کہانی اک ماں دی…باکمال لکھاری دے بہترین ناول

ویکھن وچ بالی جئی عمریا الھڑی جئی جوانی رکھن والی کہانی اپنے اصل وچ بہت قدیم تے پرانی اے۔ دسن والے دسدے نیں کہ انسان تے کہانی ہانی سانی نیں’ گویا جدوں دنیا وچ پہلا انسان پیدا ہویا اوہدوں ای پہلی کہانی دی کونپل وی پھٹی۔ لوکی ایہہ وی آکھدے سنائی دیندے نیں کہ ہر انسان اک کہانی اے تے ہر انسان دی اک کہانی اے۔ ہاں ایہہ ضرور ہوندا اے کہ کجھ دی کہانی کہی سنی جاندی اے تے بہتیاں دی داستان بے لسان رہ جاندی اے لیکن اوہناں دے کہانی تے اوہناں دی کہانی ہون وچ کوئی شک بہرحال باقی نہیں ہوندا بس اک ان کہیا پن اوہناںدا حصہ ہوندا اے۔ کہانی تے انسان دے تعلق نوں ازلی تے ابدی ربط باہم دا معاملہ من کے جدوں اسیں اپنے آلے دوالے کھلری نکھری کہانیاں نوں ویکھدے سوچدے آں تے عیاں ہوندا اے کہ ایس بابت جو کہیا لکھیا جاندا اے اوہ واقعی سچ اے تے سچ دے سوا کجھ نہیں۔ اوہ وی اک ایسی داستان اے جہنوں قدرت نے انسان دا روپ سروپ دے کے دنیا وچ گھلیا اے۔ ویسے تے اوہ دیہی زرعی ماحول دا پروردہ اے جتھے یقینا تعلیم دی کمی ضرور ہوئی ہووے گی لیکن قصہ ایس فطری ماحول وچ اپنا بھرواں جثہ انج رکھدا سی کہ اکو ویلے اوہ تعلیم’ تربیت’ تفریح تے دو ادارو سارا کجھ سی۔ یقینا ایسے لئی اوہ ہر پاسے پھیلے قصے دا حصہ بنیا’ اوہنوں سندا ویکھدا پڑھدا ودھدا گیا تے فیر اک ویلا ایسا آیا کہ اوہ کہانی کہانی کردیاں آپ کہانی بن گیا۔ فطرت نے اوہنوں کہانی سنن’ بنن تے چنن دا چج تے ہنر انج ارزاں کیتا کہ اوہ لحظہ لحظہ داستان کہندا کہانی دا گلستان مہکاندا چلا جا رہیا اے۔ اوہ دیہی پنجاب دا جم پل اے۔ ایسے لئی اپنی زمین باڑی نال اوہدا تعلق بہت گہرا اے تے ماں مٹی اوہدی کھٹی بٹی ہوئی اے۔ ایس دولت نوں سمیٹے اوہ جدوں قصے دے قصبے’ داستان دے شبستان تے کہانی دی روانی ول ودھیا تے اوہ ایس باب وچ ثقیل وی ہویا تے سجوڑ وی۔ اوہ کہانی دا اک ایسا شجر ہویا اے جہدا بیج اپنی مٹی وچ ڈلیا رلیا’ جہدی کونپل اک پوتر ماحول وچ پھٹی کھلی’ جہدی پرورش دیہی زرعی تہذیب دے پوپے پڑوپے وچ ہوئی۔ جہنوں اپنی ثقافت تے لسان نال محبت وی ارزاں ہوئی تے رابطہ واسطہ وی ہمہ وقتی ملیا۔ انج جدوں اوہ سن شعور تک پہنچیا تے اوہدوں تک کہانی اوہدے اندر اپنی جڑاں بہت گہری کر چکی سی۔ کہانی دی ایہناں گہری جڑاں نوں جدوں اوہدی دھرتی ماں دی زرخیزی’ تہذیب دی آبیاری تے ماں بولی دا چٹکا میسر آیا تے ایہہ کونپل چھیتی ای کھل کھل کے سامنے آئی۔ بلاشبہ اوہدی کہانی دور کسے بستی بیلے وچ کھلیا خودروشجر اے جہڑا وقت دے جھاڑ جھنکار تے تند آندھیاں دے مقابل کھڑا ہرارہن دا ہنر تے حوصلہ رکھدا اے۔ ایہو وجہ اے کہ کہانی اوہدے ہاں مسلسل ارتقا پذیر اے تے خوب توں خوب تر ول اوہدی پیش قدمی سرعت نال جاری اے۔ ایہہ سچ اے کہ آکھن نوں اوہ اک ادبی کھوجی ورگی اے تے اوہدا ثبوت اوہدی تصانیف سسی لکھ شاہ’ بلوچی ادب’ فریدوچار تے آزادی مگروں پنجابی نظم دی صورت ظاہر باہر ہے تو ساتھ ہی رت اساں نی ہانی جئی شعری نشانی اوہدا پتہ دسن لئی کافی شافی اے لیکن حق ایہہ اے کہ قصہ اوہدا جثہ اے تے داستان اوہدا گلستان تے کہانی ا وہدی رگاں وچ نسدے لہو دی روانی وانگوں اے تے ایہو عامل اوہنوں ہون دا اصل کارن بن چکیا اے۔ کہانی نال اوہدی آشنائی دی کھوج لئی اگے ودھیا جاوے تے پہلا پڑا پنجاہ ورہیاں دی اداسی دے نام توں آندا اے جتھوں کجھ اگے ودھیے تے ریلوے پھاٹک تے ہور کہانیاں دا بیلہ آندا اے۔ قدم قدم اگے چلیے تے ساڈے سامنے عشق لتاڑے آدمی دا سرنامہ لیتے پنجابی ناول خاص شان نال کھڑا ہوندا اے۔ ایسے راہ اتے جادہ پیمائی جاری اے تے سانوں پتہ ہوندا اے کہ ایتھے اوتھے کدھرے اوہدی نظر غالیچہ انن والی اتے جا ٹھہردی اے تے اوہ اوہدے اک منفرد ناول دا عنوان بن جاندی اے۔ ہن اوہ قصہ عاشقاں سناندا اے تے پنجابی ناول دے رسیاں دا دل موہ لیندا اے۔ اوہ ایتھے رکدا نہیں بلکہ اپنی محنت و محبت دا نواں نقش تسی دھرتی دی صورت سامنے لیاندا اے تے پنجابی ناول نگاری وچ اپنے نام تے مقام نوں خاص اعتبار مہیا کردا اے۔ ایہدی شخصیت دا عمومی جیا جائزہ ایہہ ثابت کرن لئی کافی اے کہ اوہ اپنی ماں’ ماں بولی تے دھرتی ماں نال گہرا گجا پیار کرن والا شخص اے۔ ایہو وجہ اے کہ جدوں اوہنے کجھ عرصہ پہلاں کہانی اک ماں دی کہی سنائی تے دراصل اوہنے اک ای ویلے وچ متذکرہ تناں محبتاں دی مثلث بنائی سجائی اے۔ زاہد حسن نے اپنے پنجابی ناول کہانی اک ماں دی دا انتساب یعنی چڑھاوا وستی رحمان (جھوک پیرا کورائی) تے لاہور شہر کے نام کیا ہے جہڑے اک پاسے اوہدی فکری لگاوٹ دا اظہار اے تے دوجے پاسے میری تفہیم دے مطابق ایس ناول دی یک سطری تلخیص وی اے۔ میرا گیان گمان آکھدا اے کہ ازل توں ایتھے اوتھے موجود ایس حقیقت یا کہانی نے جدوں زاہد حسن دی انگلی پھڑ کے اوکھے سوکھے رستیاں اتے جادو پیمائی کیتی تے کہانی تے کہانی کار نے وستی توں شہر تک جہڑا سفر کیتا اوہ دراصل انسانی زندگی’ تہذیب ‘ تریخ تے رشتیاں دا اوہ پینڈا اے جہڑا صدیاں توں تھکا دین والے سفر دا حاصل حصول اے۔ ایس کہانی تے ایہدے سفر دا جائزہ لیتا جاوے تے ایہہ اک لمی مراتھن ریس دا قابل لحاظ حصہ وکھائی دیندا اے جہدے دوران اتھلیٹ ہانپیا کانپیا تے نہ تھکیا بلکہ اوہ پورے اعتماد تے اعتبار نال اپنے حصے دی دوڑ دوڑدا منزل اتے جا پہنچیا اے۔ ایہہ کہانی ہمہ جہت وی اے تے ہمہ رنگ وی۔ ایہدے وچ معاشرتی ارتقا’انسانی رویاں تے پووتر جذبیاں دا خوبصورت تال میل سامنے آندا اے لیکن دھمکدے رنگاں وچ ماں دا منہ مہاندرا کجھ ایسا اجلا روشن تے لشکدا چمکدا نظرآندا اے کہ اوہناں دی انفرادیت اوہنوں ممتاز تر بنا دیندی اے۔کہانی اک ماں دی بظاہر اک عمومی جئی کہانی اے جہڑی اک دیہی زرعی معاشرت توں متعلق تے پروردہ ہر فرد تے گھر دی صورت ایتھے اوتھے ہمیشہ توں موجود رہی اے کہ ماں انسانی وجود’ تہذیب’ رہن بسیرے تے جذبیاں دا اوہ گھنٹہ گھر اے جہدا ہونا متذکرہ ساری چیزاں دے ہون دا اصل کارن اے۔ دراصل دیہی زرعی معاشریاں وچ ماں محض فرد نہیں بلکہ اجتماع دی حیثیت رکھدی اے جہڑی بیک وقت ہمہ جہتی کردار نبھا رہی ہوندی اے۔ زاہد حسن دی کہانی ایسی ماں دی کہانی ا ے جہڑی جہالت’ عسرت تے نفرت دے کنڈیاں دے بیج اپنی اولاد تے اوہناں نال جڑے ہر رشتے لئی محبت تے مروت دے پھل اگان کھلان دا ذریعہ ہوندی اے۔ ماں’ محبت’ شفقت’ تربیت دی تکون ہوندی اے جہڑی اپنے اندر تے اوہدے متعلق سارے نوں سموئے رہندی اے۔ زاہد حسن دی کہانی ایسی ای اک کہانی اے جہڑی پنجاب دے دورافتادہ تے زرعی دیہی علاقے وچ وسن والی وستی رحمن وچ اپنے وجود دی برکت تے مہک پھیلان والی ماں توں شروع ہو کے اوسے ماں اتے ختم ہو جاندی اے۔ ماںجہنوں رب نے کمال منہ مہاندرا عطا کیتا۔ اوائل زندگی توں ای اوہناں کلفتاں دا شکار اے جہڑی اوہدوں توں ہن تک دیہی تہذیب دی پروردہ عورت دا حصہ رہیاں نیں۔ مشقتاں بھرے دن رات’ عسرت زدہ صبح شام’ کچے بوسیدہ مکان’ زندگی دی ضرورتاں دی کمیابی’ رشتیاں وچ دراڑاں’ تلخ ترش ماحول ایہہ سب اوہ مال متاع اے جہنوں ساڈی ہر ماں سیت سنبھال زیست کردی ایس جہاں توں گزر گئی اے۔ ہاں تے زاہد حسن دی کہانی دی ماں وی ایہہ سب سہندی رہیاں۔ ایہنوں تے وٹے سٹے دی ضرب وی لگی سی تے کدھرے دی چوٹ دا درد کدھرے سہنا اوہدا وی مقدر سی۔ ناآسودہ رویاں دے باوجود ڈھورڈنگر چرانا سنبھالنا’ اپنے بچیاں نوں رُکھی سکھی دینا ویکھنا’ سب رشتیاں دا لحاظ مروت رکھنا تے اتوں اندر ای اندر کینسر جئی بیماری نوں پالنا سنبھالنا اوہ بھاری پتھر سی جہنوں چکے ماں نے وستی رحمان توں لہور دا سفر کیتا۔ایس سفر پاروںاوہ وستی توں لہور تے آ گئیاں لیکن وستی نوں نہ چھڈ سکی۔ سو اوہدی ہزارہا یاداں گلاں دی پوٹلی ہر ویلے اوہناں دے کول رہی۔ زاہد حسن دی کہانی ماں دا تجزیہ کیتا جاوے تے اوہ محنت بلکہ محنت شاقہ تے تلخ سردرویاں دے باوجود ساریاں لئی مروت دا پٹارہ معلوم ہوندیاں نیں۔ اوہناں نے قریبی تعلق داراں دی بدسلوکی دے باوجود عفو دی راہ کدی نہیں چھڈی تے نہ لاتعلقی دی کوئی وڈی دیوار کھڑی کرن دی کوشش کیتی۔ محبت تے محنت دی علاوہ ماں دی ا ہلیت خاصے دی چیز اے کہ اوہناں نے مشقتاں نال لکھے لفظاں نوں پڑھنا سمجھنا سکھیا تے یقینا ایسے کارن ایہہ وصف اوہناں دی اولاد نوں وی دان ہویا۔ فنی طور تے ویکھیا جاوے تے زاہد حسن دے ناول دا پلاٹ سدھا تے رواں اے جہدے وچ بس اینی جئی ٹیڑھ میڑ آندی اے جہنی اوہدوں دی دیہاتی زندگی وچ پائی جاندی سی۔ ایسے لئی یقینا ناول دا پلاٹ بے حد سلجھیا ہویا اے۔ ناول دی زبان قدیم تے بہت ٹھٹھ نہ سہی لیکن ہر لحاظ نال اپنے اصل دے کول اے۔ جہدے کارن ایہدی دلچسپی ہور ودھ جاندی اے۔ زبان تے بیان دے معاملے وچ زاہد حسن دی گرفت تے محنت کمال دی اے۔ ناول دے کردار ویسے تاں عمومی جئے نیں لیکن اوہناں دی ایہو عمومیت اوہناں دی خصوصیت اے۔ زاہد حسن نے جتھے کہانی خوبصورت نال بنی اے اوتھے کرداراں نوں وی بہت مہارت نا ل پینٹ کیتا اے۔ سارے کرداراں دی زبان حسب حال تے کمال اے۔ دیہاتی زندگی تے ایس توں متعلقات دے باب وچ منظر نگاری وی بے حد سلیقے نال کیتی گئی اے تے نال ای مختلف کرداراں دی نفسیاتی کیفیتاں دا بیان اک خاص سواد مزہ رکھدا اے۔ ماں دی اعلیٰ ظرفی’ دشمناں نوں معاف کر دین دا رویہ’ اپنے خاوند نال حجاب آمیز محبت’ علم حکمت تے طریقت نال لگیا’ اپنی اولاد نال بے پایاں پیار’ تکلیف سہن دا حوصلہ تے مشکلاں توں نکلن دا سلیقہ سب کجھ اک بہترین تربیتی عمل اے تے ماں دے وجود دا صائب عمل وی۔ ایسے طرح قدیم دیہی ماحول تے معاشرت دے رشتیاں تے تعلقات دے تانے بانے’ وقت دے سازشی عناصر دی کارفرمائیاں’ پلس دے روایتی ہتھکنڈے’ پنچایت دے منفی رویے سب کجھ کدھرے ظاہر کدھرے پوشیدہ ساڈے سامنے آندا جاندا اے۔
متذکرہ ناول دے مطالعہ دے دوران بارہا مینوں محسوس ہویا کہ جے زمینی بعد تے کسے قدر تہذیبی فرق نوں ملحوظ نہ رکھیا جاوے تے ایہہ شاید میری ماں نکی بے جی دی کہانی اے۔ سچ ایہہ اے کہ ا یہہ ہر ماں دی کہانی اے۔ ساڈے معاشرے وچ ہر ماں نوں اپنے اپنے مقام تے وقت دے مطابق ایسی ای صورت حال دا سامنا رہیا اے جہڑا متذکرہ ناول وچ بیان ہویا اے۔ کہانی اک ماں دی دراصل ساڈی خود روسی زندگیاں دا اک مرثیہ اے جتھے سب توں مقدس رشتے نوں سب توں ودھ نامعقولیت دا سامنا کرنا پیندا اے۔ ویسے سچ آکھاں تے ایہہ کہانی مینوں ناول توں ودھ اک آپ بیتی بلکہ جگ بیتی جئی لگدی اے کہ ایہہ میری تے تہاڈے ساریاں دی کہانی اے لیکن جانے کیوں مینوں لگدا اے کہ ایہہ زاہد حسن دی تن بیتی اے جہنوں اوہنے ناول دے نام نال کینوس اتے اتاریا ابھاریا اے۔ ہاں چلدے چلدے ایہہ وی کہ ایس کہانی وچ نظریاتی رویے تے کردار دی بازگشت اک ہور حقیقی المیہ دی نشاندہی اے جہڑا اک تلخ سچ دی صورت ساڈے معاشرے دا حصہ اے۔ ساڈے ہاں انقلابی سوچ و فکر جانے کیوں اینی کمزور اے کہ اسیں وقت بے وقت محض سطحی مفادات تے موقع پرستی دے ہتھوں اوہدا خون کر دینے آں تے انج تریخ دا تے اپنا مقتل سجا کے شادیانے وجاندے رہنے آں۔ مجموعی طور تے ایہہ ناول اک دلچسپ معلومات افزا تے متاثر کن تخلیق اے جہڑی جتھی ماں دے رشتے دا مان سمان ودھان دا کارن اے اوتھے کہانی کاری دی اعلیٰ خوبیاں دے کارن واقعی مثال وی اے۔