میاں نواز شریف تے عمران خان دا دکھ اک ،راہواں وَکھو وَکھ

ویسے تے پاکستان بڑے سکون دے نال تیزی نال ترقی دی راہ اتے گامزن سی۔ پاکستان دے سارے معاشی اشاریے مثبت تے تیز رفتاری دے نال اگے ودھ رہے سن۔ ترقی دی شرح 6 فیصد تک جا چکی سی۔ بجلی دے ڈیم جہڑے کہ ایوب خان دی حکومت مگروں کئی دہائیاں مگروں شروع ہوئے تاں جے ہمیشہ لئی بجلی دا فقدان ختم ہو سکے۔ ٹیکسٹائل انڈسٹری تے کنٹریکشن انڈسٹری دا گراف کنا اتے جا چکیا سی۔ بین الاقوامی پٹرول دی ودھی قیمتاں دے باوجود مہنگائی سائوتھ ایشین خطے وچ سب توں گھٹ سطح اتے سی۔ آئی ایم ایف نے اپنی رپورٹس وچ
حکومت دے مثبت کردار دی تعریف کیتی۔ امریکن دے قرضیاں توں جان چھڈان دا ویلا کول سی کہ پاکستان اک آزاد خارجہ پالیسی دے نال اپنی مرضی دے فیصلے کرے۔ سی پیک اتے پوری رفتار نال عمل جاری سی تاں جے آئندہ کجھ سالاں مگروں پاکستان ایس پروجیکٹ نوں مکمل کر کے اپنی ترقی دا عروج ویکھ سکے۔ پاکستان چائنہ’ سعودی عرب’ ایران’ افغانستان تے ترکی جیا اک مضبوط بلاک تشکیل دتا جا چکیا سی۔ پاکستان وچ صحت کارڈ جئے پروگرام جہدے توں ہر شہری دس لکھ تک صحت لئی انشورڈ ہو چکیا سی۔ پہلی واری پاکستان وچ مارگیج سسٹم متعارف کراو دتا گیا جہدے توں کرایہ داری نظام دے بجائے تسیں اپنا گھر لوو تے کرایہ دی جگہ مارگیج بینک نوں دیو۔ ایس طرح نوجوان پروگرام دے تحت 12 ہزار ہر شہری تک پہنچان جئے کم تے دوجے بے شمار منصوبے’ کسان کارڈ تے کسان پالیسی دے تحت غربت وچ گھرے کسان نوں خوشحال کرنا تے زراعت دے شعبہ وچ انقلاب لیانا۔ ماحولیات دے بدلدے تیور تے اک ارب درخت پودے لانا تاں جے دنیا نوں گرمی توں محفوظ رکھیا جا سکے تے بہت کجھ ۔ بنان دا مطلب سی کہ پاکستان بالکل ترقی ول گامزن سی کہ اچانک کیہ ہویا؟ کہ پاکستان دی ساری مختلف الخیال سیاسی جماعتاں اکھٹی ہو گئیاں تے اک مستحکم حکومت دے خلاف اکٹھی ہو گئیاں۔ مگروں پتہ چلیا کہ ایہہ بین الاقوامی سازش سی تے پاکستان دے مقتدر طاقتور حلقیاں نے اوہناں ساریاں نوں اکٹھا کیتا تے مجبور کیتا کہ ایس حکومت نوں چلدا کرئیے۔ موصوف دستگیرتے جناب میاں جاوید لطیف عوام نوں دس چکے نیں۔ گویا پاکستان وچ ہمیشہ ای مقتدر حلقے اثرانداز رہے نیں جہدے توں پاکستان وچ کدی وی جمہوریت مضبوط نہیں ہو سکی تے اک لولی لنگڑی جمہوریت تے بے بس پارلیمنٹ کدی وی پاکستان وچ ترقی تے خوشحالی نہ لیا سکی۔ پاکستان دی سیاست وچ ماضی قریب وچ جائیے تے میاں محمد نواز شریف دی وزارت عظمیٰ کھو لیتی گئی بلکہ اوہناں نوں تے اوہناں دی دھی نوں لمی سزاواں سنا کے ہمیشہ لئی نااہل کردتا گیا تے اوہ پارٹی دے عہدیدار وی رہے تے اوہناں نوں قائد دا اضافی نام دینا پیا۔ اوہ اقتدار توں وی باہر ہو گئے تے اپنی تنظیم توں وی باہر ہو گئے جد کہ بالکل ایسے طرح اقتدار عمران خان نوں منتقل ہو گیا تے لولی لنگڑی حکومت وساکھیاں دے نال اوہناں دی بنا دتی گئی۔ تسیں اندازہ کرو کہ عمران خان تقریباً ساڈے تن سالاں مگروں اقتدار توں باہر کردتے گئے تے پاکستان دی تقریباً ساری سیاسی جماعتاں نوں اکٹھا کر کے اقتدار اوہناں دے حوالے کر دتا گیا تے میاں نواز شریف دے بھرا شہباز شریف نوں وزارت عظمیٰ دی کرسی اتے براجمان کردتا گیا۔ چیتا رہوے کہ جیویں اقتدار نواز شریف کولوں کھویا گیا سی اوس ویلے وی اک مستحکم حکومت سی تے ملک وچ کوئی افراتفری نہیں سی۔
میاں نواز شریف درحقیقت عوام وچ اپنا بیانیہ مقبول نہیں کر سکے کہ میرے پچھے یا پاکستان دے پچھے پاکستان دے جرنل نیں تے ہر اوہ شخص جہڑا اوہناں دے مفادات دے اگے اکھاں وکھاوے گا تے اوہ کنا ای طاقتور کیوں نہ ہووے اوہنوں عبرت دا نشان بنا دتا جاوے گا تے میاں نواز شریف جے اپنا بیانیہ مجھے کیوں نکالا عوام نوں باور کروا دیندے تے شاید اوہ وی اج دے عمران خان ہوندے تے پاکستان دی عوام اوہناں دے نال جاندی تے پاکستان وچ تبدیلی آ جاندی۔ میں ہمیشہ ای میاں نواز شریف دی پالیسیاں اتے تنقید کردا آیا واں جہڑا کہ میرا حق اے لیکن مسلسل اک ای طاقتور انسان نے کس طرح پاکستان نوں غیر متزلزل کیتا۔ معاشی دور سیاسی فقدان پیتا کیا۔ پاکستان دے حالیہ دو لیڈراں نوں اقتدار توں باہر کیتا تے اج پاکستان سری لنکا بنن جا رہیا اے معاملہ ایتھے ای ختم نہیں ہوندا بلکہ اج میاں نواز شریف مگروں اوہناں دی تنظیم وی اوہناں توں دور کردتی تے پنجاب تے اوہناں وچ محبتاں دا جہڑا رشتہ سی اوہنوں یکسر ختم کر کے دلاں وچ نفرتاں ای نفرتاں پیدا کردتی گئیاں۔ انج محسوس ہوندا اے کہ اج میاں نواز شریف نہیں بلکہ آصف علی زرداری ای ن لیگ دے سربراہ نیں تے میاں شہباز اج وڈے بھرادے بجائے آصف علی زرداری دے مقتدر نظر آندے نیں جد کہ آصف علی زرداری خو د پنجاب وچ شہباز شریف دے موہنڈھیاں اتے اپنی جڑاں مضبوط کر کے بلاول بھٹو نوں وزارت عظمیٰ تک لیانا چاہندے نیں تے میرا اپنا تجزیہ اے کہ میاں شہباز شریف چونکہ پارٹی دے صدر نیں اوہ چھیتی ای مریم نواز نوں وی پارٹی توں فارغ کر کے مکمل طور تے قبضہ کر لین گے ۔ ایس طرح آصف علی زرداری اپنی منصوبہ بندی وچ کامیاب ہو کے پنجاب وچ اپنے قدم جما کے میاں شہباز شریف دی پارٹی دا وی صفایا کر دین گے تے بلاول لئی رستے ہموار کر دین گے۔ اج محترم میاں نواز شریف تے مریم نواز صاحبہ نوں سوچن دی لوڑ اے کہ اوہ کیویں آصف علی زرداری تے میاں شہباز شریف دے چنگل وں پھسی پارٹی نوں آزاد کروا کے Revisit کرن کہ اوہناں دے تے عوام دے درمیان ایہناں دوریاں دی وجہ کیہ اے تے اوہ کیویں دوبارہ عوامی محبتاں نوں حاصل کر سکدے نیں۔ حالانکہ میاں نواز شریف تے عمران کان دا دکھ اک اے لیکن راہواں وکھریاں وکھریاں نیں۔
میں میاں نواز شریف نوں مشورہ دیواں گا کہ مریم نواز نوں خود ای پارٹی توں دور کر دین تے میاں شہباز شریف دی ساری غلطیاں اپنے اتے نہ لین۔ پاکستان وچ اج عوامی انقلاب آ چکیا اے تے پاکستان دی عوام ووٹ دا حق وی سمجھ چکی اے تے اپنا حق وی جان چکی اے ایس لئی پاکستان دی ساری سیاسی تنظیماں نوں ویلے دی نبظ اتے ہتھ رکھ کے چلنا ہووے گا۔ اج دے ایس جدید ترین تے تیز ترین دور وچ عوام نوں بیوقوف بنان والی سیاسی تنظیماں دی جتھے پاکستان وچ کوئی گنجائش نظر نہیں آندی اوتھے تسیں محسوس کرو گے کہ پاکستان وچ مقتدر طاقتور حلقیاں دی سیاسی مداخلت جہڑی کہ پاکستان بنن توں ہن تک جاری سی تے ہے اوہ مستقبل قریب وچ کدھرے نظرنہیں آوے گی کہ پاکستان دے سارے اداریاں نوں ہن آزاد تے مضبوط ہونا ہووے گا تے غیر جانبدارانہ فیصلے کرنا ہون گے۔مینوں انج ہوندا محسوس ہو رہیا اے۔