”کیکر دے کنڈے اج وی”

چین پاکستان دے بعد آزاد ہویا۔ جرمنی دی دوجی جنگ عظیم وچ تباہی پھر گئی سی۔ امارات دی آزادی تریخی تناظر وچ ویکھو تے کل دی گل اے۔ اج ایہ ملک ترقی و خوشحالی دے عروج تے نیں۔ ایہدا کیہ کارن اے۔ ایہدی وجہ چنگی حکمرانی’ محنت تے لگن نال ملک و قوم نوں ترقی دی منزل نال ہمکنار کرن دا جذبہ اے۔ اسیںاوہناں دے مقابلے وچ دو قدم اگے لینے آں تے اک قدم پچھے کھچ لینے آں۔ کدی دو قدم اگے تے تن قدم پچھے۔ ایہدے توں لگدا اے مسافر چل رہیا اے پر منزل نہیں آ رہی۔ کدی پاکستان چین تے جرمنی دی مدد کردا سی۔ اج اسیں اوہناں دے سامنے ٹھوٹھا لے کے کھڑے آں۔ جاپان تے جرمنی دا مکمل تباہی دے بعد ترقی و خوشحالی دیاں منزلاں طے کرنا اک عظیم الشان کارنامہ اے۔ ایس قوم دے ہر بندے نے محنت کیتی۔ متحدہ عرب امارات دیاں ریاستاں تیل دی دولت نال بھریاں سن۔ سعودی عرب نوں وی تیل نے ای ترقی و امارت دی منزل نال جوڑیا پر ایہ دولت وی اک پلاننگ دے تحت استعمال کرنی ہوندی اے۔ امارات نوں متحد کرنا تے رکھنا وڈا کارنامہ اے نہیں تے تیل وی اوہناں دے کم نہ آندا۔
پاکستان وسیلیاں دے حوالے نال کسے ملک توں گھٹ نہیں دنیا دے کسے وی ملک دے پٹرولیم دے ذخائر دی مالیت دے نیڑے نیڑے پاکستان وچ کوئلے دے ذخائر نیں۔ پٹرول تے گیس وی دستیاب اے تے سب توں ودھ کے پاکستان وچ سونے دیاں کاناں تے دنیا دے سب توں قیمتی پتھر دے پہاڑ نیں۔ ایہ پتھر گھڑیاں وچ جول دے طور تے استعمال ہوندا اے۔ فیر پاکستان وچ چار بہترین موسم’ کئی فصلاں پنج واری ہوندیاں نیں۔ سیاحتی تھاواں دا کیہ شمار کرایا جاوے پر جے ہے تے پلاننگ دی کمی اے تے ایس توں ودھ کے لیڈرشپ دا بحران اے۔ قائد ورگے لیڈر کدی قوم دے مقدر وچ نہ آ سکے۔ قیام پاکستان دے بعد باکمال لیڈر شپ دی اینی لوڑ وی نہیں سی۔ قائد دے فکروفلسفے تے سوچ نوں اگے ودھان والی قیادت دی لوڑ وی ذوالفقارعلی بھٹو تے ہن عمران خان دی صورت وچ اجہی قیادت پاکستان نوں ملی۔ قیام پاکستان دے شروع وچ جہڑا جذبہ سی اوہ ہولی ہولی گھٹدا گیا۔ کیکر دے کنڈیاں توں پیپرپن دا کم ساڈے بیوروکریٹ لیندے سن۔ قائداعظم تے لیاقت علی خان نے اپنی جائیداد قوم دے ناں قربان کر دتی۔ ایہ جذبہ وی فروغ نہ پا سکیا سگوں ایہدے الٹ جائیداداں بنان دی اک ہوس نظر آئی۔ اک دوڑ لگ گئی’ جہدے وچ سیاستدان تے بیوروکریٹ اک ای صف وچ نظر آئے۔ ایہ نہیں کہ سیاستدان تے بیوروکریٹ ایمان تے دیانت توں تہی دامن ہو گئے سن۔ اجہے ضرور موجود رہے پر بیڑہ غرق بیمار ذہنیت نے کیتا۔ کرپٹ مائنڈسیٹ نے کیتا۔ میں ایتھے نظام حکومت دی بحث وچ نہیں پیندا ایوب خان ڈکٹیٹر سی اوہدے دور وچ ریکارڈ ترقی ہوئی۔ ذوالفقارعلی بھٹو دا دور کجھ معاملیاں توں ہٹ کے سنہری دور سی۔ اک موقع سی پاکستان وچ شامل ریاستاں سعودی عرب دی مدد کردیاں سن ہن ساڈے حکمراناں دے کاسہ گدائی نوں اوتھوں خالی پرتا دتا جاندا اے۔ چنگی پلاننگ ہووے تے اسیں اج وی ترقی و خوشحال دیاں منزلاں طے کر سکنے آں۔ ویرانیاں ساڈا مقدر کیوں نیں اسیں ترقی دے سفر وچ ایناں پچھے کیوں رہ گئے۔ ایس سوال دے جواب لئی تھلے دتے اقتباس ملاحظہ فرمائو:
سعادت حسن منٹو لکھدا اے کہ میں ڈاڈھی گرمی دے مہینے وچ ہیرامنڈی چلا گیا۔ جس گھر وچ گیا سی اوتھوں دی نائیکہ دو عدد ونڈو ائیرکنڈیشنڈ چلا کے اپنے اُتے رضائی پا کے سردی نال کنب رہی سی۔ میں کہیا کہ میڈم دو اے سی چل رہے نیں تہانوں ٹھنڈ وی لگ رہی اے تسیں اک بند کر دیو تاں جے تہاڈا بل وی گھٹ آوے اوہ مسکرا کے بولی کہ اساں کہڑا ایہ بل اپنی جیب وچوں دینا اے۔ منٹو کہندے کہ کافی سال گزر گئے تے مینوں گوجرانوالہ اسسٹنٹ کمشنر دے کول کسے کم لئی جانا پے گیا۔ ڈاڈھی گرمی دا موسم سی صاحب جی ڈاڈھی گرمی وچ وی پینٹ کوٹ پائے بیٹھے سن تے دو ونڈوایئر کنڈیشز فل آب و تاب دے نال چل رہے سن تے صاحب نوں سردی وی محسوس ہو رہی سی۔میں کہیا جناب اک اے سی بند کر دیو تاں جے بل گھٹ آوے گے تے صاحب بہادر بولے’ اساں کہڑا ایہ بل اپنی جیب وچوں دینا اے۔ منٹو کہندا اے کہ میرا ذہن فوراً اوسے محلے دی نائیکہ ول چلا گیا کہ دوہاں دے مکالمے تے سوچ اکو جہی سی اودوں میں پورا معاملہ سمجھ گیا۔ یعنی ایس ملک دے سارے ادارے انج دی ای نائیکہ سوچ رکھن والے بندیاں دے ہتھاں وچ نیں۔
دوستو! کدی کسے اک بندے دی ذاتی ترقی قوماں دی زندگی وچ کوئی وڈا کردار ادا نہیں کردی جدوں تک کہ پوری قوم اجتماعی جدوجہد’ محنت تے ایمانداری نال اپنے فرائض پورے نہ کرے تے میرے خیال وچ جدوں تک پوری قوم دا ہر بندہ تعلیم دے زیور توں واقف نہیں ہوندا اوس ویلے تک ترقی تے تبدیلی دا سوچنا صرف مَجھ اگے بین وجان دے مترادف اے۔ جے اسیں ترقی کرنی اے تے ساڈے سامنے قوماں دیاں مثالاں موجود نیں جد کہ ساڈے اندر ایہناں وچوں کوئی اک وی خوبی نہیں پائی جاندی۔٭