بشیر ناطق دا شعری پراگا ” آدم بیتی ”

بشیر ناطق دا ناں پنجابی شاعری دے کھیتر وچ جانیا پچھانیا ناں اے اوہناں دے سَت مجموعے چھاپے چڑھ چُکے نیں تے پڑھنہاراں توں مانتا وی حاصل کر چکے نیں۔ پتھراں وچ لعل،روپ نگری،تھلاں وچ سسی،نرالا عاشق،رموز گوہر،لجپال قلندر،جلو ئہ عشق،توحید دا چن شعری پراگے نیں،ایہناں وچوں ” توحید دا چن ” نوں اکادمی ادبیات پاکستان ولوں ایوارڈ وی مل چکیا اے۔توحید دا چانن ،منظوم سیرت دی کتاب اے جس نوں ہیر دی بحر وچ لکھیا اے۔دُنیا اُتے آدم دا آنا تے فیر ایس جگ وچ نویں جذبیاں دا پسرنا تے آدم نوں کِنیاں راہواں تے ٹر کے اپنی منزل ملی ای اصل وچ آدم بیتی اے جس نوںبشیر ناطق نے ایس کتاب وچ بیانیا اے۔ڈاکٹر اسلم رانا لکھدے نیں:
”آدم بیتی دی داستان شروع کردیاں ہویاں ناطق ہوراں نے عشق بارے اظہار دے سلسلے بڑے دراز کیتے نیں۔اقبال دا موضوع آدم اے پر ناطق نے ہر میدان اندر عشق دی بالا دستی قائم رکھی اے۔تے پوری داستان ِآدم دی عمارت عشق دی مِٹی تے پانی نال اُسری اے اوہناں دی نظم جیویں جیویں اگانہ ودھدی اے عشق دے تصور وچ کجھ تبدیلیاں آئوندیاں جاندیاں نیں” ص13
ایس عشق دے جو درجے نیں اوہ عشق نفسانی،عشق رومانی یاں عشق مجازی تے عشق حقیقی نیں۔بشیر ناطق دے دل وچ وی عشق دا جذبا حدوں ودھ اے ایہ عشق معمولی نہیں سگوں عشق حقیقی اے جو اپنے رب تے رسول اللہ ۖ نال عشق اے اوہ ” المجاز ” وچ دسدے نیں کہ عشق محمدی ۖ صدقہ ای اے کہ کائنات دی تخلیق ہوئی تے آدم نوں ایس دُنیا اُتے خلیفتہ الارض بنا دتا۔آدم نوں تخلیق توں پہلاں رب دی سوچ وچ وی اپنی تخلیق نوں بے مثال بناون دی چاہ اے تے فیراپنی تخلیق وچ اپنی ذات دے جھلکارے رکھ دتے گئے۔بشیر ناطق نے آدم دی تخلیق توں پہلاں فرشتیاں اگے اعلان کیتا تے فرشتیاں نے جو جواب دتا اوس نوں وی شاعرانا انداز نال بیانیا اے۔
ایس شاعر کول عشق دا جذبہ بیانن لئی اے تے ایسے جذبے نوں اوہناں نے وکھ وکھ انداز نال بیانیا اے اوہ بھاویں عشق ئِ حقیقی ہوویں یاں مجازی دا کوئی رنگ ۔بشیر ناطق اپنے شاعری دے موضوع بارے گل کہندے نیں:
” صاحب نے جدوں دی قلم دان کیتی اے مُڈھ توں ای میرا مضمون عشق اے جِنیاں وی کتاباں لکھیاں گل عشق دی ای کیتی اے۔کیوں جے ایہ دُنیا وی عشق پاروں وجود وچ آئی ۔”ص15
عشق نوں بیانن دے انداز ویکھو:
” جہڑی عشق حقیقی دی ہے طاقت اوہا ای عشق مجاز دی اے
دِسے خالق دی جھلک تخلیق وچوں جانن والیو گل ایہ راز دی اے”ص18
” حضرت عشق ” دے وچ اوہ لکھدے نیں:
قلعے خیبر پُٹ وکھان والا حضرت عشق اے یاں کوئی ہور اے
اعلیٰ عدل انصاف ایمان والا حضرت عشق اے یاں کوئی ہور اے
کوئی سوال نہ خالی ہٹان والا حضرت عشق اے یاں کوئی ہور اے
ڈنگ یار لئی غار وچ کھان والا حضرت عشق اے یاں کوئی ہور اے ” ص 22
ناز اوکاڑوی آپ دی شاعری بارے فلیپ وچ لکھدے نیں:
” کلام وچ روانی مضموناں تے انت دی پکڑ،قافیاں نوں نویں ڈھنگاں نال ورتناصرف ناطق ہوراں نوں آئوندا اے۔” (فلیپ)
اک شعر وچ کِنی سوہنی تلمیح ورتی اے پہلے مصرعے وچ حرص نوں نندیا اے تے اگلے مصرعے وچ معراج شریف دے واقعے نوں بیان کیتا اے ایہ اوہناں دے زبان و بیان اُتے عبور ول وی سنکیت دیندا اے ،اوہ لکھدے نیں:
حرص نفس دا پُٹ کے رُکھ مُڈھوں دِل وچ عشق جگاوندا عشق ای اے
اِک رات وچ فرش توں عرش تیکر پیا سیر کراندا عشق ای اے”ص122
ہر انسان نوں اپنے خالق دی رضا اُتے سبھ کجھ چھڈنا پیندا اے۔حضرت آدم نوں جنت وچوں دھرتی تے گھلیا تے نواں جہان اُساریا ایس حوالے نال اوہناں دا کہنا اے۔
” اللہ پاک دی پاک رضا اُتے بیڑا زندگی دا آدم ٹھیل دِتا
ہور بھُل دُنیاوی خیال سارے دِل نوں رَبّ دی یاد نال میل دِتا
نکل جنتوں آ گیا دھرت اُتے جدوں عشق مجاز اُلیل دِتا
اِک نواں جہان وسان کارن انہوں رَبّ انوکھڑا کھیل دِتا”ص129
خالق تے مخلوق دے حوالے نال پاک پریت نوں اوہ انج بیان کردے نیں:
”سارے کم وسار کے دِنے راتی اللہ ہُو دی پائی دُہائی آدم
ایس عشق مجاز دے آسرے تے اگ پاک پریت مچائی آدم” ص123
آدم دی تخلیق مگروں کویں اگلی نسل وچ عشق مجازی نے اثر پایا اوس نوں ویکھو:
خوب عشق مجاز دا رنگ چڑھیا بچے کئی حسین وجمیل ہوئے
اوتھوں بنی بنا آبادیاں دی پیدا پہلے ہابیل قابیل ہوئے” ص128
بشیر ناطق نے آدم بیتی نوں بڑے منفرد تے سوہنے انداز نال بیانیا اے نالے پڑھن والیاں لئی پُر تاثیر لہجے وچ شعراں نوں بیان کر کے عشق دے جذبے نوں وی آدم دی تخلیق وچ وڈیان دا جتن کیتا اے۔
ایس کتاب دے کُل صفحے128تے مُل چار سو روپے اے۔مکتبہ شافی،کریم پارک راوی روڈ لاہور ولوں دسبر2021وچ شایع ہویا اے۔
٭٭٭٭٭