بیانیہ تے فیصلے

عام طور تے خیال کیتا جاندا رہیا کہ عمران خان نے 2018 دے انتخابات مقتدرہ دے تعاون نال جتے۔ ایس خیال دی تائید پنجاب دی اکا دکا نشستاں اتے ہون والے ضمنی انتخابات وچ ن لیگی امیدواراں دی کامیابی تے حکومت وچ ہون دے باوجود پی ٹی آئی دی اپنی خالی ہون والی نشستاں ہارن توں وی ہوندی رہی جہدے توں ایہہ تاثر راسخ ہویا کہ پورے ملک دی جے نہیں تے پنجاب دی حد تک اج وی ن لیگ مقبول ترین جماعت اے لیکن سترہ جولائی نوں ہون والے ضمنی انتخاب وچ بلے دی فقید المثال کامیابی توں خیال تے تاثر دھندلا گیا اے۔ انج محسوس ہوندا اے جیویں پنجاب کروٹ بدلن لگیا اے کیوں جے صرف شہری نہیں دیہی علاقیاں وچ وی پی ٹی آئی متبادل دے طور تے سامنے آ رہی اے۔ ایسے بنا تے اپوزیشن وچ ہو کے وی حکمران ن لیگ نوں پچھاڑن لگی اے۔ آزاد حیثیت وچ منحرفین دی پندرہ نشستاں اتے پی ٹی آئی دے امیدوار کامیاب ہو گئے۔ ایہہ کافی حیران کن گل اے کیوں جے جہڑی جماعت حکومت وچ ہوندے ہوئے ضمنی انتخابات ہاردی رہی اوہ اپوزیشن وچ آ کے کیویں عوامی تائید حاصل کرن وچ کامیاب ہو گئی۔ نکتہ دان ایس سوال دا جواب عمران خان دے بیانیے دی کامیابی تے حکومت دے غلط فیصلے قرار دیندے نیں۔
ن لیگ تے پی پی اک دوجے دی نظریاتی مخالف نیں۔ ایہہ اختلاف ووٹراں تے کارکناں وچ ہن وی موجود اے۔ نواز شریف تے بے نظیر بھٹو نے پرویز مشرف دی آمریت توں نجات لئی میثاق جمہوریت کیتا تے رل کے چلن دے عہدو پیمان کیتے لیکن رہنماواں دی قربت دے اثرات تھرلی سطح تک نہ پہنچ سکے۔ ایسے بنا تے کئی دہائیاںتوں برسرپیکار کارکناں وچ ذہنی ہم آہنگی پیدا نہیں ہو سکی۔ 2008 دے عام انتخابات مگروں دونویں جماعتاں نے رل کے حکومت بنائی جہڑی بمشکل کجھ مہینے ای چل سکی ۔چھیتی ای ن لیگ وکھری ہو کے اپوزیشن نشستاں اتے بیٹھ گئی مگر اتحاد نال پنجاب وچ پی پی دے کارکن اتحاد توں اینے دلبرداشتہ ہوئے کہ جماعت لئی کم کرن دے بجائے یا تے سیاست توں کنارہ کش ہو کے گھر بیٹھ گئے یا جماعت تبدیل کر لیتی۔ جماعت بدلن والیاں نے شمولیت لئی پی ٹی آئی نوں ترجیح دتی۔ پی پی نے ن لیگ مگروں ق لیگ نوں نال رلا لیتا لیکن پی پی تے ق لیگ دے اتحاد نال وی کارکناں وچ بددلی پھیلی۔ 2013 دے عام انتخاباں وچ مذکورہ دونویں جماعتاں بددلی دی بنا اتے ای پنجاب وچ بری طرح شکست نال دوچار ہوئیاں۔ ن لیگ نے تے اپنے کارکناں نوں مطمئن رکھن لئی ویلے تے حکومت توں علیحدگی اختیار کر لیتی سی۔ ہن ن لیگ تے پی پی نے اک واری فیر اک دوجے د دامن پھڑ کے اتحادی حکومت بنا لیتی اے جہدے توں اوہناں دے کارکن اضطراب دا شکار نیں۔ ہور ایہہ کہ عمران خان دا ایہہ بیانیہ’ لٹ مار بچان لئی ایہہ اکٹھے ہو جان گے تے حالیہ تبدیلی دے تانے بانے بیرون ملک ملدے نیں تے دونویں جماعتاں نوں مقابلے وچ دفاعی پوزیشن اتے لیا کھڑا کیتا اے۔ ہن وی جے فکری سوچ دے متضاد پالیسیاں اتے نظرثانی نہیں کیتی جاندی تے بہتر فیصلے نہیں کیتے جاندے تے آئندہ عام انتخابات وچ بہتر کارکردگی دا مظاہرہ کرن وچ نکامی دا سامنا ہو سکدا اے۔ وجہ مولانا فضل الرحمن وانگوں جنت دے سفنے وکھان والا مذہبی چورن تے ہے نہیں ایسے لئی بیانیہ اپناندے تے فیصلے کردے ہوئے فکری حدود توں باہر جماعتاں نوں گلے لاندے ہوئے مضمرات دا خیال رکھو۔
اتحادی حکومت کولوں توقع سی کہ اوہ تجربہ کار ہون دی بنا تے ملک نوں معاشی گرداب توں کڈ لووے گی۔ بدقسمتی نال ایسا نہیں ہویا بلکہ مہنگائی تے بے روزگاری ودھدی جا رہی اے۔ تیل تے بجلی دی قیمتاں ودھان نوں بظاہر حکمران مشکل فیصلے قرار دیندے نیں۔ ایہہ بیانیہ بنان وچ میڈیا وی ہمنوا اے لیکن عام بندا ایس بیانیے نوں قبول نہیں کر رہیا۔ گل ایتھوں تک ای محدود نہیں رہی حکمراناں دی حب الوطنی نوں وی شکو شبے دی نظر نال ویکھیا جان لگیا اے۔ ہور ایہہ کہ پی پی نال اتحاد دی وجہ نال ن لیگ نے کجھ مہینے دا اقتدار لے کے اوہدے عوض کارکناں نوں بدظن کر لیتا اے۔ بظاہر شہباز شریف دی افہام و تفہیم دی پالیسی توں اقتدار دی منزل آسان ہوئی اے لیکن پی پی دے نال شراکت اقتدار نے پنجاب دی مقبول جماعت نوں ایسی پوزیشن اتے لیا کھڑا کیتا اے جہدے توں عوامی اعتماد مجروح ہویا اے کیوں جے نظریاتی مخالف کارکن ہن وی اک دوجے نوں ٹھنڈے ڈھڈوں برداشت کرن تے تیار نہیں۔ موجودہ سیٹ اپ وچ آصف زرداری تے اوہناں دی جماعت محفوظ نیں تے سارے غلط فیصلیاں دا نقصان شہباز شریف تے اوہناں دی جماعت نوں ہو رہیا اے کیوں جے پی پی دے کول ایسی وزارتاں نیں جہناں دا عام بندے نال گھٹ واسطہ رہندا اے۔ مہنگائی’ بے روزگاری تے ڈالردی ودھدی قیمت دا ذمہ دار کلے ن لیگ نوں سمجھیا جا رہیا اے ایسے لئی سیاست اتے نظر رکھن والے آکھدے نیںکہ جے صورتحال انج دی ای رہی تے پی پی نے تے خود نوں سندھ تک محدود کر لیتا مگر ن لیگ نوں سوچنا چاہیدا اے کہ پنجاب توں بے دخل ہون مگروں کتھوں کامیاب ہو سکدی اے؟
ملک دے معاشی حالات خراب نیں۔ا یس گل توں کوئی لاعلم نہیں۔ ایہناں حالات نوں بنیاد بنا کے عدم اعتماد دی تحریک پیش کیتی گئی لیکن حکومت دی تبدیلی دے باوجود حالات بہتر نہیں ہوئے نیں۔ زرمبادلہ دے ذخائر گھٹ ہون نال روپیہ بے وقعت ہوندا جا رہیا اے لیکن حکومت نوں ایہدا احساس تک نہیں۔ حکومتی حلقیاں دا بیانیہ اے کہ ضمنی الیکشن وچ ن لیگ نال ہتھ ہو گیا اے۔ ایس بیانیے وچ کوئی صداقت نہیں جد کہ عمران خان دے کول بیرونی مداخلت دے بیانیے دے نال ریاست مدینہ دے نعریاں دی بنا اتے مذہبی ووٹ بینک اے جہنوں اینٹی اسٹیبلشمنٹ دا تڑکہ لا کے ووٹراں لئی بوہتا مزیدار بنا دتا گیا اے۔ ایہہ بیانیہ ای ن لیگ نوں بہا کے لے گیا۔ اینے جاندار بیانیے داجواب دین دے بجائے ن لیگ نے عطا تارڑ’ رانا ثنا تے مریم اورنگزیب ولوں دھمکیاں دوان اتے توجہ مرکوز رکھی حالانکہ ووٹ نوں عزت دو تے سویلین بالادستی جئے پرکشش نعرے اوہدے کول جہڑے حکومت وچ ہون دی بنا تے ہن کارآمد نہ رہے۔ ہور ایہہ کہ اتحادی حکومت نے طاقتور اپوزیشن رہنما دے کیس ختم کران جئے خدشے وی درست ثابت کر دتے۔ نہ صرف نیب قوانین وچ ترمیم لیا کے ایس ادارے نوں بے اختیار بنایا بلکہ سوشل میڈیا اتے متحرک تارکین وطن نوں فیصلیاں توں ناراض کردتا۔ نیز راجہ ریاض دی صورت وچ کٹھ پتلی اپوزیشن لیڈر بنا کے اسمبلی دی ساکھ وی ختم کر دلیتی۔
نیب ترامیم دے باوجود پی پی تے ن لیگ دے ادوار وچ ڈی جی آئی بی رہن والے آفتاب سلطان نوں چیئرمین نیب بنانا ایسی کالک اے جہڑی شاید ای مٹ سکے۔ آفتاب سلطان اتے نہ صرف سارک کانفرنس دے دوران 73گڈیاں دے مبینہ فراڈ دا الزام اے بلکہ اوہ 1952.74ملین روپے دے ریفرنس وچ نواز شریف دے نال شریف ملزم نیں۔ اوہناں اتے 2014 دے دھرنیاں وچ کئی فوجی افسراں نوں ذمہ دار ٹھہرا کے بلیک میل کرن دا الزام اے۔ چپ سادھن دے عوض کجھ وصولیاں کیتیاں یا نہیں جئی غیر مصدقہ افواہواں وی نیں۔ دغدار کردار دے مالک نوں نیب دی سربراہی دین نال حکومت دی نیک نامی وچ وادھا نہیں ہویا۔ جمہوری تے اصولی گل تاں ایہہ اے کہ پنجاب وچ اکثریت نوں حکومت بنان دا موقع دتا جاوے۔ ضمنی انتخاب مگروں فریقین نے کجھ دن چنگا رویہ اپنایا۔ خود مریم نواز نے شرکت نوں کھلے دل نال تسلیم کردیاں ہوئیاں آئندہ خامیاں دور کرن دا عزم ظاہر کیتا لیکن کجھ دناں مگروں ای ہن ایہہ جذبہ مفقود اے۔ وفاقی حکومت ہر صورت پنجاب وچ حمزہ شہباز دی حکومت بنان لئی ممبران اسمبلی دی بولیاں
لا رہی اے حالاں جے انج ہون دابظاہر کوئی امکان نہیں کیوں جے پی ٹی آئی تے ق لیگ دے امیدوار چودھری پرویزالٰہی دی واضح اکثریت حاصل اے جہدی بنا تے بآسانی منتخب ہو سکدے نیں لیکن آصف زرداری تے ن لیگی زعما سیاسی بے سکونی تے تلخی ودھا رہے نیں۔ ایس تلخی تے درشتی توں محاذآرائی ودھ سکدی اے جہدے توں قوی امکان اے کہ عام انتخابات لئی مستقبل وچ کے پی کے تے پنجاب رل کے لانگ مارچ وچ رلت کرن۔ جے انج ہوندا اے تے حکمران اتحاد سوچے کہ اوہ کتھے ہووے گا؟ افہام و تفہیم دی سیاست ای بہتر اے۔ بیانیے دے مطابق ہن وی جے درست فیصلے نہیں کیتے جاندے تے حکمران اتحاد دا ہو ر سیاسی نقصان ہو سکدا اے۔
موجودہ صورتحال وچ پنجاب دے وزیر اعلیٰ دا انتخاب ہویا تے پرویز الٰہی نوں زیادہ ووٹ پئے لیکن ڈپٹی سپیکر نے چودھری شجاعت دے خط نوں بہانہ بنا کے ق لیگ دے ایم پی ایز دے سارے ووٹ کینسل کر کے حمزہ شہباز نوں وزیر اعلیٰ بنا دتا۔ ہُن معاملہ سپریم کورٹ وچ زیر سماعت اے تے دونوں امیدوار اپنے حق وچ فیصلے لئی پُر امید نظر آرہے نیں۔