فقیر میاں رحمت ، حیاتی شخصیت تے تصانیف

توں میرا وی ہک کم کر کہ مینوں ایہو جئی ڈاچی لیا کے دے ہور ایہو جئی کسے سردار کول وی نہ ہووے جہڑی میری ای سواری ہووے۔ رحمت ایہ کم کرن لئی تیا ر ہو گیا تے آکھن لگا کہ تہاڈا ہک بندا مینوں ایہ دسی کہ تہانوں کہڑی ڈاچی چنگی لگدی اے مُڑ بھاویں پچھاں ہٹ آوے۔
شاہ جی ہوراں نے اپنے بندے نوں کن وچ ایہ گل کیتی کہ اس نوں ایہو جئے بندے دی ڈاچی وکھاونی اے جس توڑیں ایہ گبھرو نہ اپڑ سکے۔ وچلی گل تاں ایہ سی جوں تھینہہ دا سردار اس شادی نوں ٹالنا چاہندا سی۔ اوہ تاں وچوں وچوں راضی کوئی نہیں سی۔ میاں رحمت نے تیاری چا وَٹّی تے سردار دا بندہ(گہنہ نائی) تے اپنے کجھ سنگتی نال لَے کے دریا چنہاں دے نال نال ٹُردے ٹردے جھنگ توں اگاں نکلے تاں سکھ سردار مہاراجہ اپنی فوجاں تے نوکراں چاکراں نال شکار کھیڈدا پیا سی ۔ ڈاچیاں ویکھیاں تے گہنہ نائی آکھن لگا کہ شاہ ہوراں لئی ایہ ڈاچی چنگی لگسی۔ ایہ دس کے پرت آیا۔
جد مہاراجہ شکار کر کے پِچھاں پرتیا تے احمد پور سیال دے نیڑے اپڑِن لگا تاں آپ نے سوچیا کہ جے ھُن ایہ کم نہ ہویا تے وَت نہیں ہو سکدا۔ جے مہاراجہ دیاں ڈاچیاں تے گھوڑے اصطبلاں وچ اپِڑ گئے تاں وت ڈاچی کھولنی اوکھی ہو ویسی۔ اوہناں سوچیا ھُن تاں کجھ کرنا ای پونا اے۔
جس ویلے مہاراجہ دے سپاہی دوپہراں دا ٹُکر کھاون لگے تاں اپنے ڈنگر بنھ کے تھوڑا جیہا اوہناں توں دور ہوئے تاں آپ تے آپ دے سنگیاں نے مہاراجہ دی ڈاچی لُکا کے اُس تے چڑھے تے ڈاچی نوں بھَجاونا شروع چا کیتا۔ ادوں سِکھ سردار نوں پتا لگ گیا سی کیوں جے ایہ واقعہ چِٹے دیہیں دا جو سی۔ واہر پِچھوں لگ گئی۔ جداں آپ دربار حضرت باہو سلطان دے نیڑے اپڑے تاں مہاراجہ دی فوج نے پِچھوں ہکلیا۔ تاں آپ تے آپ دے سنگیا ںنے ڈاچی نوں مارنا شروع چا کیتا کیوں جے ڈاچی تِرکھی بھجے پر ڈاچی تھکی ہوئی سی۔ اگاں اس ہک پیر ای نہ پٹیا تے دربار دے ساہویں پتھلا مار کے بہہ گئی۔ فوج سر تے چڑھ آئی تے ساری ڈاچی نوں چھوڑ کے نس پئے۔
میاں رحمت دربار سخی سلطان باہو دے اندر جا وڑے۔ اپنی کیتیاں دی معافی منگی تے مزار وچ اکھیوں اوہلے ہو گئے۔ مہاراجہ دی فوج نے اُتھے اپڑ کے دربار دے متولی کولوں پُچھیا ساڈا چور دربار دے اندر آ وڑیا اے۔ اوہناںآکھیا آپ ای لبھ لیئو تے لَے جائو۔ اوہناں نوں اُتھے کوئی جی نہ دِسیا تے جدوں اوہناں باہر آ کے ویکھیا تے ڈاچی دی جنس بدل گئی سی۔
آپ حضرت سلطان باہو دے مزار وچ وڑ ے تاں سلطان باہو نے فرمایا رحمت بوہا لاہ کے اندر آجا۔ آپ اندر آئے تاں اُتھے پنج ہستیاں(حضرت محمدۖ، حضرت علی، حضرت فاطمہۖ، حضرت پیر غوثِ اعظم تے حضرت سلطان باہو) دی زیارت ہوئی۔ اِتھوں ای رحمت دے من دی میل دھوتی گئی تے اُس تے کُلی رحمتاں دے بوہے کُھل گئے۔
کربلا دا پورا واقعہ آپ نوں وکھایا گیا۔ معرفتِ الٰہی تے عشقِ حقیقی اوہناں دی لُوں لُوں وچ دھا گیا۔ (جاری اے)