مشاہیرکے خطوط بنام عطاء الحق قاسمی

ایہ صرف لکھن والا ای جان دا اے کہ لکھت وچ تازگی’ شگفتگی تاثر تے انشاپردازی دے تقاضے چار دن وی نبھانا کناں اوکھا اے بھاویں ایہ ادھی صدی دا قصہ ہووے’ بندہ مجلسی زندگی وچ وی اپنی مثال آپ ہووے اولاد نوں وی اعلیٰ تعلیم یافتہ بناوے زوجہ وی خوش تے دوست تے جیویں نہال ای ہوندے چلے جان۔
فلیٹیزدے ہال وچ کتاب ”مشاہیر کے خطوط بنام عطاء الحق قاسمی” دی تقریب وچ چوٹی دے کالم نگار’ اینکرز’ شاعر’ ادیب تے احباب شریک سن۔ سیج تے جیویں سارے چینلز اکٹھے ہو گئے ہون اوہ جگمگاندے ستارے جہناں نوں ویکھن سنن لئی لوکاں نوں ریموٹ گھمانا پیندا اے بیک وقت اک ای فریم وچ موجود سن حسن نثار’ حامدمیر’ رئوف کلاسرا’ ڈاکٹر نجیب’ پرویز رشید تے مجیب الرحمن شامی وکھووکھ آراء لوکاں دا اک ہجوم جو سارے نظریاتی اختلاف سنے ایہ اعلامیہ جاری کر رہیا سی کہ عطاء الحق قاسمی موجودہ دور دے سب توں وڈے کالم نگار نیں ایس طے شدہ گل دے بعد تقریب وچ موجود اکابرین وچوں کجھ تقریراں تے تریخی بن گئیاں۔ حامدمیر نے بڑے تجزیاتی انداز وچ خطوط بنام عطاء الحق قاسمی دے اوہناں پہلوئواں نوں ویکھیا جو باقی مقرر نہ ویکھ سکے گا بالکل انج ای جیویں اوہ سب توں وکھرے زاویے نال زندگی نال بھرپور ٹاک شو کردے نیں۔ شرارت’ ذہانت دے نال مل کے اوہناں نوں صحیح معنیاں وچ ممتاز کردی اے کہ خطوط دے مطالعے توں مینوں لوکاں دے ذہن’ ظرف تے دنیاداری وی ویکھن نوں ملی۔ کشورناہید د ے تن خطاں دا حوالا دتا جہدے وچ کشور نے تنے واری عطاء صاحب نوں بحیثیت کولیگ کدی ڈیئر کدی عطا تے کدی دوستانہ انداز وچ پکاریا اے اجہے وچ افتخار عارف صاحب نے بتاریخ حوالا اوہناں نوں ڈیئر عطاء کہہ کے مخاطب کیتا بعد وچ عطاء صاحب سفیر وی بنے تے طرز تخاطب گرامی قدر ہو گیا عطاء صاحب حامدمیر نوں دوستاں دے حوالے نال شرلیاں چھڈن توں روکدے رہے پر جو چھپ جاندا اے اوہ قاری دا اثاثہ بن جاندا اے۔ انج وی حامد کتھے رکن والے سن۔ نوازشریف’ شہبازشریف دے خطوط نوں شامل کیتے جان تے پرویز رشید توں پیشگی معذرت دے نال کہیا کہ ایہہ دوویں وی مشاہیر وچ شامل ہو گئے۔
پرویز رشید نے اپنے دھیمے مخصوص انداز وچ نکتہ دانی کیتی کہیا کہ میں شاید کتاب خطوط فلاسفی تے دوجے معاملیاں پاروں نہیں آیا میں عطاء دا شکریہ ادا کرن آیا واں کہ ہر واری جدوں میرے اثاثے چھپدے تے مینوں دنیا د ا سب توں زیادہ مفلس انسان سمجھیا جاندا عطاء پاروں مینوں چار کروڑ دا جرمانہ ہویا تے لوکاں نے مینوں عزت دینا شروع کر دتی میں نکتہ ضرور سی پر سارے جان دے نیں کہ پرویز رشید تے اثاثے بنان دا الزام لگ ای نہیں سکدا کہ اوہ اپنے قول و فعل وچ تضاد نہیں رکھدے۔ پورا خاندان آرٹ’ موسیقی تے ادب دی محبت وچ ڈبیا ہویا اے اوہ اثاثہ فن ثقافت دے امین نیں ایس لئی کرنسی نال رغبت نہیں۔
مجیب الرحمن شامی’ حسن نثار’ رئوف کلاسرا نے کتاب مشاہیر دے خطوط نوں عطاء الحق قاسمی صاحب نوں ادب دی تریخ مرتب کرن ورگا عمل کہیا ایس حوالے نال ڈاکٹر عائشہ عظیم جو پہلے دائود ہبر ورگے مفکر تے کم کر چکیاں نیں خطوط دی تدوین و تالیف ورگا اوکھا ذمہ وی اٹھایا تے اوہنوں ایہ انجام دے کے مکمل کیتا جہدے اعتراف وچ اینی خوبصورت تقریب ہوئی تے ستاریاں دی کہکشاں سجی عزیزاحمد نے حق میزبانی ادا کر دتا۔ فائزہ بخاری نے بڑی عمدگی نال نظامت دے فرائض نبھائے۔ پرتکلف چائے دا اہتمام سی۔ ایہہ وی اتفاق اے کہ پچھلے کجھ دیہاڑیاں توں غبار خاطر پڑھ رہی سی مولانا ابوالکلام آزاد دے قلم دا جادو سر چڑھ کے بول رہیا سی عربی فارسی حافظ شیراز یاں القابات دا جہان کشمیر دا بوٹ ہائوس ناسازی طبع سگرٹ دا شوق دمہ تے تکالیف اسیری تے دربدری پر کیہ اے کہ قلم دا سحر نہیں ٹُٹ رہیا۔
لکھدے نیں کہ صدیق مکرم زندگی دے بازار وچ جنس مقاصد دی بڑی جستجو کیتی سی پر ہن اک نویں متاع دی جستجو وچ مبتلا ہو گیا واں یعنی اپنی کھوئی ہوئی تندرسی لبھ رہیا واں ڈاکٹراں نے وادی کشمیر دی گل گشتاں وچ سراغسانی دا مشورہ دتا سی متاع گم گشتہ دا سراغ نہ ملن تے کہندے نیں:
نکل گئی ہے وہ کوسوں دیار حرماں سے
مینوں غبارخاطر توں مشاہیر دے خطوط تک پیاس ای پیاس دا صحرا لگا جہدے تے کدی کچے گھڑے دے قطرہ قطرہ ڈگدے مٹھے احساس نے لبھایا تے کدی وقت دی کاری گری نے رلا دتا۔ سراج منیر’ آئی کے گجرال’ منیرنیازی’ سیاستدان’ شعرا’ احباب کس کس زمانے وچ کیسے کیسے پیراہن اوڑھ لیندے نیں اوہناں دے رنگ ویکھن دا بہترین طریقہ لکھتاں وچ نظری آندا اے خاص کر خطوط وچ انسان بڑا براہ راست تے بے ساختہ ہوندا اے۔ احمد ندیم قاسمی صاحب دے افسانیاں توں ہٹ کے زندگی دے سود و زیاںتے مکتوب عطاء صاحب دی متوازن و بے ساختہ شخصیت دی عکس نگاری کردے نیں۔ ایہ کتاب نہیں اک چمن اے تے ایہناں رنگ برنگے پھلاں بھرے چمن دی چمن بندی کرن والی ڈاکٹر عائشہ عظیم مبارکباد دی حق دار نیں۔٭٭