ممنوعہ عطیات دے بارے فیصلہ

لمی سماعت مگروں پولیٹیکل پارٹیز آرڈر 2022 دی دفعہ چھ دے تحت الیکشن کمیشن نے ممنوعہ عطیات بارے آخرکار فیصلہ سنا ای دتا جہدے مطابق پی ٹی آئی نے غلط رقماں وصول کیتیاں نیں مگر وصولی عطیات دے حوالے نال صرف اٹھ تسلیم جد کہ 16اکائونٹس دی تفصیلات نوں سوچے سمجھے منصوبے دے تحت لکایا جہڑا آئین دے آرٹیکل 17 دی خلاف ورزی اے۔نیز 34 غیر ملکیاں کولوں وی وصولیاں کیتیاں جہڑی ثابت ہو چکیاں نیں۔ ایس فیصلے دی روشنی وچ تحریک انصاف نوں کافی نقصان ہو سکدا اے کیوں جے نہ صرف پارٹی دے سربراہ دے طور تے عمران خان دے جمع کرائے گئے بیان حلفی غلط قرار دے دتے گئے نیں بلکہ پی ٹی آئی نوں غلط وصولیاں ضبط کرن دا شوکاز نوٹس وی مل چکیا اے جہدے توں جماعت لئی مقبولیت برقرار رکھن وچ مشکلات پیدا ہون گئیاں۔ بظاہر پی ٹی آئی رہنما ایس فیصلے نوں بہت نرم سمجھ رہے نیں۔ بلاشبہ شوکاز تے ممنوعہ عطیات ضبط کرن دے حوالے نال ویکھو تے ایہہ فیصلہ بوہتا سخت نہیں کیوں جے جماعت کالعدم ہون دا خطرہ ٹل گیا اے مگر عطیات دی بابت جمع کرائے جان والے پارٹی چیئرمین عمران خان دے بیان حلفی نوں غلط قرار دین دے دوررس نتائج ہو سکدے نیں۔ ایس اک فیصلے نال ہن عمران خان وی اوسے پوزیشن دے کول آ گئے نیں جہڑے مقام اتے ملک دی دوجی مقبول قیادت اے۔ خود نوں صادق تے امین ثابت کرن دا اوہناں نوں وی مرحلہ درپیش اے۔ جے اوہ جمع کرائے بیان حلفی نوں درست ثابت نہیں کر پاندے تے الیکشن کمیشن ولوں جھوٹا قرار پان تے کوئی وڈی عدالت نال رجوع کردا اے تے نااہلی دا سامنا کرنا یقینی اے۔ انج ہون نال اک تے اوہناں دی ایمانداری تے دیانتداری دا تاثر ختم ہوگیا دوجا ملک دی دوجی سیاسی قیادت نوں ایہہ آکھن دا موقع مل جاوے گا کہ عمران خان جو آکھدے نیں اوہدے اتے خود عمل وی نہیں کردے۔ قول و فعل دا ایہہ تضاد واضح ہونا اوہناں نوں چاہن والیاں دی نظراں توں سٹن دا کارن بن سکدا اے۔
پی ٹی آئی پہلاں ای چیف الیکشن کمشنر اتے عدم اعتماد کردے اوہناں کولوں مستعفی ہون دا مطالبہ کر چکی اے۔ عمران خان تے دوجے زعما آکھدے نیں کہ اوہ اوہناں نال وی دوجی جماعتاں دی قیادت وانگوں سلوک کرن۔ اوہ ایہہ وی
سمجھدے نیںکہ الیکشن کمیشن ساریاں نال اکو جیا سلوک دے بجائے اوہناں نوں خاص طور تے ٹارگٹ کر رہیا اے۔ اوہناں دا ایہہ وی مطالبہ اے کہ پی پی’ ن لیگ’ جمعیت علمائے پاکستان تے ایم کیو ایم سنے ساری سیاسی جماعتاں نوں ملن والے عطیات دا بیک وقت جائزہ لے کے ایسا غیر جانبدارانہ فیصلہ کیتا جاوے جہنوں سارے تسلیم کرن۔ پی ٹی آئی دے ایہہ مطالبات جائز تے مناسب نیں۔ انج کرن وچ کوئی خاص قباحت نہیں کیوں جے ایس حوالے نال الیکشن کمیشن وچ مختلف درخواستاں دی سماعت جاری اے مگر دسن والی اک ہور اہم گل ایہہ اے کہ پی ٹی آئی دے خلاف ممنوعہ عطیات بارے فیصلہ اوہدی کسی حریف جماعت دی ایما اتے نہیں ہویا بلکہ ایہدے مدعی اکبر ایس بابر نیں جہناں دا شمار پی ٹی آئی دے بانی اراکین وچ ہوندا اے ایس لئی ایہہ آکھنا کہ شوکاز دوان وچ کسی حریف
جماعت دی سازش یا دبائو دا عمل دخل اے۔ مناسب نہیں بلکہ ایہہ لنکا گھر دے بھیدی نے ڈھائی اے۔ پی ٹی آئی نوں حالات دا دھارا انتہائی نازک موڑ تے بھنور وچ لے آیا اے جہدے توں بچنا ایسے صورت وچ ممکن اے کہ قیادت محض بیان بازی اتے زور دے کے خود نوں سچا ثابت کرن دی بجائے قنونی ماہراں دے ذریعے حالات دا سامنا کرے تے قنونی دلائل توں خود نوں راست گو ثابت کرے وگرنہ عطیات توں محرومی دے نال پارٹی چیئرمین دی نااہلی دا خطرہ بوہتا دور نہیں رہیا۔
ممنوعہ عطیات کیس وچ پی ٹی آئی نوں جہڑا سب توں وڈا ریلیف ملیا اے اوہ ایہہ اے کہ الیکشن کمیشن نے کم از کم ایہہ تسلیم کر لیتا اے کہ رقماں نوں بیرونی عطیات کہنا مناسب نہیں البتہ ایہہ ایسے ممنوعہ عطیات نیں جہناں دی عطیہ کردہ رقماں اتے کئی قسم دے سوالات نیں جہناں دے مناسب جواب نہ دے کے پارٹی نے اک جرم کرن مگروں دوجا جرم کیتا اے۔ ممکن اے ایہدی وجہ جماعت دی فلاحی سرگرمیاں ہون جہناں لئی لوک وڈی تعداد وچ عطیات جمع کراندے نیں۔ فیر وی رقماں لکان لئی عمران خان دے جھوٹے بیان حلفی دا سہارا لین دی منطق ذہن تسلیم نہیں کردا۔ جے کیس دے آغاز توں ای جماعت تے فلاحی اداریاں دی تفصیلات وکھری وکھری پیش کیتی جاندیاں تے ممکن اے ایسا فیصلہ سامنے نہ آندا مگر لاپرواہی تے غیر سنجیدگی دی بنا تے دو قسم دے نقصانات دا سامنا اے۔ اول عطیات دی ضبطگی یقینی اے۔ دوجا عمران خان کسے وی ویلے کسی عدالت توں نااہلی دی زد وچ آ سکدے نیں۔ پی ٹی آئی دے اکابرین دا موقف اے کہ ایس فیصلے دے پس پردہ حکمران اتحاد اے تے حکومتی دبائو اتے ای الیکشن کمیشن نے دوجی جماعتاں توں پہلاں پی ٹی آئی بارے ایہہ فیصلہ سنایا اے۔ ایسے بنا تے چیف الیکشن کمیشن دے خلاف ریفرنس دائر کرن اتے وی کم جاری اے مگر سنجیدہ حلقے ایس رویے نوں مسائل دی گرداب وچ ہور دھنسنا قرار دیندے نیں۔ چیف الیکشن کمیشن تے پی ڈی ایم قیادت اتے الزام عائد کرن دی وجہ ایہہ اے کہ سترہ جولائی دا ضمنی انتخاب ہارن مگروں حکومتی اتحاد نے الیکشن کمیشن کولوں چھیتی فیلصہ سنان دا مطالبہ کیتا فیر وی حکومت نوں ذمہ دار ٹھہران وچ کوئی صداقت نہیں کیوں جے ایہہ کیس مسلسل اٹھ سال تک زیر سماعت رہیا تے عطیات دی بابت لائے جان والے الزاماں دا جائزہ لین لئی اک سکروٹنی کمیٹی تشکیل دتی گئی جہنے بڑی عرق ریزی نال ایسے واضح شواہد پیش کیتے جہدے توں پی ٹی آئی دا موقف غلط ثابت ہویا تے نتیجے اتے پہنچ کے الیکشن کمیشن نے 21جون نوں فیصلہ محفوظ کر لیتا جہڑا پچھلے دناں سنا دتا گیا۔
14نومبر 2014 وچ بانی رکن اکبر ایس بابر نے جدوں اپنی جماعت کولوں ناراض ہو کے الیکشن کمیشن دے روبرو کیس دائر کیتا تے شروع وچ قیادت نے سرسری جیا لیتا جدوں مسلسل سماعت جاری رہی تے الیکشن کمیشن ولوں سوال پچھن دا سلسلہ لما ہون لگیا فیر وی سنجیدگی نال مقدمے دا سامنا کردے ہوئے ختم کران دے بجائے جان بوجھ کے طوالت دین دی کوشش کیتی گئی۔ ممنوعہ عطیات دے کیس وچ 30واری التوا منگیا گیا ۔ چھ واری کیس ناقابل سماعت ہون دی درخواستاں دائر کیتیاں جدوں ایس طرح گل نہ بنی تے بار بار وکیلاں نوں بدلن دا سلسلہ شروع کردتا گیا۔ 9واری وکیل بدلن دے باوجود وی آخرکار جماعت نوں کیس دا سامنا کرن وَل آنا ای پیا حالانکہ ابتدا وچ ای جے سنجیدگی دا مظاہرہ کر لیتا جاندا تے یقینی طور تے صورتحال مختلف ہوندی تے عطیات ضبط ہون دے خدشات سنے جماعت دے چیئرمین دی نااہلی دے موجودہ حالات ہرگز نہ بندے۔