اک شام عتیق انور راجہ دے نام

پچھلے دناں بی بی سی نیوز دے دفتر وچ منے پرمنے شاعر’ کالم نگار’ صحافی تے سماجی خدمت گزار راجہ عتیق انور دے نال اک شام منائی گئی جہدے وچ بندہ ناچیز وی شامل سی۔ ساڈے ہاں رواج تے مونث چیزاں دے نال شام منان دا اے مگر راجہ عتیق انور دے نال منا کے وی دلی خوشی ہوئی۔ تاہم BBC دے دفتر نوں جے اردو وچ لکھیا جاوے بی بی سی تے ایہہ تاثر ملدا اے کہ کوئی” بی بی” سی’ یعنی کوئی زنانی سی۔ کسے ادبی تقریب دی اہمیت علمی ادبی شخصیات ای جاندیاں نیں۔ ہر علمی’ ادبی شخصیت نوں اس طرح دی محفلاں وچ دلی تسکین ملدی اے جہڑی اوہنوں کسے وڈے بندے دی محفلاں وچ نہیں ملدی۔ ایس پروقار تقریب وچ شاعراں’ کالم نگاراں’ ادیباں تے مختلف شعبہ ہائے زندگی دے لوکاں نے رلت کیتی تے عتیق انور راجہ دی علمی ادبی خدمات نوں سراہیا گیا۔ اوہناں دی شاعری تے سماجی خدمات دے حوالے نال اوہناں دی کوششاں نوں خراج تحسین پیش کیتا گیا۔ راجہ عتیق انور نے بہت سارے نویں لکھن والیاں دی حوصلہ افزائی کیتی اے۔ اوہناں دے مضمون تے کالم شائع کران وچ کردار ادا کیتا تے نوجواناں نوں شاعری ول وی راغب کیتا تے جسٹس دین محمد لائبریری نوں آباد کرن’ اوہدی تزئین و آرائش لئی جدوجہد کیتی جہدے وچ خواجہ شجاع اللہ دا نام وی بڑی اہمیت دا حامل اے جہناں نے مالی تعاون کیتا۔ تقریب دا آغاز تلاوت قرآن پاک نال ہویا تے نعت دے بجائے تمام حاضرین نے آقائے کائنات دے حضور درود پاک دا نذرانہ پیش کیتا۔ محترمہ راحت ثمر نے نقابت دے فرائض سرانجام دتے جہدا اوہناں نوں ضرور ثمر ملے گا۔ ایہہ تقریب دو ادوار اتے مشتمل سی۔ پہلا دور کالم نگاری دے حوالے نال سی تے راجہ عتیق انور دی شخصیت دے حوالے نال سی جہدی صدارت سینئر کالم نگار سلیمان کھوکھر نے کیتی تے دوجا دور شاعری دا دور سی جہدی صدارت منے پرمنے شاعر شوکت ڈار نے کیتی۔ حاضرین وچ موجود سارے شاعراں نے اپنا اپنا کلام پیش کیتا جہنوں سارے حاضرین نے میرے سنے پورے شوق دے نال سنیا مگر کسے وی مرد دی تصویر شائع نہیں ہوئی۔ ہمیشہ فوٹو گرافر خوبرو دوشیزہ دی پرکشش تصویر ای شائع کردے تے تھلے ایہہ کیپشن درج کردے نیں کہ اک زنانی جہڑی پورے شوق نال پیش کیتا جان والا کلام سن رہی اے۔ اسیں وی خود ایہہ شوق طاری کرن دی بھرویں کوشش کیتی مگر کدی کسے فوٹوگرافر نے ساڈا انتخاب نہیں کیتا۔ ایہہ سعادت محفل نعت دا کوئی فوٹو گرافر ای حاصل کریگا مگر اوتھے وی ایہہ پرابلم آڑے آ جاندی اے جہڑے نوٹ نچھاور کرن والے حضرات ہوندے نیں اوہو توجہ دامرکز ہوندے نیں جہڑے صرف اللہ دی رضا لئی گئے ہوندے نیں اوہ توجہ دا مرکز نہیں ہوندے۔ درحقیقت جہڑے اللہ لئی گئے ہوئے نیں اوہناں نوں نمائش دی آرزو وی نہیں ہوندی۔ جنید بغدادی آکھدے نیں کہ میں اخلاص اک حجام کولوں سکھیا۔ میرے استاد نے آکھیا تہاڈے بال بہت ودھ گئے نیں ایہناں نوں کٹوا کے آنا۔ میری جیب وچ پیسے نہیں سن۔ حجام دی دکان دے سامنے پہنچیا اوہ اک گاہک دے وال کٹ رہیا سی۔ میں عرض کیتا چاچا اللہ دے نام تے وال کٹ دیو گے۔ ایہہ سندے ای حجام نے گاہک نوں سائیڈ تے کیتا تے آکھن لگیا۔ پیسیاں لئی تے روز کٹنا واں اللہ لئی اج ای کوئی آیا اے۔ میرا سر چم کے کرسی اتے بٹھایا روندے جا رہیا سی تے بال کٹدے جا رہیا سی۔ جنید بغدادی آکھدے نیں میں دل وچ سوچیا کہ زندگی وچ جدوں وی کدی پیسے آئے تے ایس حجام نوں ضرور دواں گا۔ عرصہ گزر گیا جنید بغدادی بہت جید درویش تے بزرگ بن گئے۔ اک دن اوس حجام نوں ملن لئی گئے تے واقعہ یاد دوایا تے کجھ رقم پیش کیتی تے حجام آکھن لگیا جنید توں اینا وڈا صوفی بن گیا ایں تینوں اینا نہیں پتہ چلیا کہ جہڑا کم اللہ لئی کیتا جاوے اوہدا بدلہ مخلوق کولوں نہیں لیندے۔ ایس خوبصورت شام وچ سارے شرکا نے خطاب کیتا جہدے وچ بندہ ناچیز وی شامل سی۔ یعقوب مغل’ راجہ افضال عزیز’ سیف اللہ سیکھو’ ثقلین’ مفتی عمران وغیرہ شامل سن۔ سردار سجاد’ عاصم شہزاد’ عثمان اشرف نے وی خطاب کیتا۔ شاعراں وچ شوکت ڈار’ محترمہ عرفانہ امر’ روبینہ ناز تے محترم راحت ثمر نے اپنا اپنا کلام پیش کیتا۔ محترمہ سونیا نے صرف پورے شوق نال سب نوں سنیا۔ شاعری وچ سارے شاعراں دا کلام خوب سی۔ قابل داد سی۔ تاہم رمضان تائب نے خوب داد حاصل کیتی۔ تقریب دے اختتام تے دعائیہ کلمات ادا ہوئے۔ شوکت ڈار تے سلیمان کھوکھر نے صدارتی خطاب کیتے تے تقریب دے لاڑے راجہ عتیق انور نے پروہنیاں دا شکریہ ادا کیتا۔ سارے حاضرین اگلی شام دے منتظر نیں تے اگلی شام وچ شرکا مجلس پیدل چل کے آن گے کیوں جے پٹرول بہت مہنگا ہو گیا اے۔ عام بندے دی رینج توں باہر ہو گیا اے ایس لئی اگلی شام کسے وی گنجان آباد ایریا وچ رکھ لیتی جاوے تے موٹرسائیکلاں پارک کرن دا مسئلہ نہیں ہووے گا۔ ایہہ وی ہو سکدا اے تسیں ایس عنوان نال شام منائو۔ آخری شام پٹرول دے نام جہدے وچ حکمراناں نوں ایہہ گل بخوبی سمجھائی جاوے کہ تسیں عالمی منڈی توں پٹرول دے نرخاں دا موازنہ کردے او۔ ساڈے ذرائع آمدن وی امریکہ’ یورپ’ جاپان’ آسٹریلیا دے مطابق ودھائے جان۔ آمدن اوہناں توں ہزار گنا گھٹ تے پٹرول دی قیمت اوہناں دے مطابق ساڈے حکمراناں نوں اللہ ہدایت دیوے اوہناں نوں کسے دے حالات دی خبر نہیں۔ بھک افلاس دے ہتھوں لوکاں دی خودکشیاں دی پرواہ نہیں کسے دے گھر چولہا جلایا نہیں بس اوہناں دا نعرہ اے۔
یہ نغمہ فصل گل و لالہ کا نہیں پابند
بہار ہو کہ خزاں لا الہ الا اللہ