آئی ایم ایف توں جان کیویں چھٹ سکدی اے؟

وزیراعظم شہبازشریف نے قوم نال خطاب وچ آکھیا کہ اسیں اپنے پیراں تے کھڑا ہون دی بھرویں کوشش کراں گے۔ اوہناں آکھیا کہ خودانحصاری واحد راہ اے جو قوماں نوں عزت تے وقار دیندا اے پر ایہ کوئی سوکھا راہ نہیں ایہدے لئی کنڈیاں بھرے راہواں توں گزرنا پیندا اے۔ اللہ دی ذات تے انحصار کیتا جاوے تے انکساری دے نال دن رات محنت کیتی جاوے تے تہاڈی محنت ضرور رنگ لیاوے گی۔ اللہ تعالیٰ دا وی ایہو حکم اے۔ دعا اے آئی ایم ایف نال آخری عاہدہ ہووے تے اسیں خودکفیل ہو جائیے۔ آئی ایم ایف توں چھٹکارے دا اک حل ملائیشیا دے سابق وزیراعظم مہاتیرمحمد نے بیان کیتا سی۔ مہاتیر محمد نے 20دسمبر 1925ء نوں اک غریب گھرانے وچ جنم لیا۔ اوہناں دی زندگی تے سیاست دا سفر اک مثال اے کہ اوہناں نے اپنے علم تے تجربے نال قوم پرستانہ بنیاداں تے ملائیشیا نوں اک شاندار ملک بنا دتا تے اوہناں دی جدوجہد غیرملکی طاقتاں’ ورلڈبینک تے آئی ایم ایف دے قرضیاں دے بناں کامیابی نال ہمکنار ہوئی۔
مہاتیرمحمد نے اک کتاب لکھی جہدا ناں The Malay Dilemma رکھیا ایہدا اردو ترجمہ فرخ سہیل گوئندی نے ایشیا کا مقدمہ دے ناں توں 2010ء وچ چھاپیا۔ عمران خان اپنی وزارت عظمیٰ دے دور وچ ملائیشیا دے دورے تے گئے۔ اوہناں نے مہاتیر محمد نال ملاقات کیتی تے اوہناں توں پچھیا کہ اوہناںنے کیویں اپنے ملک نوں فلاحی ریاست بنایا۔ میں سمجھنا واں کہ وزیراعظم شہباز جے مہاتیرمحمد دیاں گلاں تے غور کرن تے اوہناں لئی معاونت ثابت ہو سکدیاں نیں۔
مہاتیر محمد دا کہنا سی کہ آئی ایم ایف دا قیام بین الاقوامی اقتصادیات وچ توازن قائم رکھن لئی عمل وچ لیاندا گیا سی۔ جنگ دے بعد اقتصادی تعمیر لئی آئی ایم ایف نے فکس کرنسی ایکسچینج ریٹ دا نظام ترتیب دتا جہدے وچ بڑی کامیابی دے نال جنگ دے بعد دیوالیہ ہو جان والے ملک ہون نہ صرف سنبھل لین سگوں خوشحال ہون دا موقع دتا۔ جنگ دے بعد آئی ایم ایف نے فکسڈ اکانومیز دی حمایت کیتی جتھے مارکیٹ دے تنائو نوں سمجھدار حکومتی قواعد و ضوابط لئی کنٹرول کیتا جاندا۔ بنیادی طور تے بریٹن وڈز دا طرز حکومت اوس ویلے ختم ہو گیا جدوں ترقی یافتہ ملک اپنے وعدے توں مُکر گئے تے اوہناں نے اپنی ودھدی ہوئی قیمتاں تے قابو پان لئی اپنی کرنسیاں دی قیمت وچ کمی کیتی۔ انج اصل وچ تنخواہواں ودھان دے مطالبیاں نوں سامنے رکھدے ہوئے کیتا گیا جہدے نال بین الاقوامی منڈی وچ اوہناں دے مقابلے دی سکت وچ کمی آ رہی سی جے ترقی یافتہ ملک اجرتاں تے قابو رکھدے تے اوہناں نوں تخفیف زر دی کوئی لوڑ پیش نہ آندی تے اج وی بریٹن وڈز فکسڈ کرنسی ایکسچینج دا نظام بین الاقوامی خوشحالی دا سب توں وڈا علمبردار ہوندا۔
جدوں قواعد و ضوابط دی پابندیاں دی استدعا نوں سنجیدہ لیا گیا تے میں تے میری حکومت نے ایہ فیصلہ کیتا کہ ایس منہ زور گھوڑے نوں نتھ پا کے اسیں اپنے مسئلیاں دا حل آپ لبھاں گے۔ ایس سلسلے وچ ستمبر 1998ء وچ کافی غور دے بعد اسیں ایس نتیجے تے اپڑے کہ سانوں اقتصادی بہائو تے فیر کنٹرول کرنا ہووے گا۔ جہدے لئی دو طریقے وضع کیتے گئے پہلا تے ایہ کہ ڈالر دے مقابلے وچ فکسڈ ایکسچینج ریٹ دا فیر توں اجرا کیتا جاوے تے دوجا اپنی کرنسی دے سمندر پار دے ذخائر نوں واپس لیان دی کوشش کیتی جاوے تاں جے اسیں اپنے ملکی اثاثیاں تے پوری طرح نال کنٹرول حاصل کرن وچ کامیاب ہو سکیے۔ ایہدے نال اسیں سٹاک ٹریڈنگ تے نویں قواعد و ضوابط لاگو کیتے تاں جے شارٹ سیلنگ دے مضر اثرات توں بچن دے نال نال سٹاک مارکیٹ وچ ہون والی تجارت نوں ہور شفاف بنایا جا سکے۔ ہن ملائیشیا وچ خرید کردہ کوئی وی سٹاک اک ورھے توں گھٹ مدت دے عرصے وچ نہیں ویچ سکدا۔ ایہ بین الاقوامی سطح تے کوئی انوکھی گل نہیں سی کیوں جے جنوبی امریکہ دے ملک چلی وچ وی ایس قسم دا قنون موجود اے۔تے فیر مسئلے دا حل کیہ اے؟ اک مشہور ملایا روایت اے کہ تسیں راہ بھل جائو تے تہانوں فیر توں اوتھے اپڑن دی کوشش کرنی چاہیدی اے جتھوں تسیں سفر دا آغاز کیتا سی۔ ایسے لئی ساڈے کول ایس توں علاوہ کوئی چارہ نہیں سی کہ اسیں فکسڈ ایکسچینج ریٹ دے نظام نال ای رجوع کریئے’ جو جنگ عظیم دے بعد بدحال معیشتاں دی تعمیر دا سب توں وڈا کارن اے۔
وزیراعظم شہبازشریف تے وزیر خزانہ مفتاح اسماعیل مہاتیرمحمد دے تجربیاں توں رہنمائی حاصل کرن تے ملک فلاحی ریاست بن سکدا اے۔ ایس توں پہلاں عمران خان نے مدینہ دی ریاست تے فلاحی ریاست بنان دے نعرے لائے پر اوہ عملی جامہ نہ پہنا سکے۔٭