ترقی دی بنیاد جہاد نہیں سائنس اے!

ڈنمارک توں خبر آئی اے کہ ڈنمارک دے ای اک سپوت ڈاکٹر Lanay Westergard نے اپنے ساتھی سائنس داناں دے نال مل کے آئن سٹائن دی تھیوری Condensation دی مدد نال سورج دی روشنی دی رفتار نوں گھٹ کرن وچ کامیابی حاصل کر لئی اے۔ ڈاکٹر لینی نے اپنی ایس تھیوری دا ناں بھارتی سائنس دان ستندر ناتھ بوس تے آئن سٹائن دے ناں تے رکھیا اے۔ ایہناں دوہاں سائنس داناں نے اپنے مطالعے دی بنیاد تے کہیا سی کہ سورج دی روشنی دی رفتار نوں گھٹ کیتا جا سکدا اے تے ایہ گل طے اے کہ اجے دنیا وچ روشنی دی رفتار توں ودھ رفتار کسے چیز دی نہیں۔ سائنس داناں نے اک خاص پروسس راہیں روشنی دی رفتار 71کلومیٹر فی گھنٹہ کر دتی اے۔ (ایہ پروسس اجے عام بندے دی سمجھ وچ نہیں آوے گا ایہدے لئی اک وکھرا کالم چاہیدا اے)۔
ویکھن والی گل ایہہ وے کہ انسانی جسم دے سب توں اُچے تے اُپرلے حصے وچ موجود اک چھوٹا جیہا دماغ کیسیاں کیسیاں چیزاں نوں اپنے وَس کر لیندا اے تے اوہدے توں کیہ کیہ فائدہ چکدا اے۔ ایہو دماغ کدی چن تے مریخ تے اپڑن دی گل کردا اے تے کدی اک چھوٹے جہے کمرے وچ بہہ کے انٹرنیٹ دے راہیں ساری دنیا دی خبر لے لیندا اے۔ کدی اپنے مقام تے بیٹھے بٹھائے لکھاں میل دور اپنے دشمن تے وار کر دیندا اے ایہ دماغ دا ای کمال اے کہ کل تک جو سفر مہینیاں وچ طے ہوندے سن اوہ اج گھنٹیاں تے منٹاں وچ طے ہو رہے نیں ایہ سائنس دا ای کمال اے کہ سورج جہڑا اک سیارہ اے تے سائنسی نظریہ دے مطابق ہزاراں سیاریاں وچوں اک سیارہ اے۔ ایہناں دِناں نویں کھوج تے ریسرچ پاروں سورج تے دوجے سیاریاں دے متعلق نویاں نویاں گلاں تے جانکاری سامنے آ رہی اے جیویں ثابت ہو چکیا اے کہ کجھ سیارے اجہے وی نیں جہناں دی روشنی نوں سطح زمین تک اپڑن وچ کئی ہزار سال دا عرصہ چاہیدا اے۔
اک خیال تقریباً تن سو ورھے توں انسان دے ذہن تے مسلط اے کہ مادہ تے توانائی دو وکھریاں وکھریاں چیزاں نیں پر ایہناں دوہاں شیواں دے وچکار اک رشتہ یاں تعلق ضرور اے اج دے ایٹمی دور وچ سائنس نے ایس خیال نوں اک دم بدل دتا اے تے ایہ منن تے مجبور کر دتا اے کہ مادہ تے توانائی اک ای شے دے دو وکھرے وکھرے روپ نیں۔ اج کل ایہ خیال وی خیال خام ثابت ہو گیا اے کہ مادہ صرف قدرت دی ای دین اے اج مادہ نوں ریڈیائی شعاع (ریڈیشن) توں پیدا کیتا جا سکدا اے۔ آئن سٹائن نے نظریہ اضافت دے کے ہر اک نوں حیرت کدہ وچ گم کر دتا اے کہ کائنات وچ ہر شے اضافی اے یعنی تسیں کسے شے نوں ویکھ کے ایہ دعویٰ نہیں کر سکدے کہ تسیں جو کجھ ویکھ یاں سمجھ رہے او اوہو ٹھیک یاں حرف آخر اے اوہ شے ایس توں وکھری وی ہو سکدی اے جو کجھ تہانوں نظر آ رہی اے ایہو وجہ اے کہ سائنس پرانیاں تھیوریاں تے فارمولیاں دی تھاں نویں تے ٹھوس حقیقتاں نوں جگہ دیندی آئی اے تے دیندی رہوے گی تے لطف دی گل ایہ وے کہ سائنس سب کجھ منطق تے ناپ تول نال دیندی اے۔ جد کہ لوک اج دنیا’ مذہب’ خدا تے انسانی زندگی دے بارے ہر گل نوں منن لئی تیار یاں راضی نہیں جو کہ مذہبی رہنما یاں کتاباں اوہناں نوں دسدیاں نیں۔ ہن سوچن دا ڈھنگ زیادہ تر ایس گل تے منحصر اے کہ انسان کیہ ویکھ سکدا اے کیہ محسوس کر سکدا اے تے کیہ مشاہدہ کر سکدا اے۔ ایس رویے نوں سائنس نے ای جنم دتا اے تے ایہدا مطلب اے کہ انسان دا دنیا نوں اک خاص نظر نال ویکھنا۔ نویں دور دے سائنس داناں’ مفکراں تے دانشوراں نے ایس گل تے زور دتا اے کہ علم نوں انسان دے مفاد لئی استعمال کرنا چاہیدا اے تے انسان نوں دوجے انسان دے نال چنگا ہونا چاہیدا اے ایس لئی نہیں کہ خدا یاں مذہب نے انج کہیا اے سگوں ایس لئی کہ دوویں انسان نیں۔ سائنس دی اک اہمیت ہور وی اے ایس اہمیت دا دارومدار ایہدے اُتے اے کہ سائنس کس حد تک اک عام بندے دی عقل تے سوجھ بوجھ دے دریچے کھولدی اے یاں نویں رشتے قائم کرن وچ کتھوں تک معاون بن دی اے۔ ایہناں نویں نویں پیدا کیتے گئے رشتیاں توں اک نویں قوت دا احساس ہوندا اے عام طور تے ایہ منیا جاندا اے کہ سائنس دا مقصد ساڈی سوجھ بوجھ تے علم وچ وادھا کرنا اے پر ایہدے نال نال سانوں اک نویں قوت دا احساس وی ہوندا اے کہ جو جذبہ انسان نوں بھرپور عمل لئی تیار کردا اے اوہ سائنس توں ای پیدا ہوندا اے ایس اعتبار نال جو لوک زندگی وچ عملی زندگی تے زور دیندے نیں اوہ صحیح معنیاں وچ ”سائنس دان” کہے جا سکدے نیں۔ سائنس ساڈی مالی’ اقتصادی تے سماجی ترقی وچ بڑا ہتھ ونڈا سکدی اے۔ انج وی کنے موضوعات اجہے نیں جو اصل وچ ساڈی روزمرہ زندگی دے موضوعات نیں اجہی زندگی جہدے وچ اسیں روزانہ نشوونما پاندے نیں’ زندہ رہندے نیں’ ساہ لیندے نیں۔ اجہے موضوعات ساڈی زندگی توں وکھرے تصور نہیں کیتے جا سکدے ایس لئی ساڈے آل دوالے جس زاویے’ جس ڈھنگ نال سائنس دا عمل یاں اوہدا رشتہ ساڈی سماجی یاں گھریلو زندگی نال جڑدا اے ایہدا علم ساڈے لئی بہوں ضروری اے میرے حساب نال سائنسی جانکاری پڑھے لکھے لوکاں لئی اونی ای ضروری اے جنی اوہناں لئی زندگی دیاں دوجیاں گلاں دا علم۔
پرانے زمانے وچ سائنسی عمل نوں شخصی ملکیت سمجھیا جاندا سی اج کل ایہدے معنی واہوا بدل چکے نیں۔ اج ہر سائنسی ریسرچ’ سائنسی عمل تے ہر سائنسی جانکاری بنی نوع دا حق بن چکی اے۔ سائنس صرف سائنس ہوندی اے اسلامی سائنس دان یاں اسلامی ڈاکٹر یاں اسلامی انجینئر نامی کوئی شے نہیں ہوندی۔ اج ہر مذہب وچ اجہے پیروکار موجود نیں جو سختی نال سائنسی قواعد’ قنوناں تے عمل کرن نوں مذہب دی بقاء لئی ضروری سمجھدے نیں۔ اج دی سائنس کسے اک حکومت یاں کسے اک ادارے دی جاگیر نہیں رہی ایہ تے علم دا وگدا دریا اے جہڑا چاہوے دو گھٹ بھر لوے ایہدے وچ عیسائی’ مسلم’ ہندو’ سکھ’ بدھ مت’ یہودی دا کوئی عمل دخل نہیں۔ ایس وگے دریا چوں علم تے عقل رکھن والا ہر انسان اپنی تریہہ بجھا سکدا اے۔ ہر بندہ جہڑا عمل نوں زندگی دا حصہ تے اصول بنان دا قائل ہووے اوہ اپنی سوجھ بوجھ تے کھوج نال علم دے اجہے چشمے لبھ سکدا اے جو اوہدے شوق دی تریہہ بجھا سکن۔
ایہ سائنس دا ای کمال اے کہ امریکہ دے وائٹ ہائوس وچ بیٹھا اک بندہ پوری دنیا تے حکومت کرن دا خواب ویکھ رہیا اے۔
ہم نے چٹان کاٹ کے پانی بھی پی لیا
وہ اپنے سوکھے ہونٹ دکھانے میں رہ گئے