لین دین دے سنہری اِسلامی اصول

معاشرت تے معاملات دین اسلام دے دو وڈے شعبے نیں لیکن افسوس اوہناں وَل توجہ ایس قدر گھٹ دتی جاندی اے کہ انج محسوس ہوندا اے شاید اوہناں دا دین نال کوئی تعلق ای نہیں اے۔ گویا کہ اسیں ایہہ دونویں دین دے شعبے عملاً اپنی زندگی توں خارج کر رکھے نیں۔ حالانکہ عبادتاں توں متعلق شریعت دے احکامات اک چوتھائی نیں بقیہ تن چوتھائی احکامات معاملات تے معاشرت توں متعلق نیں۔ معاملات دی خرابی دا اثر عبادتاں اتے ہوندا اے۔
حدیث مبارک وچ اے حضرت ابو ہریرہ کولوں روایت اے کہ رسول اللہۖ نے ارشاد فرمایا: بہت سارے لوک ایسے ہوندے نیں جہڑے اللہ تعالیٰ دے سامنے بڑی عاجزی دا مظاہرہ کردے نیں۔ ایس حال وچ کہ اوہناں دے وال بکھرے ہوئے نیں’ اللہ تعالیٰ نوں رو رو کے پکاردے نیں کہ یااللہ! میرا ایہہ مقصد پورا کر دیو’ فلاں مقصد پورا کر دیو’ بڑی عاجزی دے نال دعاواں کر رہے ہوندے نیں لیکن کھانا اوہناں دا حرام’ لباس اوہناں دا حرام تے اوہناں دا جسم حرام آمدن نال پرورش پایا ہویا ہوندا اے تے ایسے بندے دی دعا کیویں قبول ہووے گی(جامع ترمذی:2989)
قرآن مجید تے احادیث مبارکہ وچ باہمی معاملیاں دے اصول و ضوابط نوں بڑے منظم تے نپے تلے انداز وچ انتہائی وضاحت دے نال بیان کیتا گیا اے تے جے اوہناں اصول و ضوابط نوں مدنظر رکھدے ہوئے حالات تے واقعات دے مطابق قنون سازی کیتی جاوے تے اوہدے دور رس اثرات مرتب ہوندے نیں۔
شریعت نے لین دین دے معاملے وچ باہمی رضامندی نوں ایہدا پہلا اصول قرار دتا اے تاں جے فریقین آزادانہ طور تے بغیر کسے خوف وخطر دے باہمی رضامندی نال اپنا معاملہ جاری رکھ سکن یعنی باہمی لین دین دے معاہدے دی توثیق لئی ضروری اے کہ دونویں فریقین باہمی طور تے رضامند ہون۔ ایسا معاہدہ جہدے وچ جبرو کراہ’ دھوکہ دہی’ غلط بیانی تے دوجے غیر قنونی عناصر شامل ہون اوہنوں شریعت باطل قرار دے کے باہمی معاملے نوں حرام و ناجائز کہندی اے۔شریعت باہمی معاملے وچ ایس عہد نوں ایس لئی باطل تے حرام قرار دیندی اے کہ ایہدے وچ باہمی رضامندی تے آپس دے معاہدے وچ اتفاق شامل حال نہیں ہوندا’ ایس لئی کہ جبرو کراہ’ دھوکہ دہی تے غلط بیانی تے دوجے غیر قنونی عناصر دے شامل ہو جان نال فریقین وچ باہمی رضامندی تے ارادہ باقی نہیں رہندا’ حالانکہ فریقین دی باہمی رضامندی تے خوشنودی نوں قرآن مجید تے احادیث مبارکہ وچ اصولی قرار دتا گیا اے۔
چنانچہ قرآن مجید وچ اللہ تعالیٰ فرماندے نیں: ترجمہ: اے ایمان والیو! تسیں اک دوجے دا مال آپس وچ ناحق طریقے نال نہ کھائو’ سوائے ایہدے کہ تہاڈی باہمی رضامندی نال کوئی تجارت ہووے تے اپنی جاناں نوں نہ ہلاک کرو’ بے شک اللہ تہاڈے اتے مہربان اے (سورہ النسائ:29) ایسے طرح حضور اکرمۖ نے فرمایا: ترجمہ: فروخت دا معاہدہ صرف باہمی رضامندی نال درست اے (ارواوالغلیل) قمار تے جوئے توں بچائو وی اسلامی اصولاں وچ اک انتہائی اہمیت دا حامل اصول اے۔ اسلام نے جوئے دی ساری صورتاں نوں سختی نال منع کیتا اے۔ اسلام وچ میسر تے قمار جوا دی ایسی قسماں نیں جہڑی مکمل طور تے ممنوع نیں۔ میسر توں مراد بغیر کوئی مشقت تے ذرائع آمدن استعمال کیتے یعنی دوجیاں نوں حق توں محروم کردے ہوئے دولت نوں اکٹھا کرنا۔ مطلب بہت آسانی نال منافع حاصل کرنا۔ مثال دے طور تے لاٹری دا پیسہ’ پانسے نال کھیڈنا تے بازی یا شرط لانا میسر دی تعریف اتے پورا اتردا اے۔ قماراوہ آمدنی’ منافع یا حصول منافع اتے مشتمل رقم وغیرہ اے جہدا مکمل انحصار قسمت تے موقع ہووے۔ قرآن مجید نے اوہناں توں بچن دی تنبیہ فرمائی اے جیویں کہ فرمان باری تعالیٰ اے: ترجمہ:اے ایمان والو! بے شک شراب تے جوا تے (عبادت لئی) نصب کیتے گئے بت تے قسمت معلوم کرن لئی (فال دے تیر) سب (ناپاک شیطانی کم نیں سو تسیں اوہناں توں (کلیتا) پرہیز کرو تاں جے تسیں فلاح پا جائو (سورہ المائدہ90)
اک دوجے نال معاملات کردے ویلے سود دی وبا وی عام اے جہنوں عربی وچ ربا آکھدے نیں۔ ربا دے لغوی معنی زیادتی’ بڑھوتی تے بلندی دے نیں۔ اصل رقم وچ اک ای جنس دی دو چیزاں وچ اک غیر قنونی وادھا ربا کہلاندا اے ۔ ربا دی ممانعت قرآن و احادیث وچ بہت ساری جگہاں اتے فرمائی گئی اے۔ چنانچہ اک جگہ اللہ تعالیٰ فرماندے نیں: ترجمہ: تے اللہ تعالیٰ نے تجارت (سوداگری) نوں حلال فرمایا اے تے سود نوں حرام کیتا اے( سورالبقر:275)
اک ہور جگہ اللہ تعالیٰ فرماندے نیں: اے ایمان والو! اللہ کولوں ڈرو تے جو کجھ وی سود وچوں باقی رہ گیا اے چھڈ دیو۔ جے تسیں (صدق دل نال) ایمان رکھدے او’ فیر جے تسیں انج نہ کیتا تے اللہ تے اوہدے رسولۖ ولوں اعلان جنگ اتے خبردار ہو جائو تے جے تسیں توبہ کر لوو تہاڈے لئی تہاڈے اصل مال (جائز) نیں’ نہ تسیں اپنے اتے ظلم کرو تے نہ تہاڈے اتے ظلم کیتا جاوے (سورہ البقر:278,79)
خیلابہ تے غش وی اسلامی اصولاں وچ فریب تے دھوکہ دہی دے معنیاں وچ آندے نیں۔قرآن تے سنت نے دھوکہ دہی تے جھوٹ توں منع کیتا اے۔ خیلابہ’ غش تے تطفیف دے لفظ قرآن مجید وچ دھوکہ دہی دے معنیاں وچ استعمال ہوئے نیں۔ ایہنوں ایس طرح وی سمجھیا جا سکدا اے کہ فروخت کیتی جان والی چیز دی خرابی نوں لکانا۔ دھوکے دے کماں وچ ناپ تول دی کمی نوں (تطفیف) اک چیز دی قیمت ودھان لئی غلط بولی لانا (بخش) اک ددھ دین والے جانور دی پیداوار نوں خریدار دے سامنے غلط بیان کرنا (تسریعہ) آکھیا گیا اے۔ قرآن پاک وچ اللہ تعالیٰ فرماندے نیں: ترجمہ: بربادی اے ناپ تول وچ کمی کرن والیاں لئی’ ایہہ لوک جدوں (دوجے) لوکاں کولوں ناپ لیندے او تے (اوہناں کولوں )پورا لیندے او تے جدوں اوہناں (خود)ناپ کے یا تول کے دیندے او تے گھاٹا کر دیندے او۔ کیہ ایہہ لوک ایس گل دا یقین نہیں رکھدے کہ (اوہ) مرن مگروں دوبارہ (اٹھائے جان گے’ اک بڑے سخت دن لئی) سورالمطففین 105
ایہناں آیات مبارکہ توں واضح ہوندا اے کہ ناپ تول وچ کمی کرن والے اتے کنی وڈی وعید اے۔
حضور اقدسۖ نے ارشاد فرمایا: ترجمہ: جے دونواں نے سچ بولیا تے چیز دی خرابی نوں پہلاں بیان کیتا فیر اوہ اپنے لین دین وچ برکت پان گے تے جے اوہناں نے جھوٹ بولیا تے کجھ لکایا تے اوہ لین دین دی برکت نوں گوا دین گے (صحیح بخاری 1973′ صحیح مسلم:1532)
آپۖ نے ہور ارشاد فرمایا: ترجمہ: ایماندار تے سچا دکاندار قیامت دے دن اللہ دے نبی’ صدیقین’ شہدا تے صالحین دے نال ہووے گا( جامع ترمذی:1209)
ایسے طرح کسے دی چیز اوہدی دلی رضامندی دے بغیر استعمال کرن نوں شریعت نے حرام تے ناجائز قرار دتا اے۔ چنانچہ حضرت ابو ہریرہ اپنے چاچے کولوں روایت کردے نیں کہ رسول اللہۖ نے ارشاد فرمایا: خبرادر کسے اتے ظلم تے زیادتی نہ کرو! خبردار کسے بندے دی ملکیت دی کوئی چیز اوہدی دلی رضامندی دے بغیر لینا حلال تے جائز نہیں اے (رواہا لبیہقی فی شعب الایمان کذافی المشکوة 2946)
جے کسے دی کوئی چیز قیمت دے کے لیتی جاوے تے شریعت تے عرف وچ اوہنوں بیع وشرا (خریدوفروخت) آکھیا جاندا اے تے جے اجرت تے کرایہ معاوضہ دے کے کسے دی چیز استعمال کیتی جاوے تے شریعت تے عرف وچ اجارہ اے تے جے بغیر کسی معاوضہ تے کرایہ دے کسی دی چیز وقتی طور تے استعمال لئی لیتی جاوے تے استعمال مگروں واپس کردتی جاوے تے رعایت اے۔ ایہہ ساری صورتاں جائز تے صحیح نیں تے اوہناں بارے رسول کائنات حضور اکرمۖ دی ہدایات تے ارشادات تفصیل نال موجود نیں۔ لیکن کسے دوجے دی چیز لے لین دی اک شکل ایہہ وی اے کہ اوہدی مرضی دے بغیر زبردستی تے ظالمانہ طور تے اوہدی مملوکہ چیز لے لیتی جاوے۔ شریعت دی زبان وچ اوہنوں غصب آکھیا جاندا اے تے ایہہ حرام تے سخت ترین گناہ اے اوہدے بارے رسول اللہۖ نے مندرجہ ذیل ہدایات ارشاد فرمائیاں نیں۔
حضرت عبداللہ بن عمر کولوں روایت اے کہ رسول اللہۖ نے ارشاد فرمایا: جہڑے شخص نے کسے دوجے دی کجھ وی زمین ناحق لے لیتی تے قیات دے دن اوہ ایس زمین دی وجہ نال (تے اوہدی سزا وچ) زمین دے ستوں طبق تک دھنسایا جاوے گا (صحیح بخاری 2452)
حدیث مبارکہ وچ آندا اے کہ اک زنانی نے حضرت امیر معاویہ دے دور خلافت وچ حضرت سعید بن زید دے خلاف (جہڑے عشرہ مبشرہ وچوں نیں) مدینہ دے اوس ویلے دے حاکم مروان دی عدالت وچ دعویٰ کیتا کہ اوہناں نے میری فلاں زمین دبا لیتی اے۔ حضرت سعید بن زید نوں اوس جھوٹے الزام توں بڑا صدمہ پہنچیا۔ اوہناں نے مروان نوں آکھیا کہ کیہ میں اوس زنانی دی زمین دباواں گا تے غصب کراں گا؟ میں تے رسول اللہۖ کولوں ایس بارے سخت وعید سنی اے ۔ ایہہ گل حضرت سعید بن زید نے دل دے کجھ ایسے تاثر دے نال تے ایسے انداز نال آکھی کہ خود مروان بہت متاثر ہویا تے اوہنے آکھیا کہ ہن میں آپ کولوں کوئی دلیل تے ثبوت نہیں منگدا۔
ایہدے مگروں حضرت سعیدزید نے (دکھی دل نال) بددعا کیتی کہ اے اللہ! جے توں جاندا اے کہ ایس زنانی نے میرے اتے ایہہ جھوٹا الزام لایا اے تے ایہنوں ایہدی اکھاں دی روشنی توں محروم کر دے تے ایہدی زمین ای نوں ایہدی قبر بنا دے۔ واقعہ دے راوی حضرت عروہ آکھدے نیں کہ فیر انج ای ہویا’ میں خود اوس زنانی نوں ویکھیا اوہ آخری عمر وچ نابینا ہو گئی’ فیر اک دن چلی جا رہی سی کہ اک ٹوئے وچ ڈگ پئی تے بس اوہ ٹویا ای اوہدی قبر بن گیا( صحیح بخاری 3198)