خدائی فیصلہ

موجودہ دہائی پاکستانیاں لئی بڑی تکلیف دہ رہی اے۔ اج وی بے یقینی دے بدلاں نے ملک نوں اپنی لھویٹ وچ لے رکھیا اے کوئی پنجاب دے پچھے پیا اے تے کوئی وفاق تے نظراں گڈی بیٹھا اے۔ پارلیمان دے اختیار وچ بتیری واری مداخلت کیتی گئی۔ اک خط حلال جد کہ دوجا حرام قرار دے دتا گیا جہدے نتیجے وچ پیدا ہون والے معاشی بحران نے ملک دی حالت ہور مندی کر دتی اے۔ اج ڈالر اسمان نال گلاں کر کے ملک نوں قرضیاں دی دلدل وچ ایناں پھسا چکیا اے جہدے چوں نکلنا اوکھا ہوندا جا رہیا اے۔
اک پاسے ڈپٹی سپیکر دی رولنگ دے خلاف عدالتی فیصلے نال نویں مسئلے پیدا ہون گے تے معاشی بحران دا ہور گہرا ہونا لازم اے دوجے پاسے خودمختار کراچی دا نعرہ لا کے رائے عامہ ہموار کرن دی گھٹیا کوشش شروع کر دتی گئی اے۔ محبان وطن دا موقف اے کہ بین الاقوامی طاقتاں ایس واری اک توں ودھ نویں بنگلہ دیش بنان دی سازش بنا چکیاں نیں۔ محبان وطن اُتے ایہ وی خوف طاری اے کہ کدھرے خودمختار بلوچستان’ خودمختار جنوبی پنجاب تے خودمختار ہزارہ وغیرہ دے منصوبیاں تے عمل کرکے مملکت خداداد دے حصے وکھرے کرن لئی اک واری فیر ادھر ہم ادھر تم دا خوفناک نعرہ نہ لگ جاوے۔ ذرا سوچو کناں دردناک منظر ہووے گا جدوں سانوں کوئٹہ’ کراچی یاں بہاولپور جان لئی ویزا لینا پوے گا یاں کوئی ساڈے داخلے تے پابندی لا دیوے گا۔
زیادہ پرانی گل نہیں جدوں بنگلہ دیش دی اک عدالت نے ریپ دے ملزماں نوں پھاہے لاندے ہوئے ریمارکس دتے ایہ کہ ایہ پاکستان نہیں۔ ایہناں ریمارکس نوں سن کے محبان وطن نوں کنی تکلیف ہوئی ہووے گی؟ کیہ انج دی ہوندی اے ریاست مدینہ جہدے بارے ساڈے گوانڈھی اجہے خیالات رکھدے نیں؟ دل خون دے اتھرو روندا اے ایہ سوچ کے کہ اسیں کون سی’ اسیں کیہ ساں’ ساڈے اسلاف نے کیہ پیغام دتا؟ جنت مکانی قائداعظم محمد علی جناح کنے مایوس ہون گے کہ اوہناں دی پاک سزمین تے سیاسی اختلاف رائے دے ناں تے کنی نفرت پھیلائی جا چکی اے۔ نفاق دا بیں گڈ کے لوکاں نوں کنے انتشار دے ایجنڈے تے لا دتا گیا؟ گھٹیا ایجنڈے دی آڑ وچ ہر قسم دی ملک دشمن سرگرمیاں زوراں اُتے نیں کوئی دن اجیہا نہیں گزردا جدوں کوئی بحرانی عمل نہ ہو رہیا ہووے۔ خفیہ مداخلت تے کھلم کھلا مداخلت دے بعد نرم مداخلت دی گونج سنائی دے رہی اے۔
عوام شدت نال سوال کر رہے نیں کہ کدوں تک غداری دے سرٹیفکیٹ ونڈے جاندے رہن گے؟ کدوں تک جمہوریت دے ناںتے مرضی دے تیل وچ دل پسند شیواں پا کے من پسند حکومتی ہانڈی پکائی جاندی رہوے گی؟ اختیارات دی بساط وچھان تے وگاڑن دا عمل جاری اے پر ایہدے وچ عوامی فلاح دا عنصر کدھرے نظر نہیں آندا’ معاشی پالیسیاں اینیاں خراب اپنائیاں گئیاں کہ ستر ورھیاں وچ پہلی واری ملک دیوالیہ ہون دے نیڑے اپڑ گیا اے پر مجال اے کہ ملک نوں ایس خوفناک حالت تک اپڑان والے منن نوں تیار ہون۔ چین سنے دنیا بھر نے ویکھ لیا تے سمجھ وی لیا کہ کون کیہ کر سکدا اے تے کہدی کنی اہلیت اے؟ کون اجاڑن دی کالھ رکھدا اے تے کون ترقیاتی منصوبے لان دے نظریے تے عمل کردا اے؟ کون تعمیر تے یقین رکھدا اے تے کون مجسمہ تخریب اے؟ کون رواداری ول مائل کردا اے تے کون انتشار تے ابھارن دے منصوبیاں وچ ماہر اے؟۔
عوام جان چکے نیں کہ 1993ء وچ اوہ کس شاخ تے بیٹھا سی؟ 1999ء وچ اوہ کہدا ہمنوا بن گیا؟ 2000ء وچ اوہ کہدے گن گا رہیا سی؟ 2001ء وچ اوہنے کہدے نال ہتھ ملا لیا؟ 2002ء دی اسمبلی وچ اوہنے وزیراعظم دا ووٹ کنہوں دتا؟ 2006ء وچ اوہ فیر کہدے نال سی؟ 2008ء وچ اوہ کہدے نال مل گیا؟ 2013ء وچ اوہنے کہڑی لائن اپنائی؟ 2014ء دا دھرنا اوہنے کہدے کہن تے کیتا؟ 2016ء دے سینٹ الیکشن وچ اوہ کہدا ساتھی بن گیا؟ 2018ء وچ چیئرمین سینٹ دی سیٹ لئی اوہنے کنہوں ووٹ دتا؟ ایہدے باوجود اوہدا فخر نال بار بار کہنا اے کہ میں کرپٹ لوکاں دے خلاف بائی ورھے توں جہاد کر رہیا واں۔ پورے پاکستان نوں داء تے لان والیاں نے اوہدا تابناک مستقبل مخدوش کر دتا اے۔ میرا نہیں سگوں قوم دا موقف اے کہ دنیا بھر دے قبرستان اجہے لوکاں نال بھرے پئے نیں جو اپنے آپ نوں ضروری سمجھدے سن۔ جاندے جاندے ایہ وی یاددہانی کرا دیواں کہ جدوں خدائی کن ادا ہو جاندا اے تے سامنے فرعون ہووے یاں ہامان سارے تباہ و برباد ہو جاندے نیں۔٭٭