پیپلزپارٹی پنجاب کدوں آوے گی؟

پاکستان وچ کدی کوئی سیاسی جماعت عوامی ایجنڈا تے عوامی طاقت دے سر تے ابھری تے لوکاں تک حقیقی جمہوریت ضرور اپڑے گی۔ میری گل سن کے سامنے بیٹھے لوک ایس طرح ویکھن لگے جیویں مینوں بحالی جمہوریت دی تریخ توں جانکاری نہیں۔ میں ایہو چاہنا واں کہ مینوں بے خبر سمجھن والے ایس سوال تے گل کرن کہ پاکستان وچ کوئی سیاسی جماعت ہے وی یاں نہیں۔ دو جماعتاں اجہیاں نیں جہناں دے رہنماواں نے جاناں دتیاں۔ پیپلزپارٹی تے اے این پی دوہاں دے کارکناں تے رہنماوا ںدی گل بات سن لوو۔ گئے گزرے زمانے وچ وی مروت تے شائستگی دا مظاہرہ کردے نیں دوویں جماعتاں کندھ نال لگیاں ہوئیاں نیں۔ بینظیر بھٹو دی شہادت دے بعد پیپلزپارٹی پیراں تے کھڑا ہون دی کوشش کر ریہ اے۔ مفاہمت دے فیزون نے پارٹی نوں ناقابل تلافی نقصان اپڑایا۔ مفاہمت فیز ٹو وچ بظاہر پنجاب کابینہ وچ شراکت داری مل گئی پر اگلے انتخابات وچ کنیاں سیٹاں مل سکن گئیاں؟ جے یو آئی نال اچانک پیپلزپارٹی دے تعلقات وگڑنے شروع ہو گئے نیں۔ مولانا اینے دن جو گھٹ گھٹ نظر آ رہے سن ایہدا کارن پی پی قیادت توں فاصلے ودھان دی پریکٹس ہو سکدا اے۔ سندھ وچ جے یو آئی دے متحرک نوجوان رہنما مولانا راشد سومرو جارحانہ بیان دے رہے نیں۔ بظاہر اختلاف دی وجہ سندھ دے بلدیاتی انتخابات نیں جہناں وچ جے یو آئی تے ایم کیو ایم سنے ساریاں جماعتاں دھاندلی دا الزام لا رہیاں نیں۔ کئی ویڈیوز وی زیرگردش نیں۔ مولانا سومرو مولانا فضل الرحمن دے علم وچ لیا کے احتجاجی تحریک نوں منظم کر رہے نیں۔ پیپلزپارٹی کراچی تے حیدرآباد وچ ایم کیو ایم تے تحریک انصاف دی شکل وچ مضبوط انتخابی حریفاں دا سامنا کرن دی کوشش کر رہی اے۔ اندرون سندھ تے پی پی دا جارہ رہیا اے۔ سرداری تے جاگیرداری نظام نال جڑے الیکٹ ایبلز نے پی پی نوں سہارا دے رکھیا اے۔ اندرون سندھ وچ سیاسی دانشوراں دی وڈی گنتی وی پیپلزپارٹی نال جڑی ہوئی اے۔ سندھ دی ثقافتی تے مزاحمتی تحریک کسے نہ کسے مقام تے جا کے پیپلزپارٹی دے دھارے وچ مل جاندی اے۔
الیکٹ ایبلز تے دانشوراں دا ایہ اشتراک پارٹی دے نیوکلیس دا کیمیا بناندا اے۔ پنجاب دے لوک پیپلزپارٹی دے دانشورانہ رنگ نال متاثر رہے نیں اوہناں تک جاگیرداری تے سرداری نظام دی ظالمانہ کہانیاں بہت گھٹ یاں تاخیر نال اپڑدیاں نیں۔ رباب چانڈیو تے ایس غریب دیہاتی دا خاندان پارٹی نال وابستہ وڈیریاں دے ظلم دی یادگار اے جہنوں سندھ دھرتی تے آن والے مہمان پرندیاں نوں بچان دی سزا جان لے کے دتی گئی۔ اجہے واقعات تے پارٹی قیادت دا ردعمل متاثر کن نہیں رہیا جہدے توں لگدا اے کہ پارٹی پاور بیس لئی دانشوراں توں ودھ وڈیریاں تے انحصار کردی اے۔ پنجاب وچ فخرزمان’ ڈاکٹر لال خان’ اعتزاز احسن’ قمرالزمان کائرہ تے چوہدری منظور نے پڑھے لکھے طبقے نوں متاثر کیتا پر ایس دوران مفاہمت دا زمانہ چل رہیا سی ایس لئی متاثر ہون والے پارٹی دا سیاسی اثاثہ نہ بن سکے۔ ریکارڈ گواہ اے کہ پنجاب وچ پیپلزپارٹی واحد جماعت اے جہدے وچ نوجواناں دی گنتی 20 فیصد وی نہیں۔ سیاست دے طالب علم دے طورتے مینوں لگدا اے کہ جے کوئی جماعت لمے عرصے تک کسے طرح دی وڈی سیاسی تحریک تے سرگرمی نہ چلا سکے تے اوہدے اقتدار دے امکانات گھٹ ہو جاندے نیں۔ سیاست صرف جدلیاتی قوتاں نوں ابھرن دا موقع دیندی اے جوڑ توڑ نال صرف سہولت کار دا کردار کجھ وقت تک نبھایا جا سکدا اے۔ ایس کردار دا ہلکا یاں بھاری وزن تسلی بخش نہیں ہوندا۔
مسلم لیگ ن نوں پرویزمشرف نے پہلے ق لیگ بنا کے تقسیم کیتا فیر شریف خاندان نوں بے دخل کر دتا۔ بھاویں واپسی دا راہ بینظیر نے کھودیا پر اوہنوں اپنی جمہوری جدوجہد بنا کے اج وی ن لیگ فائدہ اٹھاندی اے۔ ن لیگ نے پی ڈی ایم دے جلسیاں توں مریم نواز نوں متعارف کران دا کم لیا۔ ووٹ نوں عزت دیو دا نعرہ لا کے نوازشریف لوکاں وچ نہ جا سکے پر مریم لوکاں دے وچکار اپڑ گئی۔ ایہ مریم دی جارحانہ سیاست سی کہ اسٹیبلشمنٹ نے شہبازشریف تے حمزہ نوں قبول کر لیا۔ پی پی نوں فائدہ ہوندا تے گھٹو گھٹ لہور دے چار صوبائی حلقیاں وچوں اک تے اپنا امیدوار کھڑا کر دیندی۔ کجھ حلقے کوشش کر رہے نیں کہ تحریک انصاف تے پیپلزپارٹی دے وچکار ورکنگ ریلیشن شپ قائم ہو جاوے۔ پیپلزپارٹی لئی ایس سودے وچ کجھ تحفظات ہو سکدے نیں پر صورتحال وچ اہم ثابت ہون والے اجہے لوک موجود نیں جو عمران خان نوں منا لین تے سارا کھیڈ پٹھا پے سکدا اے۔ مولانا دی جماعت پیپلزپارٹی دی دوست بن کے پہلے قومی منظرنامے تے نویں سریوں ابھری فیر اندرون سندھ وچ پی پی نوں کمزور کرن لئی جارحانہ سیاست لئی پرتول رہی اے۔ پچھلے پنج ورھیاں وچ ایہو ویکھیا گیا کہ مسلم لیگ ن، تحریک انصاف تے جے یو آئی نے کھل کے کھیڈیا جہدی وجہ نال اوہ مقبول ہو گئیاں۔
پی پی تے اے این پی نے جاناں قربان کیتیاں’ شائستگی نوں رواج دتا’ دانشورانہ سطح تے کم کیتا پر اوہناں دا ووٹ بینک گھٹدا گیا۔ عجب معاملہ ایہ وے کہ عمران خان نوں ہٹان دا فائدہ پیپلزپارٹی دی عوامی مقبولیت دی صورت وچ نہیں نکل رہیا۔ پیپلزپارٹی نے بلاول ہائوس چھڈ کے گلبرگ وچ سیاسی ڈیرہ بنان دا چنگا فیصلہ کیتا پر سکیورٹی معاملیاں دی آڑ وچ بلاول تے آصفہ نوں لہور وچ زیادہ متحرک ہون دی اجازت مسلم لیگ نہیں دیوے گی۔ مسلم لیگ ن دی مشینری وکھرے طریقے نال کم کردی اے اوہناں دی کاروائیاں دیاں کہانیاں آصف زرداری جیل دے دیہاڑیاں وچ سن دے رہے نیں۔ مسلم لیگ ن دی محبتاں تے یقین کر کے جے اوہ پنجاب وچ وڑن دی منصوبہ بندی کر رہے نیں تے ایہ خواب چھیتی ٹُٹ جاوے گا۔ ن لیگ اگلے انتخابات وچ مولانا نال اتحاد کرن جا رہی اے۔ پیپلزپارٹی نوں سٹرٹیجک ماہرین دی ضرورت اے۔ پنجاب وچ سسٹم نال مفاہمت نہیں ٹکران دی ضرورت اے۔٭٭