فوج دیاں لازوال قربانیاں

جاوید میرا بچپن دا دوست سی بڑا ہنس مکھ تے متحرک۔ اوہنوں فوج وچ جان دا بڑا شوق سی۔ سکول وچ اوہ ہر ویلے اجہی ایکٹویٹی وچ مصروف رہندا سی جو اوہنوں فوج وچ شمولیت لئی تیار کر سکدی سی۔ اوہدے والد اک اعلیٰ عہدے تے فائز سن تے اوس ویلے دے حالات تے رواج دے مطابق اپنے ہونہار بیٹے نوں ڈاکٹر یاں انجینئر بنانا چاہندے سی پر بیٹے دے جذبے تے جنون نوں ویکھدے ہوئے اوہناں نے اوہنوں بخوشی پاک فوج وچ شمولیت دی اجازت دے دتی۔ فوج دی جونیئر کیڈٹ کورس وچ کمیشن حاصل کرن دے بعد ساڈیاں ملاقاتاں بہت گھٹ رہ گئیاں۔ چار ورھے دا کورس کرن دے بعد اوہ اعزازی تلوار لے کے اپنے کورس وچ پہلی پوزیشن لے کے پاس آئوٹ ہویا تے بطور لیفٹیننٹ اپنی یونٹ وچ تعینات ہویا۔ میں اوس دوران تعلیم دے سلسلے وچ بیرون ملک جا چکیا سی پر ایس لائق فائق تے محب وطن افسر دی کامیابیاں دیاں خبراں ملدیاں رہندیاں سن۔ بھارت نے سیاچن گلیشیر دی برف پوش چوٹیاں تے اچانک قبضہ کر لیا تے کیپٹن جاوید اوہناں کجھ اولین فوجیاں وچ سن جو ضروری سازوسامان تے خصوصی تربیت دے بناں دنیا دے بلند ترین میدان جنگ وچ مقابلہ کرن اپڑے۔ اک مشن تے جاندے ہوئے کیپٹن جاوید تے اوہناں دے کجھ ساتھی برفانی تودیاں دی زد وچ آ کے شہید ہو گئے۔ ایہناں شہیداں دیاں قربانیاں دے نتیجے وچ اج سیاچن تے ساڈیاں فوج بہتر پوزیشن وچ نیں جد کہ بھارت دا بہت زیادہ جانی و مالی نقصان ہو رہیا اے تے ایہناں نقصانات پاروں بھارتی فوج سیاچن نوں دوبارہ غیرفوجی علاقہ بنان تے تیار نظر آندی اے۔
سیاچن دے بعد کارگل وچ بھارت تے پاکستان وچکار ہون والی محدود جنگ وچ سخت موسمی حالات تے بناں کسے سپلائی یاں لاجسٹک سپورٹ دے پاکستان دے نیم فوجی دستیاں تے والنٹیئرز نے جس بے جگری’ عزم و حوصلے نال جدید ترین اسلحے نال لیس بھارتی فوج دا مقابلہ کیتا ایہدی مثال جنگی تریخ وچ بڑی گھٹ ملدی اے۔ بھارتی فوج پاکستانیاں دے عزم’ کرنل شیرخان تے لالک جان ورگے سرفروشاں دے اگے بے بس ہو گئی تے جدید بوفور توپاں تے ملٹی بیرل راکٹ لانچراں دے گولیاں دی برسات کر دتی جد کہ بھارتی فضائیہ دے جدید میراج طیاریاں نے بمباں دی بارش کر دتی۔ بھارت بظاہر ایہ محدود یکطرفہ جنگ جت گیا پر برفیلی پہاڑی چوٹیاں تے موجود کجھ سو پاکستانیاں دی بہادری تے قربانیاں دی داستان دنیا دی ملٹری تریخ وچ ہمیشہ یاد رکھی جاوے گی۔
آزادکشمیر وچ 2005ء وچ آن والے تباہ کن زلزلے وچ ان گنت لوک لقمہ اجل بن گئے تے ہزاراں لوک ڈاڈھے زخمی ہوئے۔ لائن آف کنٹرول تے تعینات پاک فوج دے افسران تے جواناں دی وڈی گنتی وی اپنے بنکراں وچ دب کے شہید ہو گئی۔ اجہے مخدوش حالات وچ پاک فوج تے ایئرفورس نے دن رات اپنے سارے وسیلیاں دے نال امدادی کاروائیاں کیتیاں’ زمینی تے ہوائی راہواں توں زخمیاں نوں ہسپتالاں وچ اپڑایا تے امدادی سامان دی ترسیل یقینی بنائیے۔ دہشت گردی دے خلاف جنگ ہووے یاں قدرتی آفات’ پاکستان دی فوجاں ہمیشہ اپنے ملک تے اوہدے شہریاں لئی جان نچھاور کرن نوں تیار ہوندی اے۔ سیلاب ہون’ طوفان ہون یاں وکھووکھ وباواں پاک فوج دے افسر تے جوان ہمیشہ ساڈی حفاظت لئی موجود ہوندے نیں۔
نوبل انعام یافتہ ملالہ یوسف زئی نوں سوات وچ چہرے تے گولی لگن دے بعد فوجی ہیلی کاپٹر تے پشاور شفٹ کیتا گیا تے اوہدی حالت نازک سی ایس لئی ملٹری ہسپتال پشاور وچ ڈاکٹراں نے رات گئے بڑی پیچیدہ سرجری کیتی تے گولی اوہدے سر چوں کڈھی گئی جہدی وجہ نال اوہدی جان بچ گئی۔ اوس ویلے دے ملٹری کمانڈر نے خصوصی طور تے سارے انتظامات دی نگرانی کیتی۔ اقوام متحدہ دے امن مشن وچ پاکستان آرمی دی خدمات نوں پوری دنیا وچ سراہیا جاندا اے ایس توں علاوہ عالمی فوجی مقابلیاں وچ پاکستان آرمی دا دستہ ہمیشہ پوزیشن ہولڈر رہیا اے۔ پاکستان دی فضائیا دے پائلٹ دنیا دے بہترین ہواباز منے جاندے نیں۔ پاکستان دی فوجاں ڈسپلن’ مہارت تے جذبے دے نال ملک دی حفاظت لئی لڑن تے شہادتاں دین لئی ہر ویلے تیار رہندیاں نیں۔ روس یوکرین جنگ دے بعد ایہ چیز واضح ہو گئی اے کہ اک مضبوط فوج ای ملک دی سلامتی تے خودمختاری دا تحفظ کر سکدی اے۔