کیہ درست تے کیہ غلط اے؟

پیارے نبیۖ نے مال تے اولاد نوں فتنہ قرار دتا اے۔ ایس فرمان دی بار بار تصدیق ہو رہی اے اولاد دی پرورش لئی والدین زندگی بھر جائزتے ناجائز ذرائع اختیار کردے نیں۔ اوہو اولاد بڑھاپے وچ سہارا بنے گی یا خدمت کرے گی؟ یقین نال کجھ نہیں آکھیا جا سکدا مگر ایسے اولاد نوں فیدہ پہنچان لئی والدین اپنی دوستیاں تے تعلق تک ختم کر لیندے نیں۔ رشتے تک توڑ دیندے نیں۔ بھرا بھراواں تے پتر پیو دے خلاف ہو جاندے نیں۔ جائیداد تے مال توں بھیناں تے دھیاں نوں حصے توں محروم رکھن دی کوشش کیتی جاندی اے مگر اینا کجھ کرن دے باوجود رشتہ تے خاندان جڑیا رہوے گا کوئی وی وثوق نال ہاں وچ جواب نہیں دے سکدا۔ مال تے اولاد ایسا فتنہ اے جہڑا نہ صرف رشتیاں دا احترام بھلا دیندا اے بلکہ رشتیاں دی شناخت وی ختم ہو جاندی اے۔ پنجاب کیہ پاکستان وچ چودھری ظہورالٰہی شہید خاندان اپنی مہمان نوازی’ وضع داری تے شرافت وچ اک منفرد مقام رکھدا اے۔ سیاسی’ انتظامی’ سیاسی’ مذہبی تے
کاروباری لوک ایس خاندان دا احترام کردے نیں۔ ہن ایہہ خاندان ایسی ٹٹ پھٹ دا شکار اے جہڑا جگ ہنسائی دا کارن اے۔ ایس ٹٹ پھٹ وچ اولاد’ مال دے فتنہ ہون یا اقتدار حاصل کرن دے اشتیاق دا کنا حصہ اے؟ ایہدا تے مستقبل وچ پتہ چلے گا لیکن اپنے گھر دے فرد نوں اقتدار وچ آن توں روک دتا گیا۔ حالانکہ کزن نوں اقتدار توں روک کے خود حکومت وچ آن دا امکان وی نہیں سی فیر کیوں انتہا تک چلے گئے۔ سچ ایہہ اے کہ کزن دے خلاف خط لکھن نال عزت وچ وادھا نہیں گھاٹا ہویا اے۔
اقتدار تے مال و دولت لئی ایتھے کیہ کجھ نہیں ہوندا۔ غرناطہ دے حکمران ابوالحسن جدوں اپنے بھرامحمد بن سعد دے نال فرڈینڈ تے ملکہ ازابیلا دی مشترکہ فوجاں نال جنگ وچ مصروف سن تے ایہناں نازک لمحیاں دا فیدہ چکدے ہوئے ولی عہد ابو عبداللہ نے پیو دے خلاف بغاوت کردیاں ہوئیاں تخت نشین ہون دا اعلان کردتا۔ مال و دولت تے اقتدار دی ہوس نے اسلامی فوج نوں کمزور بنایا چاہے جو وی ہووے والدین اپنی اولاد دی ہر خامی بھلا کے گلے لا لیندے نیں ایسے لئی فتنے نوں پلن دے موقعے ملدے نیں۔ پیارے نبیۖ نے ایسے لئی فتنہ آکھیا اے یورپ دی ایس اسلامی سلطنت نوں ڈبون وچ اولاد جئے فتنے دا کلیدی کردار اے۔
جدوں دوجیاں کولوں انصاف دے مطابق فیصلے کیتے جاندے تے تعلق بنائے جاندے نیں جے اولاد جئے فتنے نال وی انصاف دے مطابق برتائو کیتا جاوے تے کئی خرابیاں دور ہو سکدیاں نیں لیکن انج کدی ہوندا نہیں۔
شہنشاہ اورنگزیب نوں نمازی’ پرہیزگار تے دیانتدار سمجھیا جاندا اے اوہ ٹوپیاں سی کے گزر بسر کردے سن مگر شہنشاہ شاہ جہاں نے اپنے خوبصورت تے تابعدار پتر دارالشکوہ نوں جانشین بنان لئی بقیہ تن صاحبزادیاں اورنگزیب نوں حیدرآباد دکن’ مراد نوں گجرات تے چوتھے پتر نوں بنگال دی سربراہی سونپی تے پڑھے لکھے اورنگزیب نے فیصلے نوں حق تلفی محسوس کردیاں ہوئیاں برا منایا تے کجھ ای عرصے مگروں اپنے بھرا مراد نال رل کے چوتھے بھرااتے حملہ کیتا تے دو بدو لڑائی وچ موت دے گھاٹ اتار دتا۔ فتح دے جشن وچ مراد جدوں نشے وچ دھت خوشی منا رہیا سی تے اورنگزیب نے موقع توں فیدہ چکدیاں ہوئیاں اوہنوں وی قتل کر دتا۔ ایہہ فتنہ ایتھوں تک ای محدود نہیں رہیا کجھ ای عرصے مگروں اورنگزیب نے دہلی اتے چڑھائی کردتی تے دارالشکوہ نوں شکست دتی تے بھرا نوں جان نال مار کے نہ صرف دہلی دا تخت سنبھال لیتابلکہ پیو شاہ جہان نوں نظربند کردتا۔ پیو نے اک واری پتر نوں التجا کیتی کہ قید وچ میرا ویلا بہت اوکھا گزردا اے۔ ایہہ بوریت دور کرن لئی بچے پڑھان دی اجازت دتی جاوے تے پتر نے تکبر نال ایہہ آکھ کے درخواست رد کردتی کہ اجے تک دماغ وچ بادشاہت دا خمار موجود اے ایسے لئی بچیاں اتے حکومت کرن دے سفنے ویکھن لگیا اے۔ اولاد تے مال و دولت جئے فتنے دی بنا تے خاندان ٹٹن دی تریخ بہت پرانی اے فیر وی اک مہمان نواز’ وضع دار تے شرافت دی مثال ایسے خاندان جہڑے خاندان دا پورے ملک وچ اک احترام اے دے ٹٹن اتے ہر مکتبہ فکر رنجیدہ اے پی ٹی آئی تے ق لیگ دے کارکن تے غم و غصے دا شکار نیں مگر پیارے نبیۖ نے مال تے اولاد نوں فتنہ قرار دتا اے۔ پیارے نبیۖ دا فرمان غلط ہو ای نہیں سکدا کیوں جے زبان نبیۖ دی ہوندی اے مگر اللہ دی اجازت دے بغیر نبیۖ دے منہ توں کجھ ادا ای نہیں ہوندا۔
پی ٹی آئی دے کارکن ہون یا ق لیگ دے’ نہ صرف غم دی کیفیت وچ سن بلکہ طیش وچ نیں اوہ جتھے اک پاسے ڈپٹی سپیکر دوست مزاری دی جانبدارانہ رولنگ دے خلاف مظاہریاں وچ مصروف سن تے چودھری برادران دے لہور توں لے کے گجرات تک گھراں دے باہر وی احتجاج ہو رہیا سی۔ وفاقی وزیر چودھری سالک حسین دے خلاف نعرے تے لگدے رہندے سن لیکن پہلی واری چودھری شجاعت حسین دے خلاف نعرے سنائی دتے ۔ لوکاں نے لوٹے چک کے مظاہرے کیتے۔ اک نیک نام تے ایسے رہنما جہناں نوں ہر مکتبہ فکر نے جے عزت و احترام دتا تے گھر وچ اوہناں نوں پیراں جیا رتبہ حاصل سی مگر اک خط لکھ کے عزت دا سودا کر لیتا ۔ ایس خط دے اثرات نوں اک پاسے رکھ کے جے اک وڈے سچ نوں پیش نظر رکھیے تے اوہ ایہہ اے کہ چوہدری خاندان دا اتحاد ختم ہو گیا اے۔ پشت تے وار کرن نال چودھری شجاعت حسین تے چودھری پرویزالٰہی دی سیاسی راہواں وکھری ہون دے کول نیں۔ خط ایسا کاری وار اے جہنے گھر وچ آئی وزارت اعلیٰ نوں دور کردتا سی۔ ق لیگ نے ای ق لیگ نوں شکست دے دتی ۔ حریف شریف’ بھٹو زرداری خاندان ایس ٹٹ پھٹ اتے بہت خوش نیں۔ ق لیگ دے احتجاجی کارکن آصف زرداری توں وی سخت ناخوش نیں لیکن اوہناں نوں ایہہ نہیں بھلنا چاہیدا کہ جنگ تے محبت وچ سب جائز ہوندا اے۔ آصف زرداری نوں عمران خان نال نفرت اے ایسے لئی کوئی چارہ نہ ویکھ کے اوہناں نے چودھری پرویزالٰہی نوں اوہناں دے گھروں جواب دے کے اپنی نفرت لکائی نہیں۔ اوہناں نے برسرعام ذاتی لڑائی آکھ کے اپنی نفرت دا اظہار وی کردتا اے۔ خیر جہنی وی گلاں کیتیاں جان گل اوہو اے کہ چوہدری خاندان دے سربراہواں دی علیحدگی دی ایہہ خبر ہر سنجیدہ تے محبت الوطن طبقے نوں چونکان دے نال تڑپان دا کارن اے ایہدی کسک پورے ملک نے محسوس کیتی اے۔
جتھوں تک خط توں وزارت اعلےٰ اتے مرتب اثرات دی گل اے تے بہت زیادہ امکان سی کہ عدالت عظمیٰ کولوں چوہدری پرویزالٰہی نوں ریلیف مل جاوے گاکیوں جے آئین دے آرٹیکل 63 اے دے تحت ووٹ دین دا فیصلہ پارلیمانی پارٹی نے کرنا ہوندا اے۔ اک غیر منتخب تے صاحب فراش شخص نہیں کر سکدا۔ علاوہ ازیں ق لیگ دے ممبران اسمبلی نے کسی دوجی جماعت دے امیدوار نوں نہیں بلکہ متفقہ طور تے اپنی جماعت دے امیدوار نوں ووٹ دتا اے جہدی پی ٹی آئی نے وی حمایت کیتی اے۔ ایسے بنا تے قنونی ماہرین ڈپٹی سپیکر دوست مزاری دے فیصلے نوں ماورا آئین تے اختیارات توں تجاوز قرار دیندے ہوئے ایہہ توقع رکھدے سن کہ چھیتی ای چودھری پرویزالٰہی وزیراعلیٰ پنجاب بن جان گے کیوں جے اوہناں نے 186 ووٹ لیتے نیں جد کہ حمزہ شہباز محض 179 ووٹ حاصل کر سکے نیں تے ایسے پارٹی سربراہ جہڑے غیر منتخب تے شدید بیمار نیں اوہناں دا خفیہ خط ڈپٹی سپیکر نے اوس ویلے ظاہر کیتا جدوں ووٹ کاسٹ ہو چکے ۔ ووٹ کاسٹ کرن توں پہلاں یا ایس عمل دے دوران خط دی کسے نوں ہوا وی نہیں لگن دتی گئی۔ ایس لئی جماعت دے امیدوار نوں ووٹ دین دے پارلیمانی پارٹی دے متفقہ فیصلے نوں جماعت توں انحراف نہیں آکھ سکدے نیز خفیہ خط دی بنیاد تے پوری جماعت دے دس ووٹ رد کرنا خلاف آئین تے قنون اے فیر اوہو ہویا کہ وزیر اعلیٰ پرویز الٰہی بن گئے سپریم کورٹ نے اوہناں دے حق و چ فیصلہ دے دتا مگرکیہ ٹٹن والے خاندانی رشتے دوبارہ جڑ پان گے؟ ایس سوال دا جواب مستقبل وچ ای مل سکدا اے فوری طور تے کجھ نہیں آکھ سکدے۔