رائے ریاض حسین دی انقلابی خود نوشت ”رائے نامہ”

اک کامیاب ترین شخصیت جدوں اپنی حیاتی دی آخری بہاراں نال لطف اندوز ہو رہی ہوندی اے تے اوس شخصیت نوں اک دم خیال آندا اے کہ میں ساری حیاتی کیہ کیہ کیتا۔ کیہ کیہ کامیابیاں یا نکامیاں سمیٹیاں۔ اوہناں دے کول بہت ساری تلخ تے شیریں یاداں’ حقائق تے عجیب و غریب کہانیاں جمع ہو جاندیاں نیں۔ وڈے لوک تے وڈی قوماں ہمیشہ اپنا اج کل لئی قربان کر دیندیاں نیں۔ ایسے طرحاں پاکستان دے کئی وڈے لوکاں نے اپنی داستان حیات اپنی حیاتی وچ ای تحریر کیتی تے لوکی اوہدے توں بہت لطف اندوز ہوئے بلکہ آن والی نسلاں نے اوہنوں مشعل راہ وی بنایا۔ وطن عزیز وچ انقلابی بچیاں دی ٹیم تیار کرن والا کوئی ادارہ اجے معرض وجود وچ نہیں آیا۔ لوڑ ایس گل دی اے کہ موجودہ سسٹم 70 سالاں وچ کوئی وی شعبہ قابل ذکر تے وڈا کارنامہ سرانجام نہیں دے سکیا تے ایہہ شعبے نہ تے کامیاب ہوئے نیں تے نہ نکام ہوئے نیں۔
لوڑ ایس امر دی اے کہ پاکستان وچ اک انقلابی لیڈرشپ پیدا کرن لئی بہت وڈے ادارے دی لوڑ
اے کہ پاکستان وچ کوئی مرد عمل میدان وچ آوے تے اپنے نام یا اپنے والدین دے نام اک انسٹیٹیوٹ قائم کرے جہدے وچ ہر یونیورسٹی وچ اول’ دوم’ سوم آن والے طلبا تے طالبات دی تربیت لئی سو فیصد سہولتاں مفت ہون تے اوہناں نوں سبق دتا جاوے کہ تسیں دنیا دی قیادت تے پاکستان دی قیادت کیویں کرنی اے۔ رائے ریاض واقعی اک عظیم انسان نیں۔اوہناں نے ذرہ توں آفتاب دا سفر کیویں طے کیتا۔ ایہہ تسیں اوہناں دی آٹو بائیو گرافی رائے عامہ پڑھ کے ای اندازہ کر سکو گے۔ رائے ریاض نے سرزمین جھنگ وچ جنم لیتا۔ بے سروسامانی وچ اپنی والدہ دے زیر سایہ اپنی تعلیم دا آغاز کیتا۔ تعلیم مکمل کرن مگروں ترقی دی شاہراہ اتے گامزن رہے تے کردے کردے چار وزرائے اعظم دے پریس سیکرٹری تک جا پہنچے۔ ایہہ ملک دے چار اہم وزیراعظم وزارت عظمیٰ دے دوران کیہ کیہ کارنامے سرانجام دتے نیں۔ملک دا قومی سرمایہ برباد کردے نیں یا ملک لئی استعمال کردے نیں۔ایہہ اک راز اے جہڑا رائے عامہ وچ تہانوں ملے گا۔ ایس کتاب اتے پاکستان دے بے بدل صحافی’ دانشور’ کالم نگار’ ادیب’ تجزیہ نگار’ محقق’ مدبر’ اک اخبار دے چیف ایڈیٹر جناب برادرم مجیب الرحمن شامی نے کمال دا تبصرہ لکھیا اے تے اج کل پاکستان وچ کوئی کتاب شامی صاحب دی رائے دے بغیر چھپدی نہیں۔ جے چھپ وی جاوے تے اوہ وکدی نہیں۔ شامی صاحب دی عظمت دا اندازہ ایس گل توں لایا جا سکدا اے کہ اج کل پاکستان دے مقبول ترین ادیباں دے امام بن گئے نیں تے اوہناں دے بولے ہوئے تے لکھے ہوئے لفظاں دا لوک احترام کردے نیں کیوں جے شامی صاحب اپنا اک جملہ وی ضائع نہیں ہون دیندے۔ اوہ لکھدے نیں کہ رائے ریاض حسین دا تعلق جھنگ دے اک راجپوت زمیندار گھرانے نال اے۔ اوہناں نے اک دیانتدار تے بااصول والد تے عبادت گزار تے سلیقہ شعار والدہ دے سائے وچ پرورش پائی۔ والد دے انتقال مگروں اوہناں دے والدہ نے کلی ایہ ذمہ واری نبھائی۔ پنجاںبھراواں نوں اوہناں دی آغوش نے کندن بنا دتا۔ رائے صاحب مقابلے دے امتحان دے ذریعے سرکاری ملازمت وچ پہنچے تے اعلیٰ عہدیاں اتے فائز رہوے۔ دوجے چار بھراواںوچ دو ڈاکٹر نیں تے دو تعلیم دے شعبے نال جڑے ہوئے۔ اوہناں نوں پاکستان دے چار وزرائے اعظم دے نال کم کرن دا موقع ملیا۔ ایوان اقتدار وچ بیٹھ کے اوہناں نے اوہ کجھ ویکھیا تے اوہ کجھ سنیا جہڑا بہت گھٹ لوک ویکھ تے سن پاندے نیں۔ وڈے وڈے سیاستداناں تے افسراں نال وی پالا پیا۔ بیرون ملک اہم ذمہ داریاں اتے فائز رہے۔ ہن اوہناں نے اپنے مشاہدے تے تجربے نوں الفاظ دے دتے نیں۔ اوہناں دے کسے تاثر یا اوہدے توں اخذ کردہ نتیجے توں اختلاف کیتا جا سکدا اے لیکن اوہناں دے بیان کردہ واقعات نوں جھٹلایا نہیں جا سکدا۔ اوہناں نے لگی لپٹی رکھے بغیر اوہ کجھ بیان کر دتا اے جہڑا اوہناں نے ویکھیا’ جہڑا اوہناں دی سمجھ وچ آیا جہڑا دوجیاں نوں آکھدے یا کردی پایا۔ اوہناں دے ایس مجموعے وچ مطبوعہ کالم نیں لیکن بہت کجھ غیر مطبوعہ وی اے۔ ایہہ راز تے شاید پہلی واری فاش ہو رہیا اے کہ کیپٹن صفدر وزیراعظم نواز شریف دے دل وچ ایس طرح کیویں سمائے کہ اوہناں دی عزیز از جان صاحبزادی دے رفیق حیات بن گئے۔ رائے صاحب دے ہاں دھماکے وی نیں تے ذائقے وی’ مینوں امید اے اوہناں دی ایہہ تصنیف پاکستانی سیاست تے اوہدے مختلف کرداراں نوں سمجھن وچ مدد دیوے گی تے اوہناں نوں وی ایس صف وچ کھڑا کر دیوے گی۔ جہدے وچ قدرت اللہ شہاب’ مختار مسعود تے الطاف گوہر جئے مینار کھڑے نیں۔ تسیں اندازہ کرو کہ شامی صاحب نے ہر اوہ گل آکھ دتی کہ جو اک دانشور کرن دے موڈ وچ اے یا اوہ کرنا چاہندا اے۔ جناب حامد میر لکھدے نیں کہ رائے ریاض حسین اوہ اپنی پروفیشنل لائف وچ صحافیاں نوں ملدے جلدے رہے۔ اک صحافی دی حیثیت نال میں وی وزارت اطلاعات و نشریات دے بہت سارے افسران نوں بڑے کولوں ویکھیا اے۔ رائے ریاض حسین صاحب دی انفرادیت اوہناں دی سادگی تے عاجزی رہی اے۔ میں اوہناں نوں یس سر یس سر کردے نہیں ویکھیا۔ اوہ وزیراعظم دے سامنے بڑے ادب دے نال حق گل آکھ دیندے سن۔ علامہ عبدالستار عاصم اک کرشماتی شخصیت نیں۔ وطن عزیز دی فکری تعمیر و ترقی لئی دن رات وقف کیتے ہوئے نیں۔ میرا دعویٰ اے کہ علامہ عبدالستار عاصم جئے اک ہزار نوجوان اک بیوروکریسی وچ یا انتظامی اموروچ عملی طور تے آ جان تے پاکستان نوں دنیا دی ترقی یافتہ ملکاں دی صف وچ نہ صرف کھڑا کر سکدے نیں بلکہ دنیا دی قیادت وی کر سکدے نیں۔ اوہ لکھدے نیں کہ رائے عامہ اک ایسی کرشماتی کتاب اے جہڑی اقتدار دے ایواناں دے سربرستہ رازاں نال بھری ہوئی اے۔ کتاب تریخ دے ورقے پلٹد ہوئے کدی بے رحم حقائق سامنے لیاندی اے تے کدی دلچسپ تے حیرت انگیز واقعات توں قاری نوں اپنے سحر وچ جکڑ لیندی اے۔ کتاب کیہ اے اک حیرت انگیز دلچسپ واقعات تے عجیب و غریب قسم دی داستان حیات وی اے تے داستان عزم وی اے تے داستان پاکستان وی۔ ایس کتاب وچ تہانوں پتہ چلے گا کہ ہنڈا کمپنی دا مالک سائیکل توں ہوائی جہاز تک کیویں پہنچیا تے پاکستان دے قومی ہیرو اور کروڑاں دلاں دے ترجمان محسن پاکستان نوں ہیرو توں زیرو کہڑی کہڑی قوتاں نے کیویں کیویں انداز نال کیتا۔ا یہہ کتاب ہقائق در حقائق راز دراز دی داستان اے۔ ایہہ کتاب ہر پاکستانی نوں پڑھنی چاہیدی اے اپنی زندگی وچ کامیاب ترین افسر’ اک محب وطن انسان تے اک بے لوث پاکستانی زندگی دے کہڑے کہڑے مرحلیاں توں لنگھ کے کامیاب ہوندا اے۔ انسان ساری حیاتی ذریعہ نجات لئی کوشش کردا رہندا اے کہ اوہدے ہتھ توں کوئی ایسی نیکی ہوجاوے جہڑی اوہدے لئی نجات دا ذریعہ بن جاوے۔ ایہہ کتاب وی موجودہ حالات وچ لوکاں لئی خوشخبری ثابت ہو سکدی اے۔ ایہہ کتاب پاکستان دے ہر وڈے بک سٹال اتے دستیاب اے۔ نہ ملن دی صورت وچ 0300-0515101 تے رابطہ کر سکدے او۔