صفدر ہاشمی چَتے پہر دا نمازی

بعض لوکاں دے ناں دے معنے تے مفہوم اوہناں دی عملی زندگی وچ اسمان دے تاریاں تے باغ دے پھلاں دی طرحاں اپنا آپ ظاہر کررہے ہندے نیں۔اجیہے لوک ساری حیاتی پگ دی طرحاں اپنے “ناں”دی لج رکھن لئی اپنی ہمت تے ادم دی لج نال دوجے انساناں خاطر دھرتی دی پاتال وچوں “بوکے کِھچ رہے”ہندے نیں،تاں جے ناں دی لج رہ جائے۔ایہ دنیا تے سماج اک دریا تے سمندر دی طرحاں اے۔ایس وچ ہر طرحاں تے ہر سبھا مزاج دے انسان مِلدے نیں۔ایس دریا تے سمندر وچ ترنا تے پانی دیاں ٹھلاں تے موجاں نال متھا لا کیطوفاناں نال لڑنا کِسے سمندر یا دریا نوں فتح کرن والی گل اے۔تے ایہو جہئے ہِمتی،ادمی تے سیانے لوک دریا نوں فتح کرکے پھیر”فتح دریا” اکھواوندے نیں۔”فتح دریا”توں میری مراد”فتح دریا ہاشمی”نیں۔فتح دریا ہاشمی چنیوٹ دے رہن والے سن،بڑے دانا،سیانے تے پریہہ پنچائیت دے نامی گرامی تے سِر کڈھویں بندے سن۔اوہناں نے اپنی سیانف تے ستھرے کردار نال چنیوٹ دی دریا دھرتی تے سماج نوں فتح کرکے ”فتح دریا”سدھوایا۔ اوہناں دے کئی فیصلے تے سخاوت دے واقعے چنیوٹ دی دھرتی تے ہاشمی خاندان دی تاریخ دا حوالہ نیں۔
فتح دریا ہاشمی ہوراں نوں میں ویکھیا مِلیا تے نہیں۔پر اوہناں دے پتر بلکہ”سپتر”صفدر علی ہاشمی وچوں ایس دریا دل انسان فتح دریا دیاں جھلکاں ویکھیاں نیں۔صفدر علی ہاشمی توں فتح دریا ہاشمی دا سیاسی،سماجی تے مذہبی حلیہ سنیا تے محسوس کیتا اے۔صفدر علی ہاشمی وی اپنے باپ دی طرحاں اپنے ناں دے لغوی معانیاں دے آپ خوب رکھوالے نظر آوندے نیں۔اردو لغت صفدر دے معنے”دشمن دِیاں صفاں وچ گھس جان والے تے چِیر پھاڑ کر دین والے بہادر انسان دے دسدی اے”۔صفدر علی ہاشمی دی حیاتی دا پل پل ایس مفہوم دی تشریح تے تفسیر نال پرچیا ہویا مِلدا اے۔تے اوہناں دیاں رگاں وچ دوڑدا ہویا لہو ہاشمی خون تے شجرہ دی تاثیر پاروں اکثر”شمشِیر”بن کے ظالم دے تن بدن چوں پار ہندا ہویا ویکھیا اے۔اوہناں نوں کئی واری ویکھیا اے کہ اوہ جدوں وی موقع بنن نال جِتھے وی کربلا سجا دیندے نیں۔تے حق سچ دی گل تے پہرا دیندے نیں۔ماڑے تے غریب انسان اتے ہندا ہویا ظلم اوہناں توں کدی وی برداشت نہیں ہویا۔اوہناں دا لہو ابالے مارن لگ پیندا اے،جسراں کہ اک پنجابی شاعر اکرم ساغر آکھدے نیں کہ
میرے جثے چوں سارا خون
مک جائے تے تاں بچناں
جدوں ظلماں دی حد ویہندا اے
بھیڑا کھول پیندا اے
صفدرعلی ہاشمی نے وی معاشرتی ظلم وجبر دے خلاف لڑن لئی ہمیشہ گھوڑے تے کاٹھی پا کے رکھی اے۔اوہنا دا خون ہمیشہ ظلم جبر نوں ویکھ کے کھولدا ای رہیا اے، اوہناں گلی محلے تے علاقے دی سطح تے رہ کہ اپنی ایس حق پسندی دی نماز نوں کدی وی قضا نہیں ہون دِتا تے صفدر ہاشمی ایس حوالیوں چتے پہر دے نمازی نیں۔اوہناں نے ہون تک کئی یتیماں نال بھلا کیتا،رنڈیاں تے بے سہارا عورتاں نوں قانونی تحفظ دوایا،یتیماں نوں روزگار لبھ کے دِتا،ہزاراں فیکٹری مزدوراں دے حق لئی قانونی لڑائی اپنے پلیوں لڑی تے لوکاں نوں اوہناں دا حق لے کے دتا۔یتیم دِھیاں دے اتھرو پونجھن لئی پونجھی پونجھی تک خرچ کیتی تے کنوں کن خبر وی نہ ہون دتی۔صفدر علی ہاشمی 1964 دے آخر وچ چنیوٹ توں مریدکے آن آباد ہوئے۔ایتھے آن کے کوہِ نور آئل ملز کالاشاہ کاکو وچ بھرتی ہوگئے تے”کوہِ نور”نوں اپنی محنت تے ایمانداری نال”کوہ طور”بنان وچ رت تے مڑھکا اِک کر دِتا، جِتھے آن کے اپنی ایمانداری تے روحانی “شکتی”نال اپنے رب ول دھیان رکھ کے اپنے بالی بچے دا رزق لے کے جاندے سن۔صفدر علی ہاشمی نے مزدور سیاست وچ وی اپنا بڑا پکا تے سوہنا ستھرا کردار ادا کیتا تے ہمیشہ مزدور دی عظمت ابھارن دی سیاست کیتی۔ملکی سیاست وچ وی اپنے علاقے دی سطح تے کئی MPA تے MNA دے بانہہ بیلی تے سپورٹر بن کے اوہناں نوں کامیاب کروایا۔صفدر علی ہاشمی دی شخصیت دے کئی حوالے تے پرتاں نیں تے ہر حوالے تے پرت بارے پرت پرت لِکھن نوں جی کردااے۔
صفدر علی ہاشمی نے مریدکے آن کے 1965 وچ اک تنظیم”انجمن رضائے حبیب مریدکے”بنائی تے ایس ناں دے ٹائٹل نال اک مہینہ وار میگزین وی چالو کیتا۔اک عرصہ مگروں کچھ مجبوریاں پاروں صفدر ہاشمی صاحب ایس تنظیم تے رسالے نالوں وکھ ہوگئے۔پر ایہہ تنظیم اج وی کم کررہی اے جس توں مریدکے دے لوک بھرواں فیدا چک رہے نیں۔صفدر علی ہاشمی نے جِتھے لوکاں دی سیاسی،سماجی حوالیوں خدمت کیتی اے اوتھے اپنے عِلمِ طب دے ذریعے لوکاں دا علاج کرکے وی جنت کما رہے نیں۔انساناں نال بھلا تے صلہ رحمی کرن دی عادت اوہناں نوں گڑھتی وچ مِلی اے تے ایہ صفت اوہناں اگوں اپنی اولاد اندر وی رگ رگ وچ بھر دِتی اے۔اج کل اوہنا دا چھوٹا پتر آصف رضا ہاشمی اک مطب چلا رہے نیں ۔صفدر ہاشمی ایس ویلے تقریبا 80 سالاں دے بزرگ نیں،تے ساڈی اوہناں نال یاری منڈیاں کھنڈیاں وانگ اے۔میرے یاراں بیلیاں وچ اوہ پہلے یار نیں جیہڑے 80 سالہ منڈے کھنڈے نیں،گپ شپ وچ اساں کدی وی 80 سالاں دی بزرگی دے تصور نوں پیر نہیں پاون دِتا۔
صفدر ہاشمی اجیہے 80 سالہ منڈے نیں جِنہاں دے وال برفیلے پہاڑ وانگ چِٹے نیں۔تے ایہ چِٹے وال اوہناں نوں جوان منڈیاں دے کالے والاں توں وی ودھ پھبدے نیں۔صفدر ہاشمی اپنے والاں وانگ اندروں وی چِٹے نیں تے اپنے اندر کالخ نہیں رکھدے۔ایہ گل اوہناں دے اندر دے صاف،من دے سچے تے منافق نہ ہون لئی کافی اے۔صدقے جائیے صفدر ہاشمی دے جس نے منڈا بن کے وی اپنے چِٹے سر نوں داغ نہیں لگن دِتا۔اللہ پاک اوہناں دے والاں دی چِٹیائی نوں حیاتی تائیں کالا ہون توں بچائی رکھے۔کیوں جے اوہناں اپنے چِٹے سِرنوں ہمیش پگ دی تھاں سمجھیا اے۔ہاشمی صاحب نے ایس گئے گواچے دور وِچ وی کِسے نہ کِسے طرحاں پگ دے تصور نوں قائم رکھیا ہویا اے۔اللہ پاک اوہناں دی ایس پگ نوں سدا سلامت رکھے۔٭