہرہ کیتا گھٹ عمر ہون دے باوجود اک ضدی ڈھیٹ بزرگ دے سامنے تحمل تے صبر دا مظاہرہ کیتا۔ ایہ تربیت اوہناں نوں اوہناں دے خاندان توں ملی اے ایس توں علاوہ بڑی گھٹ عمری وچ اسیری’ یرغمالی تے خانہ ویرانی ورگیاں اوکڑاں جھل چکے نیں جو ہن بطور وزیراعلیٰ اوہناں دے کم آ رہیاں نیں۔
پرویزالٰہی دا سیاسی کیریئر جس برے اندا ز وچ ختم ہو رہیا اے ایہدے توں ثابت ہوندا اے ہن تک وی ٹکے رہن دے پچھے صرف چوہدری شجاعت دی فراست سی تے جیویں کہ ہر بندے دی اولاد ای اوہدا امتحان ہوندی اے۔ چوہدری پرویزالٰہی مونس دے مقدمیاں دی وجہ نال پی ٹی آئی دے ہتھوں کھڈونا بنے رہے وزارت اعلیٰ دی دھن اجہی پکی رہی کہ کسے ہور نوں وزیراعلیٰ بنے ویکھ ای نہیں سکدے جلدبازی وچ عمران خان دیاں نیپیاں بدلن ورگے بیان دیندے رہے۔ اوہناں نے وی نیپیاں والے بیان نوں نظرانداز کرکے پرویزالٰہی نوں خوب استعمال کیتا کہ اوہ جان دے سن کہ اوہ وزیراعظم نہیں رہے تے ایہ وزیراعلیٰ کیویں ہو سکدا اے۔ جتھوں تک نظراندازی دی گل اے اصولاںدا علم چکن والے عمران خان نے پرویزالٰہی نوں پنجاب دا سب توں وڈا ڈاکو قرار دتا۔ یاں تے ایہ لوگ من جان کہ اوہناں دے جملیاں نوں سیریس نہ لیا جاوے جیویں اوہناں دے وعدے جھوٹے انج ای محبتاں وی اخلاص توں عاری تے نفرتاں وی خالص نہیں۔٭٭