حامد یزدانی دا تخلیقی سفر:شعر توں افسانے تیکر

20ویں صدی دے باکمال شاعر’ فلمی نغمہ نگار’ مکالمہ نگار تے صحافی محترم یزدانی جالندھری دے پتراں نال میرا دوستانہ تعلق بہت پرانا اے۔ میں جدوں ”نوائے وقت” اخبار وچ کالم نگاری دا آغاز کیتا تے اوس ویلے میری سب توں پہلاں خالد یزدانی نال رفاقت قائم ہوئی۔ اوہناں ای پاروں حامد یزدانی تے اوہناں دے چھوٹے بھرا ماجد یزدانی نال تعلق قائم ہویا۔ اعتبار ساجد نے کیہ خوب آکھیا:
تجھ سے لفظوں کا نہیں روح کا رشتہ ہے مرا
تو مری سانس میں تحلیل ہے خوشبو کی طرح
حامد یزدانی صاحب مطالعہ ہون دے نال نال محبت پرور تے ادب دوست انسان نیں۔ اپنے زمانہ طالبعلمی وچ اوہ ریڈیو پاکستان لہور اتے طلبا دے ہفتہ وار پروگرام تے براہ راست نشریات وچ کمپیئرنگ وی کردے رہے جہدے پروڈیوسر جعفر رضا تے ارشاد حسین سن۔ اوہ حلقۂ ارباب ذوق دے رکن وی رہے تے 1987-88 وچ حلقۂ ارباب ذوق دے جائنٹ سیکرٹری وی منتخب ہوئے۔ اوس ویلے حلقہ دی تنقیدی نشستاں وچ انتظار حسین’ اشفاق احمد’ انیس ناگی’ جیلانی کامران’ سجاد باقر رضوی’ مسعود اشعر’ عارف عبدالمتین’ اسرار زیدی’ کشور ناہید’ ڈاکٹر سلیم اختر’ سراج منیر’ ڈاکٹر تحسین فراقی’ خالد احمد تے دوجی ادبی شخصیات دی رلت باقاعدگی نال ہوندی۔
حامد یزدانی بلاشبہ ساڈے عہد دے نہایت اہم تے مقبول شاعر نیں۔اوہناں دی شعری مجموعے ”ابھی اک خواب رہتا ہے’ گہری شام کی بیلیں’ رات دی نیلی چپ’ تے ”اطاعت” اوہناں دی جگمگاندی پہچان نوں کافی نیں جہناں دے دیباچے ڈاکٹر خورشید رضوی’ ڈاکٹر ضیاالحسن ‘ پروفیسر جعفر بلوچ’ پروفیسر صدیق نور محمد تے پروفیسرعباس نجمی دے تحریر کردہ نیں۔ تاہم اوہناں دے نثر نگار ہون د اانکشاف اوہدوں ہویا جدوں حال ای وچ اوہناں دے افسانیاں دا مجموعہ ”خالی بالٹی اور دوسرے افسانے” منظر عام تے آیا۔ ایہنوں حسن اتفاق آکھیا جاوے یا حامد دی محبت دی اک ادا کہ اوہناں نے اپنے افسانوی مجموعے دا نام وی اپنے والد محترم یزدانی جالندھری دے پہلے افسانوی مجموعے ”حسن پرست اور دوسرے افسانے” توں اخذ کیتا۔
حامد دے افسانیاں دا مطالعہ کردے ہوئے سانوں محسوس ہوندا اے کہ اوہناں دے مختصر افسانیاں وچ زندگی دے کئی کردار لمے عرصہ تک ساہ لیندے وکھائی دیندے نیں کیوں جے مختصر افسانہ زندگی دے کسے اک پہلو دی کہانی دا نام اے اوہدی رفتار تے حرکت اک مرکزی نقطے دے گرد ہوندی اے۔ افسانہ نگار ایسے اک پہلو دے مختلف گوشیاں نوں فنکارانہ انداز وچ اجاگر کر کے کہانی تیار کردا اے۔ ایس حوالے نال زاہد حسن لکھدے نیں: ”حامد اپنے ہر افسانے وچ اپنی موجودگی دا احساس دواندا اے لیکن ہر افسانے توں باہر اپنے کرداراں تے اوہناں دے حالات و واقعات نوں قابو وچ رکھدے ہوئے ایہہ افسانے نہ صرف اپنے موضوعات’ زبان و بیان بلکہ اپنی تکنیک دے اعتبار نال وی ساڈے اتے اک جہان نو دے دروا کردے نیں”۔
”خالی بالٹی اور دوسرے افسانے” حامد یزدانی دے اچھوتے خیالاں’ شفاف مشاہدیاں تے سوچ دے نت نویں تے منفرد زاویاں نال بھری پئی اے۔ ایس ”خالی بالٹی” وچ پانی یا ددھ دی صورت وچ اسیں حامد یزدانی دی تخلیقی صلاحیتاں نوں بہت صاف تے ملاوٹ توں پاک ویکھ سکنے آں جد کہ دوجے افسانے وی شاہکار افسانیاں دی صورت وچ سامنے آندے نیں۔ گورنمنٹ کالج لاہور تے پنجاب یونیورسٹی دے تعلیم یافتہ حامد یزدانی دے دور طالبعلمی دی یاداں نال مزین افسانہ ”چارسدہ” نے ایس قدر متوجہ کردا اے کہ جیویں حامد یزدانی تہاڈے نال ہم کلام ہو رہے نیں۔
”حامد یزدانی کے افسانے’ اک تعارف” وچ امجد طفیل لکھدے نیں: ”حامد یزدانی دے افسانیاں دا مطالعہ کردے ہوئے مینوں خوشگوار حیرت ہوئی۔ میں پورے وثوق نال آکھ سکنا واں کہ جے حامد یزدانی افسانے نوں اپنے تخلیق اظہار دا اولین ذریعہ بناندے تے اج اوہ یقینا اردو دے صف اول دے افسانہ نگاراں وچ شمار ہوندے”۔
حامد یزدانی نے کئی سال اپنے شہر لہور وچ بسر کیتے۔ فیر اوہناں نوں ریڈیو دوئچے ویلے’ دی وائس آف جرمنی دی اردو نشریات نال منسلک ہو کے جرمنی جانا پیا۔ اوتھوں واپس آئے’ لیکچرار شپ دا وی فیر آغاز کیتا تے وائس آف جرمنی دے نمائندے دے طور تے وی کم کیتا مگر ہن اوہناں دا جی ایتھے نہ لگیا تے اوہناں نے اک واری فیر رخت سفر بنھیا تے مستقل کینیڈا وچ سکونت اختیار کر لیتی۔ ایس دوران اوہناں نوں دوجے شہراں تے ملکاں توں ائے افراد دی مختلف تہذیباں ثقافت نے اوہناں دی تجربیاں نوں اوہ گہرائی عطا کیتی جہڑی اک چنگے افسانہ نگار لئی بنیادی شرط اے کیوں جے جیندے جاگدے کردار ساڈے گردو پیش نال تعلق رکھدے نیں۔
”خالی بالٹی اور دوسرے افسانے” دا انتساب نوید صادق دے نام کردے ہوئے رقمطراز نیں:”جو اپنے ”کارواں” دے ذریعے جے میری افسانہ نگاری دی حوصلہ افزائی نہ کردے تے ایہہ کہانیاں شاید ہن تک ادھی ادھوری کدھرے میری شاعری دے تھلے دبی ہوندیاں”۔ حامد یزدانی وانگوں بہت نفیس شاعر’ معتبر نقاد نوید صادق وی میرے ایس شعر دے مصداق مخلص دوستاں وچ شمار ہوندے نیں۔
زندگی بھر لی ہے میں نے دوستوں کی ہر دُعا
ایسے تھوڑی یہ جہاں اپنا ہُوا ہے مہرباں