نوعمر مُنڈیاں دی تربیت اتے دھیان دیو

اک دور سی کہ جدوں منڈے اباجی دے موڈ آف ہون تے اوہناں دی ڈانٹ دے خوف نال بہت ساری برائیاں وچ پین توں بچ جاندے سن۔ گھر وچ رات گئے آنا’ حد توں ودھ کرکٹ کھیڈنا’ سکول دیر نال پہنچنا’ بھیڑے دوستاں دی صحبت’ رزلٹ کار ڈوچ خراب کارکردگی وغیرہ اوہ وجوہات سن جہناں اتے اباجی دی نصیحتاں خوب سنن نوں ملدیاں سن۔ تریخ شاہد اے کہ معاشرے وچ وڈے وڈے ہیریاں نوں تراشن وچ والدین نے کلیدی کردار ادا کیتا۔ صحت مند معاشرے دی تشکیل وچ اوہناں والدین دی ٹریننگ نے انقلاب برپا کیتا جہناں دی رائے سی کہ منڈیاں دی تربیت وی اینی ای ضروری اے جہنی کڑیاں دی۔ قارئین !ہر دور دے اپنے مسائل تے حالات ہوندے نیں لیکن 2022دی تربیت تے اج توں 30 سال پہلاں دی تربیت وچ نمایاں فرق آ چکیا اے۔ بچیاں بالخصوص منڈیاں دی اخلاقی تے جسمانی لحاظ نال پرورش کرنا ایس قدر اوکھا ہو چکیا اے گویا کہ لنکا ڈھان دے مترادف ہووے۔ عصر حاضر وچ الیکٹرانک گیجٹس تے درپیش چیلنجاں نے والدین دی مشکلاں وچ ہور وادھا کر دتا اے۔ مشاہدے وچ اے کہ کیجٹس دے استعمال نال منڈے ویلے توں پہلاں بلوغت دے بارڈر نوں عبور کردے جا رہے نیں۔ اوہناں وچ بچگانہ پن کدھرے نظر نہیں آندا۔ ایہو وجہ اے کہ ٹین ایج منڈے خودسر تے ضدی ہوندے جا رہے نیں۔ اوہناں نوں کوئی پرواہ نہیں کہ والدین اوہناں نوں کیہ تلقین کر رہے نیں۔ فیر جدوں والدین سختی کردے نیں’ پٹائی کردے نیں تے نتیجہ بغاوت دی صورت وچ بھیانک ہوندا اے۔ یاد رکھنا کہ ٹین ایج منڈیاں نوں مارنا اوہناں دی شخصیت دے منافی اے۔ گل منوان لئی مار دا سہارا لین نال بنیادی طور تے وڈے وڈے نقصانات ہوندے نیں۔ مارکٹائی کرن والے والدین ایس فہرست وچ آندے نیں جہڑے احساس کمتری یا برتری دے عنصر نوں دماغ اتے سوار رکھدے نیں۔جہناں والدین نوں ایہہ ڈر لاحق ہوندا اے کہ اوہناں دے بچے برادری دے بچیاں یا پڑوسی دے بچیاں توں پچھے رہ جان گے۔ اوہ بچیاں دی پٹائی بوہتی کردے نیں۔ بچیاں نوں مارے بغیر اوہناں دے رویاں نوں تبدیل کرو۔ تسیں سوچ رہے ہوو گے کہ بچے جدوں گل نہ منن تے فطری جذبہ اے۔ غصہ تے ضرور آوے گا لہٰذا ایہہ گھٹ کیویں کرئیے۔
بہترین حل ایہہ ہو سکدا اے کہ غصے دا علاج غصے نال نہ کیتا جاوے۔ جدوں تک معاف کرنا نہیں سکھو گے’ نرمی نہیں ورتو گے’ چھوٹی چھوٹی گلاں اتے سنگین سرزنش ہووے گی تے اولاد باغی ہو جاوے گی۔ بچیاں دے رویاں وچ مثبت تبدیلی چاہندے او تے تنقید دے بجائے تعریف تے توصیف کر کے ویکھو۔ بچیاں وچ خود اعتمادی آوے گی۔ معمولی غلطیاں نوں پوائنٹ کرن دے بجائے نظرانداز کرو۔ حیرت انگیز طور تے اوہ نہ چاہندے ہوئے وی چنگے ٹارگٹ سیٹ کرن گے۔ دراصل اسیں لوک نکتہ چینی دی انتہا کردیندے آں تے جہڑا کم نوٹ کرن والے ہوندے نیں اوہناں اتے توجہ نہیں دیندے۔ مثال دے طور تے بچہ کہڑی سرگرمیاں وچ بوہتی دلچسپی دا اظہار کر رہیا اے۔ نیندر کنی پوری ہو رہی اے۔ ٹی وی دے بجائے انٹرنیٹ اتے کہڑی ویڈیوز ول رجحان اے۔ بچے دے سیکھن دی قابلیت کنی اے تے رٹا سسٹم دے نرغے وچ کنا گھریا ہویا اے۔ کسی قسم دی ہراسگی تے دبائو دا سامنا تے نہیں وغیرہ۔ خاص طور تے ٹین ایج منڈے جدوں کسی وجہ نال پریشان ہوندے نیں تے اوہناں وچ منفی خیالات دا اک ختم نہ ہون والا سلسلہ شروع ہو جاندا اے۔ بہت سارے منفی خیالات دے باعث جدوں اوہ تکلیف توں گزردے نیں تے بچے فیصلہ نہیں کر پاندے کہ اوہناں دی حقیقی پریشانی کیہ اے؟ جدوں والد ای بچے دی ڈھارس نہ بندھاوے تے اوہدے وچ غصہ’ نفرت’ عدم تحفظ جیسے احساسات جنم لے لیندے نیں جہڑے ٹین ایج منڈیاں نوں اک مستقیم تے مثبت سوچ توں کوسوں دور کر دیندے نیں۔ دراصل ایس قسم دے رویے نوں اسیں ڈپریشن دا نام دے سکنے آں۔ حالاں جے مستقبل دے معماراں نوں مستقل بنیاداں اتے ایسے چیلنجاں نال نمٹن لئی شعور تے آگاہی دینا والدین دی پہلی ترجیح ہونی چاہیدی اے۔
اوہناں نوں نصیحت کیتی جاوے کہ پریشان ہونا مسئلے دا حل نہیں ہوندا بلکہ ایہدے لئی جہد مسلسل کیتی جاوے۔ ہن ذہناں وچ سوال ایہہ اٹھدا اے کہ جہد
مسلسل ول ترغیب کیویں دوائی جاوے۔ آسان ترین حل کہ اوہناں نوںٹیکنیکل’بامقصد تے تعمیری کماں وچ مگن رکھیا جاوے۔ نسل نو دی بیراہ روی دا اہم ترین سبب فراغت اے۔ ٹین ایج منڈیاں نوں جدوں صحت مند سرگرمیاں’ تفریح دے موقعے نہیں ملدے تے اوہ ناامید تے مایوس ہو کے لڑکپن وچ نفسیاتی خواہشاں تے شیطانی وساوس دا شکار ہو جاندے نیں۔ فیر جدوں والدین اوہناں نوں تنبیہہ کردے نیں کہ خبردار ایہناں کماں توں باز آ جائو تے نتیجتاً منڈے جارحانہ تے متشدد ہو جاندے نیں۔ والدین نوں بصیرت نال کم لیندے ہوئے ایسے حالات وچ سازگار ماحول دا انتظار کرنا چاہیدا اے۔ بہتر اے اوہناں نوں کجھ دیر بعد سمجھائو۔ جہنا سمجھان دی کوشش کراں گے گل وگڑدی جاوے گی کیوں جے ضدی بچے کدی غصے دی حالت وچ ناصح دی گل نوں قبول نہیں کردے۔ ویکھیا گیا اے کہ ذرا ویلا لنگھن تے اوہ والدین کولوں آپ معافی منگن آندے نیں۔ قارئین پاکستانی معاشرے وچ ایس ویلے اہم مسئلہ ایہہ وی اے کہ گھراں وچ جزا تے سزا دا اک باقاعدہ سسٹم موجود نہیں اے۔ عجب کلچر اے کہ کدی پذیرائی اتے بہت بے عزتی کیتی جاندی اے تے کدی سزا اتے گل نوں رائی دے برابر سمجھ کے ٹال دتا جاندا اے۔ چنگی تربیت دے حامل مرد نہ صرف چنگے پتر’ شوہر’ بھراں ثابت ہوندے نیں بلکہ معاشرے دے چنگے شہری بن دے نیں۔