سلیکٹڈ والا بیانیہ دفن

اندازیاں دیاں دو قسماں نیں’ جانبدار اندازہ تے نسبتاً غیرجانبدار اندازہ۔ رہ گئی گل مکمل غیرجانبدار اندازے دی تے اوہ اجے دنیا وچ شاید ای کدھرے لایا جاندا ہووے۔ اجہی صورت وچ نسبتاً غیرجانبدار اندازیاں تے ای بھروسا کرنا پیندا اے۔ جانبدار اندازے اوہ ہوندے نیں جو عموماً جلسیاں وچ شرکاء دی گنتی بارے ہوندے نیں۔ جانبدار فریقین یعنی جلسہ کرن والی پارٹی دے حمایتی تجزیہ کار ایسے اک جلسے دے بارے لوکاں نوں ایہ دسدے نیں کہ جلسے وچ شرکاء دی گنتی اڑھائی لکھ سی جد کہ ایسے جلسے دے شرکاء دی گنتی بارے مخالف پارٹی دا حمایتی بڑا ای سینئر تجزیہ کار ایہ دس رہیا ہوندا اے کہ جلسے دے شرکاء دی گنتی دس ہزار دے نیڑے سی۔ ہن اجہے وچ گھر بیٹھا ہویا شریف بندہ کیہ اندازہ لاوے تے کس گل تے یقین کرے؟۔
ایہو حال پچھلے دیہاڑے پنجاب اسمبلی دیاں ویہہ سیٹاں تے ہون والے ضمنی الیکشن تے ہون والے تبصریاں دا سی۔ ایس سلسلے وچ مسلم لیگ ن دے حمایتی ویہہ وچوں ستاراں سیٹاں تے خیر نال بڑے آرام نال جت رہے سن پر باقی تن تے وی بہت سخت مقابلہ دس رہے س ن۔ دوجے پاسے پی ٹی آئی دے حمایتی وی ایسے گنتی نوں الٹ کرکے دس رہے سن۔ (جو بعد وچ کسے حد تک سچ ثابت ہوئی) پر اودوں ایہ اندازہ اصل وچ اندازے توں ودھ خواہش دے تابع وکھائی دے رہیا سی۔ نسبتاً غیر جانبدار صاحبان عقل و خرد مسلم لیگ ن تے پی ٹی آئی نوں اک ادھ اُتے تھلے برابر دیاں سیٹاں عطا کر رہے سن پر سچ تے ایہ وے کہ اوہ اندازے جہناں نوںاسیں قدرے غیرجانبدار تے حقیقت توں نیڑے سمجھ رہے سی اوہ وی اکا غلط ثابت ہوئے تے ایہناں ویہہ وچوں پندراں سیٹاں تے پی ٹی آئی نے حیرت انگیز تے ناقابل یقین کامیابی حاصل کرکے جتھے حمزہ شہباز دی رخصتی تے مہر لائی اے ایہدے نال اسلام آباد وچ بیٹھے میاں شہبازشریف دی سٹی گم کرن دے نال نال نویں انتخابات دے مطالبے وچ وی جان پا دتی اے۔ عمران خان دی ایس کامیابی دے بعد گمان غالب اے کہ میاں نوازشریف تے اسحاق ڈار لندن وچ اپنا نیڑے نیڑے ختم ہون والا علاج نویں سرے توں شروع کر دین گے۔
جتن والیاں دے نیڑے ایہ عمران دے بیانیے دی جت اے تے ہارن والیاں دا کہنا اے کہ عمران خان جاندے جاندے جو اقتصادی بارودی سرنگاں وچھا گئے سن’ اوہدے نتیجے وچ ہون والی مہنگائی تے پٹرول دیاں قیمتاں وچ ہوشربا وادھے نے اوہناں دی شکست وچ مڈھلا کردار ادا کیتا اے۔ اُتوں لوٹیاں نوں ٹکٹ دین دا منفی اثر ہویا پر میرا خیال اے کہ ایہناں دوہاں نقطہ نظر توں لعاوہ نیوٹرلز دے بارے عوامی جذبات نے وی بہت وڈا کردار نبھایا اے۔ ایس الیکشن وچ سب توں مزے دی گل ایہ سی کہ کسے نوں وی الیکٹ ایبلز نوں گھیرن دی فکر نہیں سی۔ ایہناں ویہہ حلقیاں دا ہر الیکٹ ایبل مسلم لیگ ن دا ٹکٹ ہولڈر سی۔ پی ٹی آئی دے ٹکٹ تے یاں آزاد جت کے پی ٹی آئی وچ آن والے ویہہ ارکان صوبائی اسمبلی وچوں ستاراں تے آپ مسلم لیگ ن دے امیدوار سن’ دو نے اپنی تھاں اپنے کسے عزیز نوں ٹکٹ دوا دتی سی۔ صرف اک علیم خان والی لہور دی سیٹ سی جہدے تے دوہاں پاسیوں نویں امیدوار سن۔ ڈیرہ غازی خان دی پی پی 288 تے محسن عطا کھوسہ آزاد جت کے پی ٹی آئی وچ آیا سی تے ایس واری اوہنے اپنے کزن تے این اے 190 توں رکن قومی اسمبلی امجد فاروق کھوسہ دے بیٹے عبدالقادر کھوسہ نوں ٹکٹ دوائی سی تے مظفرگڑھ پی پی 272 توں 2018ء وچ ایم این اے باسط سلطان بخاری نے اپنی والدہ زہرہ بتول نوں پی ٹی آئی توں ٹکٹ دوایا سی تے ایس واری والدہ دی نااہلی دے بعد اوسے سیٹ توں اپنی بیوی زہرہ باسط بخاری نوں مسلم لیگ ن دا ٹکٹ دوا دتا۔ یعنی الیکٹ ایبلز یاں تے آپ امیدوار سن یاں فیر اوہناں دے نامزد کردہ امیدوار مسلم لیگ ن ولوں الیکشن لڑ رہے سن ایس لئی الیکٹ ایبلز نوں گھیرن والے ایس واری بالکل فارغ سن تے مسلسل ایہو سوچ رہے سن کہ ہن اسیں کیہ کریئے؟۔
ایمانداری دی گل اے کہ ایس ضمنی الیکشن دے نتیجے نے جتھے بہت سارے لوکاں نوں حیران کیتا اے اوتھے بہت ساریاں نوں پریشان وی کر دتا اے۔ پریشانی دا اجے کوئی حل وی نظر نہیں آ رہیا تے محکمہ زراعت دی پریشانی وچ ہور وادھا ہو گیا اے کہ ہن کیہ بنے گا؟ پنجاب وچ’ جو پاکستان دا سب توں وڈا صوبہ اے راولپنڈی توں لے کے ڈیرہ غازی خان تک پی ٹی آئی نے لوکاں وچ اپنے بیانیے دی پذیرائی دے نال امپورٹڈ حکومت توں عوامی بیزاری تے غیرجانبداراں دے جانبداری تے مبنی فیصلیاں نوں رد کر دتا اے پر ایس نتیجے نے پارٹیاں نال وفاداری دی حد تک جڑے ہوئے غیرجانبدار تبصرہ نگاراں نوں اوہناں دے اندازیاں دی خرابی تے ایہناں نتیجیاں توں پیدا ہون والی پریشانی نے انج دا مخبوط الحواس کر کے رکھ دتا اے کہ اوہ ہن ایس رزلٹ دی اجہی بھونڈی تشریحات کر رہے نیں کہ حیرانی ہوندی اے۔ میں ایدھر امریکہ وچ اک عرصے دے بعد برادر بزرگ اعجاز احمد دے ڈیرے تے لگے ہوئے ٹی وی نوں آن کیتا تے ایہناں نتیجیاں تے ہون والے ماہرانہ تبصریاں نوں سنیا۔ اک صاحب کہہ رہے سن کہ پی ٹی آئی نوں اصل وچ 2018ء دے مقابلے وچ مایوس کن نتیجیاں دا سامنا کرنا پیا اے تے پی ٹی آئی اپنی ویہہ سیٹاں وچوں صرف پندراں سیٹاں ای واپس لے سکی اے۔ یعنی پی ٹی آئی نوں ایس جت دے بعد وی پنج سیٹاں دا گھاٹا اے۔ مینوںایہ تبصرہ سن کے بڑا ہاسا آیا کہ ایہ جانبداری وی کیہ عجیب شے اے بندے نوں عقل توں بالکل ای پیدا کرکے رکھ دیندی اے۔٭٭