پاکستان تے چین نوں دور نہیں ہونا چاہیدا

پاکستان تے چین دوویں اہم ملک نیں۔ دوہاں دی ابتدائی قیادتاں نوں آن والے حالات دا اندازا سی ایس لئی دوہاں نے دوستی دا بندھن بنھیا۔ دوویں اک دوجے دے اینے نیڑے ہوئے کہ ایہ دوستی مثال بن گئی۔ ایہ وی کہیا گیا کہ ایہ دوستی سمندراں توں ڈونگھی اے’ ہمالیہ توں اچی اے تے شہد توں ودھ مٹھی اے۔ تریخ ایس سچائی تے مٹی نہیں پا سکدی کہ چین دی تیراں ملکاں نال سرحداں ملدیاں نیں تے چین دا اپنے ہر گوانڈھی دے نال کسے نہ کسے دور وچ تنازع رہیا اے سوائے پاکستان دے۔ پاکستان تے چین دی محبت ہمیشہ توں قائم اے۔ خنجراب ولوں پاکستان دی سرحد روس نال ملدی سی تے روس ہر قیمت تے گرم پانیاں تک رسائی چاہندا سی۔ رسائی دا ایہ راہ بند کرن لئی پاکستان نے اوتھوں کجھ علاقہ چین نوں دے دتا جد کہ چین نے اک ہور پاسیوں کجھ علاقہ پاکستان نوں دے دتا۔ چین جدوں دنیا لئی بند سی تے امریکی چین نال ملن لئی بے تاب سن تے دوہاں ملکاں دا ملاپ پاکستان نے کروایا۔
چین نوں پاکستان دی ترقی عزیز اے ایس لئی کجھ ورھے پہلاں پاک چین اقتصادی راہداری دا آغاز ہویا۔ عام طور تے تسیں سی پیک دا تذکرہ سن دے او۔ ایہو اوہ منصوبہ اے جو پاکستان دی اقتصادی حالت بدل دیوے گا پر کیہ کریئے کہ ایس منصوبے دے پچھے پورا جہان پیا ہویا اے۔ ایس نازک مرحلے تے دوہاں ملکاں دی قیادتاں نوں چاہیدا اے کہ اوہ اپنے منصوبے نوں سست روی دا شکار نہ ہون دین۔ ایس سلسلے وچ حکومت پاکستان نوں ای نہیں ریاست پاکستان نوں وڈا کردار ادا کرناچاہیدا اے۔ کیہ ایہ گل ٹھیک نہیں کہ شمال وچ قراقرم دے اچے اچے پہاڑاں توں لے کے بحیرہ عرب دے نیلے پانیاں تک بہترین سڑکاں دا جال ہونا چاہیدا اے۔ ایس سلسلے وچ پچھلے اٹھ ورھیاں وچ خاطرخواہ کامیابی ہوئی۔ سی پیک دے تحت بنن والی شاندار سڑکاں نے فاصلاں نوں سمیٹیا’ ایس ویلے پشاور توں کراچی جان لئی گھٹو گھٹ سکھر تک شاندار سڑک اے۔ سکھر توں حیدرآباد تے فیر حیدرآبا دتوں کراچی تک شاندار سڑک بن گئی تے اک انقلاب برپا ہو جاوے گا۔ ایسے طرح اسلام آباد دے نیڑے ہکلہ توں ڈیرہ اسماعیل خان تک شاندار سڑک نے فاصلیاں نوں گھٹ کیتا اے۔ ایہ شاندار سڑکاں ای ساڈی اقتصادی حالت بدلن گئیاں کیوں جے صنعتی تے زرعی پیداوار نوں پایہ تکمیل تک اپڑان لئی سڑکاں دا شاندار ہونا ضروری اے۔
شاید تہانوں یاد نہ ہووے کہ جدوں گوادر وچ بندرگاہ دی تعمیر دی گل چلی تے چینی قیادت نے ساڈے سامنے چار چیزاں رکھیاں۔ پہلی ایہ کہ گوادر وچ بندرگاہ تعمیر ہووے گی’ دوجی ایس بندرگاہ نوں کامیاب بنان لئی سڑکاں دا شاندار منصوبہ ہووے گا ایس لئی کہ خالی سڑکاں روزگار نہیں دیندیاں ایس لئی چینیاں نے تریجے نمبر تے کہیا کہ تہاڈے صنعتی زون بنن گے۔ فیر سوال ایہ سی کہ جس ملک نوں انرجی دی کمی دا سامنا ہووے اوتھے صنعتی زون کیہ کرن گے تے چینیاں نے چوتھی گل ایہ کہ اسیں پاور پلانٹس لاواں گے تاں جے انرجی دی کمی دا احساس نہ ہووے۔ ایس طرح لوکاں نوں روزگار ملے گا۔ چین تے زرعی شعبے وچ وی ساڈی مدد نوں تیار اے تاں جے اک صاف ستھرا’ سبز تے ہرابھرا پاکستان نظر آوے۔ مثلاً چین گوادر وچ صنعت لئی فری زون قائم کرے گا گوادروچ شاندار ہوائی اڈا تعمیر کرکے چین گوادر نوں دنیا نال اک طرح نال جوڑنا چاہندا اے چین گوادر وچ شاندار ہسپتال قائم کرے گا چین گوادر وچ روزگار دے ہور منصوبے وی قائم کرنا چاہندا اے۔
پچھلے ورھے نومبر وچ کروٹ ہائیڈرو پاور سٹیشن نے کم شروع کر دتا۔ ایہ منصوبہ پاک چین اقتصادی راہداری دا شاندار منصوبہ اے۔ چین پاکستان وچ ڈیماں دی تعمیر دے سلسلے وچ وی مدد کر رہیا اے۔ ظاہر اے جدوں ڈیم بنن گے تے سستی بجلی ملے گی تے دوجے پاسے پاکستان دا ایہ آبی ذخیرہ ساڈیاں بنجر زمیناں نوں آباد کرے گا۔ ایہ زمیناں سونا اگلن گئیاں۔ پچھلے کجھ عرصے توں پاکستان وچ پانی دی مسلسل کمی ہو رہی اے۔ نویں ڈیماں دی تعمیر نال نہ صرف پانی دی ایہ کمی دور ہووے گی سگوں اضافی پانی وی ساڈے کول ہووے گا۔ سانوں اپنی زراعت نوں جدید بنان لئی وی چین توں مدد لینی چاہیدی اے تاں جے ساڈی زرعی پیداوار وچ چوکھا وادھا ہووے گا۔
چین پاکستان وچ اجہے صنعتی پارک آباد کرنا چاہندا اے جو آلودگی توں پاک ہون تاں جے پاکستان وچ صاف ستھرا ماحول رہوے۔ ایس طرح وطن عزیز ماحولیاتی آلودگی توں بچ جاوے گا۔ دوہاں ملکاں نوں اک دوجے دی اہمیت نوں سمجھنا چاہیدا اے کیوں جے دوویں ملک اک دوجے لئی بڑے اہم نیں۔ چین تے پاکستان نوں اپنی دوستی بدنظراں توں بچانی چاہیدی اے۔ خطے وچ دوہاں ملکاں دی مضبوطی ای پکے پیڈے عالمی امن دی ضمانت اے۔ بقول شکیل بدایونی:
مجھے دوست کہنے ولے ذرا دوستی نبھا دے
یہ مطالبہ ہے حق کا کوئی التجا نہیں ہے