آخر نجات دہندہ ہے کون؟

تم نے جگہ جگہ پہ مجھے بدگماں کیا
اپنا نشاں بنا کے مجھے بے نشاں کیا
خاموش جب رہا ہوں تو گویا رہا ہوں میں
تم نے زبان دے کے مجھے بے زباں کیا
ایہ سب زندگی دے رنگ تے رویے نیں تے ایہو انداز تے ادا اے کہ اک بوقلموئی پیدا کردی اے پر جدوں مقصد حیات نہ رہوے تے زندگی ڈگر توں ہٹ جاندی اے میں ویکھیا اے کہ وابستگی تے تعلق انسان نوں اُکا بدل دیندا اے تے اکثر اوقات ایہ رشتہ دیوانگی دی حد تک ودھ جاندا اے۔ مثال بالکل سامنے دی اے کہ پچھلے دور وچ میں اجہے لوک ویکھے کہ جو کہہ رہے سن کہ پٹرول دو سو روپیے لٹروی ہو گیا تے اسیں فیر وی عمران خان دے نال آں تے ہن وی میں اجہے لوکاں نوں سن رہیا واں جو چار سو روپیے لٹر تک وی شہبازشریف نوں ای نجات دہندہ سمجھدے نیں۔ کہنا میں ایہ چاہنا واں کہ وقت دے بہائو وچ رہنماواں نے اپنے منن والیاں دے دماغ بدل دتے نیں۔ اوہناں وچ وحشت آ گئی اے جو معاشرے لئی زہرناک اے۔ معاشرے وچ کدی ادب آداب لحاظ تے وضعداری ہوندی سی شاید اوہ سنہری اقدار’ روایات گھٹ چکیاں نیں مینوں ایہناں گلاں دا خیال عمران خان دی حالیہ تقریر سن کے ہویا کہ جو بھاویں نویں نہیں پر شدت اظہار تے غصہ اے کسے حد تک تسیں ایہنوں جائز قرار دے سکدے او۔
کہنا میں چاہواں گا کہ تہاڈے تخاطب وچ تضحیک نہیں ہونی چاہیدی مثلاً تسیں جدوں آپ ڈاکو’ چیری بلاسم’ زرداری بیماری’ مولانا ڈیزل تے ایسے قسم دے دوجے القابات دے نال اپوزیشن نوں نوازو گے تے اوہ وی جواباً کیہ معاف کرن گے اوہ وی تسلسل دے نال مسٹر یوٹرن’ فتنہ خان تے اجہے الفاظ استعمال کر رہے نیں جیویں شائستگی’ خوبصورتی تے دانائی بالکل ای جاندی رہی اے یقینا تسیں سوچو گے کہ بھٹو صاحب نے وی تے کسے نوں آلو کہیا تے کسے نوں ککڑی دے پر’ اک پاپولر لیڈر دی نشانی اے پر تسیں قائداعظم دا ماڈل کیوں پیش نہیں کر سکے جہدی ہر گل توں عظمت تے وڈاپن ظاہر ہوندا سی۔ میں ایہ گل مننا واں کہ اوہ ملک توں نسن دا نہیں کہہ رہے سگوں ردعمل دے رہے نیں تے اوہناں دا کہنا اے کہ اوہ ایتھے جین مرن گے اوہناں نوں اعتبار بخشدا اے۔ دوجے پاسے نوازشریف اینڈ کمپنی ول ویکھنا واں تے خیال ضرور آندا اے کہ اوہ اپنیاں عیداں’ شبراتاں تک وی باہر مناندے نیں’ اولاداں تے جائیداداں باہر نیں اوہ اپنی ساکھ بنان لئی سب کجھ اپنے ملک دے نال وابستہ کیوں نہیں کردے۔ میں ایہ سوال وی بتیری واری کیتا کہ اپنے ملک توں اپنا محل بنان دے بعد اوہدا ناں جاتی امرا بھارت نوازی توں علاوہ کیہ اے۔ ایہدے وچ وی کوئی دوجی رائے نہیں کہ نوازشریف دا ووٹ بینک بہت زیادہ اے خاص طور تے دینی طبقہ۔ گل تے اصل وچ کردار دی اے دھیان سارا بیان بازی تے فقرے بازی ول اے۔
تھلے تک اوہو رویہ نظر آ رہیا اے جے رانا ثناء اللہ’ شیخ رشید نوں پنڈی دا شیطان کہندے نیں تے اوہ جواباً رانا صاحب نوں چمگادڑ قرار دیندے نیں۔ تسیں ذرا ایہناں لوکاں دا حسن بصارت تے حسن بصیرت ویکھو کجھ الفاظ تے لکھنے وی اوکھے نیں۔ بے حمیت تے بے حیا دے الفاظ نوں اوہ پانی دی روانی نال استعمال کردے نیں ایس فن وچ شہبازگل تے فیاض چوہان وی سپرلیگ وچ آندے نیں۔ ن لیگ توں طلال چوہدری وی۔ ساریاں نوں اپنا رویو کرن دی ضرورت اے ہن تے کوئی شے کسے توں لکی چھپی نہیں اک لمحے لئی خان صاحب وی سوچن کہ صرف خط نال تے کم نہیں چلے گا کدی ٹھنڈے دل نال غور کرن کہ مجھاں ویچن’ ککڑیاں تے کٹے پالن’ وزیراعظم ہائوس تے گورنر ہائوساں نوں یونیورسٹیاں بنان توں لے کے کیہ کیہ تہاڈے عزائم سن جہاز تے تسیں بہہ گئے آئی ایم ایف دے کول وی خرابی بسیار دے بعد چلے گئے۔ کجھ کم تسیں چنگے وی کیتے جیویں صحت کارڈ’ بھاویں مخالفین ایہدے خلاف بولدے رہے پر میں اجہے بندے مولانا اسماعیل نوں جاننا واں جہدے دل دے دو اسٹنٹ ایسے کارڈ پاروں مفت پئے۔ ایہ گل وی ٹھیک اے کہ معاملات کجھ اچھائی ول جا رہے سن پر تسیں نال ای ووٹنگ مشین دا اعلان کر دتا تے ایہ دشمناں لئی موت دا پیغام سی تسیں آپ ای اپنے سارے دشمناں نوں بھتا کے ہور متحرک کر دتا فیر ساریاں نے رَل کے کدھرے ڈیل کر لئی انج تسیں چنگے ڈیلر وی نہیں کجھ تے بلنڈر کیتے سب توں وڈا بلنڈر بزدار نوں پنجاب تے مڑھنا تے فیر اوہنوں ہٹان لئی پرویزالٰہی نوں نامزد کر دتا۔ آخر گل ایہ کہ صرف دوجیاں نوں ہٹا کے اقتدار وچ آنا تے ایہدے لئی اداریاں توں زبردستی دی توقع رکھنا تسیں اپنی ٹیم تشکیل دے کے منصوبہ بندی کرو تے اک ورھا انتظار کرو کہ کس کارکردگی دے نال ن لیگ سامنے آندی اے مقابلہ وی تہاڈا ایہدے نال’ ایس شور شرابے وچ پیپلزپارٹی پاتال وچ جا چکی اے بہرحال تہذیب تے شائستگی لوکاں نوں متاثر کردی اے تے اوہ ووٹرز ای ہوندے نیں۔٭٭